Samir Handanoviç

“Lojtar i madh dhe fitues i lindur”, kapiteni Handanoviç flet me elozhe

Sport Ekspres — Mon, 22 Jul 2019 16:30:37 +0000

Interi nuk e ka nisur aspak mirë turneun amerikan të miqësoreve, ku u mund në ndeshjen e parë nga Junajtid. Ndeshjen e radhës e ka ndaj Juventusit. Përpara kësaj sfide ka folur kapiteni zikaltër, Samir Handanoviç.

Përveç çështjeve të përgjithshme, slloveni i ka kushtuar vëmendjen më të madhe një shtylle, që do e ketë tashmë gjatë gjithë sezonit para tij. Gardiani ka folur rreth ardhjes së një mbrojtësi si Diego Godin në Milano. Ai deklaron se uruguajani do e ndihmojë Interin të plotësojë objektivat që i ka vënë vetes.

“Godin është një lojtar i madh, me eksperiencë të madhe dhe që do të na ndihmojë shumë që të arrijmë objektivat tona. E ka treguar gjatë karrierës së tij se është një fitues i lindur dhe jemi të lumtur që ai ndodhet këtu mes nesh”, përfundoi kapiteni zikaltër.

Prapaskenat e takimit të Ikardit me drejtuesit, tifozët vihen në krah të klubit!

Sport Ekspres — Fri, 15 Feb 2019 14:10:04 +0000

Mauro Ikardi ka marrë pjesë gjatë ditës së sotme në një takim katërsh midis tij Marotës, Spaletit dhe Xhardinit. Takimi ka zgjatur vetëm 15 minuta siç raportojnë mediat italiane dhe sulmuesi është parë të largohet me makinën Uandës, gruas dhe agjentes së tij.

Në takim nuk ka marrë pjesë doktori i Interit, Piero Volpi, pasi klubi nuk ka besuar për asnjë moment dhe nuk beson në një dëmtim të lojtarit. Megjithatë, klubi ka vendosur ta falë lojtarin për mungesën në ndeshjen e fituar 0-1 përballë Rapidit të Vienës në Europa League.

Negociatat për rinovimin e kontratës së ish-kapitenit po vazhdojnë dhe gjatë ditëve të ardhshme Interi do t’i paraqesë argjentinasit kontratën e re. Ikardi nuk u stërvit me grupin gjatë ditës së sotme, punoi pak mes vrapimeve dhe palestrës, por pa top. Më pas ai mori pjesë në një seancë me fizioterapistin e ekipit.

Nga ana tjetër tifozët e kanë shprehur të tyren për vendimin e klubit. Interi vendosi t’i hiqte shiritin e kapitenit Ikardit për t’ia kaluar Handanoviçit. Kundër Rapidit, portieri slloven zhvilloi ndeshjen e parë si kapiten me Interin, ndërsa ultrasit filluan me koret: “ka vetëm një kapiten”. Ata kanë mbështetur kështu vendimin e klubit dhe i kanë dhuruar emocionet e para kapitenit… Samir Handanoviç.

Handanoviç nuk ia thotë lojës me këmbë, gafa e djeshme i ka çuditur të gjithë

Sport Ekspres — Sun, 04 Nov 2018 18:23:09 +0000

Në futbollit modern kërkohet që portierët të jenë sa më të kompletuar. Loja më këmbë është bërë diçka që shikohet me shumë imtësi nga trajnerët, por gjithsesi ka ende plot gardianë që nuk i kushtojnë shumë rëndësi këtij aspekti.

Një ndër ta është dhe portieri i Interit, Samir Handanoviç. Slloveni vlerësohet nga të gjithë për reflekset e tij të mbinatyrshme, por kur vjen radha me këmbë situata ndryshon 180 gradë, siç e dëshmon edhe një pasë tërësisht amatoreske e 34-vjeçarit në takimin e djeshëm ndaj Xhenoas.

