GRUPI – “Partizani edhe në sezonin e shkuar edhe tani ka pasur grup cilësor. Me këtë grup që kemi ne synojmë që të jemi sa më të fortë. Një dorë të mirë po na japin edhe lojtarët që kanë ardhur si përforcime, sepse edhe ata kanë filluar që të ambientohen me skuadrën. Vërtetë lojtarët e ardhur kanë pak kohë, ndërsa sulmuesit nuk mund t’i vlerësojmë nga ndeshja me Karabakun. Mendoj se në ditët në vazhdim edhe ata do të jenë një forcë e madhe e Partizanit. E rëndësishme është që kemi konkurrencë në sulm dhe kjo është shumë pozitive për skuadrën dhe trajnerin”.

SHERIFI – “Është një kundërshtar i fortë, por as për t’u nënvlerësuar dhe as për t’u mbivlerësuar. Ne do të kërkojmë që t’i godasim ata në pikat e dobëta. Kam besim se do të jetë një ekip më sulmues në ndeshjen që do të luajmë këtu”.

KUALIFIKIMI – Shanset janë të mëdha, kryesore është që ne të futemi dhe të japim më të mirën tonë. Të luajmë siç edhe luajtëm me Karabakun, të përmirësohemi në sulm dhe kam besim se do të bëjmë gjëra shumë të mira”.

ROLI – “Kam luajtur me Hilën, edhe me Koten që është djalë i ri. Tashmë po përshtatem edhe me Melon apo Malën. Çdo gjë e vendos trajneri. E rëndësishme që kushdo që të futet të bëj më të mirën për Partizanin”.

TIFOZËT – Mesazhi është i qartë për tifozët tanë. Ata janë një tifozeri e mrekulleshme. Janë lojtari ynë i 12-të dhe kjo na ndikoi edhe në Baku. Po të ishin ata do të jepnim edhe më shumë, sepse dihet që ata janë një “frymë” dhe forcë e madhe për ne”.

“Mendoj se për të korrigjuar janë vetëm daljet në sulm dhe disi mbajtja e topit. Nëse veprojmë më mirë se ndeshjen e parë gjatë kundërsulmeve, jam i bindur se do t’ia dalim të shënojmë gol”

“Partizani në këtë ndeshje të kthimit shkon si një ekip i fortë, këtu bëmë një ndeshje të mirë e panë të gjithë. Besimi nuk mungon. Ne besojmë shumë, pasi të gjithë e panë në ndeshjen e parë që dhe ne jemi një ekip i fortë. Sot u stërvitëm për goditjet e 11-metërshave, pasi nuk i dihet, ndeshja mund të mbyllet pa gola, por e mira është që ne të shënojmë”.

Një nga lojtarët më të rëndësishëm të “Demave”, Bruno Telushi, ka folur para kësaj sfide për RTSH Sport, ku u shpreh: “Duhet të korrigjojmë daljet në sulm në ndeshjen e kthimit. Nëse do kundërsulmojmë si në ndeshjen e parë dhe të dalim më mirë në sulm, besoj se do ia dalim të kualifikohemi. Duhet rregulluar edhe mbajtja e topit”.

“Në Azerbajxhan, Partizani shkon si një ekip i fortë, se bëri një ndeshje të parë të mirë. Sa për pjesën e besimit, kemi shumë besim te kualifikimi se të gjithë e panë në Tiranë që jemi ekip i fortë dhe i vështirë. Penallti? Kemi punuar edhe për to, por më mirë do ishte të zgjidhej gjithçka në 90 minuta”, tha mesfushori.

Bruno Telushi e nisi nga minuta e parë këtë sfidë dhe ishte pikërisht mesfushori i kuq ai që ishte protagonist në një moment tensioni. Edhe pse miqësore, Telushi nuk i kurseu aspak nervat dhe konfrontimin me kundërshtarin, i cili bëri lojë të rrezikshme me një takë të ngritur.

“Për pjesën e të fortit, kemi qenë të gjithë të fortë, jo vetëm unë. Gjithsesi, më bëhet qejfi që jam futur në zemrën e tifozëve dhe ndihem mjaft mirë dhe mjaft i lumtur. Kjo gjë të bën të japësh maksimumin.

Normalisht që jo vetëm për mua, por për të gjithë sportdashësit, derbi është një ndeshje kulmi i futbollit shqiptar. Mua më vinte keq që Tirana ishte në këto ujëra. Shpresoj që të qëndrojnë në Superiore dhe sezonin tjetër të përjetojmë sërish derbi të bukur”.

“Nëse do të ishte në dorën time, unë mendoj se nuk duhen shumë ndryshime. Po ta vini re, te Partizani u bënë të gjithë si puna ime, të gjithë ushtarë. Normalisht që çdo ekip ka të mirat dhe të këqijat e veta, por në pozicionin tim do të thoja që nëse do të mbanim topin më shumë në kontroll, do të ishte pozitive. Pjesa tjetër, ka qenë super”, përfundoi Telushi.

MENAXHIMI I LOJTARËVE NGA GEGA – “Mbaj mend kur ishin në fazë përgatitore në Ohër, ai nuk filloi menjëherë ta na bënte stërvitjen, por organizoi disa mbledhje tek e tek. Pyeti çdo lojtar për vështirësitë që kishte pasur në sezonin e kaluar, unë i tregova për problemet që hasa me fizikun, pata shumë dëmtime. Ai diti si të fliste me lojtarët, na kuptoi çfarë karakteresh kishim. Me disa sillej sikur e kishte shok, me disa të tjerë sikur i kishte fëmijë”.

