“E nisëm mirë, pastaj bëmë gabime teknike prej nga erdhi goli. Më pas e qarkulluan shumë pak dhe keq topin, Napoli ushtronte presion të frikshëm. Luajtëm shumë keq”, e nisi analizën e tij pas ndeshjes trajneri i Interit Luçiano Spaleti. 

“Me Napolin pranohet humbja, por jo në këtë mënyrë. Ndeshja e ardhshme është finale. Kohët e fundit kemi luajtur mirë, edhe kur nuk kemi fituar. Sot Napoli na bëri të vraponi pa fund dhe kështu krijohen hapësira të mëdha.

“Natyrisht, tani skuadra nuk është e qetë, por duhet të ruajmë kthjelltësinë mendore. Luajtëm një ndeshje të shëmtuar, por e kemi në duart tona fatin tonë, pastaj Milani do luajë në Ferrara, nuk do e ketë të lehtë”.

Fitorja – “Treguam pjekuri, edhe pas golit të parë nuk e ulëm përqendrimin, duke krijuar shumë raste, derisa shënuam edhe golin e dytë”.

Napoli javën e ardhshme – “Do jetë një ndeshje ndryshe, me më shumë hapësira. Napoli do sulmojë, do jetë më e lehtë për ne”.

Polemika me median – “Ka 3 muaj që Gazzetta dello Sport më sulmon, pastaj më bën të njëjtat pyetje. Tani më quajnë të marrë fund, të mbaruar, diçka dinë që më ofendojnë, por unë mbrohem dhe mbroj Interin, nuk jam nervoz. Gjatë sezonit ka momente kur klubi duhet të mbajë qëndrim, ka 8 vite që Interit i bëjnë të njëjtën gjë dhe duhet të mbrohet. Shih trajtim jo të barabartë, ndaj Interit shih ligësi dhe nuk është normale”.

Është Antonio Konte emri i përzgjedhur për stolin dhe ish-trajneri i kombëtares italiane ka arritur marrëveshjen me drejtuesit zikaltër, raporton gazetari i Sky Sport, Xhanluka Di Marcio.

Mungon firma, sepse nuk lejohet ende, por marrëveshja është arritur dhe do të zyrtarizohet sapo të përfundojë kampionati.

Bëhet fjalë për një kontratë 4-vjeçare, ndërsa vendimtar ka qenë Bepe Marota, i cili e ka bindur ish-trajnerin e Juventusit që të bëhet pjesë e një projekti ambicioz për të rrëzuar Juven nga froni.

Natyrisht, është një ndryshim me pasoja, sepse largimi i Spaletit dhe stafit të tij kushton rreth 30 milionë euro, ashtu si do të kushtojë edhe Konte.

Ndërkaq, Interi afrohet edhe më shumë me kualifikimin në Champions dhe trajneri Luçiano Spaleti pas ndeshjes ishte i kënaqur.

“Në pjesën e parë skuadra dominoi totalisht, arritëm të krijonim shumë raste për shënim, por në fund vlen goli dhe nuk është e lehtë. Duhej të mbanim të njëjtën cilësi në qarkullimin e topit edhe në pjesën e dytë, por nuk ia dolëm mbanë. Kjo bëri që Juve të përfitonte dhe na ndëshkoi sapo gjeti pak hapësirë”.

Spaleti ka edhe kritika për të tijtë: “Jemi në një periudhë ku skuadra është e vetëdijshme për cilësitë e saj, por ka momente kur e ul nivelin dhe ndihet lodhja. Nuk tregohemi të zotë në mbylljen e hapësirave, edhe kur jemi të vendosur mirë pas”.

E ardhmja? “Unë do qëndroja tek Interi edhe për 100 vite të tjera, e kam parë tifozerinë, emocionin e të hyrit në San Siro. Megjithatë, Interi bën mirë të zgjedhë më të mirën për vete, nuk ka rëndësi nëse vijoj unë apo jo. Duhen marrë vendime për të mbrojtur Interin“.

