Schalke

Merkato në portë, Bajerni në tratativa për portierin e Shalkes

Sport Ekspres — Thu, 18 Apr 2019 11:09:38 +0000

Klubi i Shalkes po bën një sezon për t’u harruar në çdo aspekt. Megjithatë, kriza e rezultateve solli një zbulim që askujt nuk ia priste mendja.

Kapiteni dhe portieri i Shalkes, Ralf Ferhrman, humbi vendin e formacionit ndaj të riut Aleksandër Nybel. Portieri 22-vjeçar e ka përligjur besimin e trajnerit Hub Stivens dhe tani po tërheq interes nga klube të tjera gjermane.

Së fundmi mediet gjermane raportojnë se Bajerni i Mynihut është në tratativa për të blerë kartonin e portierit të Shalkes. Kontrata e Nybel me skuadrën nga Gelsenkirshen mbaron në qershor të 2020-ës, çka e vendos Shalken në një pozicion aspak të mirë dhe e bën shitjen e tij të detyrueshme.

Tolerancë zero, Shalke dënon lojtarin për arsyen skandaloze

Sport Ekspres — Mon, 25 Mar 2019 11:41:11 +0000

Dy javë më parë mesfushori i Shalkes Nabil Bentaleb u ndëshkua të stërvitej me ekip rezerve pasi disa shkelje të kodit të disiplinës.

Lojtari algjerian ishte i dëmtuar, por rregullorja e klubit është e qartë dhe të gjithë lojtarët e dëmtuar duhet të paraqiten në stadiumin “Veltins Arena” për të parë ndeshjet e klubit. Në takimin e 16 marsit ndaj Lajpcigut, Bentaleb nuk u paraqit në stadium dhe për më tepër nuk njoftoi klubin për këtë gjë.

Të nesërmen klubi njoftoi përjashtimin e lojtarit nga stërvitja me ekipin e parë për një periudhë të papërcaktuar, vendim ky që u përkrah nga fansat. Megjithatë, së fundmi historia ka marrë një rrjedhë tjetër.

Best thing that could happen in my life that’s the reason why I could not be watching the game at the stadium this weekend , after 3 months spent with my wife at hospital they made me crazy and forget to send and SMS but thank god everybody is healthy
Let’s get points now ! pic.twitter.com/pp4Kok2W5P

— Nabil Bentaleb (@nabilbentaleb42) March 21, 2019

Me anë të një postimi në “twitter” , Bentaleb shpjegoi se arsyja e mungesës ishte lindja e gruas së tij që solli në jetë binjakët e parë të çiftit. Lindja kishte qenë e komplikuar sidomos në tre muajt e fundit ku vizitat në spital ishin bërë të përditshme, si çdo prind Bentaleb nuk kishte si të mungonte në këtë ditë të shënuar të jetës së çdo njeriu. Pas këtij lajmi pritej që klubi ta rikthente në stërvitje mesfushorin, por nuk ka ndodhur kështu.

Trajneri Hub Stevens u shpreh kështu për gjendjen e lojtarit: “E urova për lindjen e fëmijëve, por qëndrimi i klubit nuk do të ndryshojë”.

VIDEO | Lajpcigu fundos Shalken, Volfsburgu me “pesë yje”

Sport Ekspres — Sat, 16 Mar 2019 16:23:02 +0000

Kanë përfunduar katër nga pesë ndeshjet e javës së 26-të, të programuara për t’u luajtur ditën e sotme në Bundesligë. Bie në sy humbje e Shalke 04 në shtëpi ndaj Lajpcigut me shifrat 0-1, duke e çuar në gjashtë serinë e humbjeve radhazi për blutë.

Timo Verner ishte ai që vendosi fatet e takimit me golin e tij në minutën e 14-të, duke ngjitur ekipin e tij në vendin e tretë, në kuotën e 49 pikëve, dy më shumë se sa Gladbahu. Triumf i rëndësishëm dhe për Volfsburgun në shtëpi, i cili shkatërroi 5-2 Dyseldorfin.

Ndërkohë, në Shtutgart, vendasit dhe Hofenhajmi ndanë nga një pikë, pas barazimit me shifrat 1-1. Golit të Kramariç në fundin e pjesës së parë, iu kundërpërgjigj Zuber në minutën e 66-të. Nga ana tjetër, Augsburgu fundosi akoma më shumë Hanoverin, teksa e mposhti me përmbysje 3-1, pasi në pjesën e parë miqtë udhëhiqnin 0-1.

