Një tjetër futbollist beratas që është prezantuar në një klub të ri është Gelando Sharavolli. Mesfushori 24-vjeçar i është bashkuar Apolonisë së Fierit, duke mbyllur kështu bashkëpunimin me klubin e Tomorit pas gjashtë vitesh.

“Është një rezultat 0-0 që u mor në Shqipëri me një pjesë të parë të mirë dhe me një pjesë të dytë shumë të mirë. Është një ndeshje që duhet të kesh kujdes 90 minuta, të mbrohesh mirë dhe të shënosh me kundersulme. Çdo barazim me gola kualifikon Partizanin, gjë pozitive. Skuadra ka punuar shumë mirë dhe janë gati për këtë ndeshje.

Është punuar më shumë nga skuadra taktike, sidomos mbrojtjen në 40 metrat e fundit, pasi Karabaku ka lojtarë shumë të mirë në lojën një kundra një. Kemi punuar dhe me goditjet standarte, korne, faulle. Nuk duam të pësojmë në një mënyrë të tillë. Kemi punuar dhe me kundësulmet, me Çinarin, Asanin. Solomon është mirë fizikisht, e mbron topin shumë mirë. Do t’i shpërbejë shokëve dhe të tre së bashku, si Çinari, Asani e Solomon, do të jenë të rrezikshëm.

Trashi? Zgjedhje e trajnerit. Trajneri është i plotfuqishëm, jo vetëm te Partizani, por në çdo skuadër. Trashi ka merita të pamohueshme për sukseset e Partizanit, sidomos sezonin e shkuar. Nëse do ishte për mua, Trashi do të luante sa më shumë minuta, pasi mund t’i shërbejë ekipit”, tha

Pas një karriere të shkëlqyer me disa skuadra të njohura të vendit, por që fatkeqësisht u ndërpre shumë herët për arsye të një dëmtimi, tani nis një tjetër sfidë për më të voglin e dinastisë Arbëri, sepse Polizoi ka vendosur të vijojë karrierën e trajnerit. Pas një eksperience të parë dhe të shkurtër tek Luftëtari në sezonin e kaluar, duke punuar në detyrën e ndihmës teknikut në krah të Gentian Mezanit, Polizoi ka kryer një tjetër ndërhyrje kirurgjikale në Itali dhe pas rikuperimit të tij të plotë, ka zgjedhur që të rinisë sërish nga puna si trajner.

Në një prononcim për SportEkspres.com , Arbri shfaq dëshirën e tij të madhe dhe gatishmërinë për t’i shërbyer skuadrës së vendlindjes, Tomorit, për të cilën shprehet i gatshëm ta drejtojë në Kategorinë e Dytë, duke ju gjendur pranë në këtë moment të vështirë ku ndodhet skuadra beratase.

“Dihet se karriera ime si trajner është në hapat e saj të parë dhe kam të njëjtën dëshirë dhe përkushtim ashtu si dikur në fushë si futbollist,  ashtu edhe në detyrën e trajnerit, ku më ndihmon jashtëzakonisht përvoja si futbollist në nivele të larta dhe ish-anëtar i ekipeve kombëtare. Besoj shumë se do të jem po kaq i suksesshëm sa dhe dikur si futbollist në fushë. Pas eksperiencës sime të shkurtër tek Luftëtari, ajo që do të më pëlqente shumë si një sfidë e vërtetë do të ishte që të drejtoja pse jo edhe Tomorin që është skuadra ime e vendlindjes dhe që i detyrohem shumë.

“Në një moment ku skuadra ka rënë në Kategorinë e Dytë, kam bindjen dhe sigurinë që po të më besojnë rindërtimin e skuadrës, do të kisha të gjithë sigurinë profesionale, por edhe gatishmërinë, për të kuruar plagët e futbollit beratas. Unë shprehem i gatshëm për të marrë drejtimin e Tomorit në këto momente, sepse e di se sa po vuajnë sportdashësit beratas dhe jam plotësisht i gatshëm që të rikthej skuadrën brenda një sezoni në Kategorinë e Parë. Kam një projekt që është ambicioz, por dhe që falë emrit dhe traditës së Tomorit nuk e diskutojmë rikthimin në të Parën”, deklaron Arbri, i cili pret dhe shpreson te riorganizimi i Tomorit, që sezonin  e fundit dështoi në çdo drejtim.

EDI SPAHIU

ADMINISTRIMI -“Menaxhimi i skuadrës së Tomorit në këtë sezon të dështuar, u bë nga njerëz të paformuar për të drejtuar një skuadër futbolli, që pretendonte elitën. Për mënyrën se si ata u sollën me skuadrën, treguan se janë shumë vite larg Tomorit të vërtetë. Për këtë dështim, duhet t’i kërkojnë falje publike të gjithë tifozerisë beratase, pse jo edhe skuadrës që e copëtoi nga faza në fazë”.

TRAJNERËT -“Nuk mund të ndodhte ndryshe edhe me trajnerët, të cilët u zëvendësuan katër herë brenda një sezoni. Nuk është faji i tyre, por i drejtuesve që nuk dinin të respektonin dhe të përzgjidhnin vlerat e pankinës. Me kontingjentin që ata kishin në dispozicion, nuk mund të jepnin më shumë, nisur nga situata psikologjike e mospagesave, që për mendimin tim ishte shkaku kryesor i rënies së skuadrës në të Dytën”.

SKUADRA – “Në nisje të sezonit, u bë një përzgjedhje e mirë nga Bledar Devolli, por largimi i tij la shumë dyshime te futbollistët, të cilët e shikonin vazhdimësinë të zymtë. Mendoj se të gjithë futbollistët dhanë më shumë se sa u trajtuan nga Bashkia, e cila i la pa pagesa për pesë apo gjashtë muaj. Kështu nuk mund të pritej më shumë, dhe unë i falenderoj futbollistët për që dhanë, njëherësh edhe i inkurajoj që të kërkojnë pagesat e tyre të pashlyera”.

AGRON KAJA

Drejtori i sporteve në Bashkinë e Beratit, Alban Pambuku, ka folur për SportEkspres.com dhe ka deklaruar, se beson ende te mbijetesa.

“Gjatë javës kemi patur disa takime me lojtarët, u kemi kaluar pagat në bankë dhe jemi munduar që ti mbajmë të karikuar para transfertës me Turbinën. Do ishte fatale një humbje, por ne jemi të përgatitur që të luajmë pa presion dhe të nxjerrim ndeshjen e sezonit. Ne besojmë ende te futbollistët tanë dhe i kërkojmë FSHF-së të dërgojë arbitër të FIFA-s në Cërrik”.

“Jemi në një situatë që nuk na ka lënë shumë hapësirë të mendojmë për të ardhmen. Aktualiteti i skuadrës është objekti i punës sonë, ndërsa për vazhdimësinë do të flasim pas përfundimit të kampionatit. Në këtë situatë, rëndësi për ne ka vetëm fitorja në Cërrik”.

AGRON KAJA

Elton Fani, ish-futbollist i Tomorit, pjesë e stafit beratas prej vitesh, për SportEkspres.com ka deklaruar: “Se çfarë ndodhi në ndeshjen Elbasani-Apolonia u pa qartë në lojë e në rezultat. Për ne tashmë ka një mision që nuk e mendoj të vështirë, por të arritshëm. Do të luajmë edhe tre ndeshje deri në fund të kampionatit dhe do bëjmë detyrën tonë deri në minutën e fundit, me besimin se do të marrim pikët që na sigurojnë mbijetesën në Kategorinë e Parë”.

Më tej ai shtoi: “Ne po stërvitemi mirë për t’i përballuar me sukses tre finalet e fundit. Këtë javë presim Elbasanin në fushën tonë dhe nuk kemi asnjë synim tjetër veç fitores. Në Fier luan Turbina dhe këtu do besoja shumë te morali i pastër e ndershmëria që drejtuesit e kësaj skuadre kanë deklaruar këto ditë në media”.

ANKESA E KLUBIT – Përmes faqes zyrtare në “Facebook”, Tomori tregon se lojtarët nuk po kalojnë një moment të mirë. Nuk lihet pa u theksuar se ekipet e tjera nuk po bëjnë garë të ndershme, teksa në postimin e klubit thuhet: “Tomori ka zbritur pasditen e sotme në fushën e blertë të stadiumit, për të vijuar rregullisht përgatitjet e javës anti-Elbasan. Një ndeshje deçizive për objektivat e klubit, të cilën duhet ta kalojmë pozitivisht, në mënyrë që të mos rrezikojmë. Në këto pozita, veç gjendjes së rënduar psikologjike që po kalojnë lojtarët, duhet të përballemi edhe me garën aspak të pastër të ‘bamirësve’ të këtij grupi. Megjithatë, jemi në momente që gjithçka mund ta rregullojmë vetë dhe do ta bëjmë me bindjen më të madhe”.

Për SportEkspres.com, kapiteni Doraldo Paja deklaron se tensioni që ka krijuar renditja nuk do të ndikojë në vazhdimësinë e ndeshjeve deri në mbyllje të kampionatit. “Kjo situatë në renditje, që nuk pritej prej nesh, ka krijuar tension tek të gjithë në skuadrën tonë. Gjithsesi ajo fazë kaloi dhe po punojmë që në ndeshjet e mbetura deri në mbyllje të kampionatit të marrim 9 pikë. Me ato garantohet mbijetesa në Kategorinë e Parë”, është shprehur mbrojtësi Paja.

Sfida me Elbasanin është vendimtare, sikurse edhe vetë kapiteni e pranon: “Ne kemi besim dhe shpresë se ndaj Elbasanit do të marrim tri pikët. Për këtë kemi nisur të punojmë që nga kjo javë, por edhe në javën e ardhshme vetëm për këtë sfidë do mendojmë. Me mbështetjen edhe të tifozerisë sonë, ne do t’ia dalim të fitojmë ndaj Elbasanit”.

