Sebajos

Sebajos te Arsenali, Zidan shpjegon arsyet e transferimit

Sport Ekspres — Fri, 26 Jul 2019 19:14:43 +0000

Dani Sebajos është larguar nga Madridi për të zbarkuar te Arsenali, ku do të luajë sezonin e ardhshëm. Spanjolli përtej cilësive të mëdha nuk arriti të zërë vend në formacionin e Realit.

Yjet e mëdhenj e me eksperiencë janë të shumtë dhe Zidan nuk kishte mundësi t’i ofronte minuta të rregullta të riut. Tekniku në një intervistë konfirmon arsyen e largimit të talentit spanjoll.

“Sigurisht që e kam pasur në konsideratë Sebajos, por atij i duhej të luante vazhdimisht. Këtu nuk mund t’i ofrohej diçka e tillë. Ka shumë lojtarë me eksperiencë dhe konkurrencë të lartë. Ai është një lojtar i madh dhe shpresoj të kthehet edhe më i fortë”, deklaroi strategu francez.

Zyrtare | Arsenal prezanton ardhjen e yllit spanjoll

Sport Ekspres — Thu, 25 Jul 2019 13:50:22 +0000

Arsenali, në mungesë të fondeve të duhura për të blerë një lojtar klasi, ka zgjedhur ta huazojë atë. Dani Sebajos do të jetë futbollist i “Topçinjve” për gjithë sezonin e ardhshëm. Mesfushori vjen nga Reali i Madridit, ku nuk arriti të gjejë hapësirat e duhura.

Zidan dëshiron një mesfushë vetëm më lojtarë të mëdhenj të afirmuar në arenën botërore. Arsenal ka nevojë për një fantazist si 22-vjeçari. Ai pritet të marrë frenat e mesfushës londineze. Sebajos tregoi potencialin e tij të madh në Europianin e U21, ku “Furia e Kuqe” u shpall kampion.

?? #HolaDani ?

Welcome to The Arsenal, @DaniCeballos46 ? pic.twitter.com/8gZLggahJZ

— Arsenal FC (@Arsenal) July 25, 2019

Befason Arsenali, katër blerje brenda një dite

Sport Ekspres — Thu, 25 Jul 2019 07:31:52 +0000

Arsenali është një nga skuadrat më aktive kur flitet për thashetheme merkatoje, pasi “Topçinjtë” janë të lidhur me shumë futbollistë në të gjitha kampionatet europiane. Por deri më tani, vetëm Gabriel Martineli (6 milionë sterlina), ka nënshkruar.

Edhe pse mendohej se gjithçka ka qenë vetëm zëra mediatikë, tashmë gjërat duken më konkrete. Dani Sebajos dhe Uilliam Saliba janë fotografuar në Londër dhe siç raportojnë portalet britanike, kanë nënshkruar për Arsenalin dhe do të kalojnë vizitat mjekësore.

Dy blerje brenda pak orësh është diçka shumë pozitive, por Arsenali duket se nuk do të ndalet këtu. Bardhekuqtë janë shumë pranë firmës dhe me dy futbollistë të tjerë. I pari është Uilfrid Zaha, ylli i Kristal Palas, i cili ka shprehur publikisht dëshirën për t’u transferuar në Londërs, ndërsa marrëveshja me mbrojtësin e Selltikut, Kieran Tierni, duket vetëm çështje orësh.

Arsenal merr vrull, marrëveshje e kryer me madrilenin

Sport Ekspres — Thu, 18 Jul 2019 17:53:38 +0000

Aresenal është gati të zyrtarizojë prurjen më të re. Dani Sebajos së shpejti do të veshë fanellën e “Topçinjve”. Mesfushori ka shkëlqyer në Evropianin e të rinjve në Itali dhe i ka mbushur mendjen Emeri për ta bërë pjesë të ekipit.

Me prurjet e fundit në Madrid, 22-vjeçari e ka gati të pamundur të zërë vend në formacionin e Zidan. Francezi nuk e ka pëlqyer as kur ishte pjesë e Realit dy vite më parë. Kështu, Sebajos do të largohet për të gjetur një destinacion ku do të luajë rregullisht.

Vlera e tij në merkato është plot 50 milionë euro. Arsenal nuk është i gatshëm ta japë këtë shumë, por as Real nuk mendon ta lërë të heqë dorë plotësisht nga mesfushori. Formula e huazimit do të jetë zgjidhja e këtij transferimi.