Augsburg – Hanover 3-1
Shënues: Kordova 65’, Shmid 79’, Han 86’ / Vejdant 8’

Shalke – Lajpcig 0-1
Shënues: Verner 14’

Shtutgart – Hofenhajm 1-1
Shënues: Zuber 66’ / Kramariç 42’

Volfsburg – Dyseldorf 5-2
Shënues: Mehmedi 34’, Vegorst 54’, 59, 88’, Knohe 57’ / Ajhan 30’, Raman 65’

Tedesko e “mbush kupën”, Shalke e shkarkon dhe rikthen një “ish”

Sport Ekspres — Thu, 14 Mar 2019 18:19:06 +0000

Domeniko Tedesko kreu një mrekulli sezonin e kaluar teksa çoi Shalken në vendin dytë të Bundesligës. Megjithatë sezoni aktual ka rezultuar krejt e kundërta kundërta.

Klubi nga Gelsenkirshen u turpërua nga Mançester Siti në Champions League ku u eliminuan me rezultatin e përgjithshëm 10 – 2 (3-2) (7 – 0), ndërsa në kampionat kanë marrë vetëm dy pikë në shtatë ndeshjet e fundit dhe rrezikojnë rënien nga kategoria.

Domenico #Tedesco freigestellt, Huub #Stevens und Mike #Büskens gegen Leipzig interimsmäßig auf der Bank. Alle Infos ? https://t.co/wXVnMjiVaQ #S04 pic.twitter.com/CXmms7ICJF

— FC Schalke 04 (@s04) March 14, 2019

Mesa duket kaq ka mjaftuar për të bindur drejtuesit e Shalkes që njoftuan ditën e sotme shkarkimin e 33-vjeçarit. Vendi i lënë bosh nga Tedesko do të zihet nga holandezi Hub Stevens.

VIDEO | Shalke për turp, Leverkuzen e Lajpcig nuk gabojnë

Sport Ekspres — Sat, 02 Mar 2019 16:25:02 +0000

Kanë përfunduar shumica e ndeshjeve në Bundesligë, të vlefshme për javën e 24-t. Surprizat nuk kanë munguar, ku mjafton t’i hidhet një sy rezultatit përfundimtar të sfidës së luajtur në Gelsenkirshen, mes Shalke 04 dhe Dyseldorfit, ku vendasit janë turpëruar me shifrat 0-4.

Bajer Leverkuzen arriti të reagonte menjëherë, pavarëisht disfatës së javës së kaluar ndaj Dortmund, ku ditën e sotme triumfoi pastër 2-0 ndaj Frajburgut të Abrashit. Gjithashtu, fitore edhe për Lajpcigun në transfertë ndaj Nurenbergut me shifrat minimale, ku një gol i Klosterman vendosi ndeshjen.

Takim drithërues në sfidën e luajtur në Frankfurt, ku Ajntrahti mundi Hofenhajmin me përmbysje me shifrat 3-2. Herta e Berlinit më në fund u kthye te fitorja në shtëpi, teksa përmbysi Maincin, duke triumfuar 2-1.

Bajer Leverkuzen 2-0 Frajburg

Shënues: Aranguiz 4’, Bejli 73’

Ajntraht Frankfurt 3 – 2 Hofenhajm

Shënues: Rebiç 20’, Haler 89’, Pasiensa 97′ / Zhoeliton 43’, Belfodil 60’

Herta Berlin 2-1 Mainc

Shënues: Grujiç 50’, Stark 60’ / Stark 46’(aut.)

Nurenberg 0-1 Lajpcig

Shënues: Klosterman 40’

Shalke 0-4 Dyseldorf
Shënues: Lukebakio 36’(pen.), Kovnacki 62’, 84’, Raman 68’

Dortmundi me marsh të pestë, verdhezinjtë nuk ndalen as në derbi

Sport Ekspres — Sat, 08 Dec 2018 16:43:02 +0000

Borusia e Dortmundit arriti të fitonte me rezultatin 2 – 1 ndaj rivalëve të përjetshëm të Shalkes pas një pritje që ka zgjatur për më shumë se tre vjet. Tomas Delajni dhe Xhejdon Sannco ishin autorët e golave për Dortmundin, ndërsa për vendasit shënoi Kalixhuri me anë të një 11-metërshi.