AGRON KAJA

Në Berat u zhvillua ndeshja mes Tomorit vendas dhe Apolonisë. Ekipi fierak mposhti në çdo drejtim vendasit me rezultatin 1-4. Apolonia shënoi dy herë brenda 5 minutash me anë të Gjatës dhe Nakos, ndërsa Beci rindezi shpresat e Tomorit për të mos dalë pa pikë.

Megjithatë, Mihana shënoi dy herë në pjesën e dytë dhe vulosi fitoren e ekipit të Stojkut me “poker” golash. Kjo humbje e zhyt ekipin beratas në vendin e fundit me 10 pikë kur kanë mbetur për t’u zhvilluar edhe 3 ndeshje, pasi është parakaluar nga Elbasani. Po 10 pikë ka edhe Turbina e Cërrikut, që ka për të zhvilluar një ndeshje më shumë.

Një gol i Ferhatit në minutën e dhjetë të pjesës së dytë i ka dhuruar një fitore jetike Elbasanit. Verdheblutë ia dolën të triumfonin në Pogradec, duke u ngjitur në kuotën e 12 pikëve, ndërsa ekipi liqenor qëndron i qetë me 22 pikë.

Tomori-Apolonia 1-4
Shënues: Beci 33’ / Gjata 15’, Nako 20’, Mihana 57’, 89’

Pogradeci-Elbasani 0-1
Shënues: Ferhati 55’

I vetmi që nuk është përgatitur me skuadrën ka qënë mesfushori Genald Sharavolli, i cili la fushën i dëmtuar në takimin ndaj Elbasanit dhe do të qëndrojë disa javë larg fushave. Në dispozicion të trajnerit Santiljan Dule, do të jenë të gjithë titullarët e zakonshëm, ndërkohë që në bisedë të shkurtër me SportEkspres.com, tekniku beratas deklaroi se janë të përgatitur që nga kjo sfidë të dalin me objektiv të realizuar.

“Natyrisht që luajmë një ndeshje të vështirë dhe jemi në Pogradec për të marrë maksimalen në këtë sfidë. Për ne, është një finale mbijetese”. Ndeshja Pogradeci-Tomori luhet të shtunën në stadiumin “Gjorgji Kyçyku”, duke nisur nga ora 16:00.

AGRON KAJA

Njoftimi i Llapit:

Zyrtare: Armin Mujkiç  nënshkruan me Llapin

Podujevë, 12 prill 2019 – Gjatë ditës së sotme me Llapin ka nënshkruar kontratë 1 vjeçare e gjysmë edhe mbrojtësi i majtë, Armin Mujkiç. Armin Mujkiç ,25 vjeç, i gjatë 1.90 m dhe i lindur më 10 mars 1994 në Bosnje Hercegovinë. Është mbrojtës i majtë dhe qendërmbrojtës. Ai ka luajtur për Mladost Kakanj, NK Visoko, Nybro dhe së fundi Tomorin e Beratit. I dëshirojmë mirësardhje dhe suksese nën fanellën bardhekaltër, Arminit!

Mujkiç ka luajtur 17 ndeshje këtë sezon me Tomorin, 16 si titullar, ku ka shënuar dhe dy gola. Mbrojtësi ka qenë një nga lojtarët më të mirë në Kategorinë e Parë dhe Llapi i ka besuar, duke siguruar firmën e tij.

Duke parë këtë situatë, drejtuesit e klubit kanë vendosur të bëjnë një sakrificë financiare, duke shlyer pjesën e mbetur të dënimit prej katër ndeshjesh pa tifozë në fushën e tyre.

Me anë të një postimi në faqen zyrtare në “Facebook”, bëhet e ditur se klubi ka paguar gjobën prej 12 milionë lekësh (të vjetra) në mënyrë që dy ndeshjet e radhës si pritës t’i zhvillojnë në Berat. Dy takimet në fjalë janë ndaj Apolonisë dhe Elbasanit.

NJOFTIMI I KLUBIT TË TOMORIT

Futboll Klub Tomori

Normalisht që humbja kundër dy skuadrave të dobëta është e patolerueshme.

Sot në orën (15:00) kemi zhvilluar një mbledhje emergjente me futbollistët e skuadrës, duke folur gjerësisht mbi humbjen dhe pasojat. Kemi arritur një marrëveshje me futbollistët për objektivat deri në fund të sezonit dhe jemi optimist për mbijetesën.

Klubi ka vendosur të shlyej plotë 12 milion lekë gjobën e dy ndeshjeve të radhës, në mënyrë që ti zhvillojmë ato në fushën tonë dhe me praninë e tifozëve.

Përtej çdo pretendimi, i drejtë apo i gabuar, në lidhje me këto më sipër, Tomori ka shkatërruar gjithçka vetë, duke ndërtuar një skuadër të dobët, duke i trajtuar keq futbollistët dhe duke i “torturuar” në aspektin financiar.

Nga burime brenda skuadrës beratase mësohet se një nga arsyet kryesore të krizës është fakti që futbollistët kanë 3 muaj pa u paguar!

Buxheti i klubit është çelur qysh në janar të këtij viti, ndaj nuk ka arsye për këto vonesa, ashtu si nuk ka arsye për absurditetet e klubit në merkato, me afrime aspak cilësore, apo largime habitëse, më i fundit ai i qendërmbrojtësit Mujkiç.

Nëse fundjavën e ardhshme nuk fitohet ndeshja shtëpiake kundër Turbinës, gjithçka rrezikon të përfundojë në mënyrë tragjike, sepse nuk duhet menduar si e pamundur zbritja nga kategoria.

EDI SPAHIU

“Duke vlerësuar rezultatin dhe paraqitjen që skuadra ka shfaqur në ndeshjen e sotme, të cilat kurrsesi nuk janë aspak të denja për emrin e madh dhe fanellën që përfaqëson Tomori, klubi i kërkon publikisht ndjesë tifozerisë së tij. Humbja me rezultatin 2-0 ndaj Elbasanit, luajtur në ‘Elbasan Arena’, nuk mund të ketë asnjë justifikim nga lojtarët për sa i përket kundërshtarit, rezultatit dhe lojës që ekipi tregoi në fushë.

Sakaq, është për t’u çuditur sesi arbitri Edvin Hoxha nuk donte t’ia dinte, edhe pse ndeshja transmetohej direkt në RTSH Sport. Dhe nëse do të vazhdojmë kështu, gjithçka është e kotë. Klubi në këtë dalje për mediat nuk do të merret aspak me vendimet e dyshimta, duke ia lënë gjithçka mediave t’i pasqyrojnë dhe reklamojnë vendimet e “kamikazit” të radhës.

Ne jemi të vendosur të mos tolerojmë kurrsesi këta arbitra kamikazë të nëpërkëmbin imazhin dhe investimet e Klubit. Tomori do të vazhdoj të konkurrojë ndershmërisht në kampionat, gjë që e ka treguar në çdo ndeshje”, shkruhet në komunikatën e klubit të Tomorit.

“Futboll Klub Tomori i ka dërguar një letër-kërkesë FSHF-së në lidhje me gjykimin e sfidës KF Elbasani – FK Tomori. Ne si klub u kemi kërkuar zyrtarëve të institucionit të futbollit një 3-she të Kategorisë Superiore, duke shmangur në këtë mënyrë një gjykim amator dhe të njëanshëm.

Gjithashtu, ky takim do të transmetohet direkt në RTSH. U jemi shumë mirënjohës televizionit publik, i cili merr përsipër transmetimin e ndeshjeve të rëndësishme, në mënyrë që gjithçka të jetë transparente për publikun. Marrin fitoren në Elbasan dhe festojmë”, shkruhet në komunikatën e Tomorit.

Sot është zhvilluar mbledhja e radhës në Këshillin Bashkiak dhe pas akuzave pa fund kohët e fundit, pritej me interes çfarë do prodhonte kjo mbledhje.

Në pak fjalë: asgjë për futbollin! Asnjë pikë në rendin e ditës nuk përfshinte diskutimin për procesin e privatizimit të Tomorit.

Me sa duket, kaq e pati edhe kjo “shashkë”, si shumë të tjera në Berat, aty ku futbolli është në koma dhe sportet e tjera nuk ekzistojnë fare.

Nënkryetarja e Këshillit Bashkiak Nikoleta Manka deklaron thatë: “Nuk i di arsyet, nëse janë tërhequr përfundimisht nga privatizimi i klubit, apo përkohësisht për faktin se mungon kuorumi i votave“.

Ndërkaq, kryetari i grupit socialist në Këshillin Bashkiak, Alban Gjoka, deklaron: “Ne e prisnim me interes të madh këtë mbledhje dhe ishim përgatitur për debat, duke paraqitur fakte për keqmenaxhimin e klubit të futbollit dhe duke dhënë prova pse po luhet me privatizimin. Bashkia në ikje nuk ka të drejtë të kërkojë privatizimin, që do të kryhet nga Bashkia e ardhshme“.

EDI SPAHIU

Klubi i ka dhënë lejekalimin dhe mbrojtësi është larguar. 25-vjeçari ka luajtur 17 ndeshje këtë sezon me Tomorin, 16 si titullar. Po ashtu, boshnjaku ka shënuar dhe dy gola, duke qenë një nga lojtarët më të mirë për skuadrën beratase.

Sot ka ardhur përgjigjja nga Alban Pambuku, drejtor i sporteve në Bashkinë e Beratit, i cili ka akuzuar për rrënim të sportit në Berat pikërisht Partinë Socialiste dhe ata njerëz që nuk duan privatizimin e klubit, për arsye të ndryshme.

