van der sar

“De Ligt largohet”, Van Der Sar e thotë troç

Sport Ekspres — Thu, 09 May 2019 14:54:03 +0000

Matia De Ligt është dëshira e merkatos për shumë klube të mëdha. Kapiteni i Ajaksit i ka bërë të gjithë të dashurohen pas tij. Veç cilësive të tij në mbrojtje, ai shfaqet edhe në zonat kundërshtare dhe shënon. Një lojtar të tillë çdo ekip do e donte ta kishte në përbërje.

Barcelona dhe Juventusi e kërkojnë me ngulm, ndërkohë që edhe në Angli Mançester Siti do e donte në ekip. Se ku do të shkojë do të duhet të presë verën. Në Holandë janë të bindur se mbrojtësi do e mbyllë aventurën e tij me Ajaksin shumë shpejt.

Edvin Van Der Sar është ai që ka folur për Sky Italia: “Mendoj se këto do jenë ndeshjet e fundi të De Ligt me Ajaksin. Shpresoj që ai të shkojë në një nivel edhe më të lartë. Ka qenë këtu që fëmijë dhe do të shkojë në një klub të madh. Mendoj se do të shkojë në Angli ose në Spanjë”.

Van der Sar: Ajaksi ka një vizion të qartë, ia kam treguar dhe Anjelit

Sport Ekspres — Thu, 02 May 2019 09:50:48 +0000

Ajaksi vazhdon të mahnisë të gjithë Europës me paraqitjet që po bën dhe holandezët janë shumë pranë finales së madhe së Champions League pas fitores 0-1 në fushën e Totenhemit mbrëmjen e shkuar. Drejtori sportiv i Ajaksit, Edvin Van Der Sar tha se çdo vit që kalon është edhe më e vështirë që futbolli të ketë histori të tilla si Ajaksi, pasi paraja po dominon futbollin.

“Ne duhet të krijojmë një sistem të cilin klubet e tjera të vogla ta përdorin dhe të luftojnë kundër skuadrave të mëdha. Klube si ne, Selltiku, Benfika, Anderlehti, Salcburgu, Gallatasaj ose Fenerbaçe duhet të jenë pjesë e këtij sistemi.

E kam diskutuar edhe me Anjelin. Kam bërë publik vizionin tim, por sistemi aktual që ekziston në futboll bën diferencën dhe të gjitha klubet e mëdha vetëm po shpenzojnë, duke vënë paranë në qendër të vëmendjes. Ne si Ajaks, duhet të ndërtojmë një formacion me lojtarë që i rrisim që të vegjël, ndërsa klubet e mëdha i blejnë të gatshëm. Kjo gjë nuk është aspak pozitive dhe duhet të ndryshojë diçka”, tha Van der Sar për “The Scotish Sun”.

Van der Sar: Kemi të njëjtën ëndërr me Juven! De Ligt? Di të them vetëm një gjë

Sport Ekspres — Wed, 27 Mar 2019 17:28:09 +0000

Ajaksi është padyshim një ndër surprizat më të bukura të këtij sezoni në UEFA Champions League. Holandezët arritën të eleminonin kampionët në fuqi të Realit të Madridit në fazën e 1/8-ave dhe tashmë do të përballen me Juventusin në çerekfinale.

Lidhur me këtë përballje ka folur së fundmi, legjenda holandeze, njëkohësisht edhe drejtori i përgjithshëm i Ajaksit, Edvin Van der Sar. Ish-portieri ka folur në lidhje me përballjen ndaj Juventusit, Kristiano Ronaldon, si dhe të ardhmen e De Ligt.

JUVENTUSI – “Është çerekfinale dhe jemi shumë të lumtur që jemi këtu. Kemi lojtar të nivelit të lartë dhe shpresoj që ta përsërisim atë që bëmë ndaj Realit. Jemi në lojë dhe kemi shanse për t’u kualifikuar. Kemi një ekip të ri në moshë, por gjithashtu kemi dhe lojtarë me eksperiencë siç janë Tadiç apo Blind, të cilët i kanë ndihmuar jo pak të tjerët. Bëmë ndeshje të mira ndaj Bajernit dhe Realit.”

RONALDO – “E njoh mirë Kristianon, pasi kemi luajtur së bashku për katër vite te Mançester Junajtid. Do të jetë bukur ta ritakoj përsëri. E di shumë mirë që ka punuar shumë fizikish, por edhe mentalisht është shumë i fortë. Do të bëjë gjithçka për të shkuar deri në fund të Championsit, gjithashtu edhe Ajaksi ka të njëjtën ëndërr, të fitojë.”

DE LIGT – “Nuk mund të flas shumë. E vetmja gjë që do të them është se De Ligt ka një të ardhme të madhe përpara, pasi është një lojtar fantastik.”