Juve dominues: “E ka merituar titullin me aq shumë pikë avantazh, ndoshta ne duhej të bënim diçka më shumë. Patëm një periudhë krize ku e humbëm kontaktin me futbollin dhe aty lëshuam shumë mirë. Mund të bënim më shumë“.

“Roma luajti një ndeshje të mirë dhe pasi pësuam gol, rrezikonim të linim shumë hapësira pas. Për këtë arsye, e pranoj me dëshirë këtë pikë. Duke parë edhe rezultatet e tjera, është një fundjavë e mbarë për ne“.

RANIERI – Një pikë në Milano nuk është kurrë keq, por Roma e Klaudio Ranierit e nisi shumë mirë dhe për një moment u duk se mund të parakalonte Milanin. Gjithsesi, pas ndeshjes trajneri verdhekuq ishte i kënaqur.

“Erdhëm me synimin për të kërkuar fitoren, mund të bënim diçka më shumë në kundërsulm në pjesën e dytë. Gjithsesi, një pikë në San Siro është mirë, e dimë që Interi në pjesët e dyta rritet shumë, ndërsa ne vuajtëm, nuk e di a ishte shkak edhe rënia fizike. Gjithsesi, e kërkuam fitoren deri në fund.

“Krahasimi mes Anglisë e Italisë? Në Itali presioni psikologjik i bllokon lojtarët, në Angli ka më pak taktikë e stres, luhet shpejt pa u shqetësuar“.

“Është një ndeshje shumë  e rëndësishme, natyrisht edhe për faktin se një pjesë e jetës sime ka qenë te Roma. Deri në fund do jenë të gjitha si finale. Duke qenë në garë për 4 vendet e para, me 6 javë të mbetura, kundër Romës, do të thotë që e kemi mbyllur jo pak hendekun që kemi pasur deri vjet. Roma është në formë, ka rigjetur rezultatet pas vështirësive që janë normale, edhe ne kemi pasur vështirësi“.

Lautaro apo Ikardi titullar? “Të gjithë merreni vetëm me një çështje, por ka edhe 10 fanella të tjera për të folur. Duam ekuilibër në fushë, duke qenë më të zotë se kundërshtarët, kaq. Nuk e di cili do luajë titullar, të dy e meritojnë të jenë në fushë“.

Xheko, një mundësi për transferim tek Interi? “Sot flas për lojtarët e mi. Xheko është kundërshtar i frikshëm, por ne kemi dy sulmus të të njëjtit nivel. Për merkaton pyesni Auzilion“.

Toti, “armiku” i Spaletit, mund të bëhet drejtues me peshë më të madhe te Roma: “Është e vështirë të gjykoj punët e të tjerëve. Nuk dua të përfshihem, kam rol tjetër tani”.

Për të ndalur Juven, a mund të imitohet Ajaksi? “Ajaksi po luan ndeshje të mira, por është e vështirë të krijosh një model Ajaks në Itali. Ajaksi ka një kulturë në nivel klubi dhe kombi, kanë një model mbi të cilin punojnë prej dekadash, nuk është aq e lehtë t’i imitosh. Jashtë Italisë nisin punën që nga portieri“.

? | CONFERENZA

Luciano #Spalletti in 6?0? secondi ???
Alla vigilia di #InterRoma pic.twitter.com/LOvdaKRBo9

— Inter (@Inter) April 19, 2019

“Fitore e rëndësishme, që na jep qetësi, ndaj një rivali aspak të thjeshtë, sepse Frozinone nuk kishte asgjë për të humbur dhe luante e qetë, të kapte ndonjë rezultat befasues. Më vjen keq vetëm për faktin që nuk shënuam shumë gola dhe nuk e mbyllëm ndeshjen më herët”.

Spaleti ka folur edhe për Ikardin, duke u ndalur te fakti që nuk gjuajti 11-metërsh: “Në ekip kemi 3-4 lojtarë që gjuajnë penallti shumë mirë. Këtë radhë Perishiç e Ikardi kishin rënë dakord që të gjuante Ivan. Është sportivitet, profesionalizëm dhe sinjal i një miqësie të fortë”.

