Shqiperia U18

Miqësore e dyfishtë, Shqipëria U18 udhëton drejt Rumanisë

Sport Ekspres — Wed, 31 Jul 2019 14:37:48 +0000

Kombëtarja U18 e Shqipërisë do të luajë 2 miqësore në muajin gusht. Ekipi i drejtuar nga Olsi Uku do të përballet me bashkëmoshatarët e Rumanisë me datë 13 dhe 15 gusht.

Kuqezinjtë do të grumbullohen me datë 9 gusht dhe stërvitjet e para do të zhvillohen në Elbasan. Më pas nisja drejt Rumanisë dhe akomodimi në qendrën stërvitore të kombëtares rumune, në kompleksin e së cilës do të luhet miqësorja e dyfishtë.

Ndeshja e parë do të zhvillohet me datë 13 gusht (ora 17:00), ndërsa e dyta me datë 15 gusht (ora 10:00). Qëllimi është grumbullimi i elementëve cilësorë të vitlindjes 2002, të cilët luajnë në Shqipëri ose jashtë.

Këto nuk janë data të lira nga FIFA dhe jo çdo futbollist mund të marrë leje nga klubet ku aktivizohet.

Përfundon turneu në Kroaci, Shqipëria U18 e mbyll e katërta

Sport Ekspres — Mon, 03 Jun 2019 13:40:07 +0000

Është mbyllur turneu “Kvarnerska Rivijera 2019”, që u zhvillua në Kroaci, pjesë e të cilit ishte edhe Kombëtarja jonë U-18. Kuqezinjtë e vegjël të drejtuar nga trajneri Olsi Uku e mbyllën në vendin e katërt, teksa në betejën për vendin e tretë u mposhtën nga Udineze.

Sfida e fundit e zhvilluar e kuqezinjve u mbyll në barazim pa gola dhe ishte lotaria e 11-metërshave që vendosi fituesin e vendit të tretë. Italianët u treguan më të saktë dhe triumfuan 5-4. Kujtojmë, që Kombëtarja U-18 u eleminua nga Rijeka, sfidë që përfundoi 2-0 në favor të kroatëve.

“Kvarnerska Rivijera 2019”
Shqipëri U-18 1-0 NK Orijent
Shqipëri U-18 1-0 Venecia
Shqipëri U-18 7-2 NK Vinodol
Shqipëri U-18 2-1 Zeljeznicar
Rijeka 2-0 Shqipëri U-18
Udineze 0-0 Shqipëri U-18 (5-4)

Rijeka e fortë, Shqipëria U18 ndalet te më e bukura

Sport Ekspres — Sun, 02 Jun 2019 06:47:37 +0000

Shqipëria U18 është ndalur në gjysmëfinale, pasi është mposhtur me rezultatin 2-0 nga Rijeka U18 në turneun“Kvarnerska Rivijera 2019” një ditë më parë. Kuqezinjtë e drejtuar nga Olsi Uku kanë pësuar dy gola të shpejtë dhe më pas kroatët e kanë mbajtur rezultatin e pandryshuar.

Kështu Shqipëria do të luajë në finalen e vogël për vendim e tretë dhe kundërshtar do jenë italianët e Udinezës, gjithashtu të mundur në gjysmëfinale. Ky turne i ka vlejtur shumë stafit teknik të kombëtares për të parë gjendjen e lojtarëve.

KVARNERSKA RIVIJERA 2019 – GJYSMËFINALET
E shtunë, më 1 qershor 2019, ora 18:30
Shqipëria U18-Rijeka U18 0-2

Sukses kuqezi në Kroaci, Shqipëria U18 merr kreun e grupit

Sport Ekspres — Tue, 28 May 2019 21:37:27 +0000

Kombëtarja U18 e Shqipërisë ka regjistruar fitoren e dytë në turneun “Kvarnerska Riviera”. Kuqezinjtë e drejtuar nga Olsi Uku mundën me rezultatin 1 – 0 Venecian. Ky rezultat siguron matematikisht kreun e grupit B.

Ndeshja e radhës e kuqezinjve do të jetë kundër kroatëve e NK Vinidol. Takimi i fazës çerekfinale do të zhvillohet më datë 30 maj dhe kundërshtari i Shqipërisë do të jetë skuadra e renditur e dyta në grupin A, ku kundërshtarët e mundshëm janë Zheljezniçar, FK Vardar, Rijeka dhe NK Pomorac.

Festë në Librazhd, Mema i dhuron fitoren Shqipërisë U18

Sport Ekspres — Thu, 25 Apr 2019 12:55:03 +0000

Shqipëria U18 ia ka dalë të fitojë miqësoren e zhvilluar në Librazhd kundër moshatarëve të Maqedonisë së Veriut. Trajneri Nevil Dede e nisi ndeshjen me këtë formacion: Çeka, Ismaili, Murataj, Shala, Musai, Pusi, Stafa, Kuka, Çahani, Gjumsi, Shahaj.

Ndeshja ishte përgjithësisht e barabartë. Emocionet më të mëdha u provuan në pjesën e dytë. Pusi goditi shtyllën, ndërsa Gjumsi nxori jashtë një top nga pak metra afër portës.

Festa e golit | Foto: Sportekspres.com

Megjithatë, djemtë kuqezi gjetën golin e fitores. Mema tundi rrjetën në minutën e 88-të, duke dërguar në festë tifozët e pranishëm dhe duke vulosur triumfin e ekipit tonë.

Shqipëri U18-Maqedonia e Veriut U18 1-0
Shënues: Mema 88′

Ceka: Nder të përfaqësosh kombin, emocion i papërshkrueshëm!

Sport Ekspres — Wed, 24 Apr 2019 12:11:51 +0000

Fatmir Ceka, portieri i Akademisë së Futbollit, ka dalë sot para mediave përkrah trajneri të Shqipërisë U19, Nevil Dede. Shtatlarti, dukshëm i pjekur në ato çka thotë, ka një mesazh të qartë për të gjithë të rinjtë: “Kur vesh fanellën kuqezi nuk prezanton veten, por kombin”.

“Të veshësh fanellën e kombëtares është një emocion i papërshkrueshëm, ndjenja më e bukur në botë. Të gjithë ata që e veshin fanellën e kombëtares duhet të ndjehen shumë krenarë për veten e tyre. Kur vishet kjo fanellë duhet të dish që nuk je duke prezantuar veten, por je duke prezantuar një komb të tërë. Duhet të bësh mbi maksimumin tënd për t’i bërë të gjithë krenarë”, shprehet Ceka fillimisht.

Më pas ai e pranon se e ka ëndërruar që të luajë për kombëtaren dhe kjo e ka shtyrë të punojë edhe më fort: “Që i vogël e kam ëndërruar dhe ka qenë motivimi im më i madh për t’u stërvitur, derisa ia arrita qëllimit. Do vazhdoj të punoj edhe më fort, që mos ta lëshoj vendin”.

Shqipëria U18 barazoi me bashkëmoshatarët e Maqedonisë së Veriut me rezultatin 2-2 dhe Ceka normalisht do kishte dashur që kuqezinjtë të triumfonin. “Kur luan për kombëtaren është gjithmonë e rëndësishme të fitosh dhe të japësh maksimumin. Edhe në ndeshjen e dytë do bëjmë më të mirën dhe do tentojmë të fitojmë. Në kombëtare nuk ka asnjë ndeshje miqësore, janë të gjitha si finale”, përfundoi portieri.