Për SportEkspres.com, tekniku beratas deklaron se koha e gjatë pa kampionat i ka krijuar më shumë mundësi për përgatitje. “Kalendari i fazës së tretë dhe ndërprerja njëjavore e kampionatit na jep mundësi për më shumë përgatitje. Nga dita e hënë kemi nisur një minifazë përgatitore dhe do kryejmë nga dy seanca në ditë. Ne luajmë më 30 mars në Elbasan dhe aty do shkojmë të sigurojmë mbijetesën”, shprehet Dule.

Ai flet edhe për largimin e Mujkiç: “Nuk kishte probleme në skuadër, madje as në financa. U largua se nuk ndjehesh mirë larg familjes. Në skuadrën tonë ai  është i mirëpritur, këtë e ka deklaruar edhe klubi ynë sot”.

MUJKIÇ – Qendërmbrojtësi boshnjak ishte një nga afrimet e goditura të merkatos së verës, por së fundmi ai kërkoi largimin dhe klubi ia dha lejekalimin. Këmbëngulja e lojtarit ka qenë e fortë dhe drejtuesit u dorëzuan. Armin Mujkiç ndërkohë ka edhe një mesazh për klubin dhe tifozët.

“Po largohem me kokën mbrapa. Unë jam i bindur se Tomori nuk do të zbresë në një kategori më poshtë. Kjo skuadër u ndërtua për të qenë në elitën shqiptare, pavarësisht pengesave, ndëshkimeve apo padrejtësive. E di që po largohem në një moment që gjithkush prej jush mund të shpërthejë në kritika ndaj meje, por më besoni që nuk mundem të qëndroj më. Shkak bëhet largësia. Këtu kam një mbështetje maksimale nga drejtuesit, stafi teknik dhe tifozët. Por, pengohem nga largësia.

Nuk mund të qëndroj dot edhe për disa kohë të tjera larg familjes dhe njerëzve të mi të dashur. Doja të largohesha që në janar, por ishte rezistenca e drejtuesve që nuk mund të shkoja. Ju kërkoj ndjesë që u largova përfundimisht. Berati është një qytet mikpritës dhe gjithmonë do ta kujtoj me nostalgji. Lidhja ime me Tomorin nuk do të ‘shuhet’ kurrë, këtë ua premtoj. Forca Tomori! Askush nuk ka kualitetin tonë. Tregojini të gjithëve se kush është Tomori dhe tifozëria beratase”, shprehet mbrojtësi për faqen zyrtare të klubit.

AGRON KAJA

“Ndihem i lumtur që më është besuar pikërisht mua drejtimi i skuadrës në një situatë jo fortë të mirë rezultatesh. Jam njohur nga afër me planin e klubit dhe nuk kam hezituar aspak për të pranuar një ofertë të tillë. Tomori për mua është si dashuria e një nëne për fëmijën e vet, duke dëshiruar që ta shikoj atë gjithnjë sa më mirë dhe të bëhet një shembull për t’u ndjekur”.

“E njoh 50% e skuadrës, ku duhet të them që ka emra të mëdhenj, si Çaço, Sharavolli, Paja, Kaloshi, Mersini dhe Koleci, të cilët i kam pasur nën urdhrat e mia në sezonin 2017-2018. Gjithashtu, ndihem i lumtur që do të kem në dispozicion futbollist si: Mujkiç, Beci, Friday, Dyca, Kingsley e Gjonaj, për të cilët mund të kenë ‘zili’ shumë klube të Kategorisë së Parë”.

“Dëmtimet dhe penalizimet i ka bërë ata që mos të tregojnë 100% e tyre. Me shumë besim e them se do të minimizojmë dy problemet kyçe të mësipërme. Krahas kësaj skuadra ndodhet në një pesimizëm që e ka mbërthyer prej disa javësh dhe kjo nuk i shërben askujt”.

“Merkato? Më duhen 3-4 prurje për të rritur nivelin dhe konkurrencën brenda grupit. Kalendarin e kemi ne favorin tonë, por jo pikët. Besoj se do t’i fitojmë të tre ndeshjet dhe më pas do të jetë ecuria e kundërshtarëve që do të vendos fatin tonë”.