Me vendin e tretë më të sigurt, Spaleti komenton qetësisht suksesin në Marassi, duke nisur nga Ikardi: “Tema Mauro Ikardi? Është më shumë e juaja, sepse tema ime është paraqitja e skuadrës, që ishte e shkëlqyer, si skuadër e pjekur, që mori 3 pikë themelore pas humbjes ndaj Lacios, ku gjithsesi luajtëm mirë. Sot rregulluam gjithçka, ka mbrëmje ku gjithçka shkon mbarë dhe bën gjithçka në mënyrë korrekte”.

Per chi crede che Icardi non abbia dato la mano a Spalletti…guardatevi il video. #GenoaInter ?? pic.twitter.com/a7rcVwcRpc

— Stefano Orabona (@OrraStefano) April 3, 2019

Edhe pse lavdëron të gjithë, Spaleti nervozohet kur i përmendet gjithnjë vetëm Ikardi: “Ju merreni vetëm me ata që shënojnë apo japin asist, por skuadra nuk i administron kështu ndeshjet. Ikardi duhet të lidhet më shumë me ekipin, të bëhet pjesë organike. Skuadra duhet t’i krijojë kushte për të shënuar, por ai duhet të japë më shumë, është mirë të ndërtojmë me 10 vetë, jo me 9. Sot Ikardi luajti një ndeshje të mirë, mund të shënonte edhe një gol tjetër. Pastaj secili mund të thotë mendimin e vet, mund të krijojë sa më shumë probleme të jetë e mundur, por vendimet i merr ai që duhet t’i marrë”.

Ikardi dhe mungesa e tij ndaj Lacios: “Duhej të qëndronte jashtë, sepse iu drejtua njerëzve që nuk kanë lidhje me Interin. Nëse nuk sqarohet me ekipin, nuk luan”.

Luhatjet në lojë: “Me Lacion mungoi durimi, ata kanë ekip me cilësi dhe nuk lënë hapësira. Ne luajtëm pa ide, thjesht në mënyrë frenetike, Lacio përfitoi. Sot luajtëm ndryshe, ishim më të qetë, e administruam mirë ndeshjen. Të shkëlqyer Politano dhe Perisiç, i cili rezistoi deri në fund, edhe pse mori një goditje të ashpër me taka në këmbë. Më bëhet qejfi që Handanoviç mori një fitore në ndeshjen e tij të 150-të”.

Pas ndeshjes trajneri i Interit Luçiano Spaleti foli për Sky Sport, ku natyrisht nuk e fshehu zhgënjimin: “Humbje e rëndë, ndaj një rivali direkt. Një ndeshje që e luajtëm mirë për periudha të gjata, por nuk patëm fat sepse pësuam gol që në fillim dhe më pas Lacio doli në lojën që donte”.

Natyrisht, mediat e kanë mendjen te çështja Ikardi: “Juve ju zbavit kjo histori, por mua nuk ma heq fare qetësinë. Duhet të luajnë të tjerët, për mënyrën si është sjellur, pastaj ju bëni filma, puna juaj. Ngjarjet janë të qarta, është e drejtë të luajnë të tjerët në këtë moment,e dhe pse Ikardi mund të luante 45 minuta për mua. Megjithatë, duhet besueshmëri në dhomat e zhveshjes, të kesh besimin e grupit. Unë kam patur besimin e çdo grupi ku kam punuar, për 22 vite, janë lojtarët me të cilët kam punuar ata që e tregojnë historinë time, jo ju, që kërkoni dhe publikoni çfarë ju teket.

“Interi nuk shkonte në Champions prej 6 vitesh, apo gabohem? Dhe Ikardi aty ishte. Sa ndeshje kemi humbur me Ikardin në fushë? Të ndërhysh që Ikardi të luajë është diçka poshtëruese, për gjithë interistët. Çdo të thotë të bisedosh, të bësh tratativa për të grumbulluar dikë? Çfarë të bëj, të dërgoj 20 e-maile për të thënë nëse grumbullohet dikush apo jo? Tratativat i shihni ju, shkoni e thojani një tifozi interist që një lojtar duhet lutur që të luajë. Unë kam nevojë që të luajnë të tjerët, pastaj ai do kthehet në grup dhe nëse vazhdon të sillet si ka bërë deri tani….

