Në ditëlindjen e një legjende, Meta: Aty kuptoje fuqinë e sportit!

Sport Ekspres — Thu, 23 May 2019 07:48:22 +0000

Sulejman Demollari ka festuar para pak ditësh 55-vjetorin e lindjes, ndërkohë që ditën e djeshme ai ka organizuar edhe një drekë me ish-futbollistë, legjenda të këtij sporti në vendin tonë. I pranishëm ishte edhe presidenti i FSHF-së, Armand Duka, ndërsa i ftuari special mund të konsiderohet padyshim presidenti i Republikës së Shqipërisë, Ilir Meta.

Ky i fundit është larguar nga ai takim me mbresa dhe i ka ndarë ato me të gjithë përmes një postimi në rrjetet sociale. “I lumtur të isha dje pjesë e një feste të veçantë me familjen dinamovite, me rastin e 55-vjetorit të Sulejman Demollarit të madhërishëm. Kaq shumë yje dhe kapitenë të Dinamos dhe Kombëtares në një ambient aq të ngushtë dhe modest nuk kam parë, nga Iliaz Ceco te Mujo Targaj”, shkruan Meta fillimisht.

Më tej ai vijon: “Kënaqësi të takoja për herë të parë Ilir Pernaskën, i cili kishte ardhur nga jashtë për të ndarë gëzimin dhe kujtimet e kohëve të lavdishme me shokët e ekipit. S’mund të mungonin dhe Ballgjini me Markon e Faruk Sejdinin. Të gjithë e ndjenin mungesën e pazëvendësueshme të Zërit e Luarasit, dhe nderimi për kujtimin e tyre ishte emocionues. E pamundur të mungonte Halit Gega, i cili mori shumë urime për suksesin e fundit të vëllait, Skënder Gega.

Ky ishte momenti kur ndihej më mirë gjiganti Perlat Musta. Kishte dhe ‘kundërshtarë’ të tjerë tepër të rrezikshëm si Shkëlqim Muça, Sokol Kushta, Hysen Zmijani, Millan Baci etj. Aty kuptoje fuqinë e sportit dhe forcën e ekipit. I nderuar të merrja nga Demollari fanellën e tij me dy njësha, pasi ai ka qenë njësh edhe në fushë edhe jashtë saj, por dhe frymëzim për shumë fëmijë e të rinj për t’u bërë si ai”.

Bakaj-Demollari, një gjyq dhe 20 mijë euro në mes

Sport Ekspres — Fri, 21 Dec 2018 21:13:43 +0000

Elis Bakaj është pjesë e Shaktar Soligorskit në Bjellorusi dhe prej një viti fantazisti kryeqytetas nuk po përballet më me rivalë shqiptarë, por ndërkohë për të disatën herë përballet në gjyq me Sulejman Demollarin, i cili ishte njeriu që e transferoi në janarin e vitit 2011 te Dinamo e Bukureshtit.

Nga ajo që mëson “SportEkspres.com”, kjo është e katërta herë që Demollari ngarkon një studio ligjore për t’i shkuar deri në fund kësaj çështjeje. Në tri rastet e mëparshme gjykatësit e kanë pushuar çështjen dhe tanimë legjenda e Dinamos dhe kombëtares ka nisur sërish betejën.

Më datë 17 dhjetor është zhvilluar edhe seanca e parë e gjyqit dhe mbetet për t’u parë se çfarë do të ndodhë. Përplasja, nëse mund të quhet e tillë, ka nisur që pas transferimit të Bakajt te Dinamo e Bukureshtit në Rumani dhe Demollari ka vënë në dispozicion të juristëve që po merren më këtë çështje marrëveshjen e tij me 31-vjeçarin.

Në vitin 2014 pretendimet e Demollarit kapnin shumën e 20 mijë eurove, teksa Gazeta Shqiptare në shtator të atij vitit shkruante se Gjykata e Shkallës së Parë Tiranë kishte paraqitur këtë objekt: “Detyrimin e të paditurit të paguajë shumën prej 20.000 (Njëzetmijë) euro si më poshtë: Shumën e detyrimeve kontraktuale të papaguara që lidhen me detyrimet e lindura nga kontrata e bashkëpunimit e datës 4.2.2011, të hartuar nga notere Majlinda E. Demollari, me nr 961 rep. Dhe 330 kol., të firmosura nga palët, në shumën 20.000 (Njëzetmijë) euro, që përfaqëson 12% të pagës së përfituar për periudhën mars 2011-korrik 2014”.