Goditje fatale, klubi i njohur italian në Serie D

Sport Ekspres — Fri, 12 Jul 2019 13:09:44 +0000

Këshilli Federal i FIGC (federata italiane e futbollit) ka marrë një vendim në lidhje me Palermon. Klubi sicilian është përjashtuar nga Serie B për shkak të parregullsive në deklarimet e bilanceve vjetore dhe do ta nisë sezonin e ardhshëm në Serie D .

Vendi i lënë bosh do të zihet nga klubi i Venecias, ish-ekipi i Xhakomo Vrionit. Sulmuesi i kombëtares luajti sezonin e fundit me Venecian kurse tani është rikthyer te Sampdoria.

Vendimi është marrë sot nga Këshilli Federal, ndërsa Palermos i mbetet të apelojë në Gjykatën Administrative Krahinore të Lacios dhe atë të Kasacionit.

Një goditje fatale për klubin e njohur italian, që nga tentativa për t’u rikthyer në Serie A e sheh veten në divizionin e katërt të futbollit italian. Shpresa e fundit është CAS-i i Lozanës dhe Gjykata Federale Zvicerane.

Dashuria për ekipin s’njeh kategori, tifozët e Barit në radhë për abonetë sezonale

Sport Ekspres — Tue, 18 Sep 2018 20:21:08 +0000

Futbolli italian nuk është më ai i kohëve të lavdishme, ku konsiderohej me të drejtë si maja e futbollit europian. Stadiumet nuk janë më të mbushura plot e për plot, përjashto ndonjë klub model si Juventusi që bën përjashtim. Por, shembulli më i mirë i mundshëm vjen nga Bari.

Skuadra që shpalli falimentimin para disa muajsh, e ka nisur gjithçka nga fillimi në Serie D. Tifozët e Barit i kanë qëndruar pranë skuadrës në këto momente të vështirë, duke shfaqur një interes të pazakontë në tërheqjen e aboneve sezonale.

Fotot e radhëve e gjata për tërheqjen e aboneve kanë bërë xhiron e internetit në sajtet italiane. Mendohet se vetëm ditën e parë janë shitur 1500 abone sezonale. Bari e fitoi ndeshjen e parë, duke mundur 3-0 në transfertë Mesinën. Këtë të dielë në stadiumin “San Nicola” do të vijë skuadra e Sankataldeses, një takim ku pritet me doemoes fitorja për të respektuar pëkushtimin e madh të fansave.