Futbollisti nga Gambia ishte autori i një dopiete për CSKA-në në takimin e sotëm, por një gol në limite i Botev Plovdivit çoi rezultatin në baraspeshë 3 – 3 (ndeshja e parë ishte fituar 3 – 2 nga Botev Plovdiv) duke  zhvleftësuar dy golat e  Soues dhe duke lënë kryeqytetasit jashtë finales së Kupës.

Eliminimi dhemb më shumë dhe për faktin se Botev luante me nëntë lojtarë që prej minutës së 83-të dhe një gol tjetër do mbyllte përfundimisht çështjen e kualifikimit.

Mbrëmjen e djeshme, Soue ka zgjedhur që të komunikojë përmes Instagramit me ndjekësit e tij, ku ndër to ka dhe shumë shqiptar. Lojtari nuk ka nguruar që të jetë i hapur dhe i drejtpërdrejtë, me përgjigjet e tij, ndonëse është pyetur edhe për një mundësi për të qenë pjesë e Partizanit.

24-vjeçari nuk e sheh veten pjesë e “demave”, teksa përgjigjet me një “JO”. Nuk kishte si të mos pyetej nëse ekziston mundësi që një ditë ta shohim sërish me fanellën e korçarëve, por shkohet akoma dhe më tej, sidomos nëse Skënderbeu do të rikthehet në arenën ndërkombëtare. Autori i një goli këtë edicion në kampionatin bullgar e pranon se nuk është i lidhur me Korçën dhe se ai e ndjen veten një “ujk”, por lë të hapur gjithçka për të ardhmen.

“Më ka pëlqyer shumë koha kur kam qenë në Shqipëri dhe unë do të jem një ujk përgjithnjë. Unë nuk mund të parashikoj të ardhmen, por duhet të punoj fort tani dhe të presim se çdo të rezervojë e ardhmja. Skënderbeun apo CSKA-në? Të dyja”!

Nëse se keni ditur, Soue është tifoz i Arsenalit në arenën ndërkombëtare, diçka që ai vetë nuk nguron që ta tregojë me të gjithë mbështetësit e tij. Një “intervistë” ndryshe e Soues.

Nesër Skënderbeu do të luajë finalen e Kupës së Shqipërisë kundër Laçit, ndërkohë që dy ditë përpara se të luhet ky takim thuajse gjithë formacioni i Skënderbeut është gati. Me mungesën e Alitit (i grumbulluar nga Kosova) dhe rikthimin me shumë gjasa të Ali Soue në majë të sulmit, mund të themi që Skënderbeu nesër do të zbresë me titullarët që kanë pasur më shumë minuta në këmbë deri në këtë moment. Edhe pse në fakt Daja do ta vendosë vetëm nesër për titullarët, pas seancës së fundit stërvitore, mësohet se kapiteni legjendar Orges Shehi do ta ketë ndeshjen e fundit këtë finale në katërkëndor. Orgesi ka kohë që e ka deklaruar me gojën e tij se do të largohet nga futbolli i luajtur pas përfundimit të sezonit dhe fundi është pikërisht nesër. Ndoshta mund të kemi ndonjë çudi më tej në javët në vazhdim dhe nëse Skënderbeu luan në Champions mund të kemi edhe ndonjë sakrificë të fundit të Orges Shehit, por edhe kjo ka pak gjasa që të ndodhë, pasi Shehi është gati për t’i varur “këpucët në gozhdë”.

