Simone Zaza

Gatuzo “ndan” Maldinin dhe Leonardon, një emër i ri për sulmin e Milanit

Sport Ekspres — Fri, 28 Dec 2018 13:24:07 +0000

E ardhmja e Xhenaro Gatuzos në stolin e Milanit është në pikëpyetje. Një gjë e tillë dihet, ndërsa kuqezinjtë luajnë ndeshjen e fundit nesër kundër Spalit në shtëpi. Djemtë e Gatuzos nuk kanë alternativa përveç fitores, por çfarë ndodh nëse nuk sigurohen tre pikët?

Siç raporton “QS”, Paolo Maldini insiston në vazhdimin e punës me Gatuzon dhe po e mbron ish-shokun e skuadrës, ndërsa Leonardo është gati për ta shkarkuar menjëherë pas ndeshjes, gjithmonë nëse nuk arrihet fitorja. Dy drejtuesit e “Djallit” kanë mendime të ndryshme sa i përket trajnerit, por mbetet për t’u parë fundi i ndeshjes kundër Spalit, me shpresën që Milani do të reagojë dhe shpëtojë trajnerin e tij.

Duke lënë mënjanë trajnerin, Milani vazhdon punën për përforcimin e ekipit në merkato. “La Stampa” zbulon objektivin e ri të kuqezinjve dhe ai është Simone Zaza. 27-vjeçari u rikthye në Itali tek ekipi i Torinos pas një sezoni shumë të mirë me Valencian, ndërsa Milani është gati ta ofrojë në ekip.

Fjalët e para të Zazës: Torino më realizoi ëndrrën

Sport Ekspres — Fri, 17 Aug 2018 21:23:21 +0000

Simone Zaza u rikthye në Itali dhe tashmë do të mbrojë ngjyrat e Torinos. 27 vjeçari është i lumtur dhe gati për të nisur aventurën e re me ekipin granata. Ai prezantohet në këtë mënyrë përpara tifozëve të rinj.

“Jam shumë i lumtur dhe falënderoj presidentin Kairo dhe Torinon, sepse më realizuan ëndrrën për t’u kthyer në Itali. Më në fund u realizua ajo çfarë dëshiroja.

Prioriteti im është të arrij shokët e ekipit dhe t’ia nis menjëherë punës për të dhënë kontributin tim në skuadër”, shprehet Simone Zaza, i cili do të formojë më Belotin një dyshe të fortë në repartin ofensiv të Torinos.

Zaza rikthehet në Torino, tanimë është zyrtare

Sport Ekspres — Fri, 17 Aug 2018 17:33:40 +0000

Simone Zaza rikthehet në Itali. Sulmuesi 27-vjeçar do të luajë sezonin e ardhshëm me Torinon dhe zyrtarizimi ka ardhur nga klubi i Valencias. Torino ka marrë italianin në huazim me të drejtë blerje në fund të sezonit.

“Valencia CF ka arritur marrëveshjen me Torino FC ditën e premte për huazimin dhe blerjen e detyrueshme të sulmuesit italian, Simone Zaza. Klubi dëshiron ta falënderojë atë për angazhimin dhe përpjekjet e tij gjatë kohës që ishte lojtar i Valencias dhe i uron lojtarit fat të mbarë në Serinë A”, shkruan klubi spanjoll në komunikatën zyrtare.

Tashmë ai do të rikthehet në Torino, në qytetin ku për dy sezone mbrojti ngjyrat e Juventusit. Zaza zhvilloi një sezon shumë të mirë me ekipin spanjoll, duke shënuar 13 gola në 33 ndeshje të luajtura. Gjatë këtyre ditëve emri i tij u lakua afër shumë klubeve, me francezët e Marsejës që insistuan për shërbimet e tij, por 27-vjeçari, i cili ka shënuar dy gola me kombëtaren e Italisë, vendosi të zgjedhë ekipin e Maxarrit.

Ofertë konkrete për Simone Zazan, pritet Gjimshiti

Sport Ekspres — Fri, 17 Aug 2018 09:16:22 +0000

Simone Zaza është lakuar në shumë klube si opsion këtë verë dhe duket se sezonin e ardhshëm sulmuesi italian do të luajë në Serinë A. Së fundmi ka një ofertë konkrete për të nga Sampdoria, që po përpiqet të afrojë disa lojtarë para nisjes së kampionatit.

Raportohet se oferta për Zazën shkon në 14 milionë euro. Por sikurse është bërë e modës, pagesa do të bëhet në dy këste. Sampdoria fillimisht do të derdhë në arkat e Valencias 2 milionë euro, kurse verën e ardhshme edhe 12 milionë të tjera.

Zaza vetë e mirëpret një rikthim në elitën e futbollit italian, ku ka spikatur më së shumti te Sasuolo. Sampdoria ndërkohë po pret një përgjigje për mbrojtësin Berat Gjimshiti.

Dje ai ishte titullar me Atalantan në ndeshjen e luajtur në Europa League. Gasperini tani duhet të vendosë përfundimisht nëse do e mbajë mbrojtësin në ekip apo do kërkohet të sistemohet diku tjetër. Sampdoria e pret.