Në studion e emisionit “Rubrika Sportive” në “RTSH”, trajneri i njohur Shkëlqim Muça u shpreh pro vendimit të gjyqtarit kroat, pasi sipas tij goli i Sherif nuk është në shkelje të rregullores.

GOLI I SHERIF – “Të mos flasim si tifozë. Rreshtimi i skuadrës në këtë rast është skandaloz. Qendra e mbrojtjes është krejtësisht bosh. Aty duhet të ketë të paktën 3 ose 4 lojtarë. S’duhet të kenë pishman fare, por duhet të nxjerrin mësime. Për mua është gol i rregullt. S’ka prekje me dorë, s’ka shtyrje. Numri 4 duhet të rrinte përpara lojtarit dhe jo mbrapa. Unë nuk shikoj gjë të parregullt në këtë gol. Për mendimin tim arbitri kryesor ka pyetur anësorin për arsyen e ngritjes së flamurit dhe më pas e ka pyetur nëse lojtari që shënoi golin ishte pozicion jashtë loje”.

PARAQITJE E EKIPEVE SHQIPTARE NË EUROPË – “Në këtë periudhë, që është shumë e rëndësishme, ekipet shqiptare gjenden të papërgatitura. Skuadrat e mira i marrin masat që në muajin janar e shkurt për këto ndeshje, pasi kemi të bëjmë me një kompeticion shumë të ndryshëm. Ka ndryshime të shumta dhe faza përgatitore të programuara në mënyrë jo të duhur. Ekipet e tjera zhvillojnë 6 ose 7 miqësore, ndërsa ne shumë më pak. Kjo është një problematikë shumë e vjetër e ekipeve shqiptare. Kështu ka qenë edhe kur trajnoja unë, asgjë s’ka ndryshuar”.

TJETËRSIMI I DINAMOS – “Njerëzit e ndërgjegjshëm e dinë çfarë është stema dhe historia e një klubi. Këto janë muhabete që unë refuzoj t’i dëgjoj. I bie që një klub me histori si Skënderbeu të zhduket dhe Dinamo klub i themeluar në vitin 1946 të zhduket nga historia. Këto klube kanë një emblemë. Pronari i Skënderbeut është bashkia Korçë, unë nuk e kuptoj pse nuk ka një prononcim nga kryebashkiaku për të sqaruar të ardhmen e klubit. Pse duhet të shkrihet një histori e tërë për shkak se klubi nuk shkon dot në Europë”.

BORXHET E KLUBEVE TË SUPERIORES – “Federata i është drejtuar shtetit me një paketë ligjesh, ku kërkon që shteti ta mirëkuptoj dhe të implementojë. Unë mendoj se pjesa më e rëndësishëm është amnistia që federata kërkon për borxhet. Në këtë mënyrë mund të fillojë formalizimi i futbollit. Në këtë moment do ishte një goditje shumë e madhe nëse do të largohen klube me emër që kanë borxhe të mëdha. Shteti duhet t’u falë këtyre klubeve borxhet ndaj tatimeve”.

Fillimisht ai analizon sfidën Tirana-Kastrioti dhe fjalët e Muçës në emisionin “Rubrika Sportive” në RTSH janë: “Natyrisht që ishte një ndeshje shumë e rëndësishme për Tiranën, që të mbyllte çështjen e mbijetesës. Nga ajo që pamë në fushë nuk meritoi më shumë se sa mori. Madje në disa momente edhe mund të kishte pësuar. Paraqiti një lojë të dobët, një lojë pa grinte, jashtë atyre karakteristikave që ka Tirana”.

Më tej Muça e shton dozën e kritikave: “Pavarësisht se ishte një ndeshje jetike, pa ngarkesën e tifozëve, skuadra ishte shumë e vaktë, shumë pa grintë, pa karakter. Mund ta them me plot gojën që është skuadra më e dobët e këtyre 30 viteve të fundit, në aspektin e cilësive. Kam qenë gjithë kohën i ingranuar me futbollin. Është ekipi më i dobët i 30 viteve të fundit, e them me bindje. Sa i takon shpëtimit, janë edhe dy ndeshje dhe Tirana e Kastrioti kanë ndeshje të vështira”.

