Schick

Telenovela Shik, talenti çek përfundon te Roma

Sport Ekspres — Mon, 28 Aug 2017 13:59:37 +0000

Habiti Italinë sezonin e shkuar, duke dhuruar spektakël te Sampdoria, ndërsa këtë verë e prenotoi Juventusi, duke e parë të shkëlqente edhe në Europianin U-21.

Patrik Shik u kthye i lumtur në Itali, kreu vizitat mjekësore dhe foli si juventin, por pastaj diçka ngeci. Kontrollet mjekësore evidentuan një problem dhe Juventusi hoqi dorë, bujshëm.

Sampdoria akuzoi për mungesë ndershmërie dhe i konsideroi gënjeshtra lajmet për probleme fizike serioze.

Më pas, në skenë u fut Interi, edhe aty bisedime e kontrolle mjekësore, por përsëri gjithçka mbeti pezull, ndërsa 21-vjeçari çek mbytej nga depresioni.

Tani Shik gjen klubin e ri: është Roma, që ka vendosur ta blejë, duke mbyllur gjithçka me Sampdorian për huazim për 6 milionë euro, por edhe 25 milionë për blerjen e detyruar dhe 7 milionë bonuse. Rekord për pronarët amerikanë të Romës, nuk kishin shpenzuar kurrë kaq shumë për një futbollist.

Kontratë 5-vjeçare, me më shumë se 2 milionë euro në vit, plus bonuse. Të gjithë të lumtur, por ka ende edhe pak… kontrolle mjekësore.

Presidenti i Sampdorias, Masimo Ferrero, një tip komik, deklaroi sot në eufori e sipër: “Si Shik lind një në 100 vjet. Është më i mirë se Bekenbauer”. OK, qetësohu president!

Juve e braktisi, Interi pret sot vizitat mjekësore

Sport Ekspres — Wed, 09 Aug 2017 13:06:07 +0000

Talenti çek Patrik Shik ka kaluar një verë plot stres, pasi transferimi i ëndërruar te Juventusi u dogj për një problem fizik të hasur gjatë kontrolleve mjekësore rutinë para firmës. Shik sapo kishte luajtur në Kampionatin Europian U-21, duke shkëlqyer, ndaj Juventusi ndoshta u nxitua, duke anuluar blerjen e një supertalenti, për rreth 30 milionë euro.

Tani Shik ka përfunduar pushimet dhe është bashkuar me Sampdorian. Sot do të kryejë kontrolle mjekësore të detajuara dhe nëse nuk dalin problemet e para disa javëve, me shumë gjasa Shik do të shkojë tek Interi.

Çeku shënoi 11 gola në Serinë A sezonin e fundit, por luajti vetëm 14 ndeshje titullar, me një mesatare super, një gol në një ndeshje e gjysmë mesatarisht.

Juve e braktisi për probleme fizike, Interi merr talentin çek

Sport Ekspres — Wed, 19 Jul 2017 16:51:44 +0000

Histori e çuditshme ajo e Patrik Shikut: sulmuesi 21-vjeçar i Sampdorias dhe Republikës Çeke shkoi te Juventusi, thuajse u mbyll gjithçka për 30 milionë euro, por krejt papritur një problem gjatë vizitave mjekësore bëri që Juventusi të tërhiqej, duke kërkuar vetëm huazim me të drejtë blerjeje, për të parë ecurinë e lojtarit.

Refuzim i prerë nga Sampdoria, që lëshoi akuza të forta ndaj Juves.

Menjëherë në treg dhe Samp ka gjetur klientin, sepse Interi është gati ta marrë talentin çek, një ndër zbulimet e mëdha të sezonit të fundit.

Klubi zikaltër është gati të paguajë shifrën që do Samp, por vetëm pas kontrolleve të reja mjekësore.

Ndërkaq, te Samp pritet të shkojë Santon nga Interi.

Pasi çmendi Italinë U21, Shik transferohet te Juventusi

Sport Ekspres — Thu, 22 Jun 2017 09:50:43 +0000

Patrik Shik është përforcimi i fundit i Juventusit, një goditje e madhe, që konfirmon forcën e klubit bardhezi në treg.

Një blerje sidomos për të arden, sepse Shik është vetëm 21 vjeç dhe nuk dihet sa shanse ka të luajë aktualisht te një Juventus i frikshëm, që ka emra si Dibala, Higuain e Manxhukiç, pa harruar kroatin Marko Pjaca.

Sezonin e fundit Shik mahniti Serinë A, duke shënuar 11 gola në vetëm 14 ndeshje si titullar, me rreth 1500 minuta në Serinë A.

Dje Republika Çeke mundi 3-1 Italinë në Europianin U-21 dhe Shik ishte fantastik, ndaj Juventusi ka nxituar: fluturim nga Polonia në Torino për yllin e ri çek, vizita mjekësore dhe prezantim.

Sampdorias i shkojnë 30.5 milionë euro, 5 më shumë se klauzola e prishjes së kontratës, vetëm për të mundësuar pagesën në 3 vitet në vazhdim, në 3 këste. Samp ka futur në marrëveshje edhe një klauzolë: nëse Juve e huazon sulmuesin, klhbi gjenovez ka prioritet.