Garsia jep dorëheqjen, Marseja futet në kërkim

Sport Ekspres — Wed, 22 May 2019 15:26:29 +0000

Rudi Garsia nuk do të jetë më trajner i Olimpikut të Marsejës. Tekniku francez komunikoi vendimin para medieve në një dalje për shtyp. Ecuria e dobët e ekipit në muajt e fundit shtyu Garsian që t’i kërkonte dorëheqjen presidentit Frenk Mekkurt edhe pse kontrata e tij aktuale ishte e vlefshme për dy sezone.

“Vendosa që të largohem. Fola me presidentin dhe ai e pranoi këtë kërkesë timen. Nëse do të bazohesha në vendosmërinë që kam si trajner do të qëndroja, por logjika dhe arsyetimi më thotë që është më mirë që të ndahemi tani”, tha Garsia

Pasuesi i Garsias mbetet ende enigmë. Mediet franceze nuk kanë mundur të zbulojnë emra konkretë për bankinën e ekipit me më shumë tifozë në Francë.

Romanisti Garsia: Shumë të pavërteta për shkarkimin tim. Unë te Lacio? Kurrë!

Sport Ekspres — Tue, 16 Oct 2018 13:24:07 +0000

Me datë 25 nëntor, Olimpiku i Marsejës do të presë Lacion në një përballje të zjarrtë të Europa League. Në stolin e francezëve është Rudi Garsia, i cili ka drejtuar për dy sezone e gjysmë verdhekuqtë e Romës. 54-vjeçari do të provojë emocionet e derbit roman, ndeshje që nuk e ka humbur asnjëherë, dhe një gjë të tillë e konfirmon vetë. “Do të jetë një ndeshje e veçantë për mua. Dua të vazhdoj me traditën time personale kundër Lacios dhe kjo do të ishte shumë e rëndësishme për Marsejën.”

Trajneri francez me origjinë spanjolle e di mirë se çfarë e pret në ndeshjen e kthimit. Tifozët bardhekaltër do e fishkëllejnë, por kjo gjë nuk është problem për Garsian. “Është e drejta të ndodhë kështu, duke marrë parasysh se unë jam dhe do të jem gjithmonë një romanist. Mjafton që gjithçka të jetë ‘fair-play’. Jemi kundërshtarë në fushë dhe jo jashtë saj. Nuk është një luftë.”

Kur pyetet se ekziston mundësia që një ditë të ulet në stolin e Lacios, trajneri i Marsejës është i prerë. “Jo, kurrë. Në Romë ekziston vetëm një klub për mua. Lacio meriton respekt, të njëjtin respekt që tifozët e tyre më kanë dhënë mua…”

Në Romë përflitet se Garsia e humbi autoritetin e tij në ekip, pas rebelimit të Totit, të cilin trajneri e zëvendësoi pas një ndeshje kundër Torinos. “Nuk dua të jem vulgar, por nuk më vjen në mendje një fjalë më e mirë se kjo: ‘këto fjalë janë budallaqe’. Të gjithë e dimë se kur filluan problemet e mia te Roma.” Dhe Garsia nis e shpjegon se kur situata u kthye në një problem, çka solli dhe fundin e aventurës së tij me Romën.

“Në fund të sezonit tim të dytë në ekip, pas derbit që konfirmoi vendin tonë të dytë, thashë atë që mendova sa i përket hendekut midis nesh dhe Juventusit dhe për pamundësinë tonë për të fituar titullin. Aty mbaroi gjithçka. Më vjen mirë që Françesko ka thënë të njëjtat gjëra para disa javësh. Një fjalë e urtë në Francë thotë: ‘Nuk është mirë të kesh të drejtë shumë herët’”, përfundon Rudi Garsia.