Mbrojtësi me eksperiencë,  në karrierën e vet ka luajtur edhe në Spanjë e Angli, përveçse në Qipro e Shqipëri, tashmë ka gjetur ekip të ri.

33-vjeçari ka firmosur me Shabab Rif Al Hoceiman, klub maroken nga Botolo Pro, kategoria superiore e vendit afrikan.

I mësuar të shëtitë nëpër Europë, zgjedhja e Serranit ka ardhur edhe për faktin se Al Hoceima është qytet bregdetar që sheh nga Spanja, duke qenë vetëm 90 milje larg Malagas.

Në këtë mënyrë, Serran ka qëndruar vetëm pak javë pa ekip dhe tashmë mund të përqendrohet sërish te futbolli i luajtur, duke lënë pas periudhën e zezë në Shqipëri, ku e akuzuan edhe për trukim pas golit të pësuar në Moldavi.

Alberto Seran ka provuar në kurrizin e vet një situatë të turpshme, sepse tashmë që është në Spanjë, larg makthit shqiptar, ka zbuluar gjithçka në një intervistë për të përditshme katalanase Sport.es.

“Nuk e prisja kurrë të kisha probleme të tilla, shkova në Tiranë për të njohur qytetin dhe për të gjetur shkollë për vajzën”, nis rrëfimin e vet Serran, i cili në akrrierë ka luajtur edhe në Spanjë e Angli, në nivelet më të larta.

“Nuk është e këndshme të të akuzojnë, apo të aludojnë, se je shitur. Jam 33 vjeç dhe kam qenë gjithmonë shumë serioz. Mbeta i shokuar kur më morën në pyetje në Vjenë, por edhe më e pabesueshme ishte ajo që më tha Safet Gjici në Moldavi. Kam dinjitetin tim, ta marrë dreqi…”.

“U bashkova me ekipin në Austri, i entuziazmuar për një eksperiencë të re, ku do të kisha mundësi të njihja një vend të ri dhe të luaja në kupat e Europës. Gjithçka nisi të deformohej pas miqësores kundër Dinamos, që humbëm 6-0. Pësuam dy gola në 6 minutat e para, luajta 70 minuta”.

Qetësia u kthye në çmenduri: “Mbërritëm në Vjenë, para udhëtimit për në Moldavi, dhe ka prisnin 6 persona, të cilët na thanë që ishim nën hetim për trukime. Përmendën 9 emra lojtarësh, përfshirë mua, të cilët duhej të shkonin në komisariat për të dhënë deklaratat e tyre dhe për të lënë telefonat për hetim. Ende nuk e kam marrë telefonin”.

Në Moldavi: “Shkuam në Tiraspol, u mundëm 1-0 për një penallti shkaktuar nga unë, për një prekje instiktive të topit me dorë. Gabova, por aty nisi makthi, sepse ndihmëstrajneri më tha që presidenti dëshironte të bisedonte me mua dhe gjëja e parë që më tha ishte ‘e ke shitur ndeshjen?’. Gjithçka po ndodhte ulur në një tavolinë, me 6 miq të tij ulur pas tij, ndërsa unë nuk u besoja veshëve”.

Katalanasi aty e kuptoi se bënte mirë të largohej: “U ngrita i revoltuar nga takimi, askush nuk më kishte akuzuar kurrë në karrierë! Trajneri dhe lojtarët më qetësuan, derisa shkova në dhomë dhe me një tablet bisedova me bashkëshorten. Pak më vonë një mik i presidentit erdhi dhe më kërkoi tabletin. E pabesueshme, gjithçka në një mëngjes në një hotel në Moldavi”…

Pas kthimit në Tiranë Serran rrëfen se mendoi prishjen e kontrats, por “prita ndeshjen e kthimit, sepse trajneri, skuadra dhe njerëzit më mbështetnin, me jepnin zemër. Ishte e vështirë të gjeje përqendrim, në fushë fituam 2-1, duke qenë në avantazh 2-0 dhe duke goditur 3 herë shtyllën në fund, edhe unë në minutën e 93-të”.

