U-21

Bushi prezanton anti-Islandën: Pres shumë nga Shpresat, së shpejti vijnë edhe dy talente nga Danimarka

Sport Ekspres — Sat, 30 Sep 2017 09:33:16 +0000

Të martën e ardhshme në Elbasan Shqipëria U-21 do të luajë ndeshjen e katërt kualifikuese për Europianin e kategorisë. Përballemi sërish me Islandën, të cilën e mundëm në fillim të muajit, duke marrë fitoren e parë në kualifikuese.

Tani “oreksi” është shtuar, sepse një fitore tjetër ndaj Islandës së fortë na ngjit ndjeshëm në renditje dhe trajneri Alban Bushi është optimist, pasi grupi që ka në dispozicion i jep shpresa të mëdha.

“Islanda është një ekip mjaft cilësor, por e mundëm një herë dhe mund t’ia dalim sërish, pavarësisht se Islanda niset favorite. Në 3 ndeshjet e para kam mbetur shumë i kënaqur nga ekipi. Është eksperienca ime e parë si trajner dhe e kisha pak me frikë, por kam pasur një ndihmë të madhe nga të gjithë dhe lojtarët kanë qenë fantastikë, ndaj kemi luajtur tre ndeshje shumë të mira. Meritonim më shumë, në aspektin e rezultateve, por futbolli i tillë është, ndonjëherë luan mirë e humbet dhe e kundërta”, deklaroi sot trajneri i Shqipërisë U-21, gjatë prezantimit të listës së kombëtares.

Dhjetë lojtarë nga lista me 23 emra janë nga kampionati shqiptar, një lajm i mirë, pasi tregon se po prodhojmë, edhe pse trajneri e pranon se kampionati ka ende shumë punë për të bërë: “Kampionati ynë ka lojtarë interesantë, por ka ende nevojë të rritet në cilësi, edhe pse ka pasur rritje vitet e fundit. Kam grumbulluar disa lojtarë, ka edhe emra të tjerë të piketuar, por dua t’i grumbulloj për një miqësore në nëntor. Ndër këta emra është edhe Jurgen Bardhi, i cili është një lojtar i talentuar dhe është në planet e mia për të ardhmen”.

Bushi zbulon se së shpejti me kombëtaren do të bashkohen edhe dy talente nga Danimarka, të cilët luajnë me Vejlen, aty ku luan edhe Ylber Ramadani: “Mesfushorët Agon Muçolli dhe Arbnor Muçolli, vëllezër që luajnë te Vejle, 19 dhe 18 vjeç, së shpejti do të bëhet pjesë e kombëtares. Presim të marrin pasaportën shqiptare, pasi kanë shprehur gatishmërinë të luajnë për ne, pa u ndikuar nga Ylber Ramadani, sepse i kemi pikasur me kohë, por edhe ai ka folur me ta, natyrisht”.

Alban Bushi kërkon… mrekullinë në shtëpinë e Xhorxh Bestit

Sport Ekspres — Thu, 31 Aug 2017 13:29:45 +0000

Shqipëria U-21 e drejtuar nga Alban Bushi do të zbresë sot në fushë, në orën 20:30, në stadiumin “Mourneview Park” të Belfastit, përballë kombëtares së Irlandës së Veriut. Praktikisht, në shtëpinë e të madhit Xhorxh Best. Shpresat vijnë nga barazimi, në një ndeshje të dominuar, ndaj Estonisë, në “Elbasan Arena” dhe ndodhen në krye të grupit. Pas Irlandës së Veriut, do të jetë radha e Islandës, më 4 shtator në Rejkjavik, ora 19:00.

Alban Bushi ka pasur shumë probleme për ndërtimin e formacionit, sepse grumbullimi nisi me dëmtimet e Bytyqit dhe Seferit, ndërsa është dëmtuar dje edhe Ylber Ramadani, i cili nuk do të luajë. Jo vetëm kaq, sepse Endri Çekiçi nuk ka mundur të marrë vizën britanike dhe nuk do të jetë.

