Mesazh për Suad Licin: Kujdes, nuk bëhen qoka me Vllazninë!

Sport Ekspres — Tue, 09 Jul 2019 15:54:59 +0000

Vllaznia është në ajër. Ende nuk dihet se kush do të jetë trajneri, me Agim Canajn që është në pritje të një telefonate të drejtuesve. Kuqeblutë pak ditë më parë kanë prezantuar dy afrimet e para, mbrojtësin Dajan Shehi dhe mesfushorin Herald Marku.

Administratori Suad Lici ishte krah tyre në momentin e prezantimit, ndërkohë që për të ka një mesazh nga ana e kryebashkiakut të ri, Valdrin Pjetri. “Administratori të jetë i kujdesshëm me blerjet që është duke bërë. Nuk është momenti për të bërë qokat në blerjet e lojtarëve që janë në rezervat e ekipeve.

Ky është i vetmi mesazh që kam për administratorin. Vllaznia nuk është e atij, as e imja, por është e gjithë shkodranëve. Nuk është pronë dhe s’mund të bëhen qoka individuale me blerje skarco. Vllaznia është aset i shkodranëve”, ka thënë Pjetri para mediave lokale në Shkodër.

Ai ka folur edhe për çështjen e privatizimit dhe të borxheve: “Orientimi do të jetë privatizimi i klubit, por duhet parë ligjërisht procedura. Nuk ndodh në ditën 0. Ka rreth 1 miliard borxhe. Për sa i përket pjesës së borxheve do të merret dikush tjetër. Do ta shohim në vazhdim. Për sa i përket lëvizjes së administratorit dhe drejtorit teknik, do ta shohim në vazhdim”.

VIDEO | “E çojmë Vllazninë në të Parën”, gafa që tërbon shkodranët!

Sport Ekspres — Wed, 26 Jun 2019 08:27:18 +0000

Ndodh për të dytën herë, në fushatë, ku premtohet një Vllazni në Kategorinë e Parë. Duke qenë larg futbollit dhe Superiores, ata që merren me politikë nuk e dinë se e Para është liga e dytë e futbollit në vend. Nga kjo vorbull nuk ka shpëtuar as Valdrin Pjetri, kandidat për kreun e Bashkisë Shkodër.

Voltana Ademi, i falet në njëfarë mënyre pasi është edhe femër, e premtoi Kategorinë e Parë dhe kuqeblutë sezonin e shkuar luajtën aty, ndërkohë që fjalët e Pjetrit nuk janë pritur mirë nga tifozët. Reagimet në rrjetet sociale kanë qenë të shumta, ndërkohë që kandidati i Partisë Socialiste e shikon zgjidhjen te privatizimi i klubit.

“Vllaznia nuk po arrin të kalojë aty ku e ka vendin. Kam marrë shumë shqetësime nga tifozë të ndryshëm dhe pyetja kryesore është: Valdrin, çfarë do të bësh me Vllazninë nesër? Në konsultë edhe me mjeshtrat e sportit, por edhe duke parë anën ekonomike, propozimi ynë është fillimi i procedurave për privatizimin e KF Vllaznia”, shprehet mes të tjerash Pjetri, i cili sa duket nuk ka informacion që procedurat e privatizimit kanë nisur dhe aksionet e Vllaznisë tashmë e kanë edhe një çmim.

Më tej ai flet për rëndësinë e privatizimit dhe bën gafën e madhe: “Vetëm atëherë ne mund të çojmë Vllazninë në Kategorinë e Parë dhe t’i japim Vllaznisë as më shumë e as më pak, por atë që meriton. Ja kemi borxh dhe borxhet duhet me i la. Koncepti ynë është që Vllaznia të privatizohet”.