“Messi e Kristiano bëjnë diferencën, ndoshgta edhe pak të tjerë. Është disiplina forca e vërtetë e skuadrës, kundrejt vetes dhe ambientit ku punon. Pastaj tensionin Interit ia rritin gjithnjë, sepse i hidhen sipër dhe i bëjnë gjëra që ky klub nuk i meriton”.

Interi ka kaluar pa asnjë problem në 1/8-at e finaleve në Europa League dhe ka ardhur fitorja e tretë në po aq ndeshje pa Mauro Ikardin.

Gjithsesi, trajneri Luçiano Spaleti nuk preferon të komentojë për çështjen e sulmuesit: “Po përmirësohemi dhe po gabojmë më pak se më parë. Megjithatë, nuk është e drejtë të aludohet për diçka që ka ndodhur në këtë periudhë. Dua të flas për ata që luajtën sot, që meritojnë komplimente, pa kaluar në eufori. A zbriti Ikardi të festonte me shokët? Nuk e di, di që lojtarët ishin të kënaqur pas ndeshjes”.

Spaleti ka bërë humor për golin e shënuar nga Ranokia: “I thashë para ndeshjes që do shënonte. Prisha ndonjë gol me kokë, jo një gjuajtje nga distanca”.

Problemi i Interit mbetet cilësia: “Na mungon cilësia në mesfushë e lart, shpesh jemi në vështirësi aty” .

Një Inter mediokër, që nuk reagon kurrë kur pëson gol, ndërsa tifozët janë të tërbuar sidomos me trajnerin Luçiano Spaleti.

Pas ndeshjes drejtuesit më të lartë zikaltër, se bashku me kapitenin Ikardi, kanë zhvilluar një takim me trajnerin, por nuk ka pasur ultimatum.

Për momentin, me pak fjalë, Spaleti konfirmohet, por Interi vlon dhe nëse nuk vjen kthesa urgjente Spaleti largohet.

Nuk ka asnjë trajner niveli në qarkullim veç Kontes dhe Murinjos, por asnjëri nuk e merr Interin në këtë moment, sepse duan ta nisin vetë ndërtimin e ekipit. Për këtë arsye, po flitet për Esteban Kambiaso, si Solskjaer në Mançester, por drejtuesit e Interit janë ende të pavendosur.

Trajneri i Interit, Luçiano Spaleti, pas ndeshjes komentoi me qetësi eliminimin: “E nisëm keq, më pas u futem në ritmin e ndeshjes. Na mungoi qartësia për të sulmuar më mirë. Gjithsesi, ishte një ndeshje në ekuilibër total”.

Qetësinë Spaleti e humbet kur flitet për Naingolan dhe Perisiç. I pari humbi penalltinë vendimtare, i dyti prej një muaji ishte në epga të largimit dhe klubi zbuloi se kroati e kërkoi vetë largimin, që nuk u realizua.

Kjo gjë ka tërbuar Spaletin, që tani akuzon administratorin e deleguar Marota, edhe pse nuk ia përmend emrin:  “Naingolan duhet rikuperuar si futbollist, ka pasur dëmtime dhe i duhet vazhdimësi. Perisiç? Duhet të rigjejmë rolet dhe detyrimet që një lojtar ka. Nuk është mirë që u zbulua që kishte kërkuar largimin nga Interi. Kjo krijoi tension rreth nesh, por tani Ivan është i qetë dhe po stërvitet mirë” .

Trajneri zikaltër pas ndeshjes fajësoi fazën sulmuese të ekipit për mungesën e golit: “Duhej të kishim më shumë cilësi në sulm, humbëm shumë topa. Sasuolo luajti një ndeshje të mirë, ndërsa ne nuk kishim qartësi në ndërtimin e fazës sulmuese”.

