Stefano Sensi

VIDEO | Goli i parë i sezonit, Interi e nis me një perlë të Sensit

Sport Ekspres — Sun, 14 Jul 2019 16:08:14 +0000

Interi po zhvillon ndeshjen e parë nën drejtimin e Antonio Kontes. Zikaltrit po luajnë një takim miqësor kundër zviceranëve të Luganos, ku golin e parë e ka shënuar mesfushori i blerë së fundmi nga Sasuolo, Stefano Sensi.

Në minutën 25-të futbollisti shtatshkurtër kreu një goditje fantastike me të djathtën që nuk i la asnjë mundësi portierit kundërshtar.

First #Inter 2019/20 Line-Up

Handanovic (c)
D'Ambrosio
de Vrij
Skriniar
Candreva
Sensi
Brozovic
Gagliardini
Perisic
Esposito
Longo#LuganoInter

— Alessandro Rimi (@Ale_Rimi) July 14, 2019

“Luaj si Ksavi, mendoj si Konte”, njihuni me mesfushorin e Interit

Sport Ekspres — Wed, 10 Jul 2019 17:08:54 +0000

Stefano Sensi ishte pranë transferimit te Milani, por në fund u vesh zikaltër. Interi veproi shpejt, plotësoi kërkesat e Sasuolos dhe arriti marrëveshjen me 23-vjeçarin. Mesfushori ka folur për “Gazzetta dello Sport”, duke zbuluar frymëzimin spanjoll, më saktë atë katalanas.

Ksavi është idhulli i tij, ndërsa Barcelonën shpreson ta ketë përballë në Champions. Më pas Antonio Konte dhe defekti i Interit. Sensi beson fort te trajneri i ri dhe nuk i kursen thumbimet në fund për kuqezinjtë e Milanit.

“Interi është ashtu siç e kisha imagjinuar. Po nis një jetë të re, por më duket sikur ndodhem këtu prej vitesh. Idhulli im ka qenë gjithmonë Ksavi. Më duket si një person i familjes. Jam rritur duke parë ndeshjet e tij, studioja videot e tij dhe besoj se në stilin tim ka diçka nga ai lloj futbolli. Kam bërë gjithmonë tifozllëk për Barcelonën dhe shpresoj të luajmë kundër tyre në Champions.

Mendoj se Interi ka vuajtur për mungesë të mentalitetit fitues. Në këtë sens mendoj se Konte mund të bëjë kthesën e nevojshme. Interi ka gjithçka për t’u rikthyer te fitimi i trofeve që këtë sezon. Milan? Bëra zgjedhjen më të mirë dhe këto ditë këtu ma kanë konfirmuar diçka të tillë. Tani dua vetëm që të bashkohet edhe Barela me ne“,përfundon lojtari i kombëtares italiane.

Interi hap merkaton, përforcimi i parë vjen në mesfushë

Sport Ekspres — Fri, 28 Jun 2019 16:51:25 +0000

Interi hap merkaton e verës me blerjen e mesfushorit të Sasuolos, Stefano Sensi. Sipas “Sky Sports”, zikaltrit kanë arritur akordin me lojtarin dhe klubin emilian. Zyrtarizimi i transferimit do të ndodhë fill pas vizitave mjekësore që priten të ndodhin të martën ose të mërkurën e javës që vjen.

Sensi ka qenë një ndër lojtarët më të përfolur në Itali gjatë muajve të fundit. Mesfushori shtatshkurtër ishte një ndër objektivat kryesorë të Milanit që e kërkoi me ngulm edhe një vit më parë, por drejtuesit e “djallit” nuk arritën të gjenin akordin me Sasuolon.

Futbollisti 23-vjeçar do të jetë një përforcim madhor për mesfushën e Interit. Finalizimi i kësaj është një lajm i keq për ata tifozë zikaltër që donin të shihnin me fanellën zikaltër Nikolo Barelën e Kaljarit. Mesa duket 22-vjeçari nga Sardenja do të zgjedhë një destiancion tjetër.

Torreira i pamundur, Milani kthehet te “fiksimi i vjetër”

Sport Ekspres — Mon, 17 Jun 2019 08:03:54 +0000

Lukas Torreira duket se është një objektiv i pamundur për t’u arritur nga Milani, me Arsenalin që ka konfirmuar qartë që nuk ka ndërmend ta shesë uruguajanin.

Gjendur në këtë situatë, te Milani kanë nisur të mendojnë përsëri për Stefano Sensin. Mesfushori është kërkuar edhe më parë nga kuqezinjtë, por asgjë nuk është konkretizuar.

Sasuolo i ka idetë e qarta dhe kërkon së paku 25 milionë euro për të lënë të lirë 23-vjeçarin. Sensi është produkt i akademisë së Çezenës dhe është bashkuar me Sasuolon në vitin 2016.

Milani sakrifikon Kutronen, kërkon me çdo kusht mesfushorin!

Sport Ekspres — Sun, 16 Jun 2019 08:34:56 +0000

Mesfusha është reparti kryesor ku do të fokusohet merkato e Milanit gjatë kësaj merkatos së kësaj vere. Drejtuesit e “djallit” ëndërrojnë transferimin e uruguaianit të Arsenalit, Lukas Torreira, por gjasat që mesfushori shtatshkurtër të rikthehet në Serie A janë të pakta.

Plani B i Milanit është futbollisti i Sasuolos Stefano Sensi. Mesfushori italian ndiqet prej vitesh nga Milani. Kartoni i 23-vjeçarit është i përballueshëm për financat e lëkundura të Milanit, por te Sasuolo nuk kërkojnë vetëm para “cash”.