Ja deklarata e plotë e zotit Pambuku, si përfaqësues i klubit Tomori:

“Futboll Klub Tomori është i indinjuar nga deklaratat e fundit të këshilltarëve të Partisë Socialiste në lidhje me dezinformimin e qytetarëve beratas, me lojërat e fjalëve: “shitje aksionesh apo privatizim”. Ne si klub duam të theksojmë se kemi të bëjmë vetëm me një hap të parë për sa i përket vlerësimit të aksioneve në transparencë të plotë për opinionin e gjerë publik. Ky vendim nuk është aspak i nxituar siç theksohet në deklaratat e tyre, por çdo gjë është në kohën e duhur, pasi klubi ndodhet në një periudhë që ka shlyer të gjitha borxhet dhe detyrimet e akumuluara që nga viti 2010-2015. Por, pa harruar që janë edhe dy kërkesa nga investitorë të mëdhenj, siç  janë “Salillari Ltd” dhe “Mela Holding Grup”. Gjë që na shtyn edhe më shumë për t’i hapur rrugën këtij ngërçi shumë-vjeçar, për t’i dhënë Tomorit dhe qytetarëve të Beratit atë që meritojnë. Pa menduar për grada apo virtyte siç shprehen ata që: “do ta bëjmë në kur të vijmë”, por në qoftëse do të vijnë. Deri në atë kohë sipas llogarisë së tyre klubi dhe qytetarët do të presin tekën e radhës të këshilltarëve socialistë, të cilët mendojnë se janë pronarët e këtij qyteti.

Deklaratat e tyre janë tepër amatoreske dhe histerike. Por është edhe qesharake kur historia e themelimit të Tomorit në mendjen tuaj daton në vitin 1925, dhe jo 1923, ashtu siç është në realitet. Pra, Tomori nuk është 93-vjet klub, por mbi 95 vjet histori dhe lavdi.

Duam të shpjegojmë disa nga pikat që paditurisht pretendojnë se është ashtu dhe flasin për mediokritet në moton “shpif, shpif, se diçka do të ngel”.

Ata thonë se ngritja në Kategorinë e Parë është detyrë, ndërkohë që kur është marrë klubi, Tomori ishte në Kategorinë e Dytë dhe në mjerim. Siç dihet, klubi ka pasur edhe 250 milion lekë borxhe të akumuluara dhe kamatë-vonesa. Ku ka qenë kjo detyrë në atë kohë?

Akuzojnë se premtuam rregullimin e stadiumit e vjetër dhe se do të mbrojnë me fanatizëm tjetërsimin e këtij aseti. Duam të theksojmë se nuk mundemi të lëvrojmë asnjë projekt në atë ambient, vetëm të kryejmë stërvitje në ato kushte të mjera, pasi Kryeministri i vendit na ka hequr çdo të drejtë me arsyen se është bërë projekti “Qyteti i fëmijëve”, që do të jetë një qendër multifunksionale kreativiteti për fëmijët e qytetit.  Në këtë mënyrë nuk kuptojmë se këta këshilltarë të këtij subjekti politik nuk dinë se çfarë po ndodh dhe shprehen në hartimet e tyre të radhës.

Kërcënojnë se do të kërkojnë informacion, pa e ditur se informacioni tashmë është i hapur në çdo media vizive apo të shkruar dhe për këtë jemi krenar, pasi që nuk kemi asnjë lloji detyrimi financiar ndaj FSHF, ISSSH, SHAUK, OSHEE, TATIMEVE,dhe çdo operatori të tretë.

Mendojnë se futbolli është “barrë” që duhet hequr qafe dhe nuk e shikojnë si sportin e një qyteti. Ndërsa mendojnë që këtë “barrë” ta heqin qafe (me ardhjen e tyre), duke mos e parë si një zgjidhje të shumëpritur nga qytetarët.

Akuzojnë për organikë të fryrë. Themi se është po e njëjta organikë që ka qenë dikur, edhe pse nga kërkesat e FSHF-së ne kemi shumë mangësi.

Për mos t’u zgjatur më tepër, Sporti është i qytetarëve dhe i tifozerisë. Tifozeri kjo që për gustot tuaja nuk është adapte, siç keni theksuar, por është ajo pjesë e shoqërisë që e ka ndjekur Tomorin në ditë të mirë dhe të keqe. Ndaj, ju themi që të mbani larg duart  e përlyera me politikë nga sporti i këtij qyteti.

Kryetari i grupit socialist në Këshillin Bashkiak të Beratit, Alban Gjoka, ka folur për “SportEkpres” në lidhje me këtë çështje, duke hedhur akuza të forta në drejtim të bashkisë, për shkak të mungesës totale të transparencës.

– Zoti Alban, prononcimi juaj a është një sinjal i luftës së ndezur politike në kuadër të zgjedhjeve të ardhshme për Bashkinë e Beratit?

– Jo, nuk është aspak e vërtetë, përkundrazi ne si forcë politike jemi më e madhja në qytetin e Beratit dhe me votat tona kishim zgjedhur drejtuesit në ikje të Bashkisë së qytetit. Jo vetëm që kemi të drejtën e ligjshme të reagojmë pas “mizanskenave” dhe akuzave boshe të drejtuesve të Bashkisë dhe disa zyrtarëve që vetëm lidhje me futbollin nuk kanë, por edhe na lind e drejta që të përgënjeshtrojmë çdo akuzë false në lidhje me të ashtuquajturin “refuzim” të procesit të  privatizimit të Tomorit nga ana e grupit socialist në Këshillin Bashkiak të qytetit, në mbledhjen e fundit të tij. Për parantezë, më duhet të them se ne jemi forca më e madhe politike në Berat, që kemi falur apo dhuruar Bashkinë në kuadrin e një koalicioni, por që forca politike në ikje nga skena në qytetin tonë, po kërkojnë të bëjnë politikë dhe të fitojnë padrejtësisht vota në kurrizin tonë dhe të futbollit sikur ta kishin pronë të vetën.

– Më konkretisht, cili ka qenë qëndrimi i arsyetuar i grupit socialist dhe a jeni ju kundër privatizimit të klubit, sikundër ju kanë akuzuar?

– Po shpjegohem shumë thjesht për qëndrimin tonë zyrtar, ku më së shumti kjo i vlen opinionit futbolldashës dhe qytetar beratas, që jo vetëm nuk e kanë ndjekur të plotë në median vizive lokale qëndrimin tonë zyrtar, por më keq akoma, ju serviren nga aparatçikë të rëndomtë në media disa deklarata që shtrembërojnë të vërtetën. Në mënyrë të beftë dhe pa asnjë paralajmërim apo mbledhje në komisionet përkatëse përpara mbledhjes së Këshillit, na është servirur në mbledhje një material vërtetë amatoresk për nga mënyra e formulimit, ku na kërkohej që të votonim për hapjen e procedurave të privatizimit, në vend që të kishte një argumentim të hollësishëm dhe shumë profesional. Për të mos u zgjatur më shumë në këto detaje, më duhet të them se grupi socialist e cilësoi si shumë të nxituar dhe tendencioz këtë veprim të Bashkisë, ndaj ka vendosur që të abstenojë, duke mos u dhënë mundësinë atyre personave që kërkojnë nxitimthi që të çojnë klubin për interesa të dyshimta drejt privatizimit. Kjo u duk qartë nga mënyra nervoze me të cilën u shfaqën drejtuesit dhe sejmenët e tyre menjëherë pas votimit që nuk mori votat e nevojshme.

– Po pse grupi socialist akuzohet se është kundër privatizimit?

– E ritheksoj se gjithçka është gatuar në mënyrë tendencioze nga njerëz që kërkojnë më shumë se sa t’i shërbejnë futbollit beratas, duan që ta heqin qafe atë dhe pse jo dhe të përfitojnë prej tij për interesa të caktuara. Pse pikërisht në këtë moment kërkohet privatizimi, në një kohë që këta zotërinjtë në ikje kishin kohë një mandat për të kryer procesin e privatizimit, aq më shumë kur e kishin të gjithë mbështetjen tonë si grup, sepse ju dhamë kryetarin por i votonim edhe buxhetin pa asnjë problem, edhe pse nën drejtimin e tyre ata quajnë sukses ngjitjen në Kategorinë e Parë që është një detyrë për klubin dhe emrin e Tomorit? Kishin një buxhet që ishte i taksapaguesve beratas, por me klubin Bashkia dhe forca e tyre politike janë sjellë sikur ta kishin pronë private, mjafton të shikosh punësimet apo borderonë e klubit, ku paguheshin 37 persona në total, a thua se ishte pronë private. Së fundi, vijnë në mbledhje dhe na thonë që ka dy kërkesa për privatizim, por në material nuk u thonë asnjë detaj këshilltarëve. Ne s’mund të votonim symbyllur këtë dëshirë të drejtuesve në ikje të Bashkisë Berat. Ne jemi shumë të qartë për sa i përket futbollit në Berat dhe nuk do të lejojmë as tjetërsimin e ish-stadiumit të vjetër që këta zotërinj premtuan shumë, por e lanë në mëshirë të fatit, dhe as të pengojmë zhvillimin e futbollit, që procesin e privatizimit do ta kalojmë mbi bazën e ligjit dhe nga Bashkia e mandatit të ri që do të drejtohet nga PS.

– Po si do të procedoni në rast se vjen sërish një kërkesë në mbledhjen e radhës?

