Një mbrëmje për t’u harruar për Federiko Kiezën. Ndeshja e “yllit” të Fiorentinës përfundoi në minutën e 35-të. Një problem muskulor e detyroi t’i linte postin Xhovani Simeones.

Lojtari e vuajti shumë një gjë të tillë dhe në pankinë u pa i lotuar dhe me të dy duart në fytyrë. Megjithatë, dëmtimi nuk pritet të jetë serioz dhe Kieza mund të qëndrojë vetëm pak ditë pushim.

“Federiko është pasionant ndaj këtyre ngjyrave dhe vuan kur nuk arrin të japë kontributin e tij për skuadrën. Shpresoj që ta kem të gatshëm për ndeshjen e së premtes kundër Kaljarit”, komentoi Silvio Pioli, trajneri i Fiorentinës.

Silvio Pioli ka folur për Federiko Kiezën dhe trajnerin e tij të preferuar në prononcimin e dhënë për “Pentasport”. Rritja e 21-vjeçarit, i cili ka shënuar 11 gola këtë sezon, e ka befasuar trajnerin viola. Pioli nuk i kursen elozhet për të dhe e krahason me një “përbindësh” si Kilian Mbape.

KIEZA – “Federiko po rritet shumë dhe nuk e prisja këtë ndryshim radikal që ka pësuar gjatë këtij sezoni. Ai është pjekur dhe ka ndryshuar qasje. Nuk e di se çfarë është më e mira për të ardhmen e tij, por është shumë i kujdesshëm për gjërat që ndodhin rreth klubit. Në këtë moment Kieza është talenti italian më i madh, së bashku me Zaniolon. Nuk e di nëse do të bëhet një sumues, i cili shënon 20 gola në sezon. Megjithatë, po më befason përmirësimi që po i ndodh në fazën ofensive dhe mund t’i ngjajë shumë Kilian Mbapesë.”

MODELI – “Për mënyrën se si i përmirëson lojtarët, për metodet e punës dhe për faktin që e kam ndjekur nga afër për një javë, do kisha kënaqësinë të stërvitesha nga një trajner si Pep Guardiola.”