Tifozat Kuq e Zi

Futbolli bashkon njerëzit, shembulli vjen nga tribunat

Sport Ekspres — Fri, 16 Nov 2018 20:05:56 +0000

Edhe pse ndeshja mes Shqipërisë dhe Skocisë është programuar për ditën e nesërme, tifozët nuk u është duruar deri atëherë, teksa kanë zbritur vetë në fushë. “Tifozët Kuq e Zi” kanë sfiduar tifozët miq në një takim miqësor të zhvilluar në fushat sportive në Kamzë.

Është ndarë në barazim 1-1 kjo ndeshje, e cila është një mesazh për të gjithë, duke treguar se futbolli duhet të bashkojë njerëz. në fund shtrëngim duarsh dhe foto mes të dyja palëve. Ky duhet të jetë mesazhi që të gjithë duhet të marrim.

Rrallëherë mund të ketë pasur një atmosferë më të mirë midis dy tifozerive se sa kjo para ndeshjes së nesërme ndaj Skocisë. Gjatë ditës së sotme tifozët skocezë kanë festuar në rrugët e Tiranës e Shkodrës pa shkaktuar asnjë lloj shqetësimi, duke lënë përshtypje të mira te të gjithë.

Rikthimi i madh i kombëtares, Tifozët Kuq e Zi

Sport Ekspres — Fri, 24 Aug 2018 07:45:42 +0000

Shqipëria pret Izraelin më 7 shtator në “Elbasan Arena”, ndërkohë që skuadra e drejtuar nga Kristian Panuçi këtë herë do të ketë edhe mbështetjen e Tifozave Kuq e Zi, të cilët kanë thyer bojkotin e vendosur.

Kjo nuk erdhi në mënyrë të rastësishme, por pasi kanë marrë garancitë e duhura nga FSHF dhe Policia e Shtetit për plotësimin e kushteve të paraqitura, një prej tyre edhe largimi i forcave të rendit nga tribuna ku ata qëndrojnë. Vendimi i thyerjes së bojkotit konfirmohet edhe nga njoftimi i tyre për organizimin e sfidës me Izraelin.

Të nderuar tifozë, me shumë kënaqësi ju njoftojmë mbi detajet e organizimit për ndeshjen e radhës:

Shqipëri – Izrael (Liga e Kombeve, kualifikuese)
07 shtator 2018, ora 20:45, stadiumi “Elbasan Arena”, Elbasan

Çmimi i biletave për anëtarë:
1000 lek/ 8 euro* | Tribuna C2

Afati i fundit për rezervim: 30 gusht 2018, ora 20:00.

FOTOLAJM/ Behrami lë Zvicrën, Tifozat Kuq e Zi e ngacmojnë

Sport Ekspres — Tue, 07 Aug 2018 17:17:15 +0000

Valon Behrami nuk do të jetë më pjesë e përfaqësues së Zvicrës. Mesfushori me origjinë shqiptare ka njoftuar se nuk do të angazhohet me përfaqësuesen helene.

Nuk kanë munguar urimet e shumta nga shokët e tij të skuadrës, por dhe ngacmimet nuk kanë qenë të pakta. Fakti që ai zgjodhi Zvicrën dhe jo Shqipërinë e më vonë as Kosovës nuk i ka lënë shije të mirë tifozëve të cilët nuk kanë nguruar që ta ngacmojnë në këtë moment.

Tifogrupi më i madh i mbështetësve të Kombëtares, “Tifozat kuq e Zi” e ka thumbuar me një foto, kur Behrami luante i kundërshtar në “Qemal Stafa”, duke ironizuar me shkopin e tupanit që mbante në dore: “Shkopin e tupanit mund ta mbash kujtim”, shoqërohet fotoja e TKZ. Mesazhi është i qartë!

Tifozat Kuq e Zi: Lorik, mos u tërhiq tani!

