Valentino Lazaro

ZYRTARE | Interi kompleton mbrojtjen, firmos me një austriak

Sport Ekspres — Mon, 01 Jul 2019 15:47:18 +0000

Interi i sezonit të ardhshëm po fillon të marrë formë. Pas zyrtarizimit të Diego Godin, zikaltrit kanë prezantuar përforcimin tjetër për repartin e mbrojtjes. Lojtari më i ri i Interit është austriaku Valentino Lazaro. Kartoni i 23-vjeçarit ka kushtuar 22 milionë euro .

Lazaro vjen nga Herta e Berlinit dhe pritet të jetë zgjedhja e parë e Antonio Kontes në rolin e mbrojtësit të djathtë.

https://www.instagram.com/p/BzYRdpYiiHz/?utm_source=ig_web_copy_link

23-vjeçari është një prodhim i akademisë së Red Bull Salcburg dhe deri dy vite më parë luante si sulmues krahu, por një zhvendosje nga trajneri hungarez Pal Dardai rezultoi vendimi i goditur për të ardhmen e lojtarit që tanimë është përshtatur në mënyrë perfekte si mbrojtës krahu.

Inter plotëson dëshirën e Kontes, merkato hapet me një austriak

Sport Ekspres — Wed, 26 Jun 2019 17:24:07 +0000

Konte është i fiksuar pas Valentino Lazaros. Austriaku arrin të mbulojë të gjithë krahun e djathtë, çka do të thotë se është një lojtar i përshtatshëm për lojën që aplikon tekniku i Interit. 23-vjeçari aktivizohet me Herta Berlin. Këtë vit ai regjistron 3 gola dhe 7 asiste.
Klubi gjerman ka treguar rezistencë. Para pak ditësh Marota u prezantua me një ofertë prej 17 milionësh, që u refuzua menjëherë nga klubi gjerman. Ata pretendojnë të fitojnë më shumë nga ylli i tyre. Kështu, Interi nuk u dorëzua dhe siç raportojnë mediet italiane, ka gati shifrën prej 22 milionë eurosh për Lazaron.

Sipas “Sky Sport” kjo është oferta që vulos këtë lëvizje. Klubet kanë arritur marrëveshjen përfundimtare dhe në ditët në vijim Lazaro do të zbresë në Milano për t’ju nënshtruar vizitave mjekësore, që do të pasohen nga prezantimi në “San Siro”. Lazaro do të jetë blerja e parë e Interit për këtë verë.

Herta bën barrikadë, Inter nuk dorëzohet për talentin austriak

Sport Ekspres — Fri, 21 Jun 2019 11:08:16 +0000

Interi po kërkon me ngulm shërbimet e Valentino Lazaro nga Herta e Berlinit. Austriaku është një lojtar, që arrin të mbulojë të gjithë krahun e djathtë nga mbrojtja në sulm, çka tregon se është perfekt për skemën 3-5-2, e preferuar nga Antonio Konte.
Herta e Berlinit e bleu nga Salsburg për 6.5 milionë euro verën e kaluar. Gjermanët kërkojnë të arketojnë sa më shumë nga shërbimet e tij. Inter ofron rreth 17 milionë euro, çmim i konsideruar i ulët nga klubi i Bundesligës. Ata kërkojnë 25 milionë euro për të lënë të lirë austriakun.

Një marrëveshje për 20 milionë euro, me Hertën që mban një përqindje të kartonit, është e mundshme. Lazaro arriti të shënonte në ndeshjen e fundit të kombëtares së tij ndaj Maqedonisë. Këtë vit në kampionat regjistron 3 gola dhe 6 asiste. Duhet të theksojmë se ka pasur më shumë detyra difensive, duke u përdorur si mbrojtës i djathtë.

Perfekt për skemat e Kontes, Interi pranë talentit të Bundesligës

Sport Ekspres — Thu, 13 Jun 2019 07:00:07 +0000

Interi ka piketuar një talent cilësor në kampionatin gjerman. Valentino Lazaro është mesfushori i krahut të djathë që zikaltrit e duan me çdo kusht. Austriaku është një nga lojtarët më të mirë të Hertës së Berlinit.