Heroi i fitores është padyshim anglezi Xhejdon Sanço, i cili edhe pse vetëm 18-vjeç është kthyer në një nga lojtarët më të rëndësishëm të kryesuesve të Bundesligës. Skuadra e Lysjen Favre po e përballon më së miri presionin e bavarezëve, të cilët qëndrojnë nëntë pikë pas tyre.

Bajerni i Mynihut e pati shumë të lehtë përballjen ndaj “fqinjëve” të Nyrnbergut. Djemtë e Niko Kovaç fituan me rezultatin 3 – 0, falë dopietës së Levandovksit dhe golit të Riberi. Diferenca me kryesuesit e Dortmundit qëndron në nëntë pikë, por të paktën bavarezët kanë “parakaluar” përkohësisht Gladbahun për vendin e dytë renditje.

Lajpcig është mundur thellë nga Frajburgu me rezultatin 3 – 0, ndërsa vazhdon kriza e Augsburgut që me humbjen e pësuar sot ndaj Levekuzenit, shënon ndeshjen e katërt radhazi që del me 0 pikë nga fusha e blertë.

Ngacmim seksual në stadium, Shalke nis hetim

Sport Ekspres — Fri, 30 Nov 2018 11:50:06 +0000

Një tifoze ka pretenduar se ka qenë viktimë e një ngacmimi seksual në një ndeshje të Bundesligës gjermane, ndërsa sipas saj një stjuard i ka thënë “shko në shtëpi dhe shikoje ndeshjen në televizor”, nëse nuk i pëlqente në stadium.

Femra pretendon se është prekur vazhdimisht nga një person, i cili qëndronte pas saj dhe u mundua edhe t’i zbërthente sutienat gjatë ndeshjes së fundjavës së shkuar mes Shalkes e Nyrenbergut.

Policia gjermane në Gelsenkirshen ka regjistruar denoncimin dhe po mundohet të identifikojë personin ka ngacmuar tifozen, por edhe stjuardin që nuk mori asnjë masë.

Edhe Shalke ka deklaruar se ka nisur një hetim të brendshëm: “I kemi marrë shumë seriozisht këto akuza. Jemi në procesin e një hetimi të brendshëm dhe po bashkëpunojmë me policinë, pasi sjellje të tilla në stadiumin tonë janë të patolerueshme”.

Kur mundi dhe puna shpërblehen, Shalke rinovon kontratën e 36-vjeçarit

Sport Ekspres — Wed, 17 Oct 2018 16:04:42 +0000

Futbolli është një sport mizor, ku gabimi më i vogël mund të të kushtojë rëndë. Futbollistët që kalojnë të 30-at e gjejnë veten në një situatë të zymtë. Klubet elitare nuk i preferojnë më, pasi futbolli është kthyer në një biznes ku qarkullohen me miliona dollarë dhe talentet janë “xhevahirët” e këtij sistemi. Por, ka dhe përjashtime…

I tillë është dhe rasti i brazilianit Naldo. Qendërmbrojtësi po luan sezonin e tij të 14-të Bundesligë dhe në moshën 36-vjeçare shumë vetë besuan se ky do të ishte fundi për të. Megjithatë, Naldo nuk po tregon shenja plakjeje. Me të si lider të repartit të prapavijës, Shalke u rendit e dyta në renditje. Ditën e sotme erdhi dhe dhurata mëse e merituar nga klubi. Një rinovim deri në përfundim të sezonit 2019/2020, që është përshëndetur nga të gjithë fansat e klubit nga Gelsenkirshen.

??Einfach nur WOW??#Naldo verlängert beim #S04 bis 2?0?2?0?! #Naldo2020

Alle Stimmen & Reaktionen dazu hier ??https://t.co/qww2IS9Ym4

— FC Schalke 04 (@s04) October 17, 2018

Zyrtare/ Rudi i jep fund në Mynih, firmos me Shalken

Sport Ekspres — Mon, 27 Aug 2018 19:10:00 +0000

Aventura e Sebastian Rudit te kampionët e Gjermanisë zgjati vetëm një sezon. Mesfushori 28-vjeçar u prezantua sot nga klubi i tij i ri Shalke. Te skuadra nga Gelsenkirshen Rudi do mbajë numrin 13 dhe kontrata që ka firmosur zgjat për katër sezonet e ardhshme.