Sport Ekspres — Thu, 21 Sep 2017 19:34:38 +0000

Lorik Cana ka vendosur të tërhiqet zyrtarisht nga futbolli dhe në tetor do të zhvillohet një ceremoni në “Loro Boriçi”, para ndeshjes kundër Italisë. Një rast ideal për të nderuar një ndër më të mëdhenjtë e historisë së sportit shqiptar, por ka një problem. Grupimi “Tifozat Kuq e Zi” i ka dërguar një letër publike ish-kapitenit të Kombëtares së Shqipërisë, Lorik Cana ku i kërkojnë të shtyjë ceremoninë e lamtumirës. Gjithçka për faktin ata nuk do të jenë në stadium për ta përshëndetur dhe për të thirrur emrin e tij, për shkak të bojkotit të shpallur prej kohësh për ndeshjet që Kombëtarja luan në shtëpi.

“Tifozat Kuq e Zi” janë në protestë për shkak të keqorganizimit dhe keqtrajtimit fizik dhe psikologjik që tifozëve u bëhet nga policia shqiptare. Kjo ka bërë që ta ndjekin Kombëtaren vetëm jashtë Shqipërisë, ku trajtimi i policive të huaja është shumë më normal dhe profesional se në Shqipëri, ku për hir të së vërtetës, jo vetë TKZ, por çdo tifoz i thjeshtë ndihet i ofenduar dhe i nëpërkëmbur nga një polici e organizuar në mënyrë të turpshme, duke arritur deri aty sa të ofendojë njerëzit hapur, me batuta të tipit: “Mos eja në stadium, nuk të merr njeri me zor, nëse nuk duron dot dy orë pa ujë”.

Letër publike drejtuar kapitenit legjendar, Lorik Cana

I dashur kapiten

Marrim shkas që të drejtohemi me këtë letër publike, pas lajmit për ceremoninë lamtumirëse nga futbolli, të caktuar më datë, 9 tetor 2017.

Përpara kësaj, dëshirojmë që në emër të të gjithë anëtarëve të grupimit TKZ (Tifozat Kuq e Zi), të të falënderojmë, për çdo djersë dhe mund për të mirën e Kombëtares. Kudo ku të kemi ndjekur, imazhet e tua kanë qenë ato copëzat e krenarisë që e kanë plotësuar mozaikun e një shqiptari të mirë dhe shembull.

Siç edhe jeni në dijeni, Tifozat Kuq e Zi, dhe bashkë me të edhe disa grupime të tjera tifozerike që prej 1 viti, pa dëshirën e tyre janë në bojkot të ndeshjeve të Kombëtares në shtëpi. Arsyeja ka të bëjë me keq-organizimin, dhe me keqtrajtimin fizik dhe psikologjik që na bëhet nga policia shqiptare. Akoma në kohën kur po shkruajmë këtë letër, nuk ka ndonjë reflektim, prandaj edhe nuk mund të kthehemi në stadium derisa këto sjellje të përfundojnë një herë e përgjithmonë.

Si TKZ, si njerëz që të kemi ndjekur kudo, jo vetëm me ekipin kombëtar, kërkojmë nga ju që të shtyjeni për një kohë tjetër ceremoninë e lamtumirës. Kjo për faktin se nuk mund të pajtohemi se nuk do të jemi në stadium për të përshëndetur edhe për të thërritur emrin tënd fortë, si përherë.

E dimë që nuk është kërkesë e zakonshme, por kërkojmë që të na kuptoni drejt kërkesën tonë, nuk ka të bëjë më ndonjë kryeneçësi, por ka të bëjë kryekëput me trajtimin tonë njerëzor dhe dëshirën për ta bërë këtë ceremoni falënderuese sa më madhështore. Ne jemi të vendosur që bojkotin ta çojmë deri në fund, sikurse jemi të sigurt në respektin dhe përkrahjen që na e ke dhënë gjithnjë, për të cilën gjë besojmë se as ju nuk keni dëshirë që të na shihni duke u persekutuar e keqtrajtuar.

Pa marrë parasysh rrjedhën e situatës, ju keni qenë, dhe do të jeni udhërrëfyes për shumë prej nesh se si lartësohet emri i Shqipërisë dhe i shqiptarëve nëpër botë.

Faleminderit kapiten!

Tifozat Kuq e Zi

O sa mirë me qenë shqiptar!