SOUE

Lajme më shumë se të mira ka pasur ditën e djeshme në kampin bardhekuq, teksa golashënuesi më i mirë i Superligës shqiptare, Ali Soue nja ka dalë për të qenë gati për të diel. Në fakt, prova gjenerale do të jetë sot, por dje në stërvitjen e radhës të Skënderbeut në Durrës, Daja e ka pasur në dispozicion sulmuesin nga Gambia. Kishte disa ditë që Soue nuk stërvitej me grupin, madje edhe në ndeshjen e fundit të Superligës ndaj Vllaznisë nuk u aktivizua asnjë minutë të vetme për shkak të dëmtimit në këmbë, ndërkohë që ajo që e ka “frikësuar” dje kryepankinën e Skënderbeut ka të bëjë me atë se cila është forma e lojtarit pas kaq ditësh pushimi. Kjo ka bërë që Ali Soue dje të mos stërvitej me 100% të mundësive të tij, që edhe pse ishte gati, Daja nuk ka dashur ta rrezikojë. Sot do të jetë prova e rëndësishme e lojtarit nga Gambia dhe nëse e kalon, atëherë nesër do të jetë në fushë nga minuta e parë. Gjasat janë të mëdha që Ali Soue në finalen e Kupës të jetë në fushën e lojës, por që gjithsesi fjala e fundit do të thuhet pas mbylljes së përgatitjeve për Kupën e Shqipërisë. Për sa u përket të tjerëve, nuk ka asnjë problem. Edhe Bruno Dita që pati një problem të vogël edhe ai është gati dhe infermieria përpara finales së Kupës te Skënderbeu është krejtësisht e boshatisur.

FORMACIONI

Ndërkohë që Shehi nesër është i sigurt që do ta nisë nga starti, në mbrojtje Vangjeli dhe Mici do të jenë dy krahët e Skënderbeut. Në qendër në mungesë të Alitit, Radas dhe Osmani janë dyshja e qendrës. Në mesin e fushës Bruno Dita duket se është gati për ta filluar nga fillimi dhe pranë tij Muzaka dhe Lilaj, janë dyshja tjetër që do të plotësojnë mesin e fushës. Për të kaluar në sulm, ku pas disa javësh do të shikojmë treshen e frikshme të sulmit korçar me Gavazaj në të djathtë e Xhejms majtas dhe në majë golashënuesin më të mirë të superligës, Ali Soue.

Formacioni i mundshëm i Skënderbeut (4-1-4-1)

Shehi – Vangjeli, Radas, Osmani, Mici – Dita, Gavazaj, Lilaj, Muzaka, Xhejms – Soue

Leonard Trebicka
Ali Soue rezulton të jetë një nga blerjet më të mira jo vetëm të Skënderbeut, por edhe të gjithë Superiores për këtë sezon. Sulmuesi nga Gambia, i huazuar nga korçarët, më shumë se për golat, dallon për mënyrën e lojës, profesionalizmin e tij dhe sakrificën për grupin. Madje, në një farë mase, Skënderbeu ka krijuar varësi nga Soue, aq më tepër që në këtë moment ai është qendërsulmuesi i vetëm në ekip. Në një intervistë për “Sport” Ekspres”, Soue thekson se ekipi do të jetë edhe më i fortë në vazhdim, pasi nuk ka ngarkesën e ndeshjeve europiane. Është i bindur për titullin dhe nuk e fsheh dëshirën për të vazhduar me Skënderbeun dhe sezonin tjetër.

– Soue, sapo jeni kthyer nga Antalia. Si shkoi faza përgatitore?

– Ishte një fazë përgatitore shumë e mirë, në kushte perfekte dhe që na shërbeu për pjesën e dytë të sezonit. Jemi pak të lodhur, por kjo është normale, sepse kemi zhvilluar nga dy stërvitje në ditë.

– Në ndeshjen e fundit miqësore nuk u aktivizuat. Çfarë ju shqetëson?

– Ngarkesa ka qenë e madhe gjatë qëndrimit në Turqi dhe kisha nevojë të qëndroja pak pushim. Trajneri dhe stafi mjekësor më kursyen pak a shumë. Nuk kam asnjë problem dëmtimi, gjëra të vogla të të fazës përgatitore. Tani jam gati dhe ju premtoj se do të jap më të mirën deri në fund.

– Si do të jetë Skënderbeu i 2018-ës, më i fortë apo ajo skuadër që kemi parë në 16 javët e para?

– Afrimet në skuadër, Vila dhe Krasniqi, them se do ta rrisin rendimentin e ekipit. Fakti që kemi ruajtur grupin të plotë, plus afrimet, më bën të mendoj se do të jemi më të forte. Kam bindje për këtë.

– Pse më të fortë, çfarë do të ndryshojë?

– Më të fortë, sepse siç e theksova më lart, kemi ruajtur grupin dhe kjo është shumë pozitive, ndërkohë që nuk do të kemi ngarkesën e ndeshjeve të Europa League. Kjo do të thotë se do t’i ruajmë fuqitë vetëm për ndeshjet e kampionatit dhe Kupës së Shqipërisë. Kur luanim edhe në Europë, dashje pa dashje, lodhja ishte e madhe, por ne ditëm ta përballonim.