“Duke parë gjithë ndeshjen, u tregua se Partizani e meriton vendin ku është. Kemi parë një ekip që ishte shumë i përqendruar. Dukej sikur ishte për trofeun. E dominoi ndeshjen dhe e fitoi pastër. Tani është gati të prekë trofeun”.

DERBI – “Shpresoj të ketë shumë tifozë në derbi. Aty shpëtohet sezoni për tifozët. Do ishte mbylla më e mirë për kampionatin, Është një derbi special, pasi Partizani do të fitojë trofeun. Tirana nga ana tjetër do pikë për objektivin që ka. Në derbi nuk ka llogari. Ne që e kemi provuar, sado jemi ,munduar, asnjëherë nuk dalin llogaritë. Tifozët nuk të lënë. Shpresoj të bëhet derbi i bukur. Nuk ka moment më të mirë për Partizanin ta fitojë titullin në derbi. Tifozët mezi presin ta fitojnë në derbi”.

FITORJA E TIRANËS – “Skënderbeu krijoi raste, por nuk pamë vendosmërinë për të fituar. Isha i bindur që do ta fitonte Tirana. E kisha atë ndjesinë. Ishte në fushë Skënderbeu, por nuk kishte dëshirën e madhe për të fituar. Gjyqtari nuk dha penallti, nuk kishte pse shkonte ashtu. Lojtari i Skënderbeut ka shkuar direkt te këmbët e lojtarit. Ishte penallti neto. Po të mbaronte 0-0 do të kishte polemika. Po të mos bëhej goli, do ishte penalizim i madh për Tiranën”

NDESHJA NË DURRËS – “Nuk mund të bëj analizë të hollësishme, por me atë që pashë më afër fitores ishte Luftëtari. Teuta vazhdon dobët, Teuta ishte me fat. Gjirokastritët lanë dy pikë”, u shpreh Muça gjatë emisionit.

Në një intervistë për SportEkspres.com, Muça ka folur për ndeshjen Tirana-Skënderbeu, që është mjaft e rëndësishme për të dyja ekipet. Ai shikon bardheblutë si favoritë, ndërkohë që mungesa e tifozëve e bën këtë ndeshje “të vdekur” në aspektin e atmosferës.

INTERVISTOI: AGRON KAJA

Pas 31 javëve të luajtura në Kategorinë Superiore, mendoni se skuadrat renditen aty ku e meritojnë?
-Kjo është renditja reale e pjesës më të madhe të skuadrave në këto 31 javë. Duke përjashtuar Kukësin, që duhet të kishte më shumë pikë, kjo renditje tregon së pari gjendjen e mirë që po kalon Partizani.

Tirana-Skënderbeu është një nga ndeshjet e kësaj jave dhe janë ekipe që ju i keni drejtuar në të shkuarën. Cilën skuadër shikoni si favorite?
– Tiranën për vetë gjendjen që ka në renditje, por edhe sepse Skënderbeut nuk i rrezikohet asgjë dhe një vend në Europë për ta është shumë i vështirë. Tirana është favorite edhe për faktin se do të luajë në stadiumin e saj. Në këtë parashikim nuk mendoj se e nënvleftësoj skuadrën korçare. Mes respektit dhe realitetit, unë zgjedh fitoren e Tiranës.

Por nuk do të ketë tifozët. Sa do të ndjehet mungesa e tyre?
-Normalisht, një ndeshje që luhet pa tifozë në stadium është e vdekur. Gjithsesi rregulloret tona e kanë këtë. Mendoj se duhet ndryshuar strategjia e dënimeve të tifozëve dhe të aplikohen ndëshkime të tjera. Kështu, çdo dënim është i rëndë edhe në aspektin financiar.

