Kriza e Monakos, Vasiliev: Kemi humbur besimin, por duhet të ringrihemi

Sport Ekspres — Sat, 29 Sep 2018 11:51:27 +0000

Monako e nisi me një fitore me rezultatin 1-3 përballë Nantë në transfertë kampionatin francez, por ajo mbetet fitorja e vetme edhe mbas javës së tetë të Liga 1. Klubi nga principata ndodhet në krizë dhe në shtatë ndeshjet e fundit në kampionat, ka marrë vetëm tre pikë.

Humbja e fundit përballë St. Etienit ka sjellë zhgënjimin e drejtuesve të klubit dhe zëvendës presidenti i klubit, Vadim Vasiliev. Ky i fundit ka folur për “Canal +”, pas humbjes së fundit, ku ka deklaruar: “Na mungon besimi. Është koha për të shtrënguar dhëmbët, të punojmë dhe të ngremë kokën. Nuk është momenti për të bërë një bilanc. Jam i zhgënjyer, të gjithë jemi të zhgënjyer”.

Të mërkurën, Monako udhëton drejt Gjermanisë për t’u përballur me Dortmundin në Champions dhe klubi francez shpreson që ekipi të reagojë dhe të rikthehet te rezultatet pozitive.

Vasiliev: Perez miku im, por diçka nuk ma fal kurrë!

Sport Ekspres — Thu, 16 Aug 2018 15:45:03 +0000

Vadim Vasiliev është zëvendës-presidenti i Monakos dhe mbrëmjen e kaluar, ai ishte në Talin për të ndjekur finalen e Superkupës së Europës. Marrëdhëniet e tij janë të mira me presidentin e Realit të Madridit, Florentino Perez, por ky i fundit i përsërit gjithmonë të njëjtën gjë, sa here ata takohen. Tema është Kilian Mbape dhe spanjollit akoma nuk i ka kaluar inati për transferimin e kampionit të botës në Paris.

“Florentino më fajëson gjithmonë për faktin që nuk ja shitëm Mbapenë Realit. Ne jemi dy klube mike, por Perez, sa herë që takohemi, më përsërit të njëjtën gjë: pse ja shitëm Mbapenë PSG-së dhe jo atij”, komenton rusi për “RMC Sport”.

Reali ishte një nga klubet e interesuara për 19-vjeçarin, por PSG veproi shpejt dhe pagoi 180 milionë euro dhe Mbape mori rrugën për në kryeqytet, atë francez dhe jo spanjoll. Diçka e tillë i ka mbetur peng kreut të Realit, i cili nuk ngurron t’ia përsërisë një fakt të tillë Vasilievit, sa herë që ata takohen.