Mëngjesin tjetër, agjenti që e solli në Shqipëri, Kosta Grillo, e telefonoi dhe i tha që drejtori i klubit i kishte komunikuar që Safet Gjici “dëshiron të prishë kontratën”. I dëshpëruar, por edhe i lehtësuar, Serran firmosi me shpejtësi dhe u kthye në Barcelonë. Fundi i historisë.

“Do të vazhdoj të luaj”, thotë Serran, tashmë në shtëpinë e vet, me familjen e vet dhe me buzëqeshjen e rigjetur. Por tre javët shqiptare nuk harrohen: “Vendi, njerëzit… Dashurova gjithçka. Dakord, pothuajse gjithçka”, përfundon.

Tani Serran është larguar, ka prishur kontratën me Kukësin, nuk dihet ende qartësisht e kërkoi ai apo e larguan, por me një postim në Facebook mbrojtësi 33-vjeçar ka dashur të sqarojë disa gjëra, duke u mbrojtur për gjithë akuzat që ka pasur te Kukësi.

“Siç mund ta dini, aventura ime në Shqipëri mori fund. Ka qenë një eksperiencë e shkurtër, por shumë intensive dhe mjaft e vështirë…

Gjithçka ka qenë e re për mua dhe kam përjetuar momente që nuk ia uroj askujt, por si në jetë, eksperiencat negative shërbejnë për përmirësuar një futbollist.

Falënderoj ata që kanë pasur besim tek unë dhe më kanë mbështetur, por në jetë has edhe në njerëz që marrin vendime në bazë të mënyrës së jetesës dhe rrënjëve kulturore. Megjithatë, ajo që kurrë askush nuk do të mund të më akuzojë dhe të ma vërë në dyshim është profesionalizmi im, puna ime dhe ndershmëria që kam në këtë profesion”.

Ndershmërinë mos ia prekni Safet Gjicit! E ka thënë me të madhe që kur është përfshirë në botën e futbollit dhe në Europë ka bërë atë që deri më sot asnjë klub se ka arritur, duke kaluar tre ture. Gjithsesi, këtë verë nuk është ndjerë mirë kur Kukësi i tij ka përfunduar si i dyshuar për trukime. Federbeti lëshoi alarmin dhe pati një “luftë” në distancë. Dinjiteti iu prek presidentit Gjici, që nuk do ta lërë me kaq këtë çështje: “Shihemi në gjyq! Do kërkoj 30 milionë euro dëmshpërblim. Na është prishur imazhi”.

Gjërat evoluuan, pasi u fut në lojë edhe Sportradari. Policia austriake u vu në lëvizje dhe disa prej futbollistëve ende nuk i kanë marrë telefonat e tyre mbrapsht. Kundërshtuan edhe t’i dorëzonin, por ishin të detyruar. Të gjithë këto e trazuan Kukësin, por më pas pati edhe një tjetër ngjarje në Moldavi. Këtë herë ndërrojnë pozicionet, pasi është Kukësi “Federbeti”. Një penallti e shkaktuar nga Serran ndaj Sherifit të Tiraspolit la shumë për të dyshuar dhe presidentin Gjici diçka e “ngacmonte” përbrenda.

“Nuk ka mundësi të shkaktohet një penallti e tillë. As në volejboll nuk ngrihet dora aq lart”. Në fakt, kur e sheh habitesh, por në futboll ndodh gjithçka. Te Kukësi lindën dyshime të mëdha dhe spanjolli Serran përfundoi në bankën e të akuzuarit. Iu mor kompjuteri, kontroll bisedave të tij private. Kurrë nuk e kishte provuar diçka të tillë dhe mendoi menjëherë largimin, me apo pa dëshirë. Diçka krejtësisht normale, ndodhej në vend të huaj, në një ambient që nuk e njihte dhe nuk e kishte provuar kurrë më parë të ishte në një pozitë të tillë.