Të dyja skuadrat do të ketë mungesa, sa e vështirë bëhet për trajnerët?
-Po, me sa di do të jenë Karabeci e Kërçiku te Tirana dhe Dita me Radasin te Skënderbeu. Dy mungesat te Tirana janë shumë të rëndësishme për këtë sfidë, por çdo skuadër ka një numër të caktuar lojtarësh dhe kanë alternativa. Gjithsesi, janë mungesa serioze për Tiranën.

Mema dhe Shehi janë trajnerë të rinj,  si e shikoni pozicionin e tyre në të tilla sfida delikate?
-Unë i mbështes trajnerët e rinj dhe në Kategorinë Superiore të këtij sezoni janë disa që po tregojnë nivel e kulturë në pankina. Është pozitive që edhe në sfidën Tirana-Skënderbeu do jenë dy trajnerë të rinj. Mema dhe Shehi do aftësohen me të tilla ndeshje delikate.

Mendoni se ndeshjet e javës së 32-të do të sjellin ndryshime në renditjen e skuadrave?
-Duke përjashtuar Partizanin, që nuk lëviz nga vendi i parë në renditje edhe nëse humbet në Vlorë, te skuadrat e mesit dhe në fundin e tabelës edhe mund të ketë ndonjë ndryshim. Të gjitha janë afër me pikë, por Laçi mund të ngjitet këtë javë. Flamurtari nuk më duket shumë bindës.

Në studion e emisionit “Rubrika Sportive ” në “RTSH”, Muça e cilësoi këtë fenomen si një ndër shkaqe kryesore të mungesës së njerëzve në stadiume.

“Asnjë rezultat nuk më habiti, ishin të pritshme. Në këto javë, vetë lufta për Europën dhe mbijetesën e bën kampionatin më të bukur. Nuk ka llogari dhe lëshime. Kjo e bën futbollin më tërheqës dhe të pastër. Të gjitha kanë qenë ‘fair’ dhe shpresoj të vazhdojë kështu. Vitet e shkuara ka pasur lëshime në fund. Duhet kuptuar që duhet luftuar deri në fund, është një produkt që duhet reklamuar. Po u lanë ndeshjet e fundit, njerëzit gjashtë muaj pas nuk vijnë. Të gjithë duhet ta forcojnë garën me lojë të ndershme. Po të ketë ndeshje të pastra, njerëzit do vijnë 10 ose 20 për qind më shumë”.

Për SportEkspres.com, Muça deklaron se Partizani e Kastrioti janë më të favorizuar për fitore. “E mendoj një javë me ndeshje të forta e të vështira, por më shumë prioritet do të kenë skuadrat pritëse. Një rikthim te fitorja për Partizanin në kryendeshjen me Skënderbeun, ndërkohë që edhe Kastrioti do të arrijë të dalë me një rezultat pozitiv në përballjen ndaj Luftëtarit”, kështu theksoi fillimisht në deklarimin e tij Shkëlqim Muça.

Ndërkohë që për ndeshjet e tjera të javës kësaj jave, Muça mendon një barazim  në Vlorë mes Flamurtarit e Teutës dhe fitore të Laçit me Kukësin. “Teuta nuk duhet parë nga rezultatet e fundit që ka arritur dhe në Vlorë besoj se do të marrë barazimin. Për Laçin, rruga e fitoreve duket e shtruar edhe në këtë sfidë me Kukësin, ndaj pres që kjo javë të sjellë disa lëvizje në renditje, por në të dy kahjet e saj”.

AGRON KAJA

TEUTA – “E kam thënë dhe herë të tjera, Teuta është një ekip pa personalitet. Ata kanë bërë një fazë të tretë shumë të keqe. E filluan me një seri barazimesh dhe e mbyllën me një ndeshje skandaloze. Ishte një ndeshje e çuditshme, në çdo sulm të Laçit rrezikohej për gol. Futbolli ka dhe ndeshje të tilla”.