GARA ME RIVALËT – “Në fillim të sezonit Flamurtari ishte një ekip shumë i mirë, por filluan problemet financiare. Pas disa javësh rivali kryesor ishte Kukësi. Ata na kanë motivuar, i falënderoj me deklaratat që kanë bërë: “Jo gjunjtë, jo biçikleta”. Ndonjëherë kur të mungon karikimi, këto deklarata të karikojnë”.

TIRANA DHE DËSHTIMI NË DERBI – “Normalisht që kjo ndikon. Me kaq shumë kohë sa ka Tirana pa fituar, shtohet presioni pasi kërkon medoemos fitoren. Dihet që presioni i tepërt të bën keq në ekip. Unë mendoj se Tirana gabimin e ka bërë që në fillim. U frynë shumë, me foto etj. . E kam provuar vetë te Flamurtari në 2015-ën. Ekip me emra shumë, por 0. Edhe Partizanin në sezoni e shkuar. Futbolli i sotëm duhet të kesh një grup shumë të fortë që të arrish te suksesi. Vetëm Mesi dhe Ronaldo janë të aftë të marrin ekipet përdore”.

FILLIMI I SEZONIT – “Titulli kampion nuk ishte objektiv. Kjo ka bërë dhe mirë për grupi, pasi nuk ishte ai presioni: ‘O kampion o s’ka’. Pas javës së 10-të grupi filloi ta kuptonte se titulli ishte i mundshëm”.

PREMIO E TITULLIT – “Jemi ulur me presidentin dhe na ka thënë: Djema mendojeni vetë shifrën e premios. Gjithsesi ne lojtarët ende nuk jemi mbledhur që të vendosim për këtë gjë”.

I pyetur nga drejtuesi i emisionit, nw lidhje me banderolën “Kampion me VKM” të bërë nga tifozët e Tiranës, Telushi tha:“Ne e kemi treguar në fushë që kemi marrë çdo gjë me meritë. Olsi Rama ka qenë një ndër personat që gjithmonë më ka udhëzuar të jem i qetë me arbitrat në çdo rast. Mbaj mend gjatë derbit, tifozët e Tiranës se ç’kishin një shprehje për Erion Braçen dhe tifozët në krahun e Partizanit filluan të acarohen dhe shajnë, Olsi ishte i pari që u ngrit dhe filloi të qetësonte tifozët”.

TITULLI – “Normalisht që jam shumë i lumtur, por te them të drejtën, nuk më besohet ende që jam kampion. E kam vuajtur shumë këtë takim në tribunë, pasi nuk jam mësuar që të shikoj shokët e mi të luftojnë e unë të mos jem aty. Ishte një atmosfertë fantastike, përjetova shumë emocione”.

FILLIMI I SEZONIT – “E kam thënë dhe herë tjetër, që ndryshuan shumë gjëra, ndryshoi dhe stafi. Të gjithë çunat kanë qenë të mirë, si brenda fushës, ashtu dhe jashtë saj. Të gjithë kemi ulur kokën dhe kemi dëgjuar më të madhin, kështu patëm sukses”.

STILI I LOJËS – “Unë dua të them që për pjesën e kartonëve, e kam ulur shumë dozën, pasi e mbyllja e sezonin me 34 kartona, ndërsa këtë vit vetëm me 8. Dua të them se ky është karakteri im dhe nuk mund të zbutem më shumë. Mund të krahasohem me Gatuzon, kështu e mendoj. Është karakteri im”.

TOLERIM – E kemi diskutuar jo në këtë pikë që t’i lëmë ndonjë pikë Tiranës. Diskutuam që na vjen keq nëse Tirana bie. Duam që të shpëtojë, pasi derbi është derbi. Vjet nuk kishte kuptim sezoni pa derbi. Shpresoj të mos ndodhë sërish”, tha Telushi.

KASTRIOTI – “Është shumë e vështirë për mua. Më përshtatet ajo fushë për karakterin dhe lojën që bëja. U mundova të ndihmoj edhe nga stoli. Po ndihmoja ekipin, jo Gegën. Është goxha e vështirë të qëndrosh në stol. Ekipi mund të bënte edhe më mirë, por është e vështirë në atë fushë. Stërvitesh në terren tjetër, ndërsa luan në fushë tjetër. Kështu duket bukur, por kur hyn në fushë është katastrofë. Ato raste, në një fushë tjetër do realizoheshin”.

RIKTHIMI – “Për momentin nuk e mendoj rikthimin. Po stërvitem i diferencuar dhe shpresoj të jem gati sa më shpejt për ekipin”.

Paragjykimet? – “Kjo është diçka që ndodh shumë në Shqipëri. Nganjëherë janë edhe të vërteta. U fol dhe për ndeshjen me Luftëtarin. Na mundën për fajin tonë. Me Kastriotin e dinim që do ishte e vështirë, atje kanë shkuar ekipe dhe kanë humbur. Është fushë e vështirë. Pozicioni që jemi dhe pikët të bëjnë të mendosh që është i fituar titulli. Duhet luftuar derisa matematika të na japë titullin”.

