Futbollisti nga Gambia ishte autori i një dopiete për CSKA-në në takimin e sotëm, por një gol në limite i Botev Plovdivit çoi rezultatin në baraspeshë 3 – 3 (ndeshja e parë ishte fituar 3 – 2 nga Botev Plovdiv) duke  zhvleftësuar dy golat e  Soues dhe duke lënë kryeqytetasit jashtë finales së Kupës.

Eliminimi dhemb më shumë dhe për faktin se Botev luante me nëntë lojtarë që prej minutës së 83-të dhe një gol tjetër do mbyllte përfundimisht çështjen e kualifikimit.

Golashënuesi më i mirë i Superligës, Ali Soue, ka dy ditë që ka udhëtuar drejt Gambias. Ai ka mbërritur dje në vendlindje, duke nisur kështu pushimet. Sipas kontratës që ka lojtari me Skënderbeun, duhet të kthehet për të luajtur me bardhekuqtë vetëm nëse ata do të luajë në Champions League. Në të kundërt, Ali Soue do të kthehet te Kievo, që ka kartonin e tij.

Duhet pranuar se Soue është i nevojshëm për Skënderbeun, për mënyrën e lojës së tij, por, nëse korçarët e humbasin “luftën” me UEFA-n, atëherë edhe afrikani, si shumë të tjerë, nuk mund të kthehet. Nëse CAS-i jep një vendim pozitiv, më 10 qershor Soue do të udhëtojë drejt Shqipërisë për të filluar stërvitjen me grupin. Pas përfundimit të Championsit Soue përfundon kontratën që ka me korçarët dhe në atë moment do të flitet për një rinovimin e mundshëm të saj.

Soue shkëlqeu gjatë sezonit që lamë pas me fanellën bardhëkuqe dhe vlera e tij tashmë është rritur shumë. Kievo mund ta shesë futbollistin në fjalë, nëse do të ketë ndonjë ofertë të majme financiare, por për këtë vendosin italianët dhe jo korçarët. Bisedimet mes Kievos dhe Skënderbeut do të nisin vetëm pas Championsit. Për sulmuesin afrikan në fakt ka pasur interesim pak ditë më parë nga skuadrat turke, konkretisht nga Trabzonspori. Korçarët do të kenë të vështirë ta mbajnë këtë futbollist edhe në të ardhmen, por të paktën ta kenë gati për Championsin.

Skema nuk ndryshon, me 4-3-3 edhe në Gjirokastër

Trajneri Ilir Daja, pas mbylljes së përgatitjeve anti-Luftëtar, ka vendosur për 11-shin, që do të zbresë sot në fushë. Gazeta e bërë të ditur pak ditë më parë formacionin dhe nuk ka asnjë ndryshim. 4-3-3 është skema e lojës për Skënderbeun në përballjen e javës së 17-të, ku ndryshimet e vetme janë në sulm, për shkak të mungesës së Soue. Shehi e nis titullar në portë, më pas vijnë Vangjeli, Mici, Radas dhe Jashanica në mbrojtje. Fidan Aliti do të jetë në stol, ndërsa Osmani do të luajë në mesfushë, ku do të bëjë rolin e shkatërruesit. Përpara tij luajnë Muzaka dhe Lilaj dhe në sulm debuton Emiljano Vila, i cili do të luajë në ta djathtë. Enis Gavazaj kalon në të majtë dhe Xhejms do të jetë sulmuesi kryesor i Skënderbeut.

Formacioni i mundshëm i Skënderbeut

Shehi – Vangjeli, Radas, Jashanica, Mici – Osmani – Muzaka, Lilaj – Vila, Gavazaj – Xhejms

Pas fitores së djeshme sulmuesi u shpreh: “Jam shumë i lumtur që shënova sërish dhe që bëra detyrën time si sulmues. Kur shënon dhe fiton skuadra, golat kanë më shumë vlerë. Skënderbeu e them me bindje se është i pandalshëm dhe unë do ta kem më të lehtë të fitoj “Këpucën e artë”. Ne kemi si objektiv të risjellim titullin kampion në Korçë dhe do ta bëjmë patjetër. Jemi skuadra më e mirë dhe këtë e kemi treguar gjatë gjithë fazës së parë me 8 fitore dhe vetëm 1 barazim. Kombëtarja? Mund të pushoja, pasi kisha nevojë, por nesër (sot) duhet të udhëtoj drejt vendit tim, Gambias, pasi jam thirrur nga ekipi kombëtar. Kam luajtur me kombëtaren e moshave që kur isha 16 vjeç. Kthehem pas një jave dhe më pas do të vazhdojmë rrugën tonë drejt titullit”.

Leonard Trebicka

Në Zagreb zhvilloi një ndeshje të mirë, edhe pse ishte e para me fanellën e Skënderbeut. Ali Soue, i ardhur në huazim nga Kievo, e kapi menjëherë lojën e korçarëve dhe konsiderohet shumë i rëndësishëm edhe për ndeshjen e kthimit. Në një intervistë për “Sport Ekspres”, sulmuesi shtatlartë flet për mundësitë e kalimit në grupet e Europa League. Flet edhe për ambientimin e shpejtë me ekipin e ri, si dhe për nxehjen në rastin e golit të Latifit, i cili nuk i pasoi, teksa ai ishte krejtësisht i lirë.   