– Besoj se isha shumë i qartë pak më sipër, klubi shkon në privatizim mandatin tjetër. Në mbledhjen e radhës do të jetë radha jonë që të kërkojmë transparencën financiare të klubit të futbollit dhe çdo investimi që është kryer në infrastrukturën e futbollit në këtë mandat. Do të kërkojmë llogari dhe do të nxjerrim para përgjegjësisë të gjithë zyrtarët që kanë abuzuar me lekët e taksapaguesve beratas, sepse janë paguar persona jashtë çdo kriteri në borderonë e klubit dhe lekët e buxhetit vjetor nuk janë investuar për ekipet e moshave. Për fat të keq, paguhen vetëm trajnerët nga ana e klubit, ndërsa futbollistët dhe prindërit e tyre paguajnë dietat e udhëtimit për ndeshjet zyrtare. Kemi shumë materiale dhe do të kërkojmë llogari deri në një, pasi nuk mund të lejojmë në këtë fund mandati që persona mediokër që për një devotshmëri ndaj kryetarit apo forcës politike që drejton Bashkinë, të vazhdojnë të dëmtojnë imazhin e një klubi me histori 93-vjecare, duke na dëmtuar rëndë si në mungesën e organizimit në ndeshjen me Apoloninë, ashtu edhe pse nuk e nisën skuadrën në ndeshjen në Ballsh, a thua se Tomori është pronë e tyre dhe e forcës politike që ata përfaqësojnë.

FLET NIKOLETA MANKA (Kryetare e Këshillit Bashkiak dhe përfaqësuese e PS)

“Unë nuk do të flas më shumë se sa atë çka kam konstatuar me keqardhje gjatë procedurës së mbledhjes dhe më konkretisht për pikën që u abstenua me të drejtë nga ana e këshilltarëve socialistë që është edhe grupi më i madh në Këshillin Bashkiak. Në fillim më bëri përshtypje materiali i formuluar shumë cekët dhe pa asnjë argument konkret nga ana e përpiluesve që e sollën me shumë nxitim për miratim në Këshill. Këta flasin për dy firma që kërkojnë të privatizojnë klubin, por harrojnë se asnjë firmë nuk kishte një plan biznesi dhe për më shumë kur pretendohet për një firmë italiane. Është shumë e rëndësishme që të ketë seriozitet dhe jo se do një tifoz që punon në këtë firmë apo edhe vetë pronari, pasi në Itali dhe kudo në botë nuk të jep njeri në privatizim një klub pa sjellë garanci financiare dhe plan biznesi. Për të ardhur tek procedura, ku ligji e thotë qartë se tjetërsimi i pronës publike kalon me miratimin e 3/5 të votës së anëtarëve të Këshillit, ndërsa këta nxitonin me numër të thjeshtë votash, a thua se po privatizonin ndonjë objekt të rëndomtë dhe jo një klub futbolli. Qëndrimi i këshilltarëve të PS ka qenë shumë i drejtë e parimor dhe mbi të gjitha në mbështetje dhe bazuar tërësisht në ligj. Ata që kërkuan të bëjnë një privatizim të dyshimtë nëpërmjet hapjes nxitimthi të një procedure, bëjnë mirë të heshtin dhe t’u kërkojnë falje kolegëve të tyre socialistë dhe qytetarëve beratas, sepse kërkojnë mesa kuptohet qartë që të mbulojnë dështimin e tyre me futbollin dhe sportin në përgjithësi në fund të mandatit të tyre”.

 EDI SPAHIU

Ekipi beratas do të udhëtojë në Fier për t’u ndeshur me Apoloninë dhe duke marrë parasysh rëndësinë e madhe të kësaj ndeshjeje, Bashkia e Beratit ka vendosur në dispozicion autobusë falas për tifozët. Kjo gjë u njoftua dhe nga faqja zyrtare e klubit në “Facebook”, e cila shkroi:

Futboll Klub Tomori | Njoftim
Njoftojmë të gjithë tifozët se Bashkia Berat do të vendos në dispozicion të tyre, 3 deri në 4 autobusë për transfertën ndaj Apolonisë. Kjo ndeshje do të luhet të shtunën në orën 15:00 në stadiumin “Loni Papuçiu” të Fierit.

Ne dëshirojmë që të gjithë tifozët e zjarrtë të Tomorit të jenë të pranishëm në stadium për të mbështetur ekipin në këtë përballje të rëndësishme. Autobusët falas do të nisen nga stadiumi “Tomori”. Për informacione më të detajuara do t’iu njoftojmë në vazhdim.

Nuk është thjesht një ndeshje futbolli, pasi tensioni  i lartë që shkaktoi ndeshja më e fundit midis tyre në Berat solli edhe dënimin ekstrem të Tomorit, që fill pas këtij takimi është “masakruar” nga ana e Komisionit të Disiplinës, duke u penalizuar aq shumë sa i janë zbritur edhe plot 6 pikë pas humbjes në tavolinë me Apoloninë (fitore 3-2 në fushë) dhe mosparaqitjes në ndeshjen me Bylisin në transfertë.

Ndaj dhe ballafaqimi me Apoloninë pritet me shumë interes, për të mos thënë se në fushën e lojës Tomori do të ketë një motivim ekstra me këtë rast, për të kërkuar pse jo dhe revanshin ndaj skuadrës fierake.

Për takimin e radhës skuadra beratase është e privuar nga mesfushori me tipare sulmuese Aldo Dervishi, ndërsa si një lajm pozitiv që inkurajon stafin teknik dhe vetë skuadrën është rikthimi pas pezullimit 1-javor i dy futbollistëve titullarë si qendërmbrojtësi  Beci dhe sulmuesit Sharavolli, që rrisin sigurinë në prapavijë dhe forcën goditëse.

Për momentin Tomori stërvitet intensivisht dhe jo rastësisht ka zgjedhur që të heshtë përpara këtij takimi, pasi siç shprehet Genaldo Sharavolli: “Është më mirë për të gjithë që skuadra të flasë më shumë në fushën e lojës ditën e shtunë, sesa nëpër media.

EDI SPAHIU

Pas këtij vendimi ka ardhur reagimi nga klubi, që nëpermjet një postimi në llogarinë zyrtare në “facebook”, e ka cilësuar vendimin e këshilltarëve të majtë si një hap pas për futbollin dhe konfirmoi se çështja e privatizimit do të ridërgohet për votim.

REAGIMI I KLUBIT TË TOMORIT

Futboll Klub Tomori | Privatizimi

Në vend që të bëjmë hapa përpara në lidhje me futbollin vazhdojmë e kthehemi sërish prapa në kohë. Sot ishte momenti që t’i hapnim rrugën privatizimit, ku LSI dhe PD ishin (pro) kësaj çështjeje, teksa është për të ardhur keq indiferenca e PS dhe mos votimi i tyre pozitivisht për këtë situatë. Bashkia Berat do ta ridërgojë sërish këtë çështje në Këshillin Bashkiak, pasi jemi në kohën që kemi shlyer të gjitha detyrimet e akumuluar dhe jemi gati për hapin e madh në futboll

Në mbledhjen e Këshillit Bashkiak kanë qenë këshilltarët e Partisë Socialiste ata që kanë abstenuar dhe kështu gjithçka mbetet pezull. Ndoshta në mbledhjen e radhë do të ketë të tjera zhvillime, por për momentin gjithçka është në ajër.

“Të gjitha pikat e rendit të ditës u miratuan, me përjashtim të pikës 14, për të cilën kërkohej një shumicë e cilësuar votash, gjë që nuk arrit ( 16 pro, 9 abstenuan), pasi këshilltarët e PS-së abstenuan, duke penguar nisjen e procedurave për shitjen e aksioneve të Klubit të Tomorit”, thuhet në njoftimin e Bashkisë.

Kompania “Mela Holding Group”, e drejtuar nga Marko Saljihu, kishte shfaqur interesimin e saj për të blerë shumicën e aksioneve të Tomorit. Vetë kreu i kësaj kompania kishte zbarkuar në Berat dhe ka zhvilluar edhe një takim me drejtuesit e klubit dhe Bashkisë.

I dënuar, me humbje në tavolinë e heqje pikësh, Tomori e priti në Ballsh Elbasanin, me shpresën se do të harronte hallet e javëve të fundit me një fitore.

Që në fillim Tomori e niste pa dy titullarë për gafat e veta, sepse Sharavolli e Beci ishin të pezulluar dhe fare mirë e kryenin pezullimin në Ballsh, por Tomori zgjodhi të mos shkonte fare, duke harruar që pezullimi i lojtarëve të rëndësishëm nuk shlyhej në ndeshjen e humbur në tavolinë. Pa Sharavollin e Becin, ndryshimet në formacion ishin të detyruara, ndërkohë që në fushë beratasit bënë gjithçka për të marrë tre pikët, por në fund ishin me fat që nuk humbën.

Edhe pse dominues në lojë e raste, lojtarët e Tomorit gabuan shumë para portës kundërshtare, por ndoshta nuk e prisnin që Elbasani të shënonte shumë shpejt, me Nertil Hoxhaj që në minutën e nëntë.

Në fundin emocionues të ndeshjes miqtë në tre raste kundërsulmi mund të kishin shënuar, por portieri Kaloshi eviton një gol të sigurt të Nurit në minutën e 80-të, për të ardhur tek goli i barazimit të beratasve, ku pas goditjes nga këndi qëndërmbrojtësi Mujkic në minutën e 86-të realizoi me kokë fare pranë portës.

Barazim me vlerë duke parë si shkuan gjërat, por Tomori është tashmë në ankth, sepse renditja është bërë dramatike.

DYSHIMI – Te Tomori dyshojnë se mbrojtësi elbasanas Jurgen Lleshi është aktivizuar duke qenë i pezulluar. Lleshi mori karton të verdhë javën e shkuar dhe sipas beratasve është i katërti sezonal, por me siguri këtu ka një paqartësi, sepse në faqen zyrtare të FSHF-së rezulton se Jurgen Lleshi ka 5 kartonë të verdhë dhe e shleu pezullimin dy javë më parë.