Serran ka një karrierë të pasur dhe një njollë tani që është drejt fundit nuk do e donte kurrë. Duroi, festoi ditëlindjen, por raporti mes tij dhe drejtuesve nuk mund të ishte më kurrë normal. Largimi i tij ishte çështje kohe dhe erdhi dje, ashtu si ai nuk do kishte dashur kurrë. Brenda një muaji ndodhën shumë gjëra, nga ato që spanjolli as nuk i konceptonte dot. Serran do kërkojë ta kujtojë gjithë këtë histori si një ëndërr të keqe. Presidenti Gjici duhet ta kuptojë mirë spanjollin, sapo e kaloi një situatë të tillë dhe po hetohet pas dyshimeve për trukime ndeshjesh, edhe pse në ndërgjegjen e tij ndihet i pastër. Po ashtu ndihet edhe Serran, por nuk kërkon 30 milionë euro, vetëm qetësi…

Jurgen Zela

Ajo shtyllë në minutën e fundit shtesë vendosi fatin e kualifikimit të Kukësit, por jo vetëm. Në pak milimetra, qendërmbrojtësi Albert Serran pa që të eklipsohej dhe mundësia e tij për të shlyer gabimin e ndeshjes së parë, por ndoshta dhe për të ndryshuar mendimin e tij që aventurën me kuksianët ta vijonte së paku dhe për pak javë më shumë. Saktësisht, një muaj më parë, më 20 qershor, Serran zbarkonte në Kukës si një nga blerjet më të rëndësishme dhe kishte një detyrë delikate, të mbulonte largimin e Albi Allës. Ishte formuar tek akademia e Espanjolit, ka luajtur në kampionatin anglez dhe qipriot, ndërsa në Kukës u konsiderua si nja nga afrimet më të bujshme për shkak të CV së tij. Aventura e tij te Kukësi kaloi në disa faza të rëndësishme dhe vendimtare, që përcaktuan të ardhmen e tij. Pas miqësoreve në Austri përfundoi i skeduar nga policia vjeneze para nisjes për Moldavi së bashku me shumë futbollistë e drejtues, pati akuza të forta për trukim pas ndeshjes së parë me Sherifin nga drejtuesit e Kukësit, ndërsa festa e ditëlindjes dhe shtylla e minutës së fundit në Elbasan u duk se rregulluan diçka në raportin me Kukësin. Kaq shumë ngjarje në 30 ditë janë shumë dhe Serran nuk e sheh dot më veten në Shqipëri. Paraditen e djeshme kërkoi një takim me presidentin Gjici, ku parashtroi kërkesën që të ndërpresë bashkëpunimin. Numri një i kubit të Kukësit është pajtuar me këtë ide dhe ka vendosur që gjithçka të marrë fund në mënyrë konsensuale. Rrugët e Kukësit dhe spanjollit të lindur në Barcelonë u ndanë këtu. Një ndarje e pritshme…

SERRAN

Arsyeja e largimit nuk ka aspak vend për imagjinatë, lojtari te Kukësi ka përjetuar një nga përvojat më të hidhura në jetë. Ajo penallti e shkaktuar në Moldavi u pasua me një lumë akuzash nga drejtuesit e Kukësit (i kontrolluan edhe laptopin), të cilët jo pak e rënduan psikologjikisht lojtarin, që siç duket e kishte ndarë mendjen që të largohej nga Kukësi pas “bombardimit” që iu bë. I rënduar psikologjikisht, qendërmbrojtësi e kishte të pamundur të vazhdonte me Kukësin dhe nuk ndihej aspak i lumtur. “Sport Ekspres” kontaktoi me lojtarin, i cili nuk ngurroi që të japë një prononcim për eksperiencën një-mujore tek Kukësi. Ndryshe nga dalja e fundit e tij në media, kur deklaroi se ishte i lumtur për aventurën tek kampionët, gjithçka duket se ka qenë një “maskim”, ndoshta dhe për të mirën e skuadrës.