Nga shitja e mesfushorit, Bajerni përfiton 16 milionë euro. Fitim i konsiderueshëm po të marrësh parasysh se lojtari gjerman erdhi me parametra 0 nga Hofenhajmi 12 muaj më parë. Te Rudi Shalke gjen një lider për mesfushën, që do të ndihmojë trajnerin Tedesko të zvogëlojë boshllëkun e madh që lanë largimet me kosto 0 të Maks Majerit dhe Leon Goreckës.

#Rudy erhält Vierjahresvertrag beim #S04 und trägt künftig die Nummer 1?3?. Alle Infos ? https://t.co/vHyD1gC74g pic.twitter.com/1sWJVB4yGp

— FC Schalke 04 (@s04) August 27, 2018

Aksidentoi për vdekje këmbësorin, gjykata “përkëdhel” mesfushorin e Shalkes

Sport Ekspres — Wed, 01 Aug 2018 13:11:33 +0000

Futbollisti maroken i Shalkes, Amin Harit, është përfshirë në një skandal që ka bërë xhiron e botës pas daljes së vendimit të gjykatës për përfshirjen e tij në një aksident rrugor me pasojë vdekjen e një këmbësori në qytetin e Marrakeshit më datë 6 korrik.

Gjykata marokene vendosi ta gjobisë lojtarin e Shalkes me një gjobë 780 euroshe, shifër kjo tërësisht qesharake duke marrë parasysh faktin se Harit ishte duke drejtuar automjetin e tij me një shpejtësi mbi normat e lejuara.

Harit nuk është i vetmi lojtar që ia ka hedhur paq drejtësisë pas përfshirjes në aksidente rrugore me pasoja fatale. Dy raste të tjera të njohura janë dhe ato të ish-sulmuesit të Ajaksit e Barcelonës Patrik Klajvert, si dhe mbrojtësi i majtë i Çelsit Markos Alonso.

Talenti gjerman në Premier Ligë, Shalke merr “qindarka”

Sport Ekspres — Tue, 31 Jul 2018 13:51:23 +0000

Kampioni i Europës me Gjermaninë U-21, Maks Majer, është pranë firmës me Kristal Palas, në Premier Ligën angleze, raporton The Guardian. Majer ka qenë futbollist i lirë, që pas largimit plot polemika nga Shalke në fund të sezonit të shkuar, ndërsa tashmë po bisedon me klubin londinez, që duket se ka fituar derbin me Arsenalin, por edhe Liverpulin e Marsejën.

Mesfushori 22-vjeçar pritet të kryejë kontrollet mjekësore sot dhe do ishte një goditje e shkëlqyer për Roj Hoxhson në prag të sezonit të ri, sepse bëhet fjalë për një talent të madh, të aftë të luajë si numër 10, ose më i tërhequr, ndërsa ka qenë edhe pjesë e kombëtares A, duke debutuar që në vitin 2014.

Sezonin e fundit Majer refuzoi rinovimin e ofruar nga Shalke dhe nisi një konflikt i gjatë, derisa në prill Majer i nxor jashtë skuadre. Këtë verë shumë klube iu afruan, por gjermani dhe agjentët e tij kishin kërkesa “të rënda”, që me sa duket Kristal Palas ia ka plotësuar.

Ndërkaq, Shalke doli e humbur në këtë histori, sepse humbi falas një futbollist që vlente të paktën 20 milionë euro në treg. Në fakt, jo falas, sepse Shalke do të marrë 500.000 euro si taksë formimi. Ngushëllim tepër i vogël!

Zyrtare/ Shalke dorëzohet, Gorecka firmos me Bajernin

Sport Ekspres — Fri, 19 Jan 2018 10:25:13 +0000

Bajerni i Mynihut dhe Leon Gorecka, gjithçka e kryer, nga kontrollet mjekësore e deri te firmat.