Ma Handanovic che minchia fa? Ma perché? #InterGenoa pic.twitter.com/QgrVcO9Lno

— Paolo Vigo (@Pagolo) November 3, 2018

Portieri i zikaltërve vendosi të mos spastronte nga zona një top të pasuar nga Shkrinar, por pasa e projektuar për Dalbert në krahun e majtë la shumë për të dëshiruar. Fatmirësisht për Interin, braziliani u tregua këmbëshpejtë duke larguar topin nga këmbët e sulmuesit afrikan të Xhenoas Kuame.

Rrëfimi ndryshe i Handanoviç: Nga idhulli, loja e preferuar tek ndeshjet brenda familjes

Sport Ekspres — Tue, 25 Sep 2018 16:42:48 +0000

Samir Handanoviç ka nisur sezonin e shtatë me Interin, që nga koha kur u transferua nga ekipi i Udinezes. Portieri slloven ka folur për “Matchday Programme”, ku tregon detaje interesante nga jeta e tij.

SHAHU – “Më pëlqen shumë. Kur kam kohë të lirë, futem në internet dhe luaj me kundërshtarë të ndryshëm. Jam i apasionuar pas lojës së shahut dhe të gjithë në familjen time e luajmë si lojë.”

INTER – “Arrita në Itali shumë i ri dhe, fatmirësisht, nuk isha shumë larg Sllovenisë. Kjo gjë më ndihmoi shumë të përshtatem, sidomos në fillim. Pastaj kalova tek Inter, që e cilësoj si shtëpinë time. Kur stërvitem, nuk e ndjej kurrë peshën e lodhjes. Ambienti është shumë familjar: shokët, stafi, tifozët. Të jem këtu është një krenari e madhe për mua.”

IDHULLI – “Kur isha më i ri, më pëlqente Shmajkëll, i cili ishte ndër më të mirët në botë mes shtyllave.”

HIMNI – “Kur dëgjoj ‘Pazza Inter’, jam gati për të dhënë gjithçka. Stadiumi ynë është magjepsës, unik dhe plot adrenalinë.”

FAMILJA – “Nuk e harroj ndeshjen e parë që kam parë në vendin tim. Ishim mbledhur të gjithë bashkë dhe po shihnim një ndeshje të kushëririt tim, i cili është gjashtë vite më i madh. Vazhdojmë të mblidhemi prapë bashkë dhe luajmë volejboll, ose basketboll. Është një mënyrë që na bën të relaksohemi. Kur kam kohë të lirë, luaj gjithmonë më fëmijët e mi.”

Portieri acaron dhe legjendat, Maxola: Handanoviç ka nevojë për një okulist!

Sport Ekspres — Mon, 27 Aug 2018 16:50:14 +0000

Interi nuk ia doli të fitonte përballë Torinos edhe pse ishte në avantazh të dy golave. Lojtarët zhvilluan një pjesë të dytë të dobët, por ai që mendoi t’i jepte një dorë Torinos, ishte portieri Handanoviç. Slloveni gaboi në daljen e golit të Belotit, ndërsa mund të evitonte golin e barazimit të Torinos. Kritika kundrejt tij dhe e fundit vjen nga një emër i madh i Interit.

Ish-kapiteni i famshëm, Sandro Maxola, i cili u aktivizua për 17-të sezone me zikaltrit gjatë viteve 60-70, është i befasuar nga paraqitja e ekipit dhe sulmon gardianin e portës.

“Futbollistët nuk mungojnë, por ndoshta mungon mentaliteti i tyre. Spaleti nuk duhet të dorëzohet, por të vazhdojë të punojë dhe nëse është akoma ai person që kam njohur unë, atëherë do e bëjë diçka të tillë. Martinez është lojtar që mund të zgjidhë ndeshjet, por ndoshta nuk është gati fizikisht dhe psikologjikisht për të luajtur më shumë.

Handanoviç? Ai ka nevojë për një takim me okulistin, për të kuptuar nëse shikon mirë. Duhet të punojë me kokën e tij dhe të përqendrohet gjatë gjithë ndeshjes”, përfundon Sandro Maxola.