Serran shpreson që ajo që ka përjetuar ai, nesër të mos ndodhë me askënd tjetër: “Është e pabesueshme çfarë kam jetuar këto javë. Jam shumë i zhgënjyer. Është turp, pasi ajo situatë mund të ndodhë përsëri nesër me lojtarë të tjerë”. Sot, 33-vjeçari, i cili ditëlindjen e tij e festoi vetëm para pak ditësh, nuk do të largohet vetëm me mendime negative, pasi e pranon se në Shqipëri ka gjetur dhe njerëz të mirë, por normalisht, siç dhe vetë ai e pranon, i frikësohej faktit se precedenti mund të përsëritej, me të dhe me të tjerë. Kjo ka qenë një arsye e fortë që në të ardhmen të evitonte një situatë të ngjashme me atë të Moldavisë. Një largim i hidhur për të dhe për Kukësin, pasi disa milimetra mund të kishin ndryshuar gjithçka, por ndoshta dhe asgjë, pasi mbrojtësi e kishte vendosur që të largohej.

Edhe dje në Elbasan Serran ishte i pafat, sepse mbulonte lojtarin që shënoi, ndërsa në sekondat e fundit të ndeshjes goditi shtyllën, duke qenë pak milimetra larg kualifikimit.

Tani Kukësi njofton prishjen e kontratës me spanjollin, por ende nuk ka njoftim për modalitetin e prishjes së kontratës, edhe pse zyrtarisht thuhet se mbrojtësi ka kërkuar largimin, i rënduar nga kritikat e ashpra të Gjicit

Serran është i pari, sepse në vazhdim priten largime të tjera nga Kukësi.

Ndërkaq, sot mbrojtësi spanjoll Albert Serran ka pasur ditëlindjen e tij të 33-të dhe Kukësi i ka bërë një ceremoni të thjeshtë, duke e befasuar me një tortë për ditëlindje në mbrëmje, gjatë darkës.

Presidenti Safet Gjici ka qenë i pranishëm dhe ka takuar përzemërsisht spanjollin, duke harruar të bërtiturat pas humbjes në Moldavi, ku kishte në shënjestër pikërisht mbrojtësin spanjoll.

Për këtë arsye, Albert Serran nuk priste surpriza në Shqipëri, kur firmosi për Kukësin, pasi fundja ka luajtur për disa vite në Qipro, ku hallet dhe problemet janë të njëjtat.

Megjithatë, ditëlindja e 33-të, festuar sot, sërish larg familjes, me siguri ka qenë më pak e lumtura në jetën e qendërmbrojtësit spanjoll, i cili në Tiraspol shkaktoi penalltinë që i dha fitoren Sherifit.

Në nerva e sipër, pas ndeshjes presidenti Safet Gjici i kërkoi llogari me tone të larta, si e ka zakon. Drejtuesit dhe lojtarët e vjetër të Kukësit janë mësuar, Gjici kështu e ka, njërën ditë të gropos me sharje dhe tjetrën të flet sikur nuk ka ndodhur asgjë. Serrani nuk ia kuptoi shqipen, por fjalët e presidentit e kanë vrarë shumë. Ka ardhur në Shqipëri për të fituar ndoshta kontratën e fundit të mirë të karrierës së tij të pasur, nuk i shkonte kurrë mendja se që në ndeshjen e parë do ta akuzonin për një gabim që ishte vërtet i pafalshëm, por zor se ndonjë futbollist e bën me dashje (natyrisht, nëse nuk ka ndonjë urdhër nga lart, si jemi mësuar në Shqipëri).

Serran ka postuar në Instagram një foto ku shfaqet i qeshur mes shokëve te Kukësi, duke shkruar: “Një ditëlindje tjetër larg shtëpisë, pa familjen dhe miqtë e mi… por nuk është se po ia kaloj keq edhe këtu”.

Një fitore dhe kualifikim kundër Sherifit të mërkurën do të fshijë gjithçka, edhe pse Serran do ta mbajë mend gjatë aventurën shqiptare.

Otro cumpleaños fuera de casa y echando de menos a la família y amigos… pero no por eso mal acompañado?? #birthday#cumpleaños#teammates#compañeros#friends#amigos#nicecompany#tonteriaslasjustas

A post shared by Alberto Serrán Polo? (@a.serran_33) on Jul 17, 2017 at 2:47am PDT

“Jam shumë i lumtur që kam arritur marrëveshjen me ekipin e Kukësit. Më kanë pëlqyer njerëzit dhe gjithçka tjetër ka shkuar mjaft mirë. Jam mësuar me kërkesat e klubit dhe i kam objektivat e qarta, e di çfarë presin prej meje. E di që duhet të jap maksimumin për të arritur sa më larg në Champions League.