Ai e ndihmon ekipin në të dyja fazat e lojës dhe ka nuhatje goli. Lazaro do të ishte perfekt për skemën klasike 3-5-2 të Antonio Konte. 23-vjeçari këtë sezon regjistron tre gola dhe shtatë asisistime në 31 ndeshje të luajtura në Bundesliga.
Interi ka shfaqur interes konkret për të dhe agjenti i tij e afron edhe më shumë drejt klubit italian. Ai shprehet se nuk ka sesi e refuzon ofertën e një klubi aq të madh. Gjithsesi, nuk e ka me ngut dhe shton se nuk do të ishte ndonjë problem nëse Lazaro shpenzon edhe një vit në Gjermani.

“Nëse një klub me aq prestigj interesohet, duhet ta marrim në konsideratë. Do të ishte diçka e pakujdesshme nëse nuk e bënim. Megjithatë, Valentino ka edhe dy vitë në kontratë dhe nuk do të ishte problem nëse qëndron”, u shpreh agjenti i Lazaro.

Interi ka kohë që e ndjek dhe e vëzhgon zhvillimin e 23-vjeçarit dhe tani është gati për ta sjellë në “San Siro”. Vlera e tij në merkato është rreth 30 milionë euro. Ditët e fundit për të ka shfaqur interes edhe PSG.

Objektivi luan në Bundesligë, Interi nis sulmin për “xholin”

Sport Ekspres — Fri, 07 Jun 2019 08:48:20 +0000

Bepe Marota dhe Piero Auzilio po bëjnë maksimumin për t’i dhuruar Antonio Kontes lojtarët e duhur për skemat e tij. Ambiciet e Interit janë të mëdha për sezonin e ardhshëm, ndërsa ekipi do të konkurrojë në kampionat dhe Champions.

Emri i fundit që ka dalë në skenë është një austriak. Valentino Lazaro sapo mbylli sezonin e parë me Hertën e Berlinit. 23-vjeçari bën mirë të gjitha rolet e krahut të djathtë. Tre gola shënoi në 31 ndeshje të luajtura me ekipin kryeqytetas, ndërsa Interi ka nisur negociatat me Hertën.

Bisedimet po shkojnë mirë dhe drejtuesit zikaltër synojnë të sigurojnë sa më shpejt një marrëveshje, me qëllim transferimin e Lazaros në San Siro. Ky i fundit është një pikë fikse e kombëtares austriake, aty ku ka shënuar një gol në 19 ndeshje të zhvilluara.

Milani në sulm për austriakun, vjen reagimi i Hertës

Sport Ekspres — Tue, 25 Dec 2018 20:10:18 +0000

Mediat gjermane zbuluan lajmin për një interesim të Milanit për Valentino Lazaron, anësorin e krahut të djathtë të Hertës së Berlinit. “Berliner Morgenpost” raportoi se kuqezinjtë kanë gati 20 milionë euro për kartonin e austriakut, ndërsa ka ardhur dhe reagimi i klubit kryeqytetas.

Në një prononcim për “Berliner Zeitung”, Majkëll Pretz, i cili është menaxheri i përgjithshëm i Hertës, ka mohuar zërat e shitjes së 22-vjeçarit. “Tino ka një kontratë me ne deri në vitin 2021. Askush nuk duhet të shqetësohet, sepse ai nuk do të largohet nga klubi ynë”, thekson zyrtari i klubit të Hertës së Berlinit.

Majkëll Pretz

Lazaro cilësohet si një nga talentët më të mëdhenj austriak dhe ai bën mirë të gjitha rolet e krahut të djathtë, si fazën defensive, ashtu dhe atë ofensive. Ai ka zhvilluar dhe 19 ndeshje me kombëtaren austriake, ku ka shënuar një gol.