Për këtë arsye, Tomori nuk ka shpresa për fitore në tavolinë, edhe pse pritet që zyrtarë beratas të shkojnë në FSHF për të verifikuar protokollet e ndeshjeve të Elbasanit.

TOMORI – ELBASANI 1-1

Shënues: Mujkic 86′ / Hoxhaj 9′

Tomori: Kaloshi, Dervishi, Dobra, Dore, M. Duka, Dyca, Galica (Kumani 53′) Koleci (Gjonaj 70′) Mujkic, Oaja, Shaqe (Mersini 38′) Tr: E. Fani

Elbasani: Moli, E. Duka, Ferrati, Hidaj, Hoxhaj, Koldashi ( Cungu 40′ ) J. Lleshi, Mici (Jaupaj 79′) Nuri (A. Lleshi 90′) Suvaria, Ukaj. Tr: E. Kotorri

Karton i verdhë: E. Duka 85′

Gjyqtarë: B. Ziri, E. Veseli, E. Kushi ( F. Krujë )

Pas ndeshjes

1. Pambuku (Zyrtar i sporteve në Bashkinë Berat): Kemi prodhuar shumë lojë dhe të vjen keq që na mungoi fitorja në këtë përballje, pasi nuk na deshi aspak fati, ashtu sikur shpreh keqardhjen që vec erës së fortë në këtë takim, mund të them se kemi pasur edhe gjykimin kundër, dhe FSHF vazhdon që të na sjellë gjyqtarë që me gjykimin e tyre tendencioz vazhdojnë të dëmtojnë interesat e Tomorit, që gjithsesi nuk do të jetë skuadra që rrezikon rënien na kategoria, pasi skuadra jonë ka shumë vlera dhe është më lart në të gjitha drejtimet se katër skuadrat e tjera të pesëshes dytë në grupin ku ne bëjmë pjesë.
2. Kotorri (Trajner i Elbasanit): Jemi shumë të kënaqur me këtë barazim që na jep akoma më shumë shpresë për qëndrimin në kategori, por më së shumti ky rezultat pozitiv në transfertë është një hap i madh për moralin e skuadrës në fazën e tretë, ku ne do të rivalizojmë fort me Tomorin dhe Turbinën. Për ndeshjen e sotme, mund të them se vërtetë Tomori na vuri në vështirësi duke krijuar epërsi dhe raste për shënim, por më parë se të vinte barazimi ne mund të kishim mbyllur ndeshjen me golin e sigurisë, por meritë në këtë barazim ka padyshim e gjithë skuadra dhe në veçanti portieri ynë Moli në një formë të shkëlqyer.

Luhet në fushë asnjanëse për shkak të dënimit të fushës dhe përballja e radhës ndaj Elbasanit është një finale e vërtetë, sepse ngjarjet e fundit kanë bërë që Tomori të humbasë pikë në fushë e jashtë saj, duke qenë tashmë rrezikshëm pranë fundit të tabelës.

Gjithsesi, arritja e objektivit minimal sezonal është e sigurt, sipas mesfushorit Endri Mersini. “Pavarësisht se do të luajmë në një fushë asnjanëse si ajo e Ballshit, unë dhe gjithë skuadra jemi të bindur se me vlerat dhe përbërjen cilësore që ne kemi aktualisht, as që nuk do ta diskutojmë as fitoren ndaj Elbasanit dhe po kështu as mbijetesën në Kategorinë e Parë”, shprehet Mersini, i cili pas rikuperimit të tij është duke i qëndruar pranë skuadrës dhe motivuar në maksimum për fitoren e mundshme përballë Elbasanit në fushën asnjanëse të Ballshit këtë fundjavë.

EDI SPAHIU

Javën e 17-të beratasit nuk udhëtuan në Ballsh dhe e humbën në tavolinë 0-3 ndeshjen me Bylisin, por edhe iu zbritën 3 pikë në renditje. Tashmë Tomori ka 16 pikë dhe renditet në vendin e 8-të, ndërsa nesër përballet me Elbasanin në stadiumin “Adush Muça” të Ballshit.

Por duke qenë se dy trajnerët e skuadrës beratase, Dule dhe Paja, ishin objekt i dënimeve, mbetet për t’u mësuar se kush do ta drejtojë ekipin beratas kundër verdhebluve. Përgjegjësi i sporteve në Bashkinë e Beratit, Alban Pambuku, deklaron për SportEkspres.com se do të jetë ai që do ta drejtojë skuadrën në Ballsh.

Ndërkohë, trajneri Santiljano Dule deklaron se nesër në pankinë do të jetë Thoma Fani, ish-futbollist i Tomorit në periudhën 1996-2010, aktualisht pjesë e stafit të beratasve. Gjithsesi, nesër në “Adush Muça” do të mësohet kush do ta drejtojë zyrtarisht Tomorin kundër Elbasanit.

AGRON KAJA

Futboll Klub Tomori | Opinioni ynë
Vendimet e Komisionit të Disiplinës (sot) treguan dy standarte kur hidhen shishe me uji në fushën e lojës. TURP!!! Pse vetëm ne si të njerkës?!

VENDIMI!
Ishim në dijeni për atë çfarë përcakton rregullorja në rast se një ekip nuk paraqitet në njërën prej ndeshjeve të kampionatit. Ndaj, lajmi për humbjen në tavolinë 0-3 dhe zbritjen e 3 pikëve nga klasifikimi nuk përbënë diçka të re për klubin tonë. Ne i treguam FSHF-së që jemi të gatshëm të sakrifikojmë 9 pikë, por jo të na i rrëmbeni ato me “hajdutëri”. Kemi një skuadër që nuk tundohet nga asnjë prej ekipeve elitare, dhe jo më… Apolonisë. Na duhen vetëm 3 minuta për të mposhtur Apoloninë, qoftë në Berat, ashtu edhe në Fier.

RIKTHEHEMI NË FUSHË
Tomori do të rikthehet këtë fundjavë në fushën e blertë ndaj KF Elbasani, ku këtë herë jemi më të uritur se kurrë për të treguar më të mirën në fushën e lojës. Skuadra po përgatitet intensivisht dhe atmosfera është pozitive. Nuk na poshtërojnë dot disa pseudo-zyrtarë, arbitra apo edhe serbët bardhejeshil.

MIQËSORJA
Është mbyllur me fitoren e ballshiotëve 2-1 ndeshja miqësore ndaj Bylisit, ku autori i golit për skuadrën tonë ka qenë mesfushori Salvador Gjonaj. Kjo ndeshje u zhvillua në kuadër të ndeshjes së kontrollit.

Vendimet e Komisionit të Disiplinës

• KF “Iliria”, në bazë të Nenit 13 të KDS, paralajmerohet se në rast përsëritje të shkeljeve disipinore, do të jetë subjekt i ndëshkimeve qe parashikon Kodi i Disiplinës Sportive dhe rregulloret e tjera të FSHF.
• KF “Tomori”, për mos paraqitje në ndeshje me KF “Bylis”, në bazë të Nenit 55/1 të KDS, dënohet me humbjen e ndeshjes në tavolinë me rezultatin 3 me 0 dhe zbritjen e 3 (tre) pikëve nga klasifikimi.
• Zyrtari i KF “Maliqi”, Spartak Meraku, për sjellje jo sportive duke ofenduar zyrtaret e ndeshjes, në bazë të Nenit 49/2/a të KDS, dënohet me 8 (tetë) ndeshje pezullim nga aktiviteti. Në bazë të nenit 20 të KDS, zyrtari i ndalohet qëndrimi ne dhomat e zhveshjes dhe territorin përreth fushës.
• KF “Maliqi”, në bazë të Nenit 13 të KDS, paralajmerohet se në rast përsëritje në vonesat e lojës, do të jetë subjekt i ndëshkimeve qe parashikon Kodi i Disiplinës Sportive dhe rregulloret e tjera të FSHF
• Lojtari i KF “Tepelena”, Alekasander Beqiri, për dhunë ndaj lojtarit kundërshtar, në bazë të Nenit 48/1/e të KDS, dënohet me 4 (katër) ndeshje pezullim nga aktiviteti.
• Lojtari i KF “Këlcyra”, Sajmir Kule, për dhunë ndaj lojtarit kundërshtar, në bazë të Nenit 48/1/e të KDS, dënohet me 4 (katër) ndeshje pezullim nga aktiviteti.
• KF “Tepelena”, për dështim në përshmbushjen e përgjegjesive dhe ndërprerjen e përkohëshme ndeshjes, në bazë të Nenit 65/1 të KDS, dënohet me gjobë në masën 100.000 (njëqindmijë) lekë. Në aplikim të Nenit 136/1/b të KDS, gjoba paguhet në masën 20%.
• Lojtari i KF “Pogradeci” U-17, Jurgen Likollari , për dhunë ndaj lojtarit kundërshtar në lojë të ndaluar, në bazë të Nenit 48/1/e të KDS, dënohet me 10 (dhjetë) ndeshje pezullim nga aktiviteti.
• KF “Burreli” U-19, për mos paraqitje në ndeshje me KF “Shkodra” U-19, në bazë të Nenit 55/1 të KDS, dënohet me humbjen e ndeshjes në tavolinë me rezultatin 3 me 0 dhe zbritjen e 3 (tre) pikëve nga klasifikimi.
• Lojtari i KF “Butrinti” U-19, Rei Cipa, për sjellje jo sportive ndaj zyrtarit të ndeshjes, në bazë të nenit 49/1/a të KDS, dënohet me 4 (katër) ndeshje pezullim nga aktiviteti.
• KF “Bylis” U-19, për mos paraqitje në ndeshje me KF “Lushnja” U-19, në bazë të Nenit 55/1 të KDS, dënohet me humbjen e ndeshjes në tavolinë me rezultatin 3 me 0 dhe zbritjen e 3 (tre) pikëve nga klasifikimi.
• KF “Korabi” U-17, për sjellje të gabuar të spektatorëve të tij duke shkaktuar ndërprerjen e përkohëshme të lojës, në bazë te Nenit 66/1 të KDS, dënohet me gjobë në masën 100.000 (njëqindmijë) lekë. Në aplikim të Nenit 136/1/e të KDS, gjoba paguhet në masën 3%.
• Zyrtari i KF “Korabi” U-17, Bexhet Hysa, për protesta ndaj vendimeve të zyrtarit të ndeshjes, në bazë te Nenit 56/1 të KDS, dënohet me 2(dy) ndeshje pezullim nga aktiviteti.
• KF “Bylis” U-17, për mos paraqitje në ndeshje me KF “Lushnja” U-17, në bazë të Nenit 55/1 të KDS, dënohet me humbjen e ndeshjes në tavolinë me rezultatin 3 me 0 dhe zbritjen e 3 (tre) pikëve nga klasifikimi.
• Lojtari i KF “Republika” U-17, Klaus Tenko, për pështymje ndaj lojtarit kundërshtar, në bazë të Nenit 48/1/f të KDS, dënohet me 8 (tetë) pezullim nga aktiviteti.
• Zyrtari i KF “Republika” U-15, Matias Qirinxhi, për sjellje jo sportive duke ofenduar zyrtaret e ndeshjes, në bazë të Nenit 49/2/a të KDS, dënohet me 8 (tetë) ndeshje pezullim nga aktiviteti. Në bazë të nenit 20 të KDS, zyrtari i ndalohet qëndrimi ne dhomat e zhveshjes dhe territorin përreth fushës.
• Pranimin e kërkesës së lojtarit të KF “Naftëtari”,Egland Lamaj , dhe pezullimin e pjesës së mbetur të dënimit. Në bazë të Nenit 33/4 të KDS, lojtari Egland Lamaj vendoset në provë për një periudhë 6 mujore.si të pa bazuar në KDS dhe Rregulloret e tjera të FSHF.
• Pranimin e kërkesës së lojtarit të KF “Partizani” U-17 ,Brajan Marku, dhe pezullimin e pjesës së mbetur të dënimit. Në bazë të Nenit 33/4 të KDS, lojtari Brajan Marku vendoset në provë për një periudhë 6 mujore.si të pa bazuar në KDS dhe Rregulloret e tjera të FSHF.