“Para se të vija jam njohur edhe me historinë e Kukësit në Kupat e Europës dhe e di se aty kanë pasur shumë sukses. Di diçka për Kukësin, edhe pse jo shumë. Verilindorët janë ekipi kampion i Shqipërisë. Kam biseduar me menaxherin e klubit për të ardhur këtu”.

Tani Kukësi shpreson që Serran të ambientohet sa më shpejt dhe të jetë në formë sa më të mirë fizike për kupat e Europës, por edhe për sezonin e ardhshëm, ku me përforcimet e kryera, Kukësi është sërish pretendent serioz për titull.

Bëhet fjalë për një lojtarë me një “CV” mjaft të pasur, i lindur në Barcelonë dhe i formuar si futbollist tek akademia e Espanjolit. Më parë është aktivizuar dhe në Angli, në Championship te Suonsi, por dhe në Segunda Divizion në Spanjë me Alkorkonin. Një lojtar i shpejtë, teknik dhe pika e tij më e fortë është lufta në ajër.

Pas largimit të Allës, Serran është projektuar titullar dhe përshtatja sa më parë e tij me skuadrën është mjaft e rëndësishme. Së bashku me Shametin pritet të formojnë një dyshe të fortë për sezonin e ardhëm, ndërsa alternativë është edhe Rustem Hoxha. Fakti që sezonin e fundit me ish-skuadrën e tij Doksa, në Qipro, Serran është aktivizuar në 25 takime, nga të cilat 24 prej tyre nga minuta e parë, tregon se gëzon një formë të mirë sportive dhe përshtatja e tij me Kukësin mund të mos dojë shumë kohë.

Lojtari ka firmosur për një sezon me Kukësin, me opsion rinovimi dhe për një vit tjetër.

Jurgen Zela

Verilindorët janë zgjuar më në fund dhe kanë nisur të lëvizin. Pas largimit të disa lojtarëve, radha tashmë është e afrimeve. Normalisht që të larguarit pritet të zëvendësohen me lojtarë me kualitet, por deri më tani diçka e tillë nuk kishte ndodhur. Kukësi i ka dhënë fund pritjes së gjatë dhe tashmë ka mbyllur marrëveshjen me mbrojtësin spanjoll Alberto Serran Polo. Qendërmbrojtësi 32-vjeçar është goditja e parë e kampionëve, duke nisur kështu zyrtarisht serinë e afrimeve. Largimi i Albi Allës bëri jo pak me dhimbje koke trajnerin Gjoka, i cili nuk e kishte menduar se do i duhej një ndërhyrje urgjente në repartin e mbrojtjes.

SERRAN – Bëhet fjalë për një lojtar me një “CV” mjaft të pasur, i lindur në Barcelonë dhe i formuar si futbollist tek akademia e Espanjolit. Më parë është aktivizuar dhe në Championship në radhët e Suonsit, por dhe në Segunda Divizion me Alkorkon. Një lojtar i shpejtë, teknik dhe pika e tij më e fortë është lufta në ajër. Me motivin e duhur mund të kthehet në një nga lojtarët më të rëndësishëm të kampionëve. Normalisht, që pas largimit të Allës, Serran është projektuar titullar dhe përshtatja sa më parë e tij me skuadrën është mjaft e rëndësishme. Së bashku me Shametin pritet të formojnë një dyshe të fortë për sezonin e ardhëm. Mosha e tij e madhe nuk premton për një periudhë të gjatë garancie, por në situatën ku u gjend Kukësi, ishte alternativa më e mirë e mundshme. Fakti që sezonin e fundit me ish-skuadrën e tij Doksa, Serran është aktivizuar në 25 takime, nga të cilat 24 prej tyre nga minuta e parë, tregon se gëzon një formë të mirë sportive dhe përshtatja e tij me Kukësin mund të mos dojë shumë kohë. Lojtari do të firmosë për një sezon me Kukësin, me opsion rinovimi dhe për një vit tjetër.