Mungojnë Atanda dhe Rexhepi? – “Partizani ka një grup të mirë. Mungojnë ata, por kthehet Ibrahimi. Do të ketë djem të tjerë dhe skuadra nuk do të ketë boshllëqe. Kjo është gjë e mirë. Qejfi ma ka të kthehem në derbi. Kam dëshirë të jem edhe titullar atë ndeshje. Këto ditë do shihet se si do të shkojë”.

“Festimi si ushtar? Sepse e konsideroj veten si ushtar, që futem dhe marr urdhra dhe i shkoj luftës deri në fund. Kjo pjesë më pëlqen jashtë mase. Kështu kam qenë edhe në Vlorë”.
“Edhe e kam menduar një sezon të tillë. Vjet pata një moment të vështirë. Mendoja edhe dështimin. Kjo më bënte edhe më të fortë për të arritur te suksese. E kam kërkuar dhe e kam arritur me ndihëm e profesorit dhe shokëve. Erdhi një pikë që ndihesha mirë për kontributin”.

Dëmtimi? – Në momentin më të mirë del diçka e keqe. Ndoshta edhe më kanë marrë në sysh. Ishte një goditje me bërryl dhe për shkak të saj u ça cipa e mushkërisë. U krijua ajër dhe pastaj qëndrova në spital, Për një javë më hoqën ajrin me tub, por kishte mbetur akoma. Bëra një ndërhyrje dhe më pas gjithçka shkoi mirë. Bëra edhe një sondë nga goja për pastrim. Më pas dola nga spitali. Ishte diçka e frikshme, nuk e kisha parashikuar. Shkova për dy ditë në spital, qëndrova 17 ditë. Rikuperimi po shkon mirë, nuk nxitohem. Dhimbjet nuk më linin të flija. Kur qëndroja shtrirë ishte e pamundur, tubi më jepte dhimbje. Pas ndërhyrjes u qetësova. Ato ditë normalisht të rëndojnë nervat. Goli që më dedikuan ishte diçka e bukur, nuk ua kam kërkuar. Ata e kanë bërë nga vetja në dy ndeshje. Pjesa më e madhe kanë qëndruar me mua në spital. Vinin e bënin batuta. Ka qenë edhe një lojtar i Tiranës, Bedri Greca, i cili ka fjetur një javë me mua. E falënderoj nga zemra, nuk ia harroj kurrë”.

DERBI DHE GJENDJA E TIRANËS – “Nuk e duam të bie Tirana, pasi derbi është lezeti i kampionatit. Do luajmë fort në derbi, sido që të jetë situata. Duke parë edhe vitet që nuk humb, nuk mund ta lësh ndeshjen”.

Në intervistën e dhënë në fund të takimit për emisionin “Gol pas Goli” në “Supersport”, 32-vjeçari foli mbi titullin që po afron ndeshje pas ndeshje, kolegët në repartin e mbrojtjes dhe shpjegoi arsyen  e festimit unik të skuadrës së tij.

MBROJTJA – “Po, është e vërtetë që jemi mbrojtja më e mirë. Trashi, Belica, Lumi, Atanda, të gjithë. Bëmë një ndeshje shumë të mirë, duke marrë edhe fitoren, që ishte qëllimi ynë. Sa i takon Gripshit dhe Bregut, janë dy lojtarë shumë të mirë, por sot ishte dita ime dhe jam shumë i lumtur. Vazhdojmë kështu.

GOLAT – “Kam gjashtë vite këtu, që kur presidenti Demi ka marrë drejtimin. Kam shënuar gjashtë gola dhe është një gjë super. Festimi i golit ishte dedikim për Telushin, që është një lojtar shumë i rëndësishëm për ne. Jemi të gjithë ushtarët e Partizanit”.

TITULLI – “Kemi qenë shumë afër dhe dy vite më parë, por këtë vit jemi disi më mirë. Duhet t’i marrim ndeshjet një e nga një dhe të qëndrojmë me këmbë në tokë”, përfundoi Ibrahimi.

Sot, klubi i kuq ka njoftuar se Telushi e ka kaluar me sukses këtë operacion dhe do të rikthehet në fushat e lojës më shpejt seç ishte parashikuar. Njoftimi i klubit të Partizanit:

“Ka përfunduar me sukses ndërhyrja kirurgjikale në mushkëri për Bruno Telushin. Mesfushori i kuq i cili u dëmtua në takimin ndaj Teutës, i është nënshtruar sot operacionit, ndërhyrje e cila është kryer në ambjentet e spitalit “Amerikan 3” në Tiranë. Përgjatë gjithë këtyre ditëve titullari i ekipit ka qënë në kujdesin e stafit mjekësor të spitalit Amerikan, të cilët pasi kanë monitoruar gjendjen e tij shëndetësore kanë vendosur të bëjnë një ndërhyrje në mushkëri.  Falë këtij operacioni, i cili ka rezultuar i suksesshëm koha e rikuperimi të Telushit pritet të jetë më e shpejtë nga sa parashikohej dhe tashmë mesfushori i kuq do të ndjek një program të veçantë”.

Ftesa e Trashit për në kombëtaren shqiptare ka bërë që mesfushori vlonjat t’i dërgojë  një mesazh shokut të tij nëpërmjet Instagramit. Telushi ka postuar një foto ku ndodhet së bashku me Trashin të shoqëruar me mbishkrimin “Trashi mos harro sa kohë ke që e pret këtë ftesë vëlla”.

