RUDI GARCIA

Legjenda argjentinase pranë stolit të Marsejës

Sport Ekspres — Mon, 20 May 2019 18:59:23 +0000

Rudi Garsia është pranë largimit nga Olimpiku i Marsejes. Ish trajneri i Romës nuk ka bindur në Francë dhe klubi nuk e sheh të arsyeshme të vazhdojë me të. Gabriel Heinze është emri kryesor në listën e francezëve. 41-vjeçari e njeh shumë mirë atmosferën brenda gjigantëve francezë, pasi ka kaluar dy vite në stadiumin “Velodrome”.

Heinze nga viti 2015 ka nisur aventurën e tij si trajner. Atdheu ka qenë “streha” e parë për të startuar. Godoy Kruz dhe Argentinos Juniors ishin aventurat e para, ndërsa tani drejton Velez Sarsfiled. Ai me skuadrën e tij renditen të 6-ët në kampionatin argjentinas. Marseja pritet të jetë aventura e parë në Evropë për argjentinasin. Përveç Marsejes ish-mbrojtësi ka luajtur me ekipe si Mançester Junajtid, PSG, Real Madrid apo Roma gjatë karrierës së tij brenda fushës së blertë.

Garsia: Baloteli është pjekur, kur e kisha kundër tentoja ta provokoja!

Sport Ekspres — Sat, 02 Mar 2019 12:56:10 +0000

Transferimi në janar te Olimpiku i Marsejës i ka bërë mirë Mario Balotelit. Sulmuesi italian po luan mirë, është qetësuar dhe ka shënuar 3 gola në katër ndeshjet e zhvilluara me ekipin e ri.

Rudi Garsia ka dhënë një prononcim interesant për 28-vjeçarin në konferencën për shtyp përpara ndeshjes kundër Seint Etienit. Trajneri i Marsejës vlerëson shumë karakterin e lojtarit dhe pranon që po zbulon një person ndryshe nga ai që kishte menduar, në një sfidë të rëndësishme për një vend në Champions Ligë.

“Baloteli po tregohet i zgjuar dhe ka gjetur ekuilibrin e munguar. Kur e kisha kundërshtar i kërkoja ekipit tim që ta provokonin. Më ka befasuar karakteri i tij, është një person i qeshur dhe inteligjent. Mario vlerësohet shumë nga shokët e skuadrës dhe është e kundërta e asaj që kam menduar për të”, përfundon Rudi Garsia.

Strotman pranë largimit, e konfirmon Di Françesko

Sport Ekspres — Sun, 26 Aug 2018 14:47:01 +0000

Kevin Strotman është shumë pranë largimit nga skuadra e Romës. Mesfushori holandez luan prej pesë sezonesh te skuadra verdhekuqve, por tani ka ardhur momenti që palët të ndahen. Destinacioni i i ri 28-vjeçarit është Franca. Ku ekipi i Marsejës i ka bërë një ofertë që nuk mund ta refuzojë.

Rudi Garsia, trajneri i tij i mëparshëm te Roma tri vite më parë është personi që po insiston ta sjellë mesfushorin te skuadra ku drejton aktualisht. Te Marseja Strotman do të jetë një lider i padiskutueshëm dhe gjithashtu edhe lojtari më i paguar në ekip së bashku me fantazistin Dimitri Paje.

Vetë trajneri i Romës konfirmoi para gazetarëve se Strotman është në bisedime me një ekip tjetër në konferencën që i parapriu ndeshjes së verdhekuqve me Atalantën. Por, derisa kjo çështje të zgjidhet nëjherë e mirë, 28-vjeçari do të vazhdojë të jetë i gatshëm për teknikun italian.

Tare me mision në Skoci, një njohje e vjetër i bëhet pengesë

Sport Ekspres — Thu, 16 Aug 2018 19:50:37 +0000

Igli Tare është duke projektuar përforcimin e fundit të Lacios për këtë merkato vere. Objektivi i shqiptarit është sulmuesi 22-vjeçari i Selltikut Musa Dembele. Sulmuesi i skocezëve ka ngjallur interes dhe nga një “armik” i dikurshëm i Lacios.

Bëhet fjalë për ish-trajnerin e Romës Rudi Garsia, i cili tani drejton Marsejën në Francë. 54-vjeçari kërkon ta kthejë në vendlindje sulmuesin, por Tare nuk do t’ia bëjë aspak të lehtë francezit. Momentalisht përflitet se Sellik kërkon të paktën 15 milionë euro për talentin francez, por konkurrenca midis klubeve mund ta rrisë akoma më shumë çmimin e tij.

Në rast se Dembele do t’i bashkohet Lacios, atëherë do shikohet mundësia e huazimit të sulmuesit ekuadorian Felipe Kaisedo, i cili nuk bindi aspak gjatë sezonit të shkuar ku shënoi vetëm tri gola. 29-vjeçari me shumë gjasa do të huazohet te skuadra e Rajo Vajekanos.