Duke qenë se fusha e Tomorit është dënuar, beratasit do të spostohen në Ballsh, si për të kërkuar falje që nuk shkuan javën e shkuar.

TOMORI – BYLIS DO TE LUHET… PËR QEJF! – Bylisi doli kot në fushë javën e shkuar, sepse Tomori nuk u paraqit fare, duke i prishur punë në një farë mënyre si vetes, ashtu edhe kundërshtarit.

Tani palët kanë rënë dakord që të ndeshen, por jo për pikë, sepse ato i mori Bylisi. Ndeshja do të luhet, por thjesht si miqësore, në Ballsh.

Për këtë miqësore trajneri Santiliano Dule komenton: “Konfirmoj që ndeshjen e radhës në kampionat ndaj Elbasanit që do ta zhvillojmë në Ballsh, dhe pse si mundësi kanë qenë edhe fushat e Kuçovës dhe Çorovodës. Po kështu, ditën e mërkurë do të luajmë miqësoren me Bylisin në Berat, si një mundësi për të rikuperuar pushimin e fundjavës së kaluar në kampionat, dhe në këtë rast testojmë skuadrën përpara ndeshjes me Elbasanin”.

EDI SPAHIU

Tashmë çështja do të shkojë në CAS, të paktën kështu mendojnë në Berat për momentin. Kryebashkiaku Petrit Sinaj, në një lidhje direkte me emisionin “Kampionët” në Vizion Plus ka kërkuar garanci nga FSHF për garën, ndryshe do të bojkotojnë kampionatin.

Problemet në ndeshjen me Apoloninë nuk mohohen, por gjithçka sipas tyre ka ndodhur për shkak të gjykimit të arbitrit Elidon Hala. Ky i fundit ka qenë i padëshiruar në Berat dhe sipas Sinajt ai qëllimisht ishte vendosur të gjykonte takimin Tomori-Apolonia.

Në lidhje me dënimin e dhënë ka folur edhe Alban Pambuku, drejtor i sporteve në Bashkinë e Beratit. “Është një gjë krejtësisht absurde. Edhe deklaratat e gjyqtarëve janë bërë me qëllim tendencioz, që të dënohemi ne. Kemi të gjitha pamjet e sigurisë brenda dhomave të zhveshjes, ku duket se askush nuk është futur te gjyqtarët për t’i goditur. Nuk e kuptojmë se cila është arsyeja përse e kanë shpikur një gjë të tillë bluzat e zeza”, është shprehur Pambuku.

Më tej ai ka treguar se ka shumë donatorë të gatshëm në Berat, të cilët dëshirojnë të paguajnë 48 mijë eurot që duhen për ta apeluar vendimin e Komisionit të apelit në CAS. Pambuku veçon edhe një takim të delegatit të ndeshjes, Petrit Haxhia, me presidentin e Apolonisë, Koço Kokëdhima.

“Mua më lind dyshimi, çfarë diskutoi Petrit Haxhia me Kokëdhimën. Mos vallë i tha presidentit të Apolonisë, “qetësohu, se do ta rregullojmë këtë punë”. Ky është dyshimi ynë, që u vërtetua pas hartimit që bënë gjyqtarët që solli dënimin tonë”.

Bojkoti vetëm për një ndeshje është një absurditet tipik shqiptar, sepse nëse vendoset për bojkot, çohet lufta deri në fund dhe këtë gjë shumica e tifozëve e kanë thënë troç, duke dalë kundër vendimit të klubit.

Arbitri i ndeshjes në Ballsh, Indrit Myrtja, ka zbatuar rregulloren, duke pritur një orë për beratasit, që as që kishin njoftuar ndokënd zyrtarisht se nuk do të udhëtonin për në Ballsh.

Natyrisht, humbja në tavolinë 3-0 është sipas rregullores, ashtu si ndonjë gjobë, por në Berat i kanë bërë llogaritë, pasi fundja gjoba vlen aq sa shpenzimet për udhëtimin.

Në Ballsh ka pasur zhgënjim, për faktin se prisnin të luanin dhe të fitonin në fushë, por ndërkohë lajmi se Lushnja mundi Besën ishte surpriza më e bukur e ditës, sepse kreu është gjithnjë e më shumë i blinduar.

Trajeri i Bylisit, Veljko Dovexhan, pas përfundimit të ndeshjes së Lushnjës deklaroi: “Prisnim të luanim, na duhej edhe për të mbajtur ekipin në formë, por jam dyfish i kënaqur ditën e sotme, pasi jo vetëm që formalisht presim një fitore në tavolinë, të cilën nuk e diskutoja që do ta meritonim edhe në fushë, por na kënaq humbja e rivalit tonë Besa në fushën e Lushnjës. Është një rezultat më shumë se i favorshëm për Bylisin,  edhe një shenjë pozitive për një garë korrekte nga Lushnja. Tani do të punojmë fort gjatë gjithë javës, me qëllim që mungesa e ndeshjes me Tomorin të mos na ulë përqendrimin dhe do të punojmë shumë që ndeshjen e fundit të fazës së dytë ndaj Orikumit ta mbyllim me fitore“.

EDI SPAHIU

DEKLARATA E TOMORIT

“Drejtues të Tomorit do të jenë të ftuar sonte në emisionin “E Hëna Sportive” në RTSH, në orën 18:30 për të diskutuar gjërësisht mbi çështjen e vendimit të Disiplinës dhe Apelit. Ende jo zyrtare, por mund të ketë edhe një lidhje direkte nga qyteti i Beratit me Presidentin e Klubit, Kryetari i Bashkisë së Beratit, Petrit Sinaj.

Na ndiqni, pasi kemi shumë për të thënë!

Sakaq, në orën 22:00 do të jemi të ftuar në emisionin “Kampionët”, i cili zhvillohet në “Vizion Plus”. Fakte dhe të vërteta mbi padrejtësinë që na është bërë. Dërgimi i ç’ështjes në KAS, etj…”, kështu shkruhej sot në faqen zyrtare të FK Tomori.

Megjithatë, protesta mbaron me ndeshjen në Ballsh, sepse Tomori, në mënyrë komike, shtrembëron kampionatin për një ndeshje dhe pastaj vendos të vijojë normalisht futbollin, sepse do ta vijojë luftën në CAS, të paktën me llafe.

Tomori ka njoftuar se do të nisë gjyqin me Komisionet Disiplinore të Federatës Shqiptare të Futbollit. “Klubi i Tomorit ka marrë vendim që çështjen në lidhje me vendimin e Komisionit të Disiplinës dhe atë të Apelit t’a dërgojë në Gjykatën e Arbitrazhit të Lozanës. Kemi hyrë në bisedime me një kompani avokatie shumë të njohur dhe premtojmë që do të dalim të fituar në shumë aspekte të tjera. Në fundjavë rikthehemi në fushë...”, thuhet në njoftimin e beratasve. 

Mbetet për t’u parë nëse do të ndodhë diçka e tillë, pasi çështje të tilla kërkojnë shuma të konsiderueshme në aspektin financiar. Më parë Tirana e Flamurtari janë tërhequr, duke pasur parasysh se nisja e procedurave gjyqësore kushton goxha. Tomori, ndoshta për faktin se flet në tym, nuk tregon as emrin e kompanisë shumë të njohur të avokatisë, a thua se është sekret shtetëror.

