Bind mbrojtësi i moshave të Shqipërisë, nënshkruan si profesionist

Sport Ekspres — Sat, 26 Jan 2019 09:35:27 +0000

Para disa kohësh u ftua nga Shqipëria U17 dhe Usni Ismaili nuk tha jo. Mbrojtësi i djathtë po spikaste me moshat e Pelisterit dhe trajneri Xhemal Mustedanagiç e pëlqeu dhe më pas i riu mori edhe pasaportën shqiptare. Së fundmi rreth tij ka lajme të reja.

Edhe te Pelisteri janë bindur për cilësitë e tij dhe i kanë ofruar një kontratë si profesionist. Ismaili, i cili luan në të djathtë të mbrojtjes, ka nënshkruar për tre vite, ndërkohë që financiarisht nga viti në vit do të përfitojë më shumë. Gjithsesi synimi është tjetër: kalimi në një ligë më të fortë.

Usni Ismaili, në momentin e firmosjes së kontratës

SportEkspres.com mëson se në kontratën e bërë mes palëve është përfshirë edhe një klauzolë që i lejon Ismailit të largohet me parametro zero. Për kartonin e tij Pelisteri nuk do të negociojë, por sigurisht nuk do të dalë pa gjë. Klubi maqedonas do të përfitojë vetëm pjesën e taksës së formimit, konform rregullores së FIFA-s.

VLADIMIR PRENGA

Mustedanagiç “peshkon” në Maqedoni, një mbrojtës për kuqezinjtë

Sport Ekspres — Sat, 13 Oct 2018 13:39:04 +0000

Shqipëria U17 po bëhet gati për ndeshjet kualifikuese të Europianit, ndërkohë që trajneri Xhemal Mustadanagiç po mendon për listën e lojtarëve që do të ftojë. Në periudhën 20-30 tetor, në Shqipëri zhvillohen kualifikueset dhe kuqezinjtë përballen me skuadra si Norvegjia, Skocia dhe Azerbajxhani.

Sa i takon listës, “SportEkspres.com” mëson se Usni Ismaili, mbrojtësi i djathtë i datëlindje 2002, do të jetë pjesë e Shqipërisë U17. Adoleshenti po luan në Maqedoni me Pelisterin në ligën e dytë dhe është një element me të ardhme.

Trajneri Mustadanagiç e ka pëlqyer lojtarin në fjalë dhe e ka në planet e tij. Kështu shtohet numri i lojtarëve nga Maqedonia që zgjedhin të veshin fanellën kuqezi. Te moshat janë disa lojtarë që kanë bërë këtë zgjedhje, ndërkohë që ka edhe të tjerë në fokus.

VLADIMIR PRENGA