Rron Broja

Broja i bashkohet Partizanit, merr numrin “vakant”

Sport Ekspres — Mon, 01 Jul 2019 17:40:07 +0000

Afrimi më i fundit i Partizanit, Rron Broja, i është bashkuar skuadrës së “demave” në fazën përgatitore në Slloveni. Mesfushori i lindur në Mitrovicë zgjodhi të vijojë karrierën në Shqipëri pas një eksperience 2-vjeçare te Shkupi.

Në fotot e publikuara nga klubi 23-vjeçari shihet teksa ka veshur uniformën me numrin tetë, numër ky që nuk qenë në përdorim te të kuqtë gjatë vitit të kaluar. Mbajtësi i fundit i këtij numri te Partizani ka qenë mesfushori tetovar Emran Ramadani.

Zyrtare: Godet Partizani, dhurata e parë për Lerdën

Sport Ekspres — Sat, 29 Jun 2019 12:23:22 +0000

Rron Broja është afrimi i radhës te Partizani. Mesfushori qendror, i larguar nga Shkupi, po kërkohej nga disa klube, mes tyre dhe Shkëndija e Tetovës. Gjithashtu edhe Tirana e dëshironte, sikurse SportEkspres.com ka raportuar, por mesfushori ka zgjedhur Partizanin.

“Klubi Futbollit Partizani zyrtarizon sot arritjen e marrëveshjes me Rron Broja. Mesfushori i talentuar do të jetë pjesë e skuadrës për dy vitet e ardhshme, pasi ka nënshkruar sot kontratën me kampionët e Shqipërisë. 23 vjeçari nga Kosova vishet i kuq, pas eksperiencës pozitive te FC Shkupi.

Njëkohësisht Broja ka luajtur me skuadra si Gent II, SK Deinze në Belgjikë dhe Trepça’89. Gjithashtu ka qenë pjesë edhe e ekipeve Kombëtare U-21 të Shqipërisë dhe Kosovës. Mesfushori i talentuar do tëi bashkohet të kuqve menjëherë pas mbërritjes së ekipit në kryeqytet”, njofton klubi i Partizanit.

Jo vetëm Partizani, edhe Tirana në garë për mesfushorin

Sport Ekspres — Fri, 28 Jun 2019 08:02:27 +0000

Rron Broja, mesfushori qendror që u largua para pak ditësh nga Shkupi, ka disa oferta të rëndësishme. Shkëndija e Tetovës, që e ka dashur edhe në të shkuarën, i ka kthyer sërish sytë nga 23-vjeçari dhe po tenton ta bindë të nënshkruajë për ta.

Gjithsesi konkurrenca është e madhe dhe dëshirës e Brojës është që të luajë në një kampionat më të fortë. Një nga klubet që është vënë pas mesfushorit është edhe Partizani, sikurse raportojnë kolegët tanë të “Infosport.mk”.

Broja ka edhe simpatizues të tjerë dhe SportEkspres.com mëson se edhe Tirana është e interesuar për të. Në Kosovë gjithashtu po tentojnë ta bindin, ndërkohë që lojtari duhet të mendohet mirë dhe të vendosë se ku do e vazhdojë karrierën. Luksin e ka që të zgjedhë.

Shkupi humbet më të mirin, e ardhmja në Superiore

Sport Ekspres — Mon, 24 Jun 2019 07:46:54 +0000

Rron Broja nuk është më lojtar i Shkupit dhe për baedhekaltrit është një humbje e madhe. Mesfushori me tipare mbrojtëse ishte një nga lojtarët më të rëndësishëm të skuadrës shqiptare në Maqedoninë e Veriut.

Ish-futbollisti i Kosovës U21 ka pasur disa oferta, jo vetëm nga rajoni. Gjithsesi, nga ajo që raportohet nga mediat e vendit fqinj, Broja ka një ofertë nga Superiorja dhe gjasat janë që të zgjedhë të luajë në Shqipëri.

Edhe në Kosovë, ku është aktivizuar më parë me Trepça ’89, e kërkojnë. Broja, 23 vjeç, duhet të ndajë mendjen për të ardhmen e tij. Te Shkupi sezonin e fundit është aktivizuar në 31 ndeshje, 28 prej të cilave i ka nisur nga minuta e parë. Ai ka shënuar vetëm një gol me penallti, kundër Sileks.