Ndoshta në Berat harrojnë se vendimi i komisioneve të Disiplinës dhe Apelit i përkasin futbollit vendas dhe nuk ka si CAS të mblidhet për një ndeshje të humbur në tavolinë, kur nuk ka asnjë fakt, pasi dihet që arbitrat dhe zyrtarët e ndeshjes mund të raportojnë çfarë të duan, edhe dhunë fizike, dhe Tomori nuk i kundërshton dot në asnjë mënyrë, duke qenë se është fjala e Tomorit kundër FSHF-së.

E fundit: CAS thjesht për t’u mbledhur për Tomorin jo vetëm që ka shpenzime të mëdha, por do të gjente ndonjë datë nga fundi i vitit ose në 2020. A ka më ide tragjikomike se kaq? Të kërkosh në tavolinë 3 pikë, dhe të shpresosh t’i marrësh në 2020!

ÇFARË VENDOSI DISIPLINA – KF “Tomori 1923”, për dështim në përmbushjen e përgjegjësive për organizimin e ndeshjes duke mos zbatuar rregullat e sigurisë dhe duke mos garantuar sigurinë e zyrtarëve të ndeshjes dhe lojtarëve kundërshtarë, si dhe për sjelljen e gabuar të spektatorëve duke përdorur shprehje diskriminuese e hedhur sende brenda rrethimit te fushes duke shkatuar akte dhune, në bazë të nenit 57, 64/1/b 64/1/c), 65/1, 65/2, dhe 66/3/b) të KDS dënohet me humbjen e ndeshjes kundër F.K Apolonia në tavolinë me rezultatin 3-0, zhvillimin e 4 (katër) ndeshjeve në fushë asnjëanëse dhe pa spektatorë si dhe gjobë në masën 200.000 (dyqindmijë) Lekë. Në aplikim të nenit 136/1/a), gjoba të aplikohet në masën 50%.

Zyrtari i KF “Tomori 1923”, Arben Paja, për sjellje jo sportive ndaj zyrtarëve të ndeshjes, në bazë të Nenit 49/2/a të KDS, dënohet me 8 (tetë) ndeshje pezulim nga aktiviteti.

Zyrtari i KF “Tomori 1923”, Santiljano Dule, për sjellje jo sportive ndaj zyrtarëve të ndeshjes, në bazë të Nenit 49/2/a të KDS, dënohet me 8 (tetë) ndeshje pezulim nga aktiviteti

Lagunarët shënuan nga një gol për pjesë. Alushi gjeti golin e avantazhit në minutën e 12-të, ndërsa Fatjon Sefa vulosi fitoren e ekipit vendas 11-të minuta përpara fundit të ndeshjes. Kjo fitore e ngjit Lushnjen në vendin e katërt me 27 pikë, ndërsa Besa e Maganit mbetet në vendin e dytë me 32 pikë (7 larg Bylisit kryesues.)

Ndeshja tjetër mes Bylisit dhe Tomorit nuk u zhvillua, pasi ekipi beratas nuk u paraqit, ashtu siç e kishte paralajmëruar më parë një gjë të tillë. Ekipi ballshiot do të fitojë ndeshjen në tavolinë me shumë mundësi, çka do e ngjiste në kuotën e 40 pikëve.

Lushnja-Besa 2-0
(Alushi 12’, Sefa 79’)

“Futboll Klub Tomori, FKTProteston. Klubi jonë proteston vendimin e Komisionit të Disiplinës dhe të atyre që kurdisën dënimin tonë. Skuadra e Tomorit nuk do të paraqitet sot në Ballsh. Forca FKT, Tomori Proteston”, kështu shkruhet në rrjetin social Facebook, pikërisht në faqen zyrtare të FK Tomori.

Dy ditë më parë Komisioni i Apelit në FSHF la në fuqi vendimin e Komisionit të Displinës, i cili mes dënimeve të tjera i hoqi tri pikët Tomorit për fitoren e tij me Apoloninë në javën e 16-të. Tashmë do jenë trupat gjykuese në FSHF që do të vendosin për mosparaqitjen e Tomorit për ndeshjen sot me Bylisin në Ballsh.

Kjo humbje skuadrës fierake është komentuar edhe nga kundërshtarët e javës së shkuar, Tomori. Pas shumë polemikave gjatë gjithë javës, Tomori nuk ka ngurruar të ironizojë as sot me skuadrën e Apolonisë. Sapo u mbyll takimi mes Apolonisë dhe Orikut, klubi i Tomorit ironizoi me një postim në faqen e tyre zyrtare, duke shkruar:

“E kuptoni tani se çfarë skuadre ka Apolonia? Nuk ia kemi ne fajin që i kthyem rezultatin dhe kurdisën atë çorbën me pretendim që mund të ishin në 5-shen e parë. Ata janë skuadër tavoline dhe lëpirës të diktaturës. Zoti i ndëshkoi dhe do t’i rindëshkoi këta palaço. Sërish do luani me ne, do e shikojmë edhe forcën tuaj…”

Skuadra beratase u dënua me humbje të ndeshjes në tavolinë dhe katër ndeshje në fushë asnjëanëse për shkak të mospërmbushjes së përgjegjësive të  organizmit të ndeshjes dhe për sjelljen e gabuar të tifozëve.

Vendimet e Komisionit të Apelit në FSHF (15.02.2019)

Vendimi Nr.1
1. Lënien në fuqi të vendimit të Komsionit të Disiplinës datë 13.02.2019 (pika 6).
2. Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.

Vendimi Nr.2
1.Lënien në fuqi të vendimit të Komsionit të Disiplinës datë 13.02.2019 (pika 8).
2.Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.

Komisioni i Disiplinës (13.02.2019)
6. KF “Tomori 1923”, për dështim në përmbushjen e përgjegjësive për organizimin e ndeshjes duke mos zbatuar rregullat e sigurisë dhe duke mos garantuar sigurinë e zyrtarëve të ndeshjes dhe lojtarëve kundërshtarë, si dhe për sjelljen e gabuar të spektatorëve duke përdorur shprehje diskriminuese e hedhur sende brenda rrethimit te fushes duke shkatuar akte dhune, në bazë të nenit 57, 64/1/b 64/1/c), 65/1, 65/2, dhe 66/3/b) të KDS dënohet me humbjen e ndeshjes kundër F.K Apolonia në tavolinë me rezultatin 3-0, zhvillimin e 4 (katër) ndeshjeve në fushë asnjëanëse dhe pa spektatorë si dhe gjobë në masën 200.000 (dyqindmijë) Lekë. Në aplikim të nenit 136/1/a), gjoba të aplikohet në masën 50%.

8. Zyrtari i KF “Tomori 1923”, Santiljano Dule, për sjellje jo sportive ndaj zyrtarëve të ndeshjes, në bazë të Nenit 49/2/a të KDS, dënohet me 8 (tetë) ndeshje pezulim nga aktiviteti.

Është një sezon i zi në Berat, sepse klubi ka probleme pa fund, mjafton të kujtohen vonesat e pagave në fund të vitit të shkuar, apo kushtet skandaloze ku jetojnë futbollistët jabanxhinj dhe të huaj, në ambientet e stadiumit Tomori.

Megjithatë, ajo që ka ndodhur këtë radhë konsiderohet një padrejtësi e madhe në Berat, sepse prisnin ndonjë dënim fushe e shumta, por jo masa të tilla, duke qenë se gjithçka ndodhi nga tribunat, ashtu si në shumë ndeshje të tjera, edhe në Superiore, ku ka pasur arbitra të goditur, por asnjë vendim kaq drastik.

Trajneri i Tomorit, Santiliano Dule, i cili është dënuar për shumë javë që të mos e drejtojë skuadrën, flet për ngjarjen e fundit dhe për dënimin e tij, duke akuzuar hapur zyrtarët e ndeshjes, ndryshe nga klubi, që ka akuzuar FSHF-në.

– Dule, çfarë mund të thoni për ngjarjet e fundit dhe për dënimin e rëndë dhënë nga Komisioni i Disiplinës?

– Për të qenë sa më i qetë dhe për të artikuluar sa më mirë reagimin tim zyrtar, unë po dal pas 24 orësh për të qartësuar këdo në opinionin futbolldashës shqiptar, në lidhje me atë vendim sa skandaloz, aq edhe masakrues për mua dhe skuadrën e Tomorit, por edhe fyes për një qytet si Berati, që jeton me futbollin dhe reagon me të drejtë ndaj një poshtërimi të tillë si rasti më i fundit. Sot ka pasur një deklaratë zyrtare nga ana e klubit dhe presidencës, por kjo nuk do të thotë që edhe unë si trajner dhe viktimë e kësaj maskarade të mos jap prononcimin dhe qëndrimin tim.

– Më konkretisht Dule, çfarë kontestimi keni dhe si i argumentoni ju vendimet ekstreme apo maskaradë, siç e cilëson klubi.

– E nisim qysh nga dënimi më skandaloz, kur na zbriten tre pikë, edhe pse ndeshja është zhvilluar shumë korrekte në fushë dhe s’ka pasur asnjë element plotësues që të zbatohej rregullorja për ndryshimin e rezultatit. Ne kemi fituar një ndeshje me gjak dhe shumë sakrificë, edhe pse kemi luajtur ndaj Apolonisë dhe tre gjyqtarëve që kanë qenë tërësisht të njëanshëm, dhe për çudi kryesori Halo jo vetëm që nuk ka konstatuar asgjë të parregullt në fushë, ku s’ka elementë të dhunës dhe goditje të gjyqtarëve apo kundërshtarit, por as nuk ka pasur asnjë ankesë që loja  duhej ndërprerë apo duhej luajtur për publik. Edhe kaseta e ndeshjes e vërteton këtë dhe ajo mund të shkojë deri në FIFA për ta gjykuar specialistë më të aftë atë që ndodhi në 96 minuta lojë. Për të vijuar me dënimin tim, kur vetëm në pushim të ndeshjes i kam kërkuar kryesorit që të mos irritojë popullin në stadium sepse moviola do ta nxirrte zbuluar për mosakordimin e dy 11-metërshave. Unë motivoj skuadrën dhe kjo është e drejta ime dhe aspak një mëkat, ashtu sikur kam të drejtën që të kërkoj edhe mbështetjen e publikut.