PARTIZANI – “Kësaj here e pashë Partizanin shumë të çekuilibruar, sidomos në mbrojtje. Ishte një problem në tërësi. Skuadra u nervozua shumë pas golit të dytë. Ekipi u shkërmoq, nuk dukej se ishte skuadra që kryesonte. Për fatin e tyre rivali humbi gjithashtu. Merita i takojnë dhe kundërshtarit,  që ishte shumë i qetë”.

TIRANA – “Tirana duhej treguar më shumë cinike, pasi krijuan shumë raste. Nuk e shikoj të rrezikuar si vitin e kaluar, pasi skuadra ka një grup më të plotë se përpara dy vitesh. Gjithsesi kampionati është i fortë dhe duhet të fillojnë të fitojnë ndeshje. Duhet të dish ta drejtosh një skuadër, pasi është biznes, nuk është si dikur që investonte shteti disa lek. Gjykimi? Nuk mendoj se është mirë që të flitet shumë për arbitrat, siç u pa ndaj Flamurtarit u dha penalltia”.

“Ma humbi Hasani (qesh). Fokusi kryesor ishte Partizani-Kukësi. Rezultati, për atë që u pa, ishte i drejtë. Kukësi e gjetur Partizanin në ditë të vështirë, u mungonin lojtarë me shumë peshë. Nuk ishin Telushi e Mala, po ashtu edhe Hebaj. Partizani e menaxhoi me kujdes ndeshjen. Pasi barazoi mund të mbyllte, por duhej më shumë besim. Kukësi në fund u shpërfytyrua. Partizanit i ngjiti ai rezultat, 9 pikë nuk janë pak”.

Rezultat i drejtë në Kukësi-Partizani? Në fillim u duk sikur Kukësi do dominonte. Luajtën nga krahët, në qendër ishte e vështirë. Partizani ishte i qetë, sidomos qendra e mbrojtjes. Partizani ishte më mirë në kundërsulme. Po ta shikosh, ata patën edhe raste e shënimit. Kukësi bëri vetëm volum. Mungesat në mesfushë e penalizuan Partizanin. Në pjesën e dytë erdhi goli i Rexhinaldos. Kukësi duhet ta kontrollonte lojën, por nuk ndodhi. Partizani mori fushë dhe shënoi. Më pas mund të mbyllte lojën dhe kampionatin. Kishte frikë të mos hapej dhe të shënonte. Po luante me kujdes. Kukësi u lodh shumë. 25 minutat e fundit nuk i mbanin më gjunjët. Veprimet më pas i kishin spontane”.

“E kam thënë se Partizani është më afër titullit. Kam qenë trajner dhe një ekip për të dal kampion ka nevojë për shumë gjëra. Duhet qetësi, menaxhim i fitoreve dhe humbjeve. Ata nuk kanë pasur tension, kurse të tjerët ka pasur probleme. Futbolli ka humbje dhe fitore. Ke të bësh me njerëz dhe duhet të dish t’i menaxhosh. Kam parë lojtarë që futen dhe japin maksimumin. Kam pasur lojtarë që futeshin dhe varnin turinjtë. Po ta shikosh si lojë, nuk ka gjë më shumë. Diferencën e bëjnë gjërat e tjera. Është fryma dhe menaxhimi. Te Tirana nuk di kush janë drejtuesit. E kanë humbur fare identitetin. Partizani i ka”.

“Trajneri duhet të vazhdonte te Kukësi, ishte në luftë për titull. Ndryshimi u bë jo në kohën e duhur. Merkato nuk më pëlqen, prishen ekuilibra. Rexhinaldo ishte lojtar kryesor, Shkurtaj do kohë, Kjo krijon pakënaqësi. Rroca njeh lojën e Shkurtajt dhe ende s’e kam parë në lojë. Merkato nuk ka qenë e goditur. Ka marrë lojtarë të mirë, por duheshin marrë me kujdes. Presidenti nuk ka folur mirë për trajnerët. Është edhe Demi këtu, nuk mund të jetë presidenti trajner”.