“Ndihem mirë dhe i falënderoj të gjithë ata që më votuan. E fitoj për herë të parë këtë çmim dhe ndihem shumë mirë. Ky është sezoni im më i mirë dhe që ekipi ku luaj unë është aty ku duhet. Shumë çuna duhet të bëjnë mirë dhe të japin maksimumin.

Mendoj se do të na ndihmojnë shumë, sidomos çunat e rinj. Të them të drejtën, tani fillon vështirësa e kampionatit. Duhet të tregohemi më të qetë dhe të marrim ndeshjet sipas radhës”,- u shpreh Telushi.

Me një përzierje të talenteve me eksperiencën, Gega ka ndërtuar një ekip solid dhe shumë të fortë. Asani dhe Telushi kanë qenë dy lojtarët më të rëndësishëm për Partizanin, por pa harruar dhe portierin Hoxha, i cili ka bërë pritje shumë të rëndësishme.

Deri në këtë javë të 21-të të kampionatit, të besuarit e Gegës kanë shënuar 23 gola, duke grumbulluar plot 46 pikë, 8 më shumë se Kukësi i vendit të dytë. Fakt interesant është se këto 23 gola janë shënuar thuajse në mënyrë të barabartë në dy pjesët e lojës.

11 gola janë shënuar në pjesën e parë të takimeve, ndërsa 12 në fraksionin e dytë të lojës. Duket qartë se skuadra e Partizanit mund ta gjejë golin në çdo minutë të sfidës dhe nuk kanë një “minutazh të preferuar”.

Kjo lojë shumë e qëndrueshme ka bërë që “Demat” të marrin shumë pikë dhe të jenë të paparashikueshëm. Golat variojnë që nga minutat e para deri në ato të fundit, çka tregon se Partizani mund të godasë në çdo sekondë. Goli më i shpejtë është ai i Esat Malës përballë Skënderbeut në javën e 19-të, me mesfushorin që shënoi në minutën e 3-të të takimit.

Ndërsa goli më i vonë i shënuar nga të kuqtë kryesues, mban firmën e mesfushorit Bruno Telushi, i cili ndëshkoi ish-ekipin e tij, Flamurtarin, në minutën e 90′ të sfidës, e vlefshme për javën e pestë të kampionatit.

GOLI – “I shënova Devollit edhe kur drejtonte Kamzën në fillim të sezonit? Më tha edhe ai pas ndeshjes, “m’u bëre ferrë”. Për sa i përket golit, unë gjuaj mirë edhe me të majtën, nuk e kam problem kur gjuaj. Duhej pak fat, natyrisht, jam i lumtur për golin dhe sidomos fitoren”.

“Ndihem mirë për faktin që fiton ekipi, së pari. Golat e mi janë me vlerë vetëm nëse sjellin pikë, nëse do shënoja shumë gola në humbje nuk do kishte asnjë vlerë”.

GOLASHËNUES I KAMPIONATIT –  “Do ishte një kënaqësi, por janë sulmuesit ata që duhet të shënojnë më shumë dhe janë shumë më afër portës sesa unë, ndaj e shoh të vështirë të garoj për kreun e golashënuesve”.

KOLEGËT NË MESFUSHË –  “Unë ndihem mirë me të gjithë, por Hila është i preferuari, sepse kemi luajtur bashkë gjatë fazave të para. Megjithatë, edhe Atanda e Kote kanë bërë shumë mirë dhe më kanë ndihmuar shumë kur kanë luajtur krah meje në mesfushë”.

GOLAT   NGA DISTANCA – “Të them të drejtën, nuk e dija fare sa gola kam shënuar në Superiore deri tani, edhe për faktin se nuk më intereson shumë goli, ai është prioritet i sulmit. Nuk e kam të lehtë të depërtoj në zonë e të shënoj gola të thjeshtë, ndaj detyrohem e gjuaj nga distanca dhe dalin gola si ai sot”.

VENDI I PARË – “Nuk kam qenë asnjëherë më parë kaq gjatë në vendin e parë, është emocionuese dhe ndihesh super”,- u shpreh Telushi.

Vlonjati është ruajtur prej javësh që të mos ndëshkohej, por nuk e shmangu diçka të tillë dhe në takimin me verilindorët, duke e detyruar gjyqtarin Jorgji që t’i tregonte dhe kartonin e katërt të verdhë për këtë edicion që në pjesën e parë. Gjithsesi, gega nuk ka pse të shqetësohet pasi do të ketë në dispozicion një prej lojtarëve që këtë edicion ka qenë mjaft i rëndësishëm.

Jasir Asani nuk ishte prezent në takimin e djeshëm, për shkak kartonësh, por tani që e shleu pezullimin do jetë gati për të zbritur në fushë që nga minuta e parë në takimin e javës së ardhshme. Asani ka realizuar 4 gola këtë sezon dhe është shënuesi më i mirë për “demat” së bashku me Telushin.

DERBI – “Ndeshja derbi është maja e futbollit shqiptar. Është një javë shumë emocionuese dhe po përgatitemi mjaft mirë edhe pse u mundëm në Vlorë. Uroj të arrijmë ku duhet dhe të mos dalim pa pikë”.

HUMBJA ME FLAMURTARIN – “Ishte një ndeshje për t’u harruar. E kemi bërë analizën e ndeshjes. Besoj se do ta kalojë këtë takim siç kemi bërë edhe pas humbjeve me Skënderbeun, ku kemi reaguar dhe kemi treguar se grupi ka forcë”.