– Po për dënimin e fushës çfarë komenti keni?

– Çfarë duhet të them, në një kohë që delegati Haxhia na kërkoi përpara ndeshjes 7 stjuardë dhe ne i sollëm 8? Po kështu, kërkoi mjetet e zjarrfikëses dhe autoambulancën dhe ato ishin në kohën e duhur, kërkoi shtesë të forcave të policisë bashkiake dhe i sollëm edhe 8-10 forca shtesë dhe si përfundim ndëshkohemi kaq rëndë, kur gjykimi i kryesorit Halo dhe dy ndihmësve të tij kanë irrituar ata 2000 sportdashës. Duke luajtur me ndjenjat e tyre dhe skuadrën e Tomorit, detyrimisht që do të ketë edhe sharje si në çdo stadium, ashtu edhe ndonjë bidon uji, por të dënohet fusha pa spektatorë, jo të na degdisin katër ndeshje jashtë Beratit dhe pa spektatorë, sepse kështu shtohet mëkati i atyre që erdhën si delegat dhe vëzhgues, të cilët u bënë palë me Apoloninë dhe gjyqtarët, dhe për mua s’ka asnjë faj as Disiplina dhe as FSHF, sepse jemi të bindur që “lepuri” fle diku tjetër dhe e gjitha kjo është një inskenim i turpshëm nga drejtuesit e Apolonisë, sipas asaj që komentohet gjerësisht në Berat.

– Ç’doni të thoni me ‘”lepuri” fle diku tjetër’?

– Unë vetë nuk akuzoj asnjëri, por nuk dua të fsheh për opinionin futbolldashës atë që po komentohet gjerësisht në qytetin tonë, teksa janë ngritur dyshime të forta për një takim të kryesorit Elidon Halo me drejtuesit e Apolonisë gjatë rrugës për në Berat ditën e ndeshjes. Së dyti, ka dyshime të forta dhe të arsyeshme, që delegati Petrit Haxhia ka qenë pjesë e inskenimit të kësaj maskarade për të dëmtuar Tomorin dhe për të ndihmuar Apoloninë, që ashtu si Tomori pretendonte vendin e pestë. Së treti, flitet se gjyqtarët që i ka kërkuar Apolonia janë përzgjedhur nga njerëz të njohur në komisionin tekniko-gjykues, që janë miq të presidentit të Apolonisë. Për të vijuar me dyshimin tonë më të fortë, se protokolli i ndeshjes që i është çuar Disiplinës është ribërë nga e para diku jashtë Beratit nga delegati dhe vëzhguesi i ndeshjes, sipas kërkesave të drejtuesve të Apolonisë. Personazhi më negativ përveç gjyqtarit është padyshim delegati Haxhia, që pas ndeshjes i shkoi për të komunikuar me presidentin e Apolonisë tek makina e tij, ndërsa Kokëdhima i shtyu derën në nerva e sipër! Është po delegati Haxhia që çuditërisht na kërkonte që në gjysmën e tribunës qendrore që koincidonte me pankinën e Apolonisë dhe vijërojtësin e parë, të vendoseshin sportdashësit e Apolonisë, në një kohë që “specialisti” Haxhia ka harruar me sa duket  që klubi Tomori i ka vendosur sportdashësit miq në këtë sezon dhe në pesë vitet e fundit në të gjitha kategoritë, në pjesën pas portave ku ka qenë ishte ora e stadiumit.

– Së fundi, ndryshe nga pretendimet për bojkot, sot keni dalë në stërvitje. Çfarë hapash do të ndiqni për në shkallën e dytë në Apel dhe çfarë prisni prej tij?

– Po, sot kemi kryer pagesën pranë FSHF për të nisur procedurën e Apelimit të vendimit të Disiplinës dhe do të kërkojmë anulimin në themel të tre vendimeve që na masakruan padrejtësisht. Një ekip profesionistësh me juristë, së bashku me kasetën e ndeshjes, jo vetëm që do të kërkojnë rikthimin e fitores dhe faljen e fushës dhe timen dhe të ndihmësit tim, por do të shkojmë më tej, duke kërkuar që të dënohen treshja e gjyqtarëve dhe mundësisht delegati Haxhia dhe vëzhguesi Koreshi të gëzojnë ditët e tyre të pleqërisë larg stadiumeve dhe jo të penalizojnë një qytet futbolldashës si Berati dhe një skuadër si Tomori. Fitorja me Apoloninë ishte me meritë dhe me gjak, sepse i kishim të gjithë kundër, ndaj nuk e falim dhe s’ka asnjë dyshim për këtë, ndërsa Apolonia dhe presidenti i saj besoj se kanë zgjedhur gabim “viktimën” e tyre me emrin Tomori, sepse dirigjuan një maskaradë pa llogaritur se ndeshja në fushë dha një tjetër shfaqje dhe kaseta e ndeshjes e vërteton këtë. Duhet të akuzojmë ne dhe do të denoncojmë deri në fund atë që kërkuan të na bëjnë në fushën tonë këta gjyqtarë dhe zyrtarë të papërgjegjshëm që ju dogj skenari që desh i vunë flakën Beratit.

EDI SPAHIU

Sot, shefi i klubit të Tomorit, Alban Pambuku ka dalë në konferencë, ku ka shtruar problemet dhe i është përgjigjur FSHF-së për dënimin. Duke siguruar që të gjitha dënimet do të shlyhen, Pambuku tha se skuadra e Tomorit do të bojkotojë ndeshjen kundër Bylisit dhe beratasit nuk do të udhëtojnë drejt Ballshit.

Për SportEkspres.com, nënkryetari i Bashkisë së Beratit, Gëzim Zema, i cili mbulon edhe sportet në këtë institucion, deklaron se po përgatitet një deklaratë që pas pak do bëhet publike në media. Ai theksoi se vendimet do të apelohen, madje deri në UEFA.

“Është një vendim i paprecedent, që nuk i përgjigjet aspak situatës së atij takimi. Monitorimi në stadium është i plotë dhe nëse do të kishte probleme sikundër edhe shprehet në vendim, ndeshja nuk duhet të vazhdonte. Gjithsesi, ne do t’i paraqesim të gjitha provat tona, madje edhe në UEFA”.

Ndërkohë që vendimi i parë i drejtuesve të futbollit në Berat është që në ndeshjen e javës së 17-të në Ballsh skuadra nuk do të udhëtojë. “E respektojmë skuadrën ballshiote dhe gjithë opinionin futbolldashës në atë qytet, por nuk udhëtojmë në Ballsh. ”.

AGRON KAJA

Klubi beratas ka reaguar me anë të një postimi në llogarinë zyrtare në “Facebook”, ku ka hedhur akuza të forta ndaj Komisonit të Disiplinës duke e quajtur atë një institucion qesharak e duke kërcënuar me tërheqjen nga kampionati.

Futboll Klub Tomori | Komunikatë për Media

TURP, TURP, KËTIJ FUTBOLLI SHPIFËSIRË QË KA RËNË NË DORËN E MASKARENJËVE, KRIMINELËVE DHE HORRAVE!!!

Klubi i Tomorit, pasi është njohur me vendimin e Komisionit të Disiplinës pranë FSHF-së, i cili ka dënuar klubin tonë me humbjen e ndeshjes në tavolinë 0-3, katër (4) ndeshje pa tifozë në stadium asnjëanës, 2 milion lekë gjobë dhe dënimin me 8-të javë pezullim të trajnerit Santiliano Dule dhe ndihmësit të tij Arben Paja, kërkon të informojë mbarë opinionin publik shqiptar dhe më gjërë se kjo është një maskaradë e kurdisur nga disa pseudo-zyrtarë dhe servila, të cilët janë ushqyer me (lekë).

Përgjatë gjithë kampionatit janë dashur të na dëmtojnë nëpërmjet “kukullave me kurdisje” (arbitrat), por nuk ia kanë dalë dhe tashmë sulmi vazhdon nga e vetmja mundësi e tyre, Komisioni i Disiplinës, i cili është kthyer në një institucion qesharak dhe aspak serioz që dëmton imazhin e futbollit në Shqipërinë e mijra (halleve&problemeve)

Vendimi i ditës së sotme nga ky pseudo-organ juridik është një akt i papreçedent. Vetëm një organ i tillë mund të transformojë të vërtetën, duke iu shërbyer palës që ka hapur “thesin” për t’i ushqyer me kacole. Si mundet t’i humbash ndeshjen në tavolin një skuadër që brënda fushës së lojës është luajtur futboll i pastër dhe “fair play”. Bidona apo ofendime ka kudo, por nuk arrihet deri aty sa një ekip humb ndeshjen në tavolinë. Vetëm Komisioni i Disiplinës i Federates Shqiptare të Krimit në Sportin e Futbollit mund të jepte një vendim ku vërtetësia e fakteve nuk ka asnjë relevancë.

– NESËR DALIM NË KONFERENC PËR SHTYP… MUND TË TËRHIQEMI NGA GARA DUKE FILLUAR QË NGA NDESHJA E KËSAJ JAVE. DO BËHEMI I PARË KLUB SHËMBULL!!!