Natyrisht, Ikardi në fokus: “Ai është lojtar finalizues, sot nuk gjeti hapësira. Duhej të çonim më shumë pasime, por edhe ai duhej të lëvizte me shumë”.

Në renditje Interi është i treti, +7 nga Roma: “Nuk jemi shumë komodë, duhen rezultate për të ruajtur vendin e tretë. Kjo skuadër duhet të konsolidohet, të rritet, të punojë dhe të fitojë eksperiencë, në Europa League e në kupë. Duam të fitojmë Kupën, sepse kampionatin e fiton sërish Juve dhe ndoshta do të luanim dy finale. Na duhet një trofe, për atë që është historia e Interit”.

Skuadra zikaltër luftoi deri në frymën e fundit sezonin e shkuar për t’u kthyer në Champions dhe këtë verë bëri merkato të mirë në pamje të parë, por gjithçka u shkri si sheqeri në ujë, sapo nisi futbolli i vërtetë, që është ai i Europës, shumë herë më i fortë dhe më cilësor se Seria A.

Kundër PSV-së Interi kishte gjithçka në favor: luante në shtëpi, 60 mijë tifozë me vete, motivim i madh krahasuar me një rival të eliminuar, por pikërisht holandezët ishin ata që impresionuan për lojën e mirë dhe motivimin e shfaqur.

Edhe pas barazimit me Ikardin, që u duk se dha shkundjen e madhe, Interi e uli ritmin dhe vetëm në fund, kur erdhi lajmi i barazimit të Totenhemit në Barcelonë, zikaltrit u kujtuan të sulmonin, një qëndrim tepër i gabuar, që u kushtoi shtrenjtë italianëve, në imazh, moral e financa.

E DHËNA E FRIKSHME – Në fillim ndodhi në Wembley, me Totenhemin, më pas me PSV-në. Interi pati dy raste ideale për të siguruar kualifikimin dhe në të dy rastet dështoi.

Gjashtë ndeshje në grup, të gjitha me një tipar të përbashkët mjaft domethënëse: skuadra e drejtuar nga Spaleti pësoi gjithnjë gol e para, duke realizuar përmbysjen ndaj Totenhemit në Itali e PSV-së në Holandë.

Në 7 ndeshjet e fundit në të gjitha kompeticionet Interi ka fituar vetëm një herë, kundër PSV-së pritej fitorja që do i vinte kapak minikrizës, por tani është thjesht krizë, jo më ‘mini’. Nëse gjithë stadiumi të fishkëllen dhe tifozët dorëzohen që para pushimit, diçka mjaft negative po ndodh.

U mor gjithë javën e Barcelonën dhe ainteri harroi të fitonte vetë, e pafalshme dhe që ka bërë armik me tifozët trajnerin Luçiano Spaleti.

Ky i fundit pas ndeshjes ia la fajin ekipit: “Na vjen keq, për publikun tonë të jashtëzakonshëm së pari. Nuk u treguam të qetë pas golit të pësuar dhe e administruam keq ndeshjen.

“Grumbulluam po aq pikë sa Totenhemi, por duhej qetësi gjatë ndeshjes.

“Psikologjikisht është goditje e rëndë, por e kontrolluam ndeshjen dhe mund të fitonim, por u bëmë nervozë me kalimin e kohës”.

Mendja ishte te Barcelona: “UEFA me pyeti a doja që ta fshihnin rezultatin në stadium, por si t’ua fshihja lojtarëve? Duhet forcë mendore, nuk e patëm. Naingolan? Nuk ka të bëjë mungesa e tij, një lojtar nuk ndryshon dot gjithçka”.

Siç thuhet dhe nga federate ganeze e futbollit, mbrojtësi nuk do mund të jetë pjesë e kombëtares në ndeshjet kualifikuese të Kupës së Afrikës, si pasojë e një dëmtimi. Sipas zyrtarëve të klubit zikaltër, gjendja e Azamoas ka nevojë urgjente mjekësore, për të mësuar dhe shkallën e dëmtimit.