Ndërkohë Arsenal është në bisedime edhe me një tjetër yll. Everton është talenti seleçao që po rrëzëllen më së shumti. Milani thuhet se është pranë tij. Edhe londinezët do bëjnë detyrën e tyre, duke nisur një ofertë në drejtim të Gremios.

Fantazisti i Realit me një këmbë jashtë, Totenhem favorit

Sport Ekspres — Thu, 04 Jul 2019 08:02:35 +0000

Dani Sebajos për momentin nuk është i nevojshëm në Madrid. Mesfushori edhe pse shkëlqeu me Spanjën në Kampionatin Evropian të të rinjve nuk e bind Zidanin për ta mbajtur në gjirin e “Los Blancos”. Tre ekipe angleze janë ata që janë konkrete në interesin për yllin spanjoll.
Arsenal, Liverpul dhe Totenhem e duan në skuadër. Jurgen Klop e pëlqen profilin e tij dhe dëshiron ta ketë nën urdhëra. Mungesa e një fantazisti me cilësitë e tij në Liverpul e shton mundësinë e të qenit titullar në “Anfield Road”. Megjithatë, marrëdhëniet e mira mes Realit dhe Totenhemit, i bën londinezët të jenë favoritë për shërbimet e Sebajos.

Real nuk dëshiron të heqë dorë plotësisht nga kartoni i lojtarit dhe pretendon një shitje me të drejtën e blerjes me një çmim më të lartë, siç veproi me Moratën kur e shiti te Juventusi pak vite më parë. E sigurtë është se fantazisti do largohet. Ai nuk do udhëtojë me skuadrën në Kanada, por do negociojë largimin me drejtuesit.

Zbulohet plani, Maldini-Boban përgatisin goditjen e bujshme!

Sport Ekspres — Sun, 23 Jun 2019 09:04:17 +0000

Pas zyrtarizimit të Marko Xhiampaolos te Milani, zërat për afrime lojtarësh kanë qenë të shumtë. Një emër që është i lidhur ngushtë me një kalim te kuqezinjtë, është mesfushori i Real Madridit, Dani Sebajos. Lojtari është aktualisht në Itali me ekipin e Spanjë U21 në kampionatin Europian.

Mediat raportojnë se Paolo Maldini dhe Zvonimor Boban kanë fluturuar në Madrid për të takuar drejtuesit e Real Madridit. Sistemi 4-3-1-2 i Xhiampaolo mund të jetë formacioni perfekt për lojtarin e lindur në Sevilje, pas Sebajos mund të luante si një nga tre mesfushorët ose si fantazist pas sulmuesve.

Është raportuar se “Los Blnacos” po kërkojnë afërsisht 40 milionë euro për 22-vjeçarin, por Milani ka një plan tjetër, që ndoshta mund të bindë Realin.

Mund të përdoret formula e njëjtë me Hames Rodrigez, i cili kaloi te Bajerni në huazim 2-vjeçar. Të njëjtën gjë pritet të propozojë dhe Milani, me kuqezinjtë që do të marrin përsipër edhe rrogën prej 4 milionë eurosh në sezon të mesfushorit.

Milani përgatit goditjen e madhe, Maldini niset drejt Madridit!

Sport Ekspres — Thu, 20 Jun 2019 11:06:20 +0000

Milani po lëviz shumë në ditët e fundit për sa i përket merkatos. Pasi siguruan shërbimet e Rade Kruniç nga Empoli për 8.5 milionë euro, kuqezinjtë duket se hedhin sytë nga një objektiv madhor.

Bëhet fjalë për Dani Sebajos, i cili ka pasur shumë pak hapësira te Reali i Madridit. Mesfushori është vëzhguar nga Paolo Maldini në sfidën Itali-Spanjë, e vlefshme për kampionatin europian të U-21.

Sebajos bëri një ndeshje të mirë, ku pavarësisht humbjes së iberikëve, shënoi një gol të mrekullueshëm. Maldini duket se është bindur plotësisht dhe tashmë raportohet se është nisur drejt Madridit për nisjen e bisedimeve.

Diçka të tillë e konfirmon “Gazzetta dello Sport”, që raporton se dëshira e lojtarit për t’u larguar nga Reali mund të ndikojë. “Los Blancos” kërkojnë një shifër të majme për ta lënë të lirë, por mund të gjendet dhe një marrëveshje në bazë të huazimit me të drejtë blerje.