Tomori Berat

Probleme te Tomori, largohen dy nga afrimet e janarit

Sport Ekspres — Fri, 26 Apr 2019 12:39:32 +0000

Edhe pse duhen edhe katër javë që të mbyllet Kampionati i Kategorisë së Parë, skuadra e Tomorit po kalon një situatë të vështirë. Beratasit duhet të përballojë edhe largimet e futbollistëve, veç situatës së vështirë në klasifikim.

Dy të larguarit e radhës janë mbrojtësi Oliver Dore dhe sulmuesi Elhan Galica, futbollistë të cilët u afruan në merkaton e janarit. Sulmuesi shkodran thuhet se e ka mbyllur me marrëveshje bashkëpunimin me drejtuesit e Tomorit.

Ndryshe është situata me afrikanin e marrë nga Besëlidhja. Dore pretendon se nuk është paguar në katër muaj, ndaj edhe është larguar. Ndaj lojtarit në fjalë ka shumë pakënaqësi në lidhje me paraqitjet e bëra.

Nga burime pranë klubit beratasit thuhet se Dore nuk ka qenë pjesë e takimit që futbollistët kanë bërë me trajnerin Santialiano Dule. Lojtari nuk është në dijeni të marrëveshjes së bërë për pagat, ndërkohë që raportohet se ka munguar disa herë në stërvitje. Me shumë mundësi ndaj tij janë vendosur edhe gjoba.

Momente të vështira në Berat, apel i Tomorit

Sport Ekspres — Tue, 23 Apr 2019 12:54:10 +0000

Tomori nuk ia doli të evitonte humbjen në shtëpi kundër Apolonisë në fundjavë. Ekipi fierak fitoi 1-4, duke i zhytur vendasit në vendin e fundit të Grupit B në Kategorinë e Parë.

Ekipi beratas ndodhet në kuotën e 10 pikëve, po aq sa ka edhe Turbina e Cërrikut, ndërsa Elbasani numëron dy pikë më shumë. Deri në fund kanë mbetur edhe tre ndeshje dhe Tomori ka nevojë për fitore për të qëndruar në kategori, të paktën të lërë pas një prej dy ekipeve me të cilat po rivalizon.

Vendi i fundit të dërgon në të dytën, ndërsa vendi i parafundit luan ndeshjen “play-out” kundër ekipit të vendit të dytë në Grupin B të Kategorisë së Dytë.

Klubi ka reaguar me anë të një postimi në rrjetet sociale, duke i kërkuar ndihmë dhe mbështetje tifozërisë. Pasioni për futbollin në qytetin e lashtë është i madh, por vështirësitë e hasura dhe mos rikthimi në elitë i ka ftohur të gjithë.

Megjithatë, ka ardhur koha që ata të mbushin stadiumin dhe t’i japin një dorë ekipit për të rezistuar, pasi rrëzimi në të dytën do të ishte fatal për të gjithë.

DEKLARATA E PLOTË

Të dashur qytetar beratas, tifozë, sportdashës dhe ndjekës të Tomorit, duke parë rezultatet negative të skuadrës tonë të përbashkët, vrehim një distancim tuajin karshi klubit dhe lojtarëve:

Na vjen keq që kemi krijuar këtë frymë mosbesimi, por duke kërkuar ndjesë për rezultatet zhgënjyese të javëve të fundit, kërkojmë mirëkuptimin dhe mbështetjen tuaj në këto momente të vështira.

Futbollistët tanë janë KAMPION! Ata kërkojnë vetëm mbështetje, mbështetje dhe mbështetje për të kaluar këtë “ngërç” psikologjik. Drejtuesit dhe stafi teknik është me lojtarët dhe mbështet vetëm lojtarët. Ata gëzojnë simpatinë tonë dhe ne jemi të bindur se do t’a kalojmë këtë situatë të keqe. Të bëhemi së bashku dhe duke mbështetur njëri-tjetrin do të shpëtojmë Tomorin nga zona e rrezikut.

Le të harrojmë gjithçka për një moment dhe të mos i çojmë nëpër mend rezultatet negative. Bëhuni bashk në mbështetje të lojtarëve.“

Takim për privatizimin e Tomorit, “Mela Holding Group” mbërrin në Berat

Sport Ekspres — Fri, 08 Feb 2019 09:43:29 +0000

Që nga muaji tetor 2018, Kompania “Mela Holding Group” me qendër në Itali ka treguar interes për privatizimin e skuadrës së Tomorit. Kompania e drejtuar nga shqiptari me origjinë nga lugina e Preshevës, Marko Saljihu, e mbështetur nga firma shqiptare TPN Development me president beratasin Thoma Jançe, dje ka qenë në një takim me drejtues së Bashkisë Berat, të cilëve u kanë kërkuar më shumë informacion për kohën e privatizimit të FK Tomori.

Për SportEkspres.com, Jançe deklaron se ky është jetë hapi i parë i një procesi që do e shihte Tomorin të ndryshonte pronësi dhe të bëhet më konkurrues në futbollin shqiptar. “Biseda me drejtuesit e Bashkisë u organizua për të marrë më shumë informacion rreth kërkesës sonë për privatizimin e FK Tomori. Vetë Presidenti i “Mela Holding Group”, Marko Saljihu ishte interesuar për procedurat e këtij kalimi”, kështu deklaroi Thoma Jançe për këtë takim në Bashkinë e Beratit.

Ndërkohë nga ana e saj, Bashkia u ka premtuar se në datën 25 shkurt në mbledhjen e Këshillit të Bashkisë do të merret vendimi përfundimtar për këtë kalim pronësie. “Në këtë takim, zoti Marko Saljihu mori premtimin se në datën 25 shkurt në mbledhjen e Këshillit të Bashkisë do të miratohen procedurat e kalimit të klubit në pronësi të kompanisë së tij me 76% të aksioneve. U larguam nga ky takim me mendimin e mirë, për t’u rikthyer më 25 shkurt me dëshirën që të firmosin marrëveshjen”.

Klubi i Tomorit është në pronësi 100% të Bashkisë së Beratit dhe në bazë të Ligjit për Sportin, “Mela Holdin Grup” ka kërkuar që të ketë 76% të aksioneve në klub, pjesa tjetër i takon Bashkisë.

AGRON KAJA