RITMI – “Të mbash këtë ritëm dhe vendin e parë është forca e grupit. Kemi dhe pika që bëhet diferenca, por është forca e grupit që po mbajmë këtë ritëm”.

KARTONËT – “Për kartonët kam folur dhe me shokët, që më pyesin pse kam qenë disi i ‘butë’. Që pas kartonit të tretë e kam pasur mendjen të mos marr karton, edhe pse unë e kam pasur të vështirë pasi dihet që forca ime është karakteri i fortë. E kam menduar derbin që prej 7 apo 8 ndeshjesh, që kur kam marrë kartonin e tretë të verdhë ndaj Teutës. Uroj që të mos ndëshkohem as në derbi”.

GOLI – “Uroj të shënoj, por për festim nuk besoj se të shkoj deri aty sa të marr karton”.

TIFOZËT – “Tifozët janë lojtari i 12-të. Kjo është një ndeshje që spektakli nuk duhet të mungojë. Stadiumi duhet të jetë plot dhe të na përkrahin, pasi janë të mrekullueshëm”

NDESHJA – “Skuadra luajti futboll, e mbajtëm kundërshtarin në portën e tij. Flamurtari shënoi me një episod që e dhuruam ne. Ndihem mirë për rikthimin, ka pak emocione, por nuk ka aspak probleme”.

Tifozët në pallatin pranë stadiumit? “Janë njerëzit e mi, kushërinjtë e mi. Nuk e dija se ishin ata që më ndiqnin nga pallati”.

GOLI I PËSUAR – “Ne ja dhuruam golin Flamurtarit, nuk prodhoi lojë dhe nuk na vuri në presion. E filluam pak keq, por golin ia dhuruam ne, ishte faji ynë, jo meritë e kundërshtarit”.

DERBI  – “Më shkon mendja dhe te derbi. Kam 5-6 ndeshje me 3 kartonë. Edhe sot u mundova të ruhesha për derbin që të mos mungoj. Ajo është ndeshja më e bukur në Shqipëri, Edhe në ndeshjen e parë përjetova emocione të paharrueshme”.

“Sezonin e shkuar pata disa vështirësi në aspektin fizik, sepse kisha mbetur mbrapa për shkak të dëmtimit, por këtë vit me ndryshimin e trajnerit dhe fazën e plotë përgatitore ndihem mirë.”

“Momenti i bisedës me Plakun para penalltisë? Së pari, nuk ishte penallti. Pastaj, Plakut i thashë që do ta humbiste penalltinë, sepse Alban Hoxha është mjeshtër i penalltive. Desha ta ngarkoj pak psikologjikisht.”

“Vuajtjet në pjesën e parë? Ndoshta Kamza na befasoi me lojën e saj, por edhe terreni nuk ishte aspak i mirë dhe u detyruam të luanim shumë me topa në ajër.”

“Partizani dhe titulli? Partizani futet me mendimin për të fituar çdo ndeshje, ndërsa titulli varet nga shumë gjëra, duhet edhe fat. Ne duam të fitojmë çdo ndeshje dhe më pas të shohim në fund. Do të jetë një kampionat i fortë, janë 5-6 skuadra mjaft cilësore dhe që do të luftojnë për vendet e para deri në fund.”

Një barazim që konsiderohet humbje për Belupon e Pero Pejiçit dhe Bruno Telushit, dy “ish”-ët e Superiores, që tashmë janë kthyer në titullarë fiksë tek ekipi kroat.

Sot më në fund e bëri sefte edhe Pejiç, i cili barazoi në minutën e 50-të me një goditje të shkëlqyer me kokë brenda zone, pas një krosi nga këndorja, vetëm 2 minuta pasi kishte humbur një rast ideal.

Në të 60-tën Ivanovski kaloi në avantazh Belupon, por në fund erdhi “dushi i ftohtë”.

Formacioni fitues nuk preket dhe Bruno Telushi ishte si zakonisht titullar në mesfushë. Vrap e presing konstant, ndeshja e zakonshme nga Telushi, që ka befasuar kroatët dhe po rezulton goditja e madhe në merkato.

E nisi nga stoli Pero Pejiç, por duke parë se goli nuk po dukej, ish-ylli i Superiores u fut pas pushimit.

Shënoi Cibalia e para, por dominimi i Slavenit ishte i madh dhe prodhoi dy gola, në minutat 70 e 78, i dyti autogol.

Nëntë pikë në 4 ndeshje, gjithçka perfekte për Slavenin, por tani vjen malorja: dy transferta rresht, ndaj Hajdukut në Split dhe Dinamos në Zagreb.

Elton Nika

Bruno Telushi është titullar fiks te Slaven Belupo dhe në dy ndeshjet e para në kampionatin kroat ka marrë vlerësime maksimale për paraqitjen e tij. Ish-kapiteni i kuqezinjve, i larguar pas gati shtatë vitesh nga Vlora, flet për eksperiencën e tij të re, duke pranuar se Flamurtari mbetet në zemrën e tij. Mesfushori beson se ka bërë një zgjedhje në kohën e duhur, duke vendosur të luajë në një kampionat jashtë kufijve të vendit dhe oferta e Slaven Belupos ishte e duhura. Mesfushori flet dhe për skuadrën e tij të re, kampionatin kroat dhe ndryshimet që ka hasur.