Mesfushori 22-vjeçar i Shalkes, i cili u transferua në Gelsenkirshen në vitin 2013 për 3.3 milionë euro nga Bohumi, ka vendosur të mos rinovojë me Shalken, ku është një lojtar kyç. Kontrata e tij përfundon në qershor dhe Gorecka ka zgjedhur të shkojë falas te Bajerni, ku shpreson të vazhdojë procesin e rritjes dhe të bëhet një lider edhe te kombëtarja gjermane, ku që tani është një lojtar goxha i rëndësishëm.

Goreckën e kërkonin shumë klube, nga Anglia deri në Itali, por Bajerni u futur fuqishëm në lojë pas Kupës së Konfederatave verën e shkuar, ku Gorecka shkëlqeu.

Shalke fillimisht mohoi çdo transferim, duke shpresuar të rinovimi ose shitja që në janar, por ishte e pafuqishme përballë dëshirës së vetë Goreckës.

Drejtori sportiv i Shalkes, Kristian Hajdel, deklaroi sot: “Me keqardhje u bëjmë të ditur se dje Karl-Hainc Rumenige na telefonoi, duke na njoftuar se Gorecka ka kaluar kontrollet mjekësore dhe ka firmosur, që do të thotë se humbasim një lojtar shumë të mirë. Leon do të kalojë te Bajerni prej 1 korrikut 2018, edhe pse bëmë gjithçka për ta mbajtur”.

Klauzolë 49 milionë euro, Avdijaj në shitje për “kacidhe”

Sport Ekspres — Sun, 30 Jul 2017 09:18:52 +0000

Moda e re e klauzolave për prishjen e kontratës ka hyrë prej pak vitesh edhe në Gjermani, por nuk është se vlen shumë.

Mjafton të shohim rastin e sulmuesit shqiptar Donis Avdijaj, i cili te Shalke ka një klauzolë prej 49 milionë eurosh për prishjen e kontratës.

Kush e kërkon? Askush!

Tani Avdijaj është “i vetëm në shtëpi”, sepse është në konflikt me klubin për shkak të sjelljes së tij dhe mosrespektimit të rregullave të vendosura nga klubi.

Në këtë mënyrë, Shalke nuk e ka më në planet e veta dhe e ka nxjerrë në shitje, për një shifër modeste, rreth 3 milionë euro.

“Nuk jam i interesuar fare për atë klauzolë, sepse ajo natyrisht nuk vlen. Tre milionë euro është shuma që klubi kërkon për ta lënë të lirë Avdijajn”, tha drejtori sportiv i klubit gjerman, Kristian Hajdel, për Kicker.

Shalke-Avdijaj, tani është luftë e hapur

Sport Ekspres — Tue, 25 Jul 2017 07:56:36 +0000

Donis Avdijaj si Rey Manaj, talent me shumicë, por karakter i vështirë, që i hap probleme.

Talenti i Shalkes pati probleme para pak ditësh, kur në miqësoren kundër Paderbornit nuk luajti fare. Shkak ishte një vonesë e tij para nisjes për në Paderborn.

Drejtuesit publikisht i kërkuan të respektojë rregullat, por Avdijaj postoi një mesazh në Facebook, duke shkruar se ishte vonuar pak minuta për ngrënien e mëngjesit, që sipas tij nuk ishte me detyrim.

Tani duket qartë se situata është acaruar shumë, sepse Shalke është nisur për fazë përgatitore në Austri dhe nuk e ka marrë fare Avdijajn.

Sinjal i qartë divorci, por Avdijaj ka klauzolë prej 49 milionë eurosh dhe askush nuk e blen, ndaj huazimi është opsioni i vetëm, për të mos luajtur me të rinjtë e klubit në kampionatet e fshatrave.

Gjoba nga klubi? Jo, tani e tutje punë e detyrueshme për lojtarët e Shalkes

Sport Ekspres — Wed, 19 Jul 2017 13:19:46 +0000

Shalke ka disa rregulla të reja për lojtarët e saj. Ndryshe nga vitet e tjera, ku lojtarët gjobiteshin për gabimet që ata bënin, tashmë zyrtarët e klubit kanë një forme tjetër ndëshkimi.

Trajneri i ri i Shalkes, 31-vjeçari Domeniko Tedesko, së bashku me menaxherin Kristian Hajdël dhe me drejtorin sportiv Aksel Shuster, janë duke punuar për një rregullore në lidhje me disiplinën në ekip.

