Jo vetëm Piatek e Paketa, zbarkon blerja e tretë e Milanit

Sport Ekspres — Fri, 25 Jan 2019 20:26:36 +0000

Muaji janar rezervoi dy goditje “BIG” për tifozët e Milanit. Afrimet e Lukas Paketas dhe Kristof Piatek kanë ngritur shumë moralin në kampin e “djallit”. Megjithatë drejtuesit e klubit po punojnë edhe për talentet e së ardhmes.

Talenti portugez Tiago Dzhalo, është përforcimi më i fundit i Milanit. Mbrojtësi 18-vjeçar ka mbërritur në Milano mbrëmjen e sotme dhe pritet që ditën e nesërme të bëhet prezantimi zyrtar.

18-vjeçari u ble nga skuadra e Sportingut për një shumë modeste, pasi kontrata e lojtarit mbaronte në fund të sezonit. Lacio dhe Mançester Junajtid ishin dy klubet e tjera në garë për Dzhalon, por vetë i riu zgjodhi në fund skuadrën e Xhenaro Gatuzos

Jo vetëm Piatek, Milani arrin akordin me talentin e mbrojtjes

Sport Ekspres — Sat, 19 Jan 2019 14:20:02 +0000

Ndërsa të gjithë presin zyrtarizimin e Piatek, Milani ka vepruar shpejt dhe ka mbyllur një tjetër tratativë. Kuqezinjtë kanë përforcuar mbrojtjen dhe kanë siguruar shërbimet e Tiago Djalo, 18-vjeçarit të Sportingut të Lisbonës, kontrata e të cilit përfundonte në verë.

Leonardo ka fituar konkurrencën me Lacion dhe dy klubet e Mançesterit dhe, siç raporton “GianlucaDiMarzio”, ka arritur akordin me drejtuesit e klubit portugez. Lojtari nga Guinea Bisau, i cili aktivizohet me kombëtaret e moshave të Portugalisë, do të udhëtojë të hënën drejt Milanos për të nënshkruar kontratën me Milanin.

Një klauzolë e veçantë është përfshirë në marrëveshjen mes palëve, çka i mohon kuqezinjve ta shesin Djalon në të ardhmen te Porto, ose Benfika, dy rivalët më të “urryer” të Sportingut.