Mbrojtësi ganez u transferua në merkaton e kësaj vere, nga Juventus me parametra zero. 29-vjeçari ka qenë thuajse një titullar i padiskutueshëm për Spaletin, duke nisur nga minuta e parë në 13 ndeshje nga 17 të mundshme, mes Serisë A dhe Championsit.

Fitore 2-0 dhe mbi të gjitha dominim, ndaj trajneri i Interit Luçiano Spaleti nuk e fsheh zhgënjimin e tij: “Më vjen më shumë keq për idenë që dhamë në pjesën e parë. Këto janë ndeshje që të japin besim dhe bindje, si ndaj Totenhemit dhe PSV-së. Prisja të njëjtin qëndrim edhe sot, sepse e di që mund ta bëjmë, por nuk patëm guxim në pasime, në dalje nga zona dhe Barcelona e interpretoi shumë mirë këtë mënyrë të gabuar loje nga ana jonë.

“Çfarë na mungoi? Nuk është problemi te ndonjë lojtar i veçantë, problemi është se nuk e mbanim fare topin dhe nuk gjenim dot hapësira. Duhej më shumë agresivitet për të rikuperuar topin, por luajtëm me shumë frikë”.

Derbi super, por në Camp Nou Inter i transformuar për keq: “Barça e luan topin shumë shpejt, është ekip shumë reaktiv dhe mendon me shpejtësi të jashtëzakonshme. Na mbytën me presing dhe nuk dinim ç’të bënim. Nëse duam të bëhemi skuadër e madhe, duhet të fitojmë vetë, pa pasur nevojë të ndalet rivali ynë. Sot ishim shumë keq dhe kështu nuk shkon”.

Trajneri Luçiano Spaleti tashmë rigjen buzëqeshjen: “Jam shumë i kënaqur, sepse pata mundësinë të bëj ndryshime dhe të hedh forca të freskëta. Nuk vuajtëm asnjëherë, vetëm një ose dy goditje erdhën në portën tonë. Fitore e rëndësishme për renditjen”.

Gjithsesi, Spaleti pati një moment frike, kur Kaliari barazoi afër fundit të takimit, por me VAR goli u anulua për prekje me dorë: “Dhuruam raste banale për shënim, për mendimin tim është e kotë ta them gjithnjë këtë vërejtje, kur e shoh që përsëriten gabimet. Nuk ishim aq të rrjedhshëm sa doja”.

Megjithatë, Lautaro Martinez ka qenë bukuria e mbrëmjes: “Është shumë i fortë, ka gjithçka: cilësi, teknikë, forcë, me siguri ka mësuar nga Ikardi, duke u stërvitur me të. Ka edhe pak egoizëm, sepse kishte momente kur duhej të pasonte dhe nuk e bëri, por nuk na bën dëm pak egoizëm”.

Interi tashmë duket në garë për vendin e dytë: “Nuk e dimë ende, është herët, por Juventusi me fitoren ndaj Napolit është goxha i qetë dhe Alegri ka një stol fantastik, bën rotacion çdo javë, ndaj zor se i gjejmë të lodhur, edhe pse është ende starti i sezonit dhe Champions league nuk ka hyrë ende në fazën e saj kulminante”.

Më pas, errësirë totale, një kopje e Milanit në Napoli të shtunën, sepse Interi e humbi busullën pas golit të Belotit dhe më pas barazimi i Torinos ishte rrjedhë logjike e asaj që po ndodhte në fushë.

Pas ndeshjes Luçiano Spaleti ishte i dëshpëruar, natyrisht, por nuk ka shpjegim: “Gabuam te goli i Belotit dhe pastaj na iku ndeshja nga duart. Është e vështirë të gjesh arsyet e rënies në pjesën e dytë, me shqetëson fakti që pësojmë sërish gola të tillë, me top të gjatë nga 40 metra, si shpesh këto vitet e fundit”.

Po tani, a flitet më për titull: “Në mund të bëhemi skuadra anti-Juventus, them që mund të luftojmë për kreun së bashku me 4-5 skuadra të tjera. Megjithatë, duhet shumë punë dhe ndryshim mentaliteti, përndryshe jemi anti-askushi”.

