VIDEO | “Bëmë baba të të ngjaj”, djali i legjendës së Milanit çmend Skocinë

Sport Ekspres — Sun, 03 Feb 2019 18:38:22 +0000

Timoti Ueah është një emër ende i panjohur në botën e futbollit, por shumë prej jush mund ta njihni babain e tij Xhorxh Ueah, i cili ka qenë i pari afrikan që ka fituar “Topin e Artë”.

I biri i legjendës, Timoti është vetëm 18 vjeç dhe i ka ngjarë jo pak babait të tij. Adoleshenti u huazua pak javë më parë nga PSG-ja te Selltik, ku do të ketë më shumë minuta dhe në ndeshjen e katërt ka dhuruar një paraqitje të shkëlqyer.

Në transfertën e sotme ndaj Seint Xhonston, Ueah ndryshoi rrjedhën e takimit vetëm katër minuta pasi u fut në lojë nga stoli.

Në minutën e 78-të, adoleshenti shërbeu me një asist fantastik kolegun Forest, goli i të cilët zhbllokoi takimin. Për ta mbyllur siç duhet ndeshjen Ueah gjeti dhe golin e dytë me fanellën e Selltik në minutën e 89-të dhe vulosi rezultatin e takimit në 2 – 0.

Falë fitores së sotme, Selltik çon në gjashtë pikë diferencën me rivalët historikë të Gllazgou Rejnxhërs. Titulli i tetë radhazi duket i destinuar për skuadrën e Brendan Roxhers.

Igli Tare ishte pranë talentit të PSG, zbulohen shkaqet e bllokimit të marrëveshjes!

Sport Ekspres — Tue, 11 Sep 2018 14:03:27 +0000

Një prapaskenë merkato është zbuluar nga francezja “L’Equipe”, sa i përket Lacios. Igli Tare ka qenë afër arritjes së akordit për transferimin e Timoti Ueah në Romë, por gjithçka është bllokuar në momentet e fundit të merkatos.

Sulmuesi 18-vjeçar, i cili është djali i ish-sulmuesit të famshëm të Milanit, Xhorxh Ueah, ishte pranë transferimit te Lacio, por trajneri gjerman i PSG, Tomas Tuhel, ka bllokuar tratativën dhe ka vendosur të besojë në kualitetin e djaloshit të talentuar, i cili është afër rinovimit të kontratës me klubin francez.

Përveç Lacios, ishin dhe klubet e Salsburgut dhe Gallatasarait, por Tuhel vendosi veton dhe Ueah Jr vazhdon të jetë pjesë e PSG.