Në stadium ishin rreth 2400 mijë tifozë, ku 300 kishin ardhur nga Spliti. Hajduku njihet për tifozërinë e tij të zjarrtë dhe të dhunshme dhe mbështeten nga tifogrupi “Torcida”. Gjatë ndeshjes së djeshme, këta të fundit kanë lëshuar kore ofenduese kundrejt serbëve. Armiqësia mes palëve njihet, ndërsa “Tocida” ka filluar të këndojë gjatë ndeshjes: “Ne kroatët nuk pimë verë, por gjakun e çetnikëve nga Knini”. Knini është qytet i lashtë mbretëror kroat dhe shtrihet në pjesën qendrore të Kroacisë jugore, ndërsa aty u krijua Republika e vetëshpallur e krahinës serbe nga viti 1991-1995.

Në pjesën e dytë ultrasit e Hajdukut hapën dhe një pankartë drejtuar klubit të tyre. “Zgjedhje të reja, vende të reja, njerëz të rinj dhe me vizion. Ndershmëria dhe transparenca para interesave personale.“ Klubi ka probleme dhe tifozët janë kundër drejtuesve aktualë, duke vazhduar protestat e tyre. Para sfidës, “Torcida” krijoi disa probleme në qendër të Karlovacit, ku u dëmtuan dhe disa lokale.

Shumë tifozë të Hajdukut janë nisur drejt Bullgarisë në mbështetje të ekipit të tyre, por diçka e papritur ka ndodhur, siç raporton policia serbe.

Rreth 20 kilometra në jug të Beogradit, ultrasit kroatë kanë plaçkitur një stacion benzine në autostradë. Tifozat e Hajdukut kanë konsumuar një sasi të madhe pijesh pa paguar, kanë dëmtuar stacionin e shërbimit, duke përmbysur disa kontejnerë mbeturinash dhe kanë vazhduar rrugën drejt Bullgarisë.

Torcida është tifo-grupi i ekipit kroat dhe ata, përveçse një nga grupimet më të vjetra në Europë, njihen dhe si mbështetës të zjarrtë të ekipit të tyre.