Duke pasur në mendje edhe mungesat, ndaj Irlandës së Veriut do të jetë një Shqipëri sulmuese por dhe shumë e kujdesshme.

FORMACIONI I MUNDSHËM: Selmani, Tafa, Toli, Maloku, Ceka, Doka, Ndoj, Krymi, Bare, Hebaj, Durmishaj.

Përforcimi i radhës, Taulant Seferi është kuqezi

Sport Ekspres — Thu, 08 Jun 2017 10:08:26 +0000

Një tjetër lajm i shkëlqyer për kombëtaren shqiptare: Taulant Seferi është zyrtarisht kuqezi.

FIFA, nëpërmjet Departamentit të Statusit të Lojtarit, ka dhënë miratimin që Taulant Seferi të luajë për përfaqësuesen kuqezi, njofton Federata Shqiptare e Futbollit.

Më parë Seferi, i lindur në Kumanovë, është aktivizuar me gjithë ekipet e moshave të Maqedonisë, por ka bërë kërkesë për të luajtur për Shqipërisë dhe tashmë kërkesa e tij është aprovuar, ashtu si ndodhi dje me Elvir Malokun, i cili në fakt priste prej dy vitesh.

Mesfushori 20-vjeçar është vënë menjëherë në dispozicion të ekipit kombëtar U-21, që drejtohet nga trajneri Alban Bushi dhe do të luajë të hënën ndeshjen e parë zyrtare për eliminatoret e Europianit, ndaj Estonisë në stadiumin “Elbasan Arena”, ora 20:00.

Bare: Ekipi është i ri, duhet kohë

Sport Ekspres — Tue, 06 Jun 2017 11:05:22 +0000

Mesfushori i Atletikos së Madridit, Keidi Bare, është shprehur i qetë pas humbjes kundër Francës, duke kërkuar kohë për një grup mjaft të ri: “Shumë lojtarë kanë ardhur nga ekipi U-19, jemi një ekip i sapoformuar dhe përballë kishim një rival superior në shumë drejtime, ndaj kjo humbje nuk duhet të trajtohet si dramë. Besoj se po luanim mirë derisa Franca ka shënoi për një gabim tonin, duke përfituar edhe nga fakti se kanë lojtarë më shtatlartë se ne. Bëmë edhe gabime të tjera, por jam i sigurt se do t’i riparojmë deri në ndeshjen ndaj Estonisë. Shpresoj të na kthehen edhe dy lojtarë që i kemi pasur të dëmtuar, pasi janë lojtarë të rëndësishëm dhe do të na ndihmojnë shumë.

Bare flet edhe për të ardhmen: “E ardhmja? Tani për tani jam pjesë e Atletikos, ku do të jap maksimumin për të bërë sa më mirë dhe për të gjetur hapësira”.

Zeka debuton me U-21: Ndjesi e bukur

Sport Ekspres — Tue, 06 Jun 2017 09:04:32 +0000

Grumbullimi i parë me Kombëtaren U21 për Agim Zekën, i cili u fut në pjesën e dytë dhe u mundua shumë për të bërë figurë të mirë ndaj kombëtares së vendit ku aktivizohet tani. “Ndjesi e bukur, ishte ndeshja e parë dhe jam i lumtur e i emocionuar. Tani duhet të përqendrohemi te ndeshja e radhës, pasi ajo është vendimtare për ne. Kundër Estonisë na duhet fitorja, ndryshe nga kjo sfidë miqësore kundër Francës”.

Zeka luajti kundër shumë lojtarëve që i njeh mirë, duke i parë çdo javë në fushë në Francë: “Franca ka një ekip shumë të talentuar, janë lojtarë që luajnë në nivele të larta, nuk është e lehtë për ne”.