NDËSHKIMI – Sot Interi kthehet në fushë për stërvitje, nuk ka pushim pas ndeshjes ndaj Torinos. Një masë ndëshkimore për skuadrën, marrë nga klubi në bashkëpunim me Spaletin, i cili tashmë është nën presion dhe nuk i lejon dot më gabime vetë.

Ëndrra Modriç: “Më bën krenar edhe thjesht fakti që një lojtar si ai dëshiron të luajë për Interin. Klubi u tregua i fortë që arriti të ngjallë interesimin e tij. Nuk e di si do përfundojë, Reali nuk pranon ta lëshojë. Gjithsesi, jemi të fortë edhe kështu, pastaj nëse vijnë Modriç do jemi shumë të fortë”.

REAGIMI – “Roma nuk dominoi për 70 minuta, mos ta ekzagjerojmë. Handanoviç nuk priti aq shumë sa Alison. Gabuam shumë në ndërtimin e lojës, Roma ushtronte presion konstant dhe nuk kishim hapësira. Duhet forcë dhe besim në vetvete, e kemi humbur shpesh topin”.

BROZOVIÇ – “Ka luajtur ndeshjet e tij, nëse më tregon që është i zoti, do të luajë titullar. Nuk kam asnjeri farefis, i kam të gjithë miq, por zgjedh formacionin që më jep garanci gjatë javës”.

Një ndër shembujt konkretë është Andrea Ranokia, i kthyer tek Interi pas huazimit te Hall Siti në Angli.

Mbrojtësi nuk i ka mirë punët me tifozët dhe në grumbullimin e para pak ditëve një tifoz po e tepronte me ofendimet.

Trajneri Luçiano Spaleti nuk duroi dot, shkoi te tifozi dhe iu përgjigj ashpër: “Nëse vjen dhe menjëherë sillesh si idiot, më mirë ik pirdhu, mos na bezdis”.

” E duam shumë Interin, mister”, u përgjigj tifozi, por Spaleti iu përgjigj: “E kuptova, por mos na çaj tr***”.

Videoja është bërë tashmë një hit në rrjet.

“Dikush është më mirë që të shkojë të luajë në ndonjë vend tjetër sepse prej vitesh nuk jep aq sa duhet. Ndonjë tjetër do ta marrim për të përforcuar skuadrën. Borha Valero? Në këtë moment drejtuesit sportivë lënë të gjithë fletëpalosje, për të ndjekur pistat e duhura, kurse ju ndiqni thashethemet. Brozoviç ka cilësi të dukshme. Është i fortë si shumë të tjerë, nëse qëndron do të varet nga ai. Auzilio thotë se nuk duhet të shpenzosh në merkato shumë nëse ke trajner të mirë? Mua më janë premtuar disa gjëra, nëse nuk do të mbahen këto premtime, unë do vij këtu dhe do ta them. Premtimet duhet t’i mbash nëse i jep, disa lojtarë do të blihen. Nuk jam më i mirë se ata që kanë qenë këtu përpara meje”.

MILANI – Ndërsa, për Milanin që ka bërë më shumë blerje të rëndësishme se zikaltërit, thotë: “Vitet e shkuara janë bërë blerje, por nuk është përmirësuar kushedi se çfarë. Varet nga blerjet që do të bëhen. Për këtë, garancia e Milanit dhe e Montelës, një trajner i mirë, një person i mirë, tashmë ka eksperiencën që e ka ndërtuar në fushë dhe ka arritur shumë rezultate të mira. Do të jetë një kundërshtar i vështirë, por jo sepse ka bërë blerje. Luhet 11 me 11 dhe e rëndësishme do të jetë se çfarë do të bëjnë ata të 11 në fushë”.

SHANSI I FUNDIT – “Kam një kontratë dyvjeçare, por nëse nuk bëj mirë këtë vit, viti i ardhshëm vlen pak. Nuk kam firmosur një kontratë katërvjeçare. Nëse pranon dy vite, i dyti varet nga i pari. Këtu ka lojtarë që kanë parë 5-6 trajnerë të vijnë e të ikin. Nuk ia tregojnë më askujt, është edhe faji i tyre që nuk kanë arritur rezultate, kjo është mundësia e fundit që ne kemi. Dhe jo vetëm për mua, por edhe për disa drejtues dhe shumë njerëz të Interi. Duhet ta dinë këtë”.

