Tanguy Ndombele

Priti 18 muaj, Totenhem tund themelet e merkatos me këtë blerje

Sport Ekspres — Tue, 02 Jul 2019 16:11:46 +0000

Më në fund Totenhem bën një blerje të madhe. Tangui Ndombele është lojtari më i ri i klubit londinez. 22-vjeçari do të zbresë në “Tottenham Stadium” për shifrën rekord të 73 milionë eurove, që shkojnë në arkat e Olimpikut të Lionit.
Mesfushori ka udhëtuar drejt Londrës, ku ka kryer vizitat paraprake. Para pak minutash Totenhem ka lançuar blerjen e talentit francez. Tangui firmos kontratë 6-vjeçare, që e mban të lidhur me anglezë deri nv citin 2025. Ndombele është blerja e dytë e “Spurs-ave”, pas 18-vjeçarit Xhek Klark.

Për francezin mund të themi se është afrimi i parë, pasi Klark do të vazhdojë si i huazuar te Lids Junajtid. Ndombele është operacioni më i shtrenjtë në historinë e skuadrës së drejtuar nga Poçetino. Ai pritet të jetë një pikat kryesore të londinezëve, duke formuar një treshe të frikshme me Eriksen dhe Dele Ali.

?? #WelcomeTanguy #COYS ?? #THFC pic.twitter.com/P0S9JJyfsV

— Tottenham Hotspur (@SpursOfficial) July 2, 2019

Arrihet marrëveshja, Totenhemi i plotëson dëshirën Poçetinos

Sport Ekspres — Mon, 01 Jul 2019 09:39:46 +0000

Vjet nuk kryen asnjë lëvizje, por kjo është një verë ndryshe për Totenhemin. Tangui Ndombele është objektivi i madh i nënkampionëve të Evropës për mesin e fushës.

“L’Equipe” raporton se akordi mes Totenhemit dhe Lionit është arritur mbi bazën e 72 milionë eurove, nga të cilat 62 do të paguhen menjëherë dhe 10 të tjera në formë bonusesh.

Tani ka mbetur për t’u përcaktuar vetëm rroga e 22-vjeçarit dhe drejtuesit e Spurs po negociojnë me agjentin e mesfushorit francez. Ndombele ishte një ndër emrat më të kërkuar në merkato, por Mauricio Poçetino e kërkoi me ngulm dhe arriti të bindë klubin e Lionit.

Ndombele çmend Evropën, një ankand gjigant ka nisur

Sport Ekspres — Thu, 13 Jun 2019 15:38:02 +0000

Musa Dembele u largua nga në merkaton e dimrit drejt Kinës dhe Totenhemit i duhet një mesfushor që të mbyllë vendin e lënë bosh nga belgu. Tangui Ndombele është një nga talentet francezë që ka mrekulluar këtë vit me Lionin. 22-vjeçari ka treguar cilësi të larta dhe kërkohet me ngulm nga disa gjigantë evropianë.

Së fundmi njoftohet se Totenhemi do të hyjë në garë nëpërmjet një oferte joshëse. Ata duhet të mundin interesin e dy ekipeve të Mançesterit dhe Juventusit. Presidenti i Lionit e ka bërë të qartë se kush bën ofertën më të mirë do të marrë mesfushorin.

Ai ka qartësuar edhe se nëse ofertat e klubeve të interesuara janë të ngjashme, klubi që do të përfitojë është Juventusi. Kështu, Totenhem duhet të hapë thesin nëse i do vërtetë shërbimet e talentit francez.

DENIS LALA

Juve do yllin e Lionit, dy ekipe angleze i prishin punë

Sport Ekspres — Sun, 02 Jun 2019 11:53:12 +0000

Juventus dëshiron të formojë një mesfushë më konkuruese se ç’ishte kjo e këtij sezoni. Ndombele i Lionit është një nga objektivat, të cilin “Zonja” e ka vënë në shënjestër që në merkaton e janarit. Vlera e tij në dimër ishte 70 milionë euro. Çmim që klubi italian mund ta përballonte. Gjërat tani kanë ndryshuar. Interesi i shtuar i Totenhem dhe Mançester Junajtid ka sjellë rritjen e ndjeshme të çmimit të lojtarit.

Si shkak Juventusi mund të heqë dorë nga blerja e tij. Ata nuk janë të gatshëm të ofrojnë një shumë prej 100 milionë eurosh, sa kërkon Lioni. Kështu, Paratiçi dhe Nedved do të shohin për lojtarë të tjerë që ofron tregu. Por mund të ketë një zgjidhje edhe për të siguruar paratë e blerjes së 22-vjeçarit. Nëse Pjaniç shitet te Reali, në Torino do të vinte një dorë e mirë të ardhurash.