-Dy ndeshje si titullar te Slaven Belupo, a është ky një tregues besimi për ju?

Fillimisht faleminderit gazetës suaj për interesimin. Sa i përket dy ndeshjeve të para, jam i kënaqur për besimin që kanë treguar ndaj meje dhe padyshim që këtë dua t’ua shpërblej vetëm në fushën e lojës. Fatkeqësisht nuk e kemi nisur me fitore, por kemi rikuperuar gjithçka në javën e dytë dhe duhet të vijojmë në këtë rrugë. Mendoj se edhe paraqitjet kanë qenë të mira, duke parë edhe vlerësimet që kam marrë personalisht .

-Pse zgjodhët pikërisht Slaven Belupon për të vijuar karrierën tuaj?

Kishte ardhur momenti që të luaja pas gati shtatë vitesh në një tjetër kampionat. Zgjodha Kroacinë edhe falë interesimit të vijueshëm që Slaven Belupo tregoi ndaj meje, një interesim që kish nisur disa kohë më parë dhe pastaj siç e dini u konkretizua me firmosjen e kontratës. Për dy vite do të jem pjesë e kësaj skuadre në kampionatin kroat dhe mendoj se ishte zgjedhja e duhur.

-A po ia dilni të ambientoheni shpejt, pasi normalisht duhet njëfarë kohe që të ndodhë kjo?

Jam ndjerë i vlerësuar dhe kjo është thelbësore kur mbërrin te një skuadër e re. Ambientimi ka qenë i shpejtë dhe në skuadër më kanë pritur mjaft mirë që në momentin e parë kur kam mbërritur. Kjo më ka ndihmuar dhe tashmë mendoj vetëm për fushën bashkë me skuadrën.

-Cilat janë synimet që ka këtë vit skuadra juaj?

Këtë vit synojmë që të radhitemi mes katër ekipeve të para. Ky është objektivi i këtij sezoni dhe duke parë grupin e lojtarëve mendoj se është një objektiv që mund të arrihet. Natyrisht që duhet shumë punë, pasi ka shumë konkurrencë dhe çdo ndeshje ka vështirësitë e veta. Gjithsesi, unë mendoj se i kemi mundësitë për të arritur diçka të rëndësishme, pse jo ndoshta diçka më shumë se kaq.

-Çfarë ndryshimi ka mes kampionatit shqiptar dhe atij kroat?

Ka disa ndryshime. Kampionati kroat ka më shumë rivalitet, është më i fortë, më lart në cilësi, ndërkohë dhe stërvitja bëhet në kushte mjaft  cilësore. Mendoj se këto janë ndryshimet. Rivaliteti për të arritur objektivat, që nga titulli e deri tek Europa apo qëndrimi në elitë, përfshin disa skuadra.

-Një sy e keni edhe në Vlorë. A i keni ndjekur zhvillimet e fundit te Flamurtari?

Padyshim, Flamurtari është në zemrën time. I falënderoj të gjithë për mbështetjen që më kanë dhënë gjatë kësaj kohe. Shpresoj dhe besoj shumë te një sezon sa më cilësor për Flamurtarin. Ajo skuadër, ata tifozë, ai qytet e meriton.

Së fundmi, a do shohim gola të tillë si ai në stërvitje edhe në kampionat?

Po, pse jo. Pas stërvitjes, edhe në ndeshje zyrtare e besoj shumë se do shënoj gola të tillë. Pastaj edhe te Flamurtari i kam shënuar disa. Përtej shakasë, shpresoj të vijë shpejt goli edhe në kampionat.

Mesfushori vlonjat ishte sërish titullar, ashtu si javën e shkuar në Rijeka, duke luajtur një ndeshje mjaft pozitive dhe duke i shkuar pranë golit të parë kroat me një predhë nga distanca që në minutat e para të ndeshjes.

SADIKU – Legia e Varshavës ka pritur sot Koronën në kampionatin polak dhe sërish nuk ka fituar, sepse është ndalur te barazimi 1-1. Në fakt, Legia ka menduar vetëm për ndeshjen e mesjavës së ardhshme në Champions, në Astana, ndaj shumë titullarë ishin pushim. Armando Sadiku ishte titullar, por këtë radhë nuk pati fat. Në minutën e 29-të Sadiku shpërdoroi një shans të mirë, në minutën e 42-të i shkoi shumë pranë golit, ndërsa në pjesën e dytë nuk pati raste dhe u zëvendësua në mesin e saj.

Në fund Legia shënoi, por 6 minuta pas golit të shënuar nga Kuharçik që zëvendësoi Sadikun, Korona gjeti barazimin, duke e vënë në vështirësi të mëdha Legian për disa minuta.

Mesfushori i fuqishëm ka firmosur një kontratë 2+1, duke u larguar sërish nga Shqipëria, pas disa vitesh të suksesshme te Flamurtari.

26-vjeçari ka luajtur te Flamurtari në 6 sezonet e fundit, pas kthimit nga Italia, si dhe u bë pjesë e Shqipërisë U-21 në vitin 2011, ndërsa më pas u bë edhe kapiten i Flamurtarit.

