Sandro Maxola

“Më vjen keq për Interin kur e shoh Ikardin në merkato”

Sport Ekspres — Tue, 16 Jul 2019 15:14:07 +0000

Interi është në kërkim të një sulmuesi te madh edhe pse e ka një të tillë në skuadër. Mauro Ikardi është nxjerrë në shitje pas debateve dhe sjelljes së tij ndaj klubit. Konte mendon se harmonia në klub vjen para së gjithash. Megjithatë, ka disa legjenda të klubit zikaltër, që mendojnë se Ikardi duhet të qëndrojë në ekip.
Pas Masimo Moratit, është legjenda e klubit Sandro Maxola që mendon në kundërshti me kryesinë e klubit. 76-vjeçari thur elozhe për Lukakun e Xhekon, por shton se Ikardi është më i mirë se ata të dy. Maxolës i vjen keq që argjentinasi është në merkato.

“Xheko dhe Lukaku janë dy lojtarë të shkëlqyer. I kam vlerësuar gjithmonë ata dhe janë shumë të mirë për skemat e Kontes. Janë të kompletuar, por midis tyre dhe Ikardit, unë do të zgjidhja këtë të fundit. Është një futbollist i pabesueshëm dhe më vjen shumë keq që e shoh atë në merkato”, deklaroi Maxola.

Duhet të themi se ai është një nga legjendat zikaltër të viteve ‘60. 76-vjeçari ka luajtuar si sulmues dhe si mesfushor i avancuar. Gjithë karrierën e tij ja ka kushtuar klubit nga Milano. Në 417 ndeshje regjistron 116 gola.

Portieri acaron dhe legjendat, Maxola: Handanoviç ka nevojë për një okulist!

Sport Ekspres — Mon, 27 Aug 2018 16:50:14 +0000

Interi nuk ia doli të fitonte përballë Torinos edhe pse ishte në avantazh të dy golave. Lojtarët zhvilluan një pjesë të dytë të dobët, por ai që mendoi t’i jepte një dorë Torinos, ishte portieri Handanoviç. Slloveni gaboi në daljen e golit të Belotit, ndërsa mund të evitonte golin e barazimit të Torinos. Kritika kundrejt tij dhe e fundit vjen nga një emër i madh i Interit.

Ish-kapiteni i famshëm, Sandro Maxola, i cili u aktivizua për 17-të sezone me zikaltrit gjatë viteve 60-70, është i befasuar nga paraqitja e ekipit dhe sulmon gardianin e portës.

“Futbollistët nuk mungojnë, por ndoshta mungon mentaliteti i tyre. Spaleti nuk duhet të dorëzohet, por të vazhdojë të punojë dhe nëse është akoma ai person që kam njohur unë, atëherë do e bëjë diçka të tillë. Martinez është lojtar që mund të zgjidhë ndeshjet, por ndoshta nuk është gati fizikisht dhe psikologjikisht për të luajtur më shumë.

Handanoviç? Ai ka nevojë për një takim me okulistin, për të kuptuar nëse shikon mirë. Duhet të punojë me kokën e tij dhe të përqendrohet gjatë gjithë ndeshjes”, përfundon Sandro Maxola.