Në intervistën e dhënë për SportEkspres.com, Muça thekson se i duket i çuditshëm vendimi i Panuçit për portierin e Lacios. Në lidhje me kualifikimin në Europian, ai e sheh të vështirë diçka të tillë dhe konsideron si sukses renditjen në vendin e tretë. Gjithsesi ai nuk i konsideron zero shanset.

INTERVISTOI: AGRON KAJA

Si e shikoni situatën në Grupin H eliminator të Euro 2020, ku Kombëtarja është në prag të dy ndeshjeve të para?
-Janë ndeshjet e para dhe Shqipëria në grupin H i ka kundërshtarët shumë të fortë, të fortë e të mesëm. Rëndësi ka që ta nisim me këmbën e mbarë dhe të mos humbasim që në ndeshjen e parë.

Përgatitjet për dy sfidat e para eliminatore me Turqinë e Andorrën kanë nisur, por si i shikoni zgjedhjet e trajnerit?
-Të gjitha zgjedhjet që ka bërë Panuçi për këto dy ndeshje do të shikohen në fushën e lojës, por këta emra janë, nuk ka të tjerë. Rëndësi ka që të gjithë ata që do të luajnë të jenë në formë të mirë dhe të mos zhgënjejnë që në fillim.

A ka edhe futbollistë të tjerë që mund të ishin thirrur nga Panuçi për këto dy sfidat e para?
-Ua përmenda më sipër se këta janë emrat. Lenjani ka bërë zgjedhjen e tij për të mos qenë në Kombëtare me Panuçin trajner. Në këtë situatë duhet që të merremi me ndeshjen, pasi ka shumë rëndësi përgatitja sa më e mirë e skuadrës.

Trajneri Panuçi është treguar i ashpër me portierin Strakosha. A është kjo forma e duhur për të rritur cilësinë në skuadër?
-Mua më duket i çuditshëm vendimi i Panuçit për portierin Strakosha. Pse? Sepse ai ishte në ndeshje dhe normalisht duhej të pushonte një ditë, jo t’i hipte avionit menjëherë. Disiplina është disiplinë për të gjithë, por ky është një rast që duhej të kuptohej nga trajneri.

Sfida e parë luhet në Shkodër më 22 mars me Turqinë. A mund ta kalojmë sikurse në miqësoren e fundit?
-Çdo ndeshje e kaluar ka historinë e vet, ndërsa aktualiteti duhet të përshtatë skuadrën tonë me gjendjen e mundësitë reale që ka. Duke qenë një ndeshje e fortë me Turqinë, skuadra duhet të jetë e përgatitur së pari nga ana psikologjike, sepse është sfida e parë në Euro 2020.

I ka mundësitë kjo Kombëtare që ta përsëritë suksesin e arritur De Biazin si trajner?
-Nuk e mendoj atë sukses si me De Biazin, jam shumë skeptik. Unë mendoj se Kombëtarja jonë duhet të bëjë një paraqitje të mirë dhe vendi i 3-të për të do të jetë sukses. Duhet të jemi realistë për grupin, por edhe shpresat nuk duhet t’i humbasim.

Kështu, moduli më i mirë për Muçën në këtë përzgjedhje është 1-4-4-2, duke e nisur me portierin më të mirë, ku ai vendos Blendi Nallbanin, një legjendë në katërkëndorin bardheblu. “Nallbani ka qenë një nga portierët më të mirë të kohës dhe mbetet një nga më të mëdhenjtë në futbollin shqiptar”, është kjo konsiderata për Blendi Nallbanin, ndërkohë që reparti i mbrojtjes më shumë dominohet nga bardheblutë.