Në sezonin e fundit Telushi shënoi 7 gola në 37 ndeshje mes kampionatit e kupës, duke shkëlqyer dhe duke u konfirmuar si një lojtar lider në Vlorë, aty ku lë zemrën e vet, por siç thotë ai vetë, “herët a vonë do të kthehem në shtëpi, pasi në Shqipëri Flamurtarin nuk e ndërroj me asnjë klub”.

Tashmë 26-vjeçari braktis sërish qytetin e vendlindjes për një aventurë të re, në Kroaci, ku sot do të firmosë një kontratë dy-vjeçare me Slaven Belupon.

Me një postim të shkurtër në Facebook, Telushi është përshëndetur me tifozët vlonjatë, me të cilët ka pasur një marrëdhënie të shkëlqyer gjithë këto vite.

“Me këtë status dua të falënderoj gjithë tifozët. Dua t’iu them faleminderit për gjithçka. Dua të falënderoj Flamurtarin e zemrës sime. Nga sot nuk do të jem më pjesë e ekipit, pasi do të largohem në kampionatin kroat. Respekte për ju. Bruno Telushi, Ushtari juaj”.

Bruno Telushi do të nënshkruajë për dy vite në kampionatin kroat tek skuadra e Slaven Belupos. Mesfushori vlonjat, pas gjashtë sezonesh si titullar te vlonjatët, largohet për të provuar një tjetër eksperiencë, teksa Telushi zgjodhi ofertën kroate para atyre të bëra nga ekipe të Superiores, ku më së shumti këmbëngulte Kukësi. “Sport Ekspres” ishte  e para që paralajmëroi largimin e Telushit drejt Kroacisë, ndërsa vetë mesfushori sqaron tashmë edhe detajet e transferimit në një intervistë të dhënë për gazetën.

-Bruno, e mbyllët me Flamurtarin dhe tanimë do luani në kampionatin kroat. Si e shikoni këtë lëvizje?
Po, tashmë e kam përfunduar aventurën time me Flamurtarin. Të dielën udhëtoj drejt Kroacisë, ndërsa ditën e hënë hedh firmën në kontratë. Ishte një lëvizje që vjen pas disa vitesh në kampionatin shqiptar dhe padyshim që doja të provoja një tjetër eksperiencë. Transferimi te Slaven Belupo është zgjedhja e duhur, të paktën kështu mendoj. Shpresuar që tani gjithçka të shkojë sa më mirë.
-Cilat janë kushtet e kontratës tuaj?
-Do të firmos një kontratë për dy sezone tek skuadra e kampionatit kroat. Është një skuadër që në kampionatin shqiptar njihet mirë, ndërsa sezonin e kaluar e mbylli ne vendin e gjashtë në tabelën e renditjes. Shpresoj që të jap më të mirën atje dhe të shkojë gjithçka sipas planit.
-Si lindi ideja e këtij transferimi?
-Gjithçka ishte në dorën e ish-lojtarit të kombëtares, Adrian Aliajt. Foli me skuadrën kroate dhe ata u interesuan për mua, rolin apo mënyrën e lojës. Ai ishte personi që bëri gjithçka të mundur dhe për këtë e falënderoj për vlerësimin ndaj meje edhe tek skuadra e Slaven Belupos. Tashmë më mbetet mua në dorë. Gjithçka nisi në muajin prill dhe tashmë u konkretizua me sukses.
-Mund të na zbuloni ndonjë detaj tjetër të këtij transferimi?
Nëse i referoheni atyre financiarë, preferoj t’i mbaj për vete. Gjithçka është diskutuar mes meje, Aliajt si menaxher i imi dhe klubit kroat. Vlerat që janë folur, po e them se nuk ka asgjë të vërtetë. Këtu nxitojnë shumë, kur bëhet fjalë nga ana financiare, madje duke vendosur vlera që nuk janë folur ndonjëherë.
-Gjatë kësaj periudhe patët edhe oferta të tjera. Kush ngulmoi më shumë?
-Po e vërtetë, Kukësi tentoi më shumë se të gjitha. Skuadra kampione më donte dhe padyshim që i falënderoj për vlerësimin. Veç Kukësit ishte dhe Partizani, por madje edhe Tirana. Megjithatë, në fund zgjodha të luaj jashtë.
-Pse nuk pranuat ofertën e Kukësit, por u larguat jashtë?
– E thashë se i falënderoj për interesimin dhe vlerësimin, por doja të provoja veten në një kampionat të huaj dhe prandaj zgjedhja ime ishte jashtë kufijve të vendit. Ishte një zgjedhje e menduar mirë dhe jo e çastit. Çdo lojtar dëshiron të luaj njëherë jashtë vendit në një tjetër kampionat dhe nuk mund ta refuzoja.
-Në mes ishte edhe Flamurtari…
Flamurtari mbetet shtëpia ime, ndërsa tani largohem si lojtar i lirë, pasi e kisha mbyllur kontratën. Megjithatë, rikthimi në Vlorë nuk përjashtohet asnjëherë. Flamurtari është klubi im dhe padyshim që në kampionatin shqiptar mbetet zgjedhja e parë. Dua t’i falënderoj të gjithë, që nga drejtuesit dhe deri tek të gjithë tifozët.

Ditën e djeshme Sport Ekspres zbuloi bisedimet në Kroaci dhe gjërat kanë ecur shumë shpejt.

Mesfushori vlonjat konfirmon për gazetën se tashmë ka arritur marrëveshjen dhe të hënën do të niset në Kroaci, për të kryer vizitat mjekësore dhe për të firmosur.

