Në një intervistë për Top Channel, avokati i ekipit të Kukësit tregon gjithçka rreth çështjes, duke sqaruar se tashmë Kukësi mund të qëndrojë i qetë: “Për sa i përket skandalit të basteve, kompania zvicerane ‘Sportradar’ u përpoq të tregojë manipulimin për ndeshjen me Dinamo Moskën, për faktin që humbëm 6-0. Unë kam në dispozicion dosjen me deklaratat e lojtarëve dhe menaxherëve të skuadrës të akuzuar. Janë 11 persona që kanë bërë deklarata dhe të gjithë kanë mohuar akuzat për trukim të ndeshjes”.

Avokati austriak thekson edhe një herë se nga kontrollet e telefonave celularë që policia austriake u ka seksuestruar 11 personave të skuadrës verilindore, nuk është gjetur asgjë për momentin: “Nuk ka asgjë të re nga telefonat që i ka sekuestruar policia, për këtë arsye jam optimist se kjo çështje do të mbyllet dhe do t’i rikthehet dinjiteti skuadrës dhe lojtarëve. Mund të jetë çështje javësh, ose edhe muajsh, nuk kam diçka të sigurt për përfundimin e gjyqit”, thotë ai.

Ndërkohë, lajmi i bujshëm është se Kukësi ka ndërmend të paditë edhe “SportRadar”-in, ashtu si ka bërë gati një padi për “Federbet”-in. “Për fakt të keq, është e vërtetë që ngrihen akuza pa fakte. Nëse sheh ndeshjen dhe më pas lexon akuzat, vë re se asgjë nuk ka kuptim. Ka patur edhe për klube austriake, apo rumune me akuza të ngjashme, por nuk ka asnjë sinjalizim për transferta parash dhe ndryshime koeficientësh”.

Drejtori i Komunikimit në Sportradar, Aleks Inglot, ka sqaruar se ka qenë pikërisht Sportradar dhe asnjë kompani tjetër ajo që ka kërkuar hetimin austriak: “Faleminderit për interesimin dhe i vlerësojmë përpjekjet tuaja për të marrë informacionin real mbi këtë çështje. Fatkeqësisht, ky është një hetim që po zhvillohet në momentet që flasim, ndaj nuk mund të futemi në detaje të hollësishme. Megjithatë, ajo që mund të themi është se Sportradar ka një partneritet zyrtar integriteti me UEFA-n dhe FIFA-n dhe ne shpesh monitorojmë edhe ndeshje miqësore. Ne i sinjalizuam shqetësimet tona te organizatat zyrtare të interesuara dhe duke qenë se kemi një marrëdhënie afatgjatë me Policinë Austriake, ne u raportuam atyre gjithçka ka ndodhur në ndeshjen e Kukësit dhe kemi ofruar ndihmën tonë në përpjekjet e autoriteteve austriake për zbardhjen e kësaj historie”.

Në lidhje me rolin e mundshëm të Federbetit dhe akuzave të kësaj kompanie ndaj Kukësit, Inglot sqaron: “Mund të saktësoj se asnjë kompani tjetër nuk bashkëpunon me Policinë Austriake dhe nuk është marrë parasysh asnjë lloj sinjalizimi apo aludimi për manipulim ndeshjesh, nga cilido burim”.