Elvis Sina është mbrojtësi i djathtë më i mirë në karrierën e Muçës trajner, në qendër të mbrojtjes veçon Nevil Deden e Saimir Malkon, ndërsa në krahun e majtë Gledi Micin. “Të katërt janë ndër mbrojtësit më të mirë që kanë luajtur në futbollin shqiptar, me karakteristika të ndryshme mes tyre, por lider në skuadra”.

Ndërsa mesfusha e Muçës përbëhet nga lojtarë të fortë, virtuozë dhe elegantë, duke nisur me Sokol Prengën, Ardian Memën, Ervin Bulkun dhe hungarezin Zoltan Kenesei, të cilin njëherësh e quan edhe lojtarin e huaj më të mirë që ka trajnuar në karrierën e tij si trajner. “Prenga kishte si armë goditjet standarde, Mema liderin në këtë repart. Bulku vizionin dhe Kenesei bukurinë dhe elegancën në veprimet me topin”. Të gjithë këta mesfushorë janë veçuar për cilësitë dhe për kualitetet që kanë pasur dhe për atë që kanë dhënë në futbollin shqiptar.

Për sulmuesit më të mirë, Shkëlqim Muça nuk ndahet nga bardheblutë, teksa vendos së pari “Zogun”, Indrit Fortuzin, së bashku me kroatin Pero Pejiç. “Të dy janë sulmuesit që kanë dominuar në kohën kur ata kanë luajtur. Janë të dy kryegolashënues, të cilët kanë bërë diferencën jo vetëm me golat e shënuar, por edhe me shërbimet që u kanë ofruar skuadrave në fushën e lojës”.

KARRIERA – Hapat e parë në karrierën e Shkëlqim Muçës si futbollist nisin me ish-17 Nëntorin e Tiranës. Një jetë bardheblu, e nisur si 18-vjeçar te Tirana në vitin 1978. I lindur më 19 maj 1960, Muça shkëlqeu në 11 sezone te bardehblutë dhe në Kombëtaren tonë, por një karrierë që u mbyll shumë shpejt, për shkak të dëmtimit që e largoi nga fusha e lojës në moshën 31-vjeçare.

Më pas, ai nisi karrierën si trajner pikërisht me Tiranën në vitin 1994. Në drejtimin e bardhebluvë ka fituar kampionate, Kupa e Superkupa. Në Shqipëri Muça ka drejtuar skuadra si Tirana, Teuta, Besa, Dinamo, Skënderbeu, Flamurtari, Kukësi, teksa ka fituar 4 tituj kampionë, 3 Kupa të Shqipërisë dhe 2 Superkupa. Duke qenë aktualisht një trajner në treg, Muça nuk është jashtë futbollit, pasi ka disa vite që kontribuon me komente dhe analiza në RTSH, ndërkohë që edhe drejton Klubin Shumësportësh “Partizani”.

IDEUAN DHE PËRGATITËN: Vladimir Prenga, Agron Kaja

Vetë Muça, në hapësirën e viteve 1978-1990 ka luajtur në 12 sezone me fanellën e 17 Nëntorit (sot Tirana) me 4 tituj kampionë, por edhe 16 ndeshje me Kombëtaren. Pas vitit 1994, Shkëlqim Muça ka qenë aktiv në tregun e trajningut, ka drejtuar shtatë skuadra dhe 3 herë ka fituar titullin kampion me Tiranën, Dinamon e Skënderbeun.

INTERVISTOI: AGRON KAJA

Katër fitore të skuadrave vendase dhe një barazim, si i lexoni rezultatet e javës së 16-të të Kategorisë Superiore?
-Unë mendoj se kemi hyrë në atë fazë të kampionatit ku llogaritë bëhen edhe më të detajuara. Këtë e tregojnë edhe rezultatet e kësaj jave që u mbyll në Superiore, pasi skuadrat po mundohen që të marrin maksimumin në fushat e tyre, që shërbejnë edhe si bazë për rezultatet jashtë fushe.

