Sondazhi i tifozëve të Realit, zbulohen dëshirat e merkatos

Sport Ekspres — Thu, 21 Mar 2019 10:07:16 +0000

Të gjithë janë shumë kuriozë për merkaton që do të bëjë Reali i Madridit këtë verë. Ky sezon ishte ndër më të dobëtit e viteve të fundit. Shkaqet janë të ndryshme, duke nisur që nga largimi i Ronaldos e Zidanit, deri te merkato e varfër.

Në ekip erdhën vetëm portieri Kurtua nga Çelsi, mbrojtësi Odriozola nga Sociedadi, Vinisius Zhunior nga Flamengo dhe rikthimi i Mariano Diaz nga Lioni. Zidan vendosi të rikthehet në stol dhe kjo u cilësua si një nga gëzimet më të mëdha të sezonit.

Spanjollja “Marca” ka hapur një sondazh për tifozët e Realit të Madridit. Ata janë pyetur për lojtarët që do të donin të shihnin duke luajtur me ekipin e tyre të zemrës. Rreth 200 mijë persona i janë përgjigjur sondazhit.

Në sulm zgjedhja është pothuajse unanime. Kilian Mbape është ëndrra e madhe dhe ai ka siguruar rreth 79% të votave, duke lënë pas emra si Eden Hazard dhe Herri Kejn, të cilët nuk arrijnë as kuotën 10%.

Megjithatë, belgu i “Bluve të Londrës” është zgjedhur i preferuari për rolin e “playmaker”-it, duke fituar garën me Kristian Eriksenin e Totenhemit. Matijs De Ligt i Ajaksit është dëshira e madhe për mbrojtjen, ndërsa Pol Pogba mbetet i preferuari për mesin e fushës.

Në fund, Markos Alonso për krahun e majtë të mbrojtjes. 28-vjeçari është preferuar më shumë nga tifozët e “Los Blancos” në krahasim me David Alabën e Bajernit të Mynihut. Presidenti Perez i ka premtuar trajnerit francez blerje cilësore dhe tifozët e gjigantit spanjoll po presin me padurim fundin e sezonit dhe nisjen e merkatos.

Ronaldo drejt largimit, tani nuk e duan as tifozët

Sport Ekspres — Thu, 18 Jan 2018 21:17:04 +0000

Kristiano Ronaldo mund të largohet nga Reali i Madridit dhe për këtë fajin nuk e ka askush tjetër përveç tij. Tifozët madrilenë duket se nuk besojnë më te portugezi, i cili ka krijuar një krisje në Madrid.

Gazeta spanjolle “AS” dje ka publikuar një sondazh me pyetjen “Ronaldo duhet të qëndrojë apo të largohet nga Reali?”. Vota e shumicës së tifozëve të bardhë, 58%, është kundër qëndrimit të 5-herë fituesit të “Topit të Artë” në “Santiago Bernabeu”. Rezultat edhe më të thellë kundër Kristianos ka publikuar “Diario Gol”, sipas të cilit 32-vjeçarin nuk e duan 67.5%.

Duhet theksuar se kjo nuk është një njësi matëse, sepse mediet kanë edhe synimet e tyre. Pra, këto janë përgjigjet e një grupi të përzgjedhurish, jo të shumicës së komentuesve, prandaj ky sondazh nuk është një burim 100% i saktë pasqyrues i mendimit të tifozëve.

Arsyeja kryesore pse ata kanë humbur durimin me portugezin është se Ronaldo ka rihapur çështjen e një transferimi te Mançester Junajtid, aty nga ku është transferuar për 94 mln euro disa vite më parë. Lajmi se ai dëshiron t’i japë fund aventurës te “Galaktikët” ka ngjallur interesimin e klubeve të tjera evropiane dhe ndoshta në verë do të shohim një largim përfundimtar.