Dy klubet e Milanos kanë rënë dakord për ndërtimin e stadiumit të ri, që do të kushtojë 700 milionë euro dhe do të jetë gati në vitin 2022.

Marrëveshja mes palëve është arritur dhe tifozët e “djallit” dhe ata zikaltër do të kenë mundësinë të ndjekin ekipet e tyre të zemrës në një stadium bashkëkohor dhe tepër modern.

Kapaciteti i saj nuk është bërë i qartë, por pritet të mos ketë shumë ndryshim me stadiumin aktual, që përmban rreth 85 mijë ulëse. Mrrëveshja mes palëve është në detajet e fundit dhe brenda kësaj vere do të mbyllet. Stadiumi i ri mendohet të jetë gati për sezonin 2022-2023. Gjatë kësaj kohe Interi dhe Milani do të vazhdojnë të luajnë në “San Siro”.

Sipas raportimeve të mediave italiane, opsioni i parë po merr gjithmonë e më shumë mundësi. Diçka e tillë është kërkuar nga Milani, ndërsa po binden për ndërtimin e një stadiumi të ri edhe zikaltrit.

Dy klubet duhet të paraqesin një projekt të përbashkët deri në fundin e muajit prill dhe fjalën e fundit do ta thotë komuna e Milanos. Stadiumi i ri mendohet të ndërtohet në zonën aktuale të zënë nga parkingjet, ndërsa mitiku “San Siro”, stadiumi më i madh në Itali, me një histori 94-vjeçare, mund të përfundojë pjesë e historisë, librave dhe memorjes së tifozëve të shumtë.

“A.C Milan dhe F.C Internazionale Milano njoftojnë se kanë nënshkruar një memorandum mirëkuptimi për të konfirmuar dëshirën për të punuar së bashku për realizimin e projektit të një stadiumi modern dhe bashkëkohor. Një impiant të përshtatshëm ndaj standardeve aktuale është thelbësor për t’iu lejuar tifozëve të shijojnë një eksperiencë unike dhe për të garantuar suksese brenda dhe jashtë fushës. Të dy klubet besojnë se një stadium i përbashkët është interesi primar për të gjithë aktorët nga pikëpamja financiare, administrative dhe teknike.”

“Të dy klubet po vlerësojnë një sërë opsionesh të mundshme, duke përfshirë rikonstruktimin e stadiumit ‘San Siro’ dhe kanë rifilluar analizën e alternativave të ndryshme përmes rindërtimit të grupit të përbashkët të punës. Klubet besojnë se mund të përfundojnë këtë fazë të parë eksploruese deri në fund të vitit 2018, në mënyrë që të ecin shpejt me planifikimin dhe kërkesat administrative për t’i dhuruar tifozëve të tyre një stadium modern, në kohën më të shpejtë të mundshme. Dy klubet u takuan të enjten me kryetarin e Komunës, duke rihapur një dialog konstruktiv dhe të frytshëm me qëllim thellimin e mundësisë së përmirësimit të hapësirës së ‘San Siros’”, përfundon komunikata e klubit të Milanit.

Klubet paguajnë qera për stadiumin mitik, ndërsa tashmë janë gati për t’u ulur në tryezën e bisedimeve me Bashkinë e qytetit. Me qëllimin për të vazhduar bashkëjetesën e tyre në “San Siro” për shekullin e ardhshëm. Bashkia ka vendosur së fundmi të shpenzojë 15 milionë euro për mirëmbajtjen e stadiumit dhe është e hapur për idenë e dy klubeve të qytetit.

Drejtuesit e Milan dhe Inter do të takohen në javët e ardhshme për të përcaktuar planin e tyre të përbashkët, me të cilin do të paraqiten në tryezën e bisedimeve me Bashkinë e Milanos.

Diçka e mirë për tifozët, të cilët do të kenë mundësi të vazhdojnë të qëndrojnë në “shtëpinë” e tyre, ndërsa klubet mund të pësojnë një rritje ekonomike që do ti rikthente në nivelet e larta të futbollit botëror. Situata është zhbllokuar dhe të dy klubet janë gati për të menaxhuar së bashku stadiumin historik, duke u përballur me rinovimin dhe modernizimin e stadiumit, pa humbur hijeshinë historike të tij.

Rruga është akoma e gjatë, por hapi i parë është hedhur dhe klubet do të takohen në fillim mes tyre dhe pastaj do t’i propozojnë Bashkisë idenë për të marrë stadiumin më koncesion për 99 vitet e ardhshme.