Duhet kujtuar se kampionati kroat nis që në korrik, ndaj Telushi nuk do të ketë kohë të pushojë.

Slaven e mbylli në mesin e tabelës sezonin e fundit dhe aty aktivizohet edhe mbrojtësi i Kosovës Fidan Aliti.

Elton Nika

Bruno Telushi ende nuk ka vendosur se ku do ta vijojë karrierën e tij, ndërkohë që është folur shumë për një kalim të tij drejt Kukësit, apo për qëndrimin te Flamurtari. Për mesfushorin vlonjat ka tashmë edhe një ofertë nga kampionati kroat. Kapiteni i Flamurtarit pritet që shumë shpejt të vendosë për të ardhmen e tij dhe në këtë momente ofertat nuk i kanë munguar. E fundit është pikërisht nga Kroacia, një kampionat ku jo pak herë lojtarët shqiptarë kanë qenë protagonistë me lojën e tyre. Gjithsesi, duket se për lojtarin është ende shpejt për të vendosur.

Ai pritet të zgjedhë mes ofertave të bëra,ku në mes janë Kukësi me trajnerin Gjoka, i cili e njeh mjaft mirë lojtarin dhe kërkon ta ketë pjesë të skuadrës së tij. Natyrisht kontributin e tij e do edhe Flamurtari, skuadër me të cilën Telushi ka luajtur deri tani në kampionatin shqiptar dhe është skuadra e qytetit të tij. Gjithsesi jemi në kohë merkatoje dhe në këtë periudhë ofertat janë normale. Pas largimit të Donjet Shkodrës, i cili u prezantua te Skënderbeu, një tjetër lojtar si Telushi mbetet në qendër të merkatos.

Pak kohë më parë për Telushin u fol edhe rreth një interesimi të Partizanit, por duket se më konkretët janë Kukësi dhe skuadra kroate, sigurisht duke mbetur në mes edhe Flamurtari.

KUKËSI

Telushi mbetet një dëshirë e vjetër e kuksianëve, të cilët kanë shfaqur interes edhe më parë për mesfushorin vlonjat. Situata duket ndryshe, sepse më parë një nga problemet kryesore ka qenë fakti se futbollisti ka qenë nën kontratë, ndërsa tani është i lirë. Një tjetër arsye, që mund ta bindë 26-vjeçarin të zgjedhë kampionët, është trajneri Ernest Gjoka, me të cilin ka raporte të mira, pasi kanë punuar së bashku te Flamurtari. Palët pritet të ulen në bisedime, por është presidenti Safet Gjici ai qe duhet të gjejë kohën për të diskutuar me ish-kapitenin e Flamurtarit. Angazhimet e tij politike e kanë reduktuar disi kohën, por si kampion i Shqipërisë dhe pjesëmarrës në Champions League, tashmë gjërat duhet të vihen në lëvizje, sepse ndeshjet e para janë në fillimin e muajt tjetër.

PARTIZANI

Pas Kukësit, interesim për Telushin ka shfaqur edhe Partizani. Mësohet se klubi i kuq ka pasur kontakte me mesfushorin, madje duke i bërë edhe një ofertë konkrete për t’iu bashkuar të kuqve, duke nisur nga Kupat e Europës. Në fakt, oferta e parë në drejtim të tij ka qenë nga Kukësi, por në mes qëndrojnë edhe Partizani dhe sigurisht Flamurtari.

ELTON NIKA

“Mendoj se i kishim të gjitha mundësitë dhe duhej që ta zgjidhnim më përpara situatën e qëndrimit, konkretisht në dy ndeshjet në shtëpi me Partizanin dhe Laçin, ku morëm vetëm dy pikë. Megjithatë, fatmirësisht arritëm të sigurojmë objektivin minimal për qëndrimin në Superiore, në një sezon që i ka patur të gjitha brenda tij. Dua të them se grupi i lojtarëve ka qenë mjaft cilësor dhe nëse do të kishim gjashtë pikët më shumë, mund të them se sot do të ishim në vend të katërt. Nëse ato pikë nuk do të ishin hequr, të jeni të bindur se nuk do të kishim shkuar në këtë situatë. Ky ka qenë një kampionat me të vërtetë i veçantë, me skuadra që ishin brenda objektivave deri në javën e fundit të kampionatit, si rrallëherë në këto vitet e fundit. Shikoni rënien e Tiranës, një emër i madh që largohet. Edhe unë dua t’u bashkohem zërave për një strukturë të kampionatit me 14 skuadra. Nuk është vetëm Tirana, por shikoni: jashtë Superiores janë disa skuadra, si Bylis, Besëlidhja, Dinamo apo Apolonia, skuadra që shumë mirë mund të ishin në elitë. Ka edhe më keq, është Elbasani në Kategorinë e Dytë. Për këtë u bashkohem zërave dhe bëj thirrje për një kampionat me 14 skuadra”, shprehet Telushi, që në fund flet edhe për të ardhmen, teksa vihet re që mesfushori vlonjat ende nuk ka vendosur se çfarë do të bëjë.

“Do të qëndroj pushim disa ditë, pasi kemi nevojë të gjithë, ndërsa për të ardhmen nuk di se çfarë të them. Akoma nuk kam vendosur asgjë dhe nuk përjashtoj asnjë mundësi”, përfundon Telushi prononcimin e tij.