Humbja me Devollin, Spartak Meraku largohet nga Maliqi

Sport Ekspres — Tue, 05 Mar 2019 14:09:50 +0000

Të hënën u luajt ndeshja e fundit e javës së 16-të të Kategorisë së Dytë, Maliqi-Devolli. Derbi u fitua nga skuadra e drejtuar nga Stavri Nica dhe kjo i ka kushtuar shtrenjtë maliqarëve, sepse 24 orë më pas ka “humbur” sponsorin kandidat për president, Spartak Merakun.

Vetëm një muaj zgjati kjo eksperiencë për të, pasi sot ai ka dhënë dorëheqjen. Për SportEkspres.com, Meraku deklaron se shkak i largimit të tij u bë humbja e sfidës me rivalin direkt në renditje. “Me humbjen e djeshme në derbi, Bilishti doli jashtë objektivit për ngjitje në Kategorinë e Parë. Ishte një ndeshje jo e mirë ajo ndaj Devollit dhe unë nuk mund të qëndroja aty jashtë projektit tim”, theksoi fillimisht Spartak Meraku.

Gjithsesi rikthimi në të ardhmen është opsion, por duhet plotësuar një kusht: “Nëse klubi privatizohet, jam i gatshëm të rikthehem. Maliqi është pjesë e projekteve që unë kam në futboll dhe sot ndjehem keq që eksperienca ime përfundoi kaq shpejt në kohë, por jo përgjithmonë”. Largimin e Merakut nga skuadra e Maliqit e konfirmon zyrtarisht edhe vetë klubi.

AGRON KAJA

Spartak Meraku mbyll “pushimet”, kalon aksioner te Maliqi

Sport Ekspres — Tue, 22 Jan 2019 13:05:18 +0000

Pas një periudhe rreth 20 vjeçare në krye të Bilishti Sport, sot Devolli, biznesmeni Spartak Meraku ka kaluar si aksioner te skuadra e Maliqit në Kategorinë e Dytë. Duke qenë skuadër e Prefekturës së Korçës, Meraku nuk ka ngujuar ti përgjigjet pozitivisht kërkesës së Bashkisë të Maliqit, dhe këtë fundjavë marrëveshja mes tyre ka marrë rrugë. Ndërsa nostalgjia e tij për vitet në krye të skuadrës së Bilishtit është e madhe, ai thekson se në futboll ka edhe largime e afrime.

Në deklarimin e tij për SportEkspres.com, vetë Spartak Meraku tregoi se te Maliqi shkon për të dhënë kontribut që kjo skuadër të synojë ngjitjen në Kategorinë e Parë. “Nuk e mendoja veten larg futbollit dhe oferta që më bëri Bashkia e Maliqit më tërhoqi. Në krye të skuadrës së Bilishtit isha rreth 20 vite dhe kam shumë nostalgji për të, por në futboll janë të pranueshme largimet dhe afrimet, ndaj dhe nuk hezitova që të jap kontributin tim te skuadra e Maliqit”.

Në merkaton e muajit janar 2019, te Maliqi janë afruar futbollistët Elio Beshiri nga Korabi, Roxhens Zeqo nga Egnatia, Shkelzen Tako nga Devolli dhe Lion Ndoci nga Pogradeci. Skuadra e Maliqit renditet në vendin e 3-të në Grupin B të Kategorisë së Dytë me pikë të barabarta me Devollin e vendit të 2-të, dhe 1 pikë më pak nga Shkumbini kryesues.

AGRON KAJA