“Dua t’ia shes Juves, ju tregoj shkakun! Pogba? Ndombele më i kompletuar”

Sport Ekspres — Tue, 30 Apr 2019 09:19:56 +0000

Tangu Ndombele është një nga lojtarët më të mirë të Lionit. 22-vjeçari po kërkohet nga klubet më të mëdha të Europës, ndërsa presidenti i tij ka një dëshirë. Mesfushori do të largohet nga ekipi francez në fund të sezonit. Ai ka arritur të grumbullohet edhe nga kombëtarja e Francës, ndërsa çmimi i kartonit sillet rreth shumës 80 milionë euro.

Interesimi i madh mund të rrisë çmimin dhe Lioni po fërkon duart. Zhan-Mishel Aulas ka folur për “Tuttosport”, duke treguar dëshirën e tij. Nëse ofertat janë të barabarta, Ndombele do të transferohet te Juventusi.

Presidenti i Lionit shpjegon arsyen dhe e mbyll me një krahasim midis “yllit” të tij dhe Pol Pogba.

“Është e vërtetë që Juventusi është vënë pas Ndombele, por në garë janë edhe PSG dhe dy klubet e Mançesterit. Mua do të më pëlqente ta shihja Tangun te Juventusi bashkë me Pjaniç, një lojtar të cilin e zbuluam dhe e rritëm ne e me të cilin kam mbetur shumë i lidhur. Të shohim se çfarë do të ndodhë. Nuk është çështje parash.

Parametrat ekonomike janë prioritet në shitjen e lojtarëve, po do ja shes lojtarin Anjelit, nëse ofertat janë të barabarta. Pogba? Pol ishte drita kryesore e Francës në Kupën e madhe të Botës që fituam, por, siç është normale, ai ka paguar pak lodhjen e madhe. Ndombele ka qenë më deçiziv këtë sezon dhe është më i kompletuar sipas mendimit tim”, përfundon kreu i klubi të Lionit.

Garë e fortë për mesfushorin francez, Juventusi “djeg” rivalët

Sport Ekspres — Sat, 06 Apr 2019 13:55:22 +0000

Klubet e mëdha kanë nisur prej kohësh punën për merkaton e verës. Lëvizje të shumta priten të ndodhin në fund të sezonit. Juventusi është një nga klubet më aktive. Bardhezinjtë pëlqejnë shumë mesfushorin e Lionit, Tangi Ndombele.

Për francezin ka një konkurrencë të fortë. Lista kryesohet nga PSG, Liverpuli, Çelsi dhe dy klubet e Mançesterit. Megjithatë, Juventusi është një hap parë të gjithëve. Sipas raportimeve të “L’Equipe”, Fabio Paratiçi ka nisur kontaktet prej kohësh me agjentët e lojtarit.

Tangi Ndombele

Drejtori sportiv i klubit italian ka udhëtuar disa herë drejt kryeqytetit italian dhe negociatat janë në rrugë të mbarë. Lioni e ka bërë të qartë çmimin e mesfushorit. Ai vlen 80 milionë euro.

“Zonja e Vjetër” kërkon Ndombele edhe për të zëvendësuar njërin prej Kedirës dhe Pjaniç. Gjermani mund të largohet në fund të sezonit, ndërsa për boshnjakun ndryshon situata. Juventusi nuk kërkon ta shesë, por Reali e kërkon dhe një ofertë tunduese e Florentino Perez mund të transferojë Pjaniç në Madrid.

Taktika e Juventusit, Paratiçi nis sulmin për mesfushorin francez

Sport Ekspres — Sun, 20 Jan 2019 09:40:38 +0000

Merkato e janarit nuk është mbyllur ende dhe Juventus po tenton të bëjë një tjetër goditje. Bardhezinjtë kanë arritur akordin me Aron Ramsejn, por mbetet të shihet nëse uellsiani do të zbarkojë në Torino në fund të sezonit me parametra zero, apo Juvja do të paguajë diçka tek Arsenali për të ofruar menjëherë mesfushorin në ekip dhe për t’i plotësuar dëshirën trajnerit Alegri.

Por një tjetër emër ka dalë në skenë dhe ai është Tangi Ndombele. 22-vjeçari i Lionit luan në rolin e qendërmesfushorit dhe Paratiçi ka programuar një takim me agjentin e tij në javën e ardhshme.

Konkurrenca për lojtarin, i cili debutoi në tetor me kombëtaren franceze, është e madhe dhe për të interesohen: Inter, Roma, Mançester Siti, Arsenal dhe Totenhem. Lioni rreh lart dhe kërkon 80 milionë euro, me shpresën që të hapet një ankand për yllin e mesfushës dhe çmimi të rritet.

Nga ana tjetër, Juventusi është gati të nisë sulmin për Ndombele dhe të arrijë akordin me agjentin për të bindur lojtarin të zgjedhë ekipin e Alegrit. Ky është plani i kampionëve të Italisë dhe pastaj do të nisin tratativat me klubin e Lionit për të arritur marrëveshjen përfundimtare.