– Skënderbeu e nis pjesën e mbetur të kampionatit me një avantazh prej 9 pikësh nga vendit i dytë…

– Do të mundohemi ta administrojmë në mënyrën më të mirë këtë diferencë pikësh. i kemi të gjitha mundësitë ta bëjmë këtë gjë, pse jo dhe ta thellojmë diferencën. Gjithsesi, janë 9 pikë, nuk janë pak, apo jo…?

– A do të vazhdojë Ali Soue me po atë paraqitje të 16 javëve të para?

– Jam përshtatur shumë mirë me Skënderbeun. Kanë kaluar shumë muaj që tani pjesë e këtij ekipi dhe sigurisht që do të jem edhe më mirë. Në fillim e kisha të vështirë, pasi vija në një kampionat të panjohur. Jam i bindur se do të jap më të mirën me lojë dhe me gola. Dua të shënoj sa më shumë për Skënderbeun dhe thjesht premtoj maksimumin.

– Sa ju ndihmon ekipi për të shkuar te goli?

– Kemi një mesfushë të blinduar në të gjitha drejtimet dhe kjo e bën një sulmues të dalë më thjesht te goli.

– Ju keni kontratë me Skënderbeun deri në fund të këtij sezoni. Do të kishit dëshirë të qëndronit?

– Kam kontratë deri në fund të këtij sezoni, me formulë huazimi me Skënderbeun. Nëse nuk do të kem ndonjë ofertë nga ndonjë skuadër me emër në Europë, do të qëndroj patjetër.

– Keni biseduar me presidentin Ardjan Takaj për këtë çështje?

– Po, presidenti më ka shprehur besimin e tij dhe më ka thënë se do të bëjë çmos të më mbajë te Skënderbeu edhe vitin tjetër. Kjo është një gjë e mirë për mua, por le t’ia lemë kohës, sepse tani fillon pjesa tjetër e kampionatit dhe duhet të jemi të përqendruar 100% te fusha.

– Skënderbeu është kandidati kryesor për titullin. Ju si e shikoni këtë objektiv?

– Kur erdha te Skënderbeu, pasi pashë grupin dhe gjithçka tjetër, isha i bindur se jemi skuadra që do të triumfojë në fund. Jemi afër gjysmës së Superligës dhe jemi në majë të shkëputur. Tani e them edhe më me bindje se do të jemi kampionë.

Pero Pejiç dhe Hamdi Salihi, ose ndryshe “një thes me gola”. Kroati Pejiç dhe shkodrani Salihi ishin pa dyshim “makineri” golash. Sezonin e shkuar, Superiorja kishte mundësinë që t’i gëzohej realizimeve të tyre të panumërta, ndërsa këtë edicion si skuadrat ashtu dhe sportdashësit janë në kërkim të goleadorëve të rinj.

Ali Soue dhe Rauf Alijev janë dy emrat të cilët kanë marrë statusin e kandidatëve për të pasuar dy “bomberat” e vjetshëm, por deri më tani nuk po gjejnë dot ritmin e plotë. Soue ka nisur të bëjë mirë, teksa e ka provuar shijen e golit, por ka treguar dhe një lojë të kënaqshme, ndërsa azeri i Kukësit është mjaftuar vetëm me një traversë në Superkupë, por dhe protagonizmin në golat e Kukësit pa mundur që të festojë rrjetën e parë shqiptare.

Soue dhe Alijev pa dyshim është një duel simpatik në supersfidën e javës së katërt, ku pa diskutim do të synohet që nga statusi i kandidatit të marrë statusin e liderit. E vështirë kur kujton se kë duhet të pasojnë. Si Salihi dhe Pejiç kanë luajtur për të fundit herë në Kukës së bashku. Shkodrani u largua duke grisur një karton të kuq, ndërsa Pejiç pas një 11-metërshi shumë milion eurosh. Ndoshta meritonin më shumë, por sot kuptohet që mungesa e tyre ndjehet dhe në Kukës ende i gëzohen dygolëshit që i dha titullin, ndërsa korçarët me nostalgji kujtojnë golat e nxjerrë nga hiçi të Salihit.