Lojtarët të cilët shkelin rregulloren nuk do të gjobiten më nga ana financiare, por me punë të detyrueshme. Puna e detyrueshme përfshin ndihmën në dyqanin zyrtar të klubit, madje edhe në ditë pushimi nëse shihet e nevojshme.

Sipas menaxherit Kristian Hajdël, ky lloj ndëshkimi do të jetë më i drejtë. Lojtarë si Gorecka, të cilët kanë paga deri në miliona euro, nuk e kanë problem pagesën e një gjobe disa mijëra euro, ndryshe nga lojtarë si MekKeni, ku paga e tyre prej pak mijë eurosh në muaj nuk e përballon dot këtë gjobë. Rregullorja e re për disiplinën e lojtarëve do t’i prezantohet javën tjetër bordit drejtues në qendrën stërvitore në Austri.

Disiplinë gjermane, Avdijaj shpjegon pse e ndëshkuan

Sport Ekspres — Mon, 17 Jul 2017 11:25:12 +0000

Për ne që e shohim nga jashtë, apo që nuk e kemi provuar kurrë nga afër, duket një histori për të qeshur.

Donis Avdijaj nuk u aktivizua në miqësoren që Shalke fitoi të shtunën në Paderborn, ndërsa trajneri Domeniko Tedesko u mjaftua me një batutë pas ndeshjes: “Ne i lajmë vetë rrobat e pista, problemet i zgjidhim vetë. Avdijaj e di mirë pse nuk luajti”.

Drejtori sportiv Kristian Hajdel sqaroi: “Nëse vjen vonë, nuk luan. Ka orare që duhen respektuar. Avdijaj nuk duhet të vonohet”.

Sot, me një status në Facebook, Avdijaj ka shpjeguar gjithçka. Sipas tij, ka qenë një keqkuptim për ngrënien e mëngjesit dhe orarin e tij: “Të dashur tifozë të Shalkes, dukeparë raportimet pa fund që bëri media dje, do doja të jepja këndvështrimin tim. Para ndeshjes në Paderborn të shtunën duhej të hanim mëngjes në orën 10.30 dhe të niseshim në orën 11.00.

Duke qenë se mëngjesi ishte jo me detyrim, unë u paraqita në 10.36, 24 minuta para nisjes. Kërkoj falje, nëse nuk e kam kuptuar që duhet të jem në orar fiks edhe nëse mëngjesi nuk është i detyruar”.

Shalke imiton Hofenhajmin, prezanton trajnerin 31-vjeçar

Sport Ekspres — Wed, 21 Jun 2017 12:41:55 +0000

Moda e re në Gjermani është besimi te trajnerët e rinj në moshë. Nëse Borusia e Dortmundit ka guxuar vitet e fundit, me Klop e Tuhel, Hofenhajmi vendos rekordin, duke ia besuar drejtimin Julian Nagelsmanit, i lindur në korrik të vitit 1987.

Hofenhajmi pati sukses të paparë me këtë lëvizje, ndaj tashmë edhe Shalke e imiton, sepse sot ka prezantuar trajnerin e ri Domeniko Tedesko.

Italo-gjermani është 31 vjeç, ka punuar me të rinjtë e Shtutgartit dhe më pas të Hofenhajmit (natyrisht) dhe në vitin 2017, në 8 mars, u emërua trajner i Auesë në Bundesligën 2, duke e shpëtuar nga rënia. Pak muaj në drejtim dhe erdhi oferta nga Shalke, që ka disa sezone që ndryshon trajner me një rregullsi shqetësuese.

Sezonin e fundit Shalke mbeti jashtë kupave të Europës, gjë që nuk i ndodhte prej shumë vitesh, ndaj drejtori sportiv Kristian Hajdël ka rrezikuar, duke tentuar një revolucion edhe në mentalitet.

“Shalke nuk është klub i zakonshëm. Nuk do ta lija punën te Aueja për ndonjë klub tjetër, pasi Aue ishte klubi i parë që më dha një shans në futbollin profesionist dhe do t’u jem gjithnjë mirënjohës. Shalke dëshiron të kthehet në Europë dhe ai është synimi i vetëm. E di që më krahasojnë me Nagelsmanin, për moshën dhe faktin që vijmë nga Hofenhajmi, por nuk ndihem nën presion”, deklaroi gjatë prezantimit Tedesko.