Dëmtohet Çekiçi: Shpresoj të mos jetë diçka serioze

Sport Ekspres — Tue, 06 Jun 2017 07:43:52 +0000

I pafat Endri Çekiçi, i cili dje pësoi një tërheqje dhe u detyrua të dilte që në pjesën e parë. Mesfushori i talentuar i Lokomotivës së Zagrebit është lojtari me më shumë eksperiencë që trajneri Alban Bushi ka në dispozicion, ndaj mungesa e tij ndaj Estonisë do të ishte një problem shumë i madh. Priten kontrollet e sotme, për të verifikuar situatën e lojtarit, por Bushi do ta presë deri në ditën e fundit me shpresën për ta pasur në fushë.
Pas ndeshjes, Çekiçi u shpreh: “Shpresoj që të mos jetë diçka serioze, do të shohim në ditët në vazhdim, do të bëj maksimumin që të jem gati. Shumë nga lojtarët tanë luanin për herë të parë me Shpresat. Trajneri vendos kush luan, ne na mbetet të japim maksimumin. Sot bëmë disa gabime të vogla, edhe pse kishim punuar shumë për goditjet standarde. Do të japim gjithçka për ta fituar ndeshjen kundër Estonisë. Kombëtarja A? Hapat një nga një, për momentin mendoj vetëm për Shqipërinë U-21. E ardhmja? Sapo më mbaroi huazimi te Lokomotiva, duhet të flasim me drejtuesit e Dinamos së Zagrebit”.

Afron debutimi zyrtar, Bushi publikon listën e U-21

Sport Ekspres — Thu, 01 Jun 2017 09:45:38 +0000

Alban Bushi ka disa muaj që bën prova e miqësore, por tashmë ka ardhur momenti që të debutojë në një ndeshje kualifikuesen drejtimin e kombëtares shqiptare U-21.

Më 12 qershor Shqipëria do ta nisë me sfidën shtëpiake kundër Estonisë U-21, sfidë që duhet fituar me çdo kusht, në një grup të ndërlikuar, ku bëjnë pjesë edhe Spanja, Sllovakia, Islanda e Irlanda e Veriut.

Synimi i Shqipërisë U-21, përtej evidentimit të talenteve, është edhe renditja në vendin e tretë në grup.

Ndërkaq, më 5 qershor Shqipëria do të luajë një miqësore në “Selman Stërmasi” kundër Francës U-21, një test i mirë për të kuptuar sa vlen skuadra jonë.

Për sa i përket listës, Bushi ka grumbulluar 25 lojtarë, prej të cilëve 9 janë nga Kategoria Superiore.

Portierët janë Kastrati e Selmani, titullarë te Teuta e Laçi, ndërsa nga Tirana janë afruar Doka, Marlind Nuri e Grent Halili, me Vllazninë që ka në listë Krymin e Hebajn.

Keidi Bare e Endri Çekiçi janë emrat më të njohur nga ata që luajnë jashtë, ndërsa priten me kuriozitet lojtarë pak të njohur në Shqipëri, si Arijan Qollaku i Grasshopers, Emanuele Ndoj i Breshias e Irlian Ceka i të rinjve të Lacios.

Programi i U21:

01/06/2017 ora 19:00 stërvitje, “Stadiumi Besa” i Kavajës
02/06/2017 ora 10:30 dhe ora 19:00 stërvitje, “Stadiumi Besa” i Kavajës
03/06/2017 ora 10:30 dhe ora 19:00 stërvitje, “Stadiumi Besa” i Kavajës
04/06/2017 ora 20:00 stërvitja zyrtare para ndeshjes miqësore ndaj Francës, stadiumi “Selman Stërmasi”
05/06/2017 ora 21:05 ndeshja miqësore Shqipëri – Francë, stadiumi “Selman Stermasi”
06/06/2017 ora 10:00 stërvitje, stadiumi Pogradec
07/06/2017 ora 19:00 stërvitje, stadiumi Pogradec
08/06/2017 ora 10:00 dhe ora 19:00 stërvitje, stadiumi Pogradec
09/06/2017 ora 10:00 dhe ora 19:00 stërvitje, stadiumi Pogradec
10/06/2017 ora 19:00 stërvitje, stadiumi Pogradec
11/06/2017 ora 19:30 Konferenca për Shtyp
12/06/2017 ora 20:00 ndeshja zyrtare Shqipëri U21- Estoni U21 – “Elbasan Arena”