Soue dhe Alijev janë të destinuar për të qenë lider, por kanë shumë punë për të bërë nëse duan që të heqin hijen e së shkuarës, së paku duhet të bëjnë sa paraardhësit e tyre.

Këtë e konfirmon vetë trajneri Daja: “Lojtarët e dinë se kush luan nga fillimi, pasi kemi punuar taktikisht gjatë kësaj kohe. Besoj që Soue do ta nisë titullar, pasi është përshtatur menjëherë me grupin.”

Formacioni i mundshëm i Skënderbeut

Shehi – Vangjeli, Radas, Jashanica, Mici – Osmani – Gavazaj, Lilaj, Nimaga, Latifi – Soue

“Brenda pak ditësh do të mbyllim marrëveshjen me 1 ose 2 lojtarë, pasi na duhen në raundin e tretë të Europa League”, – shprehej presidenti i Skënderbeut, Ardjan Takaj, pas kualifikimit të skuadrës së tij ndaj Kairatit. Të gjithë janë në pritje të këtyre afrimeve te bardhekuqtë.

Bëhet fjalë për dy sulmuese dhe i pari është lojtari i Kievos, Ali Soue, që mësohet se e ka mbyllur përfundimisht me Skënderbeun. Nga burime pranë gazetës mësohet se marrëveshja është që Kievo ta huazojë për një sezon te Skënderbeu sulmuesin në fjalë. Të njëjta burime bëjnë me dije se Soue mbërrin në Shqipëri ditën e mërkurë dhe nuk dihet nëse do të presë ekipin në Durrës apo do të udhëtojë drejt Korçës. Po të mërkurën skuadra korçare do të udhëtojë drejt Çekisë dhe Ali Soue e ka të pamundur të bashkohet me grupin.

Për ndeshjen e kthimit ndaj Mladës mund të jetë nën urdhrat e Dajës. Ndërkohë, klubi bardhekuq duhet të vrapojë për ta federuar lojtarin nga Gambia para ndeshjes së parë. Kjo mendohet të jetë goditja më e madhe e tyre dhe drejtuesit besojnë se ia vlen.

Ali Soue është zbuluar si synim i Skënderbeut, ku mësohet se do të përfitojë rreth 8 mijë euro në muaj, duke qenë ndër lojtarët më të paguar. Duket se presidenti Takaj e ka hapur “thesin” në këtë moment, pasi ka siguruar 675 mijë euro deri në këtë moment. Soue vjen të mërkurën, por trajenri Daja nuk e ka parë ende këtë futbollist. Soue është 1.86 m i gjatë dhe peshon 84 kg, ndërkohë që në karrierën e tij nuk është se ka shënuar shumë gola. Ka luajtur vetëm në Itali dhe sezoni i fundit ishte më i suksesshmi, me 6 gola të shënuar në 16 ndeshje në Lega Pro me Vibonezen. Korçarët shpresojnë që të rezultojë si Ekubani i Partizanit, që erdhi po nga Kievo në Shqipëri.

KELMENDI – Vetë klubi kuqebardhë e mohoi afrimin e sulmuesit Shend Kelmendi, por dje është mësuar se kosovari do të vijë nesër dhe do të bashkohet me korçarët. Kelmendi do të vijë në formë huazimi për një vit te Skënderbeu, që e kishte kërkuar edhe më parë sulmuesin, kur ai luante për Prishtinën. Në atë kohë ky klub kërkoi 200 mijë euro, ndërsa tani ka firmosur për Trepçën, ekipin mik të Skënderbeut, që ka përfituar dhe e ka marrë. Kelmendi shihet si një lojtar me shumë perspektivë, që në të ardhmen mund të shitet, siç pritet të ndodhë aktualisht me Liridon Latifin.

Karriera e Ali Soue
2012-2013 Kievo 2 ndeshje
2013-2014 Juve Stabia 35 ndeshje (5 gola)
2014-2015 Peskara 8 ndeshje
2015 Latina 13 ndeshje
2015-2016 Modena 8 ndeshje
2016 Leçe 7 ndeshje 1 gol
2016-2017 Prato 15 ndeshje
2017 Viboneze 16 ndeshje (6 gola)