tungara

Sulmuesi i Flamurtarit këput ligamentin, do mungojë gjatë

Sport Ekspres — Wed, 31 Oct 2018 18:33:51 +0000

Në verë u rikthye nga Liria e Prizrenit, ku ishte lënë në huazim dhe të gjithë prisnin që sivjet të kishte më shumë hapësira. Por lajmi i parë që mësohet për Abduljae Ibrahim Tungara është ai i operimit në gju.

Lojtari nga Mali ka këputur ligamentin dhe do të duhet të qëndrojë për të paktën katër muaj larg fushave të blerta. “Sulmuesi Abdoulaye Ibrahima Toungara ditën e sotme i është nënshtruar një ndërhyrje kirurgjikale në ligamentin Kruciat Anterior në gjurin e majtë. Shërim sa më të shpejtë. Të presim më të fortë pas dëmtimit në fushën e lojës”, shkruhet në faqen zyrtare të Flamurtarit.

Sulmuesi 19-vjeçar provoi të debutonte një vit më parë në Superiore dhe shënoi një gol në ndeshjen kundër Kamzës fazën e dytë. Për Tungara pati pak minuta në dy ndeshje dhe më pas u huazua në Kosovë te Liria, që drejtohej asokohe nga Bledi Shkëmbi.

Flamurtari zyrtarizon edhe afrimin e fundit, afrikanin Tungara

Sport Ekspres — Sun, 03 Sep 2017 21:20:31 +0000

Abdulaje Ibrahima Tungara është edhe zyrtarisht i Flamurtarit. Mesfushori me tipare mbrojtëse, prej ditësh në Vlorë, ishte stërvitur dhe kishte bindur trajnerin Duro, i cili ka dhënë miratimin për përfshirjen e tij në skuadër.

Klubi kuqezi ka zyrtarizuar dje emrin e tij si përforcim, edhe pse federimi është bërë që më 31 gusht, sipas rregullores.

Tungara, 20 vjeç, u aktivizua edhe në miqësoren e djeshme të Flamurtarit me ekipin U-19, ndërsa pak orë më vonë erdhi prezantimi si futbollisti më i ri i klubit kuqezi.

Tungara është një tjetër futbollist i huaj që shtohet te Flamurtari, por në bazë të rregullores, është i katërti nga ata që llogariten realisht të huaj, sepse futbollistët nga Maqedonia dhe Kosova llogariten si “shqiptarë”, duke mos u përfshirë në rregullin e lojtarëve të huaj.

Tungara sot në Vlorë, firmos kontratë 3-vjeçare

Sport Ekspres — Fri, 11 Aug 2017 14:53:35 +0000

Ibrahim Tungara të premten do të bashkohet me skuadrën, por stërvitjen e parë lojtari do ta zhvillojë në Veria të Greqisë. 18-vjeçari nga Mali mbërrin në Rinas sot në orën 8:00 dhe menjëherë do të udhëtojë drejt Vlorës, për të zyrtarizuar gjithçka duke firmosur kontratën me Flamurtarin, ndërsa më pas do të udhëtojë së bashku me pjesën tjetër të skuadrës drejt Greqisë, për të kryer fazën përgatitore. Vonesa e lojtarit për të mbërritur në Vlorë u kushtëzua nga disa veprime burokratike deri edhe tek vonesa e vizës. Por tashmë gjithçka ka përfunduar pozitivisht dhe lojtari ditën e premte do të jetë pranë skuadrës, për të nisur aventurën e tij me Flamurtarin.

Lojtari sulmues 18-vjeçar Ibrahim Tungara humbi plotësisht fazën përgatitore në Mavrovë, por mbërrin në kohën e duhur për të qenë pjesë e skuadrës në fazën përgatitore në Veria të Greqisë. Lojtari konsiderohet një investim mjaft i rëndësishëm për Flamurtarin, pasi vlerësohet si talent dhe kontrata e tij me vlonjatët pritet të jetë minimalisht tre-vjeçare.