Sipas “Gazzeta Dello Sport”, drejtuesit e klubit emilian janë të interesuar për shërbimet e sulmuesit Patrik Kutrone. Për momentin kërkesat specifike të Sasuolos, por palët do të diskutojnë me përfaqësuesit e lojtarit pasi ky i fundit të rikthehet nga grumbullimi i përfaqësueses U21 të Italisë, që ditën e sotme fillon rrugëtimin në Europianin U21.

Realizohet blerja e parë, Milani shpenzon 25 milionë euro!

Sport Ekspres — Mon, 20 May 2019 10:05:11 +0000

Milani ka nisur të mendojë prej kohësh për merkaton dhe goditja e parë duket se ka ardhur. Sipas “Tuttosport”, kuqezinjtë kanë mbyllur marrëveshjen për blerjen e Stefano Sensit, i cili ndiqej prej disa muajsh nga drejtuesit.

Ideator i kësaj lëvizje duket se është Ivan Gazidis, pasi mesfushori i Sasuolos është një lojtar në moshë të re dhe premton shumë për të ardhmen. Sensi do të kalojë në “San Siro” për plot 25 milionë euro.

Gjithsesi, Milani do të paguajë 13 milionë, sepse 12 milionët e tjerë do të llogariten nga transferimi përfundimtar i Lokatelit te Sasuolo. Stefano Sensi do të përfitojë gati 2 milionë euro në sezon me kuqezinjtë.

Paketa nuk mjafton, Leonardo gati dy dhurata për Gatuzon

Sport Ekspres — Wed, 09 Jan 2019 15:41:34 +0000

Leonardo dhe Paolo Maldini e dinë mirë që ardhja e Lukas Paketës nuk i zgjidh të gjithë hallet e ekipit të Gatuzos. Milani kërkon me çdo mënyrë rikthimin në Champions dhe ka nevojë për të tjera përforcime. Gjatë prezantimit të brazilianit, Leonardo u shpreh qartë që koha po kalon dhe drejtuesit e Milanit e kanë të vështirë të përforcojnë ekipin, pasi kanë vetëm një armë në dorë: huazim lojtarësh me të drejtë blerje në fund të sezonit.

Megjithatë, ai dhe Maldini po punojnë në dy pista: një mesfushor dhe një lojtar ofensiv. Flasim për Stefano Sensin, 23-vjeçarin e Sasuolos dhe Janik Karrasko, 25-vjeçarin e Dalian Jifang. Nga ana tjetër, sot kanë dalë lajmet e kalimit të Gonzalo Higuain drejt Çelsit. Argjentinasi po mendon bashkimin me Sarrin, me të cilin kanë punuar dhe kaluar shumë mirë te Napoli.

Tratativa është e komplikuar, pasi në mes është dhe Juventusi, që zotëron kartonin e lojtarit. Nëse Pipita largohet, Milani do të niste ofensivën për sigurimin e njërit midis Alvaro Moratës dhe Kristof Piatek. I pari është pranë arritjes së akordit me Seviljen, ndërsa garës i është bashkuar dhe Atletiko e Madridit. Sa i përket sulmuesit polak, Piatek ka oferta të shumta dhe nuk do të jetë aspak e thjeshtë për t’ia shkëputur Xhenoas në këto momente.

Jo vetëm Ibra, 5 emra të tjerë për merkaton e Milanit

Sport Ekspres — Wed, 21 Nov 2018 11:27:06 +0000

Milani po e pret me padurim merkaton e janarit. Kuqezinjtë janë prekur nga shumë dëmtime rresht, kështu që Leonardo dhe Maldini po punojnë për të gjetur emrat e duhur. Ekipi ka nevojë për përforcime, ndërsa Ibrahimoviç mbetet objektivi kryesor. Një rikthim i suedezit në Milanelo do të rriste entuziazmin e ambientit kuqezi, por kryesorja janë golat e Ibrës.

Ekipi i “Djallit” ka shumë probleme në mbrojtje, ndërsa Romanjoli është i fundit që ka përfunduar në infermieri. Milani ka hedhur sytë nga Anglia, konkretisht tek ekipi i Çelsit. Marrëdhëniet mes palëve janë shumë të mira dhe një gjë e tillë u vë re me huazimin e Bakajokos.

Geri Kahil dhe Andreas Kristensen pëlqehen nga kuqezinjtë. Të dy nuk po luajnë shumë me Sarrin, i cili preferon dyshen Rudiger-David Luiz. I pari është 33 vjeç, ndërsa danezi 22 vjeç. Pikërisht Kristensen është preferenca kryesore e italianëve. Ai ishte titullar sezonin e kaluar me Konten dhe bëhet fjalë për një mbrojtës kualitativ.

Gjithçka do të qartësohet në vijim sa i përket mbrojtësit danez, ndërkohë që Leonardo po punon dhe për arritjen e një marrëveshje me San Paolon. Rodrigo Çaio është emri i preferuar dhe Leonardo do të bëjë maksimumin për të siguruar shërbimet e mbrojtësit 25-vjeçar.

Në mesfushë pëlqehet Stefano Sensi. Vështirë që Sasuolo të heqë dorë nga 23-vjeçari në janar, por Milani po insiston dhe palët mund të arrijnë akordin. Një tjetër emër që përflitet për mesfushën e Gatuzos është dhe Lenadro Paredes i Zenitit. Argjentinasi e njeh mirë Serinë A, pasi ka luajtur me Empolin dhe Romën, por Sensi mbetet objektivi kryesor i Leonardos.