– Soue, keni debutuar zyrtarisht me Skënderbeun në ndeshjen ndaj Dinamos. Gjithçka siç e prisnit?

– Padyshim që jam i kënaqur, që kam hyrë menjëherë në ritmin e duhur me ekipin dhe që bëra debutimin në një ndeshje të rëndësishme. Ishte një ditë shumë e bukur për mua, mbi të gjitha në një kompeticion kaq të rëndësishëm është diçka e veçantë që ndodh. Jam shumë i kënaqur.

– Për sa i përket ndeshjes, çfarë do të shoshit për lojën e Skënderbeut dhe rezultatin?

– Ishte një ndeshje e madhe nga të gjithë shokët e mi. Kishim mundësi ta fitonim, pasi mund ta mbyllnim edhe më shpejt lojën me një tjetër gol të shënuar, por për fat të keq nuk ndodhi kështu. Pësuam atë gol në limit dhe na vjen vërtet keq, por barazimi është një rezultat me vlerë dhe mbi të gjitha me një gol të shënuar në transfertë. Tani do të luajmë sikur s’ka ndodhur asgjë në ndeshjen e kthimit. Do të mendojmë vetëm për 90-minutëshin e radhës.

– Do të jetë e vështirë?

– Sigurisht, në të tilla nivele nuk ka më ndeshje të lehta. Çdo ekip mendon se është i pakalueshëm për vete dhe e mendon të kalueshëm kundërshtarin. Ne do ta respektojmë Dinamon aq sa ky emër e meriton. Por mendoj se mund të bëjmë më shumë se një paraqitje të mirë në këtë takim.

– Je përshtatur shumë shpejt me ekipin. Cili është çelësi i suksesit?

– Kjo është një meritë jo vetëm e imja, por mbi të gjitha e klubit, trajnerit dhe shokëve të ekipit, që më kanë ndihmuar shumë. Plus kësaj, grupi është fantastik, ka lojtarë shumë të mirë dhe kjo e bën më të thjeshtë ambientimin, pasi secili di të bëjë mirë detyrën e vet dhe di të bashkëpunojë në grup. Kjo ma bëri të lehtë të hyja shumë shpejt në brendësi të ekipit.

– Si ndjehet Soue pas një muaji gati te Skënderbeu?

– Shumë mirë, jam i kënaqur dhe nuk kishte si të ndodhte ndryshe. Ndjehem mirë, pasi siç e thashë më sipër, edhe shokët e ekipit janë treguar shumë të mirë. Më kanë ndihmuar në gjërat që nuk i kuptoja, për shkak të gjuhës. Të gjithë duan të më ndihmojnë për të më bërë shpejt pjesë të skuadrës.

– Në Zagreb keni shënuar, por për fat të keq pozicioni ishte i parregullt…

– Po dhe është shumë pozitive për një sulmues. Kam shënuar, pavarësisht se në pozicion të parregullt. Eshtë e rëndësishme dhe shpresoj të shënoj çdo herë, që do të jem në fushë. Për mua është një gol, sido që të jetë, nuk është pozicion jashtë loje, unë nuk e quaj kështu, e quaj gol dhe kjo më motivon më shumë

– Kur Latifi shënoi dhe nuk ju pasoi, u nxehët, apo jo?

– Sigurisht. Të flas sinqerisht, isha i nxehur pak, pasi gjithmonë është e rëndësishme që goli të bëhet lehtë dhe s’ka rëndësi së kush e bën. Por, nëse nuk shkonte në rrjetë ai top, do të isha nxehur më shumë. Ishte një gol i rëndësishëm edhe për ekipin dhe normalisht nuk do të më pëlqente të mos bëhej. Megjithatë, Latifi u tregua i shkëlqyer.

– Çfarë mendoni për ndeshjen e kthimit?

– Them se duhet vetëm të përgatitemi mirë, siç bëmë në takimin e parë, të japim maksimumin në fushë dhe më pas të shohim.

– Sa shanse ka ekipi të shkojë në grupe?

– Jam një tip pozitiv dhe gjithmonë e shoh gotën gjysmë plot. Jemi një ekip i mirë, në rast se jemi të përqendruar mund t’ia dalim. Për mua mundësitë i kemi 100% të shkojmë në grupe.

Bëhet fjalë për një sulmues nga Gambia, 23 vjeç, i cili luan prej vitesh në Itali.

I rritur te Kievo, duke debutuar që në moshën 20-vjeçare në Serinë A, Soue ka luajtur në huazim që atëherë te Juve Stabia, Peskara, Latina, Modena, Leçe, Prato e Viboneze.

Eksperienca nuk i mungon, në vitin 2017 ka shënuar 6 gola në 18 ndeshje te Viboneze.

1.91 i gjatë, Soue duket goditja e madhe e sulmit, pasi Skënderbeu shpreson që të ketë bërë një goditje të ngjashme me Ekubanin te Partizani.