“Kupa e Pezë-Helmësit”, te Kukësi janë në humor

Sport Ekspres — Tue, 20 Nov 2018 18:10:45 +0000

Kukësi është larg pritshmërive, teksa skuadra verilindore ndodhet 10 pikë pas Partizanit kryesues. Në tre ndeshjet e fundit, të besuarit e Cungut nuk kanë mundur që të fitojnë asnjë ndeshje dhe pushimi duket se erdhi në momentin e duhur për të rifituar qetësinë e munguar, ndonëse te Kukësi dihet që nuk heqin asnjëherë dorë nga një objektiv, për sa kohë matematikisht mund ta arrijnë.

Klima në skuadër duket e mirë, të paktën kjo kuptohet nga fotot që sportistët postojnë në rrjetet sociale. Dino Shpehar ka postuar një foto sot me Arlind Kalanë, Ardian Cuculin dhe Donjet Shkodrën. Mbi foto shkruhet “Kupa e Pezës-Helmës, 4+1”. Siç kuptohet, sot kuksianët kanë zhvilluar një mini-turne dhe kroati e i ka vënë dhe emër, përderisa ai dhe skuadra e tij kanë fituar.

Ndeshja e radhës për Kukësin është ajo me Kamzën, që është programuar për t’u luajtur këtë të diel në transfertë. Pozitiv fakti se skuadra mund të jetë përshtatur me terrenin e këtij stadiumi, pasi aty ka zhvilluar dy ndeshjet e fundit si pritës.

Mangësia e madhe e Kukësit, sa të vështirë e ka për të shënuar

Sport Ekspres — Wed, 14 Nov 2018 08:41:31 +0000

Kukësi e nisi me pretendimet mëdha këtë edicion, duke mos nguruar në asnjë moment që të shprehte me të madhe se vetëm titulli i kënaqte dhe çdo vend tjetër do të ishte një dështim. Mëse normale deri diku, çdo edicion jemi mësuar ta dëgjojmë, por dhe ta shohim Kukësin të rivalizojë për vendin e parë. Gjithsesi, gjërat nuk po shkojnë mirë, diçka që shihet qartë nga fakti se verilindorët janë 10 pikë larg vendit të parë.

Nëse bëjmë një krahasim me një edicion më parë, kuksianët kanë marrë një pikë më pak, por kanë plot 10 gola më pak se një vit më parë. Një vit më parë Kukësi e kishte gjetur rrugën e rrjetës plot 22 herë, ndërsa këtë edicion vetëm 12 realizime janë regjistruar pas 13 javësh. Mesatare shumë e dobët, me më pak se një gol për ndeshje.

6 gola Rexhinaldo, 3 Kordeiro, 2 Shameti dhe 1 Shpehar, kjo është “gjeografia” e ndarjes së golave te Kukësi. Vetëm 4 shënues në 13 javë dhe dy prej tyre janë mbrojtës, edhe pse braziliani luan si mesfushor i djathtë. Vetë largimi i Harbës tregoi se llogaritë janë bërë gabim dhe se në sulm Kukësi ka probleme.

Nuk mund të priten në çdo javë gola nga Rexhinaldo apo të jetë besimi se në goditjet standarde Shameti do të jetë ne vendin e duhur e në momentin e duhur, sikurse të presësh që dhe Koredeiro të vijojë të befasojë si një sulmues i improvizuar.