Timue Bakajoko

Takim në sytë e drejtuesve, paqe mes Gatuzos dhe Bakajokos?

Sport Ekspres — Tue, 07 May 2019 12:23:23 +0000

Milani nuk ka humbur kohë dhe ka zbritur në fushë gjatë paradites së sotme. Palestër për titullarët e fitores së mbrëmshme dhe stërvitje për pjesën tjetër. Të pranishëm kanë qenë dhe dyshja Leonardo-Maldini.

Drejtuesit e “djallit” kanë patur një takim kokë më kokë me Gatuzon dhe Bakajokon. Trajneri dhe mesfushori kanë sqaruar gjithçka mes tyre dhe francezi i është bashkuar stërvitjes.

Ai mund të zbresë në fushë të shtunën kundër Fiorentinës, duke llogaritur dhe mungesat e mëdha në këtë repart. Lukas Paketa u ndëshkua me të kuqe, ndërsa Bilja dhe Çalhanoglu janë të dëmtuar. Aktivizimi i Bakajokos do të varet edhe nga rendimenti i tij gjatë javës.

E ardhmja e tij pritet të jetë larg Milanelos. Kuqezinjtë nuk kanë ndërmend të paguajnë 30 milionë euro për kartonin e tij dhe 24-vjeçari do të rikthehet te Çelsi. Një lajm i mirë për trajnerin Sarri. Anglezëve ju është bllokuar merkato dhe trajneri italian do të kishte një opsion më shumë për mesin e fushës.

Leonardo: Stop gjyqeve publike, Bakajoko gaboi dhe do paguajë

Sport Ekspres — Tue, 07 May 2019 11:22:14 +0000

Milani u rikthye te fitorja duke mposhtur Bolonjën 2-1. Tre pikë jetike për kuqezinjtë e Gatuzos, të cilët triumfuan falë golave të Susos dhe Borinit. Një episod ka ndodhur në pankinë midis trajnerit dhe Bakajokos. Gatuzo i ka kërkuar francezit që të zbresë në fushë, por ky i fundit nuk ka pranuar dhe mes palëve ka nisur një ofendim i dyanshëm.

Leonardo ka folur për rastin në fjalë. Gjithçka do të zgjidhet brenda familjes dhe nuk ka nevojë të bëhet publike. Mesfushori ka gabuar dhe do të paguajë. Më pas një koment për fitoren kundër Bolonjës, trajnerin Gatuzo dhe merkaton e Milanit.

EPISODI – “Rasti i Bakajokos do të diskutohet brenda nesh pa bërë publikimin e masave që do të marrim. Lojtari ka vuajtur shumë gjëra javët e fundit, por gabimet mbeten gabim dhe do të ndërhyjmë. Ka shumë gjëra pozitive, por kush gabon, paguan. Njësoj si gjithë të tjerët. Kanë ndodhur shumë gjëra njëkohësisht, por i kemi zgjidhur brenda nesh me Gazidis, Maldinin dhe Gatuzon. Nuk mund të bëhet çdo rast gjyq publik.”

SITUATA – “Pas derbit ishte një moment shumë i vështirë, por kundër Bolonjës treguam një forcë, që sinqerisht nuk e mendoja se e kishim. Ky Milan ka shpirt dhe shumë gjëra pozitive. Nevojitet qetësi dhe durim, sepse ekipi është në ndërtim e sipër.”

GATUZO DHE MERKATO– “Jemi treguar gjithmonë të qartë me Rinon. Gjithçka po shkon sipas planit, nuk mund të ishte gjithçka fushë me lule. Kemi pësuar ndryshime dhe normal që do të hasnim vështirësi. Nuk jemi në një situatë ekonomike të mirë, por nuk bëhet fjalë për demoralizim. Jemi të bllokuar dhe nuk do të bëjmë goditje të mëdha në verë. Megjithatë, gjithçka varet nga kualifikimi në Champions.”

Bakajoko kthehet në çështje, Milani merr vendimin drastik!

Sport Ekspres — Thu, 02 May 2019 12:39:00 +0000

Çështja kryesore e dy ditëve të fundit te Milani ka qenë padyshim Timue Bakajoko. Francezi u vonua në stërvitje një ditë më parë për shkakun se i kishte mbaruar karburanti i makinës, me trajnerin Gatuzo që së bashku me mesfushorin dënoi të gjithë ekipin me grumbullim deri ditën e hënë, që do të luhet ndeshja ndaj Bolonjës.

Përveçse kësaj, duket se drejtuesit kuqezi nuk janë mjaftuar me kaq. Gjobë 90 mijë euro për Bakajokon dhe… largim në verë. Çmimi i vendosur nga Çelsi prej 35 milionë eurosh duket i lartë për Milanin, që edhe në rast se do të kualifikohet për në Championsin, sipas raportimeve të fundit nga mediat italiane nuk do ta aktivizojë të drejtën e blerjes për Bakajokon. Duket se gjërat në kampin kuqezi sa vijnë e përkeqësohen.

Gatuzo dhe Inzagi zgjedhin “ushtarët”, tifozët e Lacios e teprojnë me koret raciste

Sport Ekspres — Wed, 24 Apr 2019 18:19:25 +0000

Atmosfera e ndeshjes Milan-Lacio është rritur ndjeshëm. Për të rritur temperaturat kanë menduar ultrasit lacialë. Pasi shfaqën një pankartën e turpshme “Nderime Benito Musolinit”, nuk kanë munguar as koret raciste. Objektivi dihet, Timue Bakajoko. Një gjë të tillë e bënë kundër Udinezes, ndërsa kanë ofenduar edhe sot mesfushorin e Milanit.

Francezi u bë shkak polemikash për festimin e bërë me bluzën e Açerbit dhe tifozët e Lacios nuk ia kanë harruar. Dy ekipet do të zbresin në fushë, sonte në orën 20:45 për ndeshjen e kthimit gjysmëfinale të Kupës së Italisë. Ndeshja e parë është mbyllur në barazim pa gola.

Dy trajnerët kanë publikuar edhe formacionet e sfidës. Xhenaro Gatuzo ka zgjedhur skemën 3-4-3. Kaldara do ta nisë nga fillimi dhe do të plotësojë treshen e mbrojtjes bashkë me Romanjolin dhe Muzakion. Në sulm, Piatek do të mbështetet nga spanjollët Suso e Kastihejo.

Simone Inzagi përgjigjet me skemën 3-5-1-1. Strakosha si gjithmonë titullar, ndërsa argjentinasi Korrea do të mbështesë Çiro Imobilen në majën e sulmit bardhekaltër.

MILAN (3-4-3): Reina; Muzakio, Kaldara, Romanjoli; Kalabria, Kesi, Bakajoko, Laksalt; Suso, Piatek, Kastihejo

LACIO (3-5-1-1): Strakosha, Bastos, Açerbi, Luiz Felipe; Romulo, Luis Alberto, Leiva, Milinkoviç-Saviç, Luliç; Korrea, Imobile