Fillimisht Spaleti i ka bërë komplimente skuadrës së të rinjve, Primavera-s së drejtuar nga Stefano Veki, që sapo është shpallur kampione e Italisë, ndërsa më pas ka folur për zgjedhjen e tij për të marrë drejtimin e Interit: “Kam zgjedhur Interin për ta rikthyer aty ku i takon. Kam imagjinuar një histori plot gjëra të bukura dhe dua t’i përjetoj të gjitha deri në fund, si aktor kryesor, por edhe si spektator i privilegjuar”.

Projekti taktik – “Kam menduar për një 4-2-3-1, duhet të jemi gati edhe për gjëra të tjera. Sistemi i lojës nuk ka shumë rëndësi, pasi së pari duhet të njohësh koncepte të rëndësishëm dhe të kesh një skuadër që e di ku duam të shkojmë. Nëse nuk do të jemi një skuadër e forta si mentalitet, karakter e cilësi loje, do të hapim krahun”.

Perishiç – “Ka disa vite që nuk fitojmë asgjë, ndaj duhet provuar diçka e re, përndryshe nuk ndryshon asgjë. Kemi lojtarë të fortë, por që duhet të futen në mekanizmin e skuadrës. Dua që gjithë lojtarët të arrijnë t’i japin shokut të skuadrës diçka nga cilësitë e veta”.

7 vitet e fundit, trajnerë pa fund tek Interi – “Duke e parë situatën nga jashtë, duket skandaloze që Interi është jashtë Europe. Unë nuk jam më i zoti se të tjerët, por jam ndryshe, kam besim te mënyra ime e punës dhe kërkon besim të plotë nga lojtarët, do jem me ta 100%, çfarëdo që të ndodhë. Dhet ta kthejmë Interin breda historisë së vet”.

Juventusi dominues prej vitesh – Në përballjen direkte nuk pashë ndonjë hendek shumë të madh. Juve duhet respektuar, sepse është një klub i fortë, një skuadër e fortë, që meriton komplimente për triumfet, sepse nuk është e lehtë të fitosh, edhe nëse ke lojtarë të shkëlqyer. Kemi respekt për Juventusin, por nuk duhet ngatërruar me frikën. Kur të ndeshemi me ta, nuk do të rrëzohemi në hapin e fundit”.

Sot ish-trajneri i Romës është nisur për në Kinë, së bashku me drejtues të tjerë të lartë të Interit, ndërkohë që i rrethuar nga gazetarët ka lëshuar një batutë për të ardhmen: “Jam i lumtur që jam trajner i Interit. Mungon firma? Asnjë problem, kemi shtrënguar duart dhe kaq mjafton, jemi me të vjetrën, nga ata që i bëjnë gjërat edhe kështu”.

Spaleti ka folur edhe për drejtorin Sabatini, me të cilin ka punuar më parë te Roma, duke pasur edhe ndonjë mosmarrëveshje: “Nuk është e nevojshme ta them që është kënaqësi të punoj me të. Valter është një person shumë i zoti në punën që bën dhe kjo ma bën punën të lehtë edhe mua”.

Ndërkaq, drejtori sportiv Piero Auzilio deklaroi: “Do ta çojmë trajnerin të prezantohet me pronarët e klubit. Kemi menduar gjithnjë për Spaletin, e donim tek Interi dhe ia dolëm mbanë. Tani synojmë që Interi të riniset menjëherë, për të qenë gati për sezonin e ardhshëm”.

Ish-trajneri i Romës është takuar sot me drejtuesit e Interit dhe praktikisht ka mbyllur marrëveshjen, me firmat që do të hidhen javën e ardhshme.

Spaleti do të marrë 4 milionë euro në sezon, për një kotratë dy-vjeçare, me opsion për një vit shtesë.