USL

Zguro shkëlqen në USL, votohet si mbrojtësi më i mirë

Sport Ekspres — Thu, 04 Jul 2019 07:47:45 +0000

Vangjel Zguro u largua nga Kukësi në muajin janar dhe u transferua në Shtetet e Bashkuara të Amerikës, aty ku po aktivizohet rregullisht me Chattanooga Red Wolves SC në USL. Mbrojtësi pogradecar ka bërë paraqitje të mira dhe është përfshirë së fundmi në katër mbrojtësit më të mirë në pjesën e parë të kampionatit.

Faqja zyrtare e USL ka organizuar edhe një votim dhe në fund Zguro ka qenë ai që ka marrë më shumë vota. Pogradecari, përmes rrjeteve sociale, sigurisht që nuk ka harruar të falënderojë edhe shqiptarët që e kanë mbështetur.

Shifrat e Zguros janë mjaft të mirë, teksa për në faqen e USL shkruhet: “Zguro është vetëm 1 asist larg më të mirit të kampionatit, me 4 asiste, dhe ka pasur paraqitje solide në përgjithësi me topin në këmbë, me kompletim pasimesh 75%, me 45 pasime mesatarisht dhe 13 pasime kyçe. Ka pasur numrin më të lartë në ekip për ndërhyrje në rrëshqitje për fitimin e topit (19) dhe është i nënti mes mbrojtësve, me 68 rikuperime topi”.

Mici kërkon largimin, dy oferta nga “atdheu i dytë” e tundojnë

Sport Ekspres — Sat, 15 Jun 2019 18:34:12 +0000

Gledi Mici mund të largohet nga Shkëndija në javët në vazhdim. Sipas “infOSport.mk”, mbrojtësi i kampionëve të Maqedonisë ka kërkuar largimin për shkak se në drejtim të tij kanë ardhur dy oferta nga skuadra amerikane.

Mici, i cili krahas shtetësisë shqiptare ka dhe atë amerikane kërkohet nga Orlando City dhe Phoenix Rising. Orlando City është klubi më prestigjioz. Ky ekip militon prej katër vitesh në elitën e futbollit amerikan, “MLS”, dhe ka në përbërje disa lojtarë me emër ku më së shumti bie në sy futbollisti portugez Nani.

Klubi tjetër, Phoenix Rising, është pjesë e divizionit të dytë për nga rëndësia: “USL”. Në vitet e fundit Phoenix Rising ka qenë ndër klubet më të suksesshme në këtë divizion. Aksioneri maxhoritar në këtë projekt është ish-futbollisti i njohur Didier Drogba.

Futboll dhe Kanabis, një klub në Las Vegas i bashkon të dyja

Sport Ekspres — Sat, 09 Mar 2019 20:50:45 +0000

Las Vegas Lajts është një klub futbolli, i cili është krijuar vetëm një vit e gjysmë më parë. Ekipi luan në “USL Championship” në Amerikë, që është një ligë që është krijuar që në vitin 2011. Deri këtu është çdo gjë korrekte dhe e zakonshme.

Në rast se gërmojmë më shumë për klubin e Las Vegasit, atëherë do të zbulojmë se nga lajmet e fundit, ky klub ka bërë diçka të pazakontë dhe të rrallë për botën e futbollit dhe jo vetëm. Siç dihet, çdo klub futbolli ka një sponsor, dhe Las Vegas Lajts, ashtu si të gjithë ka një sponsor, që quhet “Two Roots Brewing Co.”.

Kjo e fundit është një birrari, që bazën e saj e ka në San Diego dhe njihet shumë për prodhimin e birrës së mbushur me kanabis. Po, e dëgjuat mirë, birrë e mbushur me kanabis. Kjo birrë nuk lejohet nga ligjet e shtetit të Nevadës dhe për këtë arsye një version pak më ndryshe i birrës me kanabis do të lejohet të shitet në afërsi të stadiumit, kur Las Vegas Lajts të luajnë në shtëpi.

Birra e mbushur me kanabis që prodhohet në San Diego.

Vërtet diçka e pazakontë dhe shumë e çuditshme, sidomos për botën e futbollit…

Fundi i karrierës për Drogba? “Ujku” afrikan i jep fund dilemës!

Sport Ekspres — Sat, 10 Nov 2018 11:16:05 +0000

Të gjithë futbollistët e kanë të vështirë t’i japin fund karrierës së tyre dhe të heqin dorë nga futbolli i luajtur. Pavarësisht moshës 40-vjeçare, Didier Drogba as që ka ndërmend të ndalet. Sulmuesi nga Bregu i Fildishtë, i cili aktivizohet me ekipin e Phoenix Rising në divizionin e dytë të futbollit amerikan (USL) kishte deklaruar se do të tërhiqet nga futbolli pas finales së USL kundër Luisvill Sitit.

Pasi fitoi Konferencën e Lindjes, Phoenix Rising u mposht në finalen e madhe kundër Lusivill Sitit, fituesve të Konferencës së Perëndimit me rezultatin 0-1. Por, një lojtar si Drogba nuk mund ta mbyllë karrierën me humbje.

Ish-sulmuesi i famshëm i Çelsit ka reaguar në rrjetet sociale, në një mënyrë mjaft interesante. Drogba ka postuar një fragment nga filmi i famshëm “The Wolf of Wall Street”, (Ujku i Uoll Strit), ku aktori Leonardo Di Kaprio thotë shprehjen e famshme: “Nuk po largohem”

Një sinjal i qartë i afrikanit, i cili ndihet në formë dhe në moshën 40-vjeçare dhe kërkon të vazhdojë të luajë futboll, të shënojë dhe të festojë akoma.

View this post on Instagram

Retirement ??? ?????

A post shared by didierdrogba (@didierdrogba) on Nov 9, 2018 at 10:53am PST

VIDEO | Drogba vijon të mahnisë, shënon një gol për “kornizë” në Amerikë

Sport Ekspres — Sun, 21 Oct 2018 11:52:49 +0000

Didier Drogba vitin e kaluar u transferua në ligën e dytë amerikane për të luajtur me ekipin e Feniks Rajsing. Sulmuesi legjendë gjithashtu u fut në historinë e futbollit, si i pari futbollist, i cili edhe është pronar i ekipit edhe luan për atë ekip.

Aventura e tij me Feniks po shkon mjaft mirë, teksa ekipi amerikan luan për momentin në “play-off”, pasi e përfundoi kampionatin e rregullt në vendin e tretë. Mbrëmjen e kaluar ekipi i Drogba priste ekipin e dytë të Portland, në një sfidë të vlefshme për fazën e 1/8-ave. Takimi përfundoi me fitoren e pastër të Feniks, të cilët likuiduan miqtë nga Portland me tre gola.

Goli që hapi rrugën e suksesit për vendasit, ishte pikërisht i Didier Drogbasë, i cili me një goditje dënimi shënoi një supergol. Edhe pse tashmë është në moshën 40-vjeçare, lojtari nga Bregu i Fildishtë vazhdon të tregojë se pavarësisht moshës, klasi tek ai ngelet gjithmonë.