Mund të themi se u thellua më shumë diferenca mes dy grupeve në renditje, me këto rezultate?
-Unë them se po, madje do të thoja se deri në mbylljen e këtij sezoni të Kategorisë Superiore, do të kemi dy minikampionate: gjashtë skuadrat e para që do të luftojnë për kreun dhe Europën, si dhe katër skuadrat e fundit që do të luftojnë për mbijetesë. Por, me merkaton e dimrit mund të kemi edhe ndonjë lëvizje ndryshe në të dy kahet e renditjes.

Cila nga ndeshjet e kësaj jave nuk doli në pritshmëri, apo të gjitha duken në logjikën e tyre?
-Të gjitha rezultatet e javës së 16-të mendoj se ishin normale dhe të logjikshme. Sepse pritej barazimi i Partizanit në Durrës, madje edhe mund të fitonte. Po kështu edhe fitorja e Kukësit, ndërsa skuadrat e tjera i kishin si detyrim fitoret. Këtu kam parasysh Tiranën me Flamurtarin.

Çfarë tregon fakti që skuadrat vendase dolën të gjithë me tri pikë, ndërsa Teuta në barazim me Partizanin?
-Kjo është një nga të veçantat e kësaj jave. Rrallë ka ndodhur në këto vitet e fundit të Kategorisë Superiore, që skuadrat vendase të dominojnë ndeshjet në rezultat. Kjo vjen edhe nga trysnia që ka çdo skuadër në fushën e saj për të marrë maksimumin e pikëve.

Po si dukurinë më të spikatur, ju çfarë veçoni nga java e 16-të?
-Veç dukurisë që përmenda më sipër në rezultate, tjetër është fakti se kampionati po bëhet më rival në të dy kahet e renditjes. Duke qenë se llogaritë tashmë janë në plan të parë, jemi duke parë një Superiore më interesante, por edhe të vështirë në gjithë tregues e saj.

Janë gjashtë skuadra që po luftojnë në vendet e kreut, si e mendoni renditjen e tyre deri në fundin e fazës së dytë?
-Duke qenë se do të luhen 10 ndeshje, nga dy për çdo skuadër, në lojë janë 6 pikë. Pra, nëse një skuadër i fiton të dyja ndeshjet e fazës së dytë, konsolidohet më shumë në pozicionin e saj në renditje, çka mund të sjellë ngushtimin e diferencës në pikët mes tyre.

Java e 17-të nis të premten me sfidën Partizani-Kukësi, a është kjo një kryendeshje e kësaj jave?
-Ndeshja Partizani-Kukësi mendoj se do të përcaktojë shumë ecurinë e skuadrave në kreun e renditjes. Natyrisht që mbetet një kryendeshje, jo vetëm se luajnë mes tyre dy skuadrat e kreut, por edhe për historinë dhe aktualitetin. Kjo është ndeshja e vitit 2018 në Superioren e këtij sezoni.

Në takimet e tjera të kësaj jave, mund të presim ndonjë rezultat surprizë?
-Unë i parashikoj në aspektin teknik ndeshjet, e për javën e 17-të kalendari ofron edhe surpriza, e prognoza e tyre aty të çon. Por për të qenë më i matur, them se gjithçka do të varet nga loja që do të zhvillojë çdo skuadër, nga gjendja e tyre fizike, si dhe nga ana taktike në këto sfida.

Po në dy ndeshjet e fundit të fazës së dytë, çfarë mund të kenë rezervuar skuadrat?
-Së pari do të uroja që skuadrat të mos tolerojnë në këto ndeshje, e njëherësh, unë do doja që ky vit kalendarik të mbyllet me ndeshje të mira dhe Fair-play, që skuadrat të shkojnë në gjysmën tjetër të sezonit me ide më të qarta për vazhdimësinë e tyre.