Supercoppa Italia

Romanjoli: Shkojmë për luftë, Juventusi e mori mesazhin… dy vite më parë!

Sport Ekspres — Wed, 16 Jan 2019 08:01:48 +0000

Milani dhe Juventusi do të diskutojnë mes tyre Superkupën e Italisë, pasditen e sotme në kryeqytetin e Arabisë Saudite. Lidhur me takimin ka folur për mediat kapiteni i kuqezinjve, Alesio Romanjoli, sipas të cilit, ekipi i tij i ka të gjitha mundësitë për të fituar, pasi është një ndeshje teke dhe çdo gjë mund të ndodhë.

“Kemi ndjesi pozitive, është një atmosferë fantastike këtu dhe ndihemi mirë për të luajtur për trofeun. Jemi gati të japim gjithçka për të fituar. Kemi respekt për Juventusin, të cilët janë padyshim më të fortët në Itali, por besojmë në aftëitë tona gjithashtu dhe e dimë se ndodh gjithçka në një ndeshje teke”.

“Të jesh këtu është një test i vërtetë. Ne fituam dy vite më parë në Doha dhe ata janë të paralajmëruar që dhe ne jemi një ekip i fortë dhe do të shkojmë për të luftuar. Mendoj që jemi ekip më i fortë nga çfarë kemi qenë në Doha. Duhet të jemi të përqendruar dhe mos të lëmë asgjë të na rrëshqasë”.

Paketa, Ronaldo dhe Milan-Juventus: Tiago Silva “zbërthen” Superkupën

Sport Ekspres — Tue, 15 Jan 2019 21:54:44 +0000

Tiago Silva është një ndër lojtarët, i cili për aq kohë sa ishte pjesë e Milanit, u shndërrua në një simbol për klubin dhe për tifozët. Gjithsesi, braziliani e vijoi karrierën e tij në Francë, me PSG, ku dhe luan aktualisht. Gjithsesi, së fundmi mbrojtësi ka folur për mediat italiane, në lidhje me Supërkupën e Italisë, e cila do të luhet nesër midis Juventusit dhe Milanit.

34-vjeçari ka folur në lidhje me gjendjen aktuale të ekipit kuqezi, si dhe për Gonzalo Higuain dhe afrimin e ri, Lukas Paketën. Ndër të tjera, Tiago Silva tregoi dhe ekipin për të cilin bën tifo, si dhe për finalen e mundshme të UEFA Champions League këtë sezon, ku sipas brazilianit Juventusi shihet si rivali më i fortë.

“Do të jetë një ndeshje e fortë dhe shpresoj që të fitojë Milani. Higuain ka cilësi të pabesueshme dhe shpresoj që, te jetë i përqendruar për të mundur Juventusin dhe fituar këtë trofe që do të jetë thelbësore për besimin e grupit.

Paketa? Është një lojtar që ka shumë personalitet dhe shumë besim në vetvete. Kur gjërat shkojnë mirë është më e lehtë për lojtarët, edhe pse fanella e Milanit është e rëndë.

Kristiano Ronaldo?Ishte pikërisht ai që i mungonte Juventusit. Është një lojtar që ka fituar shumë dhe ka ende dëshirë për të fituar. Ne duhet të falënderojmë Ronaldon për mënyrën se si ai e kupton futbollin dhe se si ai luan.

Finale Juventus-PSG? Ne mendojmë kështu, sepse Juve ndihet më e fortë dhe është një nga favoritët. Gjithashtu, kanë përvojë dhe një Ronaldo më shumë, ne shpresojmë ta takojmë në finale”.

Milani pa yllin e sulmit, Paketa është anti-Juventus

Sport Ekspres — Sun, 13 Jan 2019 12:21:19 +0000

Milani dhe Juventusi do të përplasin brirët në Superkupën e Italisë, e cila do të luhet pasditen e 16 janarit në orën 18:30. Vendi që do të presë ndeshjen do të jetë kryeqyteti i Arabisë Saudite. Ekipi i Milanit një ditë më parë arriti të kualifikohej më tej në Kupë, teksa eliminoi Sampdorian dhe menjëherë pas takimit, është nisur drejt Arabisë.

Gjithashtu, trajneri Gatuzo ka shpallur dhe të grumbulluarit në kuadër të përballjes. Lukas Paketa, pas ndeshjes së mirë të luajtur në “Marasi”, pritet përsëri titullar, teksa mungesa më e madhe është padyshim Suso Ferdandez. Spanjolli u ndëshkua me karton të kuq në ndeshjen e fundit të luajtur në Serie A dhe do të mungojë.

Ivan Striniç jep përsëri lajme të mira, teksa pas grumbullimit në Kupë, është përsëri me ekipin dhe për ndeshjen ndaj bardhezinjve. Mungesa të tjera nuk ka për ekipin e Gatuzos, përveç të dëmtuarve, ku vetëm Lukas Bilja vlen për t’u përmendur, që po riaftësohet me ritme të shpejta dhe pritet që ndaj Napolit në fund të muajit të jetë gati.