“Kam takuar presidentin dhe mendova t’i kërkoj që t’i stërvit edhe një ekip moshash gjatë kohës që punoj te Kukësi. Kategorikisht më tha ‘jo’. Pastaj lindi ideja për ekipin B. Në parim edhe mund të kemi rënë dakord, por kjo u keqkuptua. Nuk kishim firmosur asgjë. Pasi e analizova situatën dhe fola me njerëz të afërm, më thanë që ajo lëvizje mund të ishte një hap pas. I dërgova një mesazh presidentit dhe i thashë që nuk pranoj Kukësin B”, deklaron mes të tjerash Hallaçi.

Zëvendëstrajneri, në analizën pas ndeshjes me Skënderbeun ka pasur një bisedë me presidentin Gjici, i cili nuk e ka mirëpritur praninë e tij në mbledhje. “Bëmë analizë pas humbjes me Korçën. Më tha pse ke ardhur këtu dhe i tash se kam ardhur se më kanë thënë për mbledhje. Sa duket e kishte keqkuptuar që kisha nisur te Kukësi B. Mendova se do më sqaronin më pas, por nuk ndodhi. Lajmërova se do të largohem, pasi nuk e pranoj Kukësin B. Kur punon tetë vite së bashku duhen mbyllur gjërat më mirë”, shtoi Hallaçi.

Ish-kapiteni, i pyetur mbi shkaqet e problematikave te Kukësi, deklaron se ndryshimi i shpeshte i trajnerëve nuk i bën mirë ekipit. “Është e pafalshme që Kukësi sërish vazhdon të ndryshojë trajnerët. Dolëm kampionë me një trajner. Humb një ndeshje, thuhet se e ka fajin trajneri”, u shpreh Hallaçi në emision.

Hallaçi ka thënë fjalët e tij pas largimit dhe e ka bërë përmes një postimi në llogarinë e tij në “Facebook”. Mes shumë komenteve bien në sy disa, ai i drejtorit të akademisë Vllaznia, Alban Hasani, ish-futbollistit Bledar Hodo dhe lojtarit të Bylisit, Ardit Peposhi. Gjithashtu edhe një trajner që ka punuar që në vegjëli me Rramanin, Ilir Abeshi, ka një mesazh për të.

ALBAN HASANI – Suksese e krenar për çfarë i ke dhënë dhe ke marrë nga qyteti i Kukësit. Ke qenë kampion, si në fushë dhe jashtë saj. Je verior i vërtetë.

ILIR ABESHI – Nuk e di a më mban mend, por unë kam qenë trajneri juaj në U17 të Shqipërisë. Në kujtesën time je një djalë i shkëlqyer dhe me moral. Mos u mërzit për këtë largim të cilin jam i sigurt që nuk e meriton, por ti me zotësinë tënde do ta tregosh veten gjithkund. Unë i njoh mirë presidentët e futbollit shqiptar dhe të them mos u mërzit. Ju jeni një ikonë e qytetit tuaj, këtë mos e harro. Unë kam shumë besim që ti do ta tregosh zotësinë tënde diku tjetër.

BLEDAR HODO – Nuk është koha e fisnikut, por e zvarranikut. Zoti ta bëftë mbarë! Të përshëndes!

ARDIT PEPOSHI – Suksese o kapiten, të gjithë e dimë kontributin tënd për këtë ekip dhe jam i sigurt që do mbahesh mend gjatë nga gjithë tifozët kuksiane, madje shumë më tepër se edhe presidentët që kanë drejtuar këtë ekip. Uroj me gjithë zemër të shikoj sa më lart edhe në karrierën e re që ke nisur si trajner, sepse je një njeri që vetëm ato që kanë pasur fatin të njohin nga afër ti dinë vlerat që ke ti. Ndoshta gjithë këto vlera që ke, ndonjërin mund ta ketë bërë xheloz aty që të marrin këtë vendim për ty.

Vetë Hallaçi nuk dëshiron të flasë shumë, edhe pse fatkeqësisht e ka parë veten të ndihet i tepër te Kukësi i tij. Në këto kushte bashkëpunimi me verilindorët është mbyllur dhe Hallaçi nuk ka mundur të qëndrojë i heshtur, edhe pse “helmi” që hedh është në masë të vogël.

REAGIMI I HALLAÇIT – “Përshëndetje miq! 8 vite së bashku përjetuam emocione të jashtëzakonshme, fituam trofe, kaluam shumë raunde në Europë, e ngritëm emrin e Kukësit shumë lart dhe për këtë jam shumë krenar si kuksian i vërtetë dhe shumë i fortë.

Gjej rastin të falënderoj iniciatorin e planit të ngjitjes së Kukësit në futboll Z.HASAN HALILAJ, FAMILJEN KASTRATI, Z.FLAMUR HOXHA, Z.BASHKIM GJOKA,Z.RAM GECI,PRESIDENTIN SAFET GJICI PËR INVESTIMIN KOLOSAL QË KA BËRË NË KUKËS, si dhe shumë njerëz të tjerë të nderuar që kanë kontribuar për Kukësin, me shumë respekt për të gjithë.

Unë personalisht nuk doja kurrë të ikja nga Kukësi im, por vetëm kaq, nuk dua të flas më shumë për arsyet e largimit dhe as nuk mundet njeri të më largojë nga Kukësi përfundimisht ndonjëherë, por mënyrën si më larguan nuk e meritoja.

Falënderoj të gjithë dashamirësit e mi e të gjithë tifozët e mrekullueshëm kuksian që më kanë mbështetur në çdo hap, për mua ata janë special. E vështirë ndarja me Kukësin, por nuk ishte zgjedhja ime kjo. Suksese të mëtejshme FK KUKËSIT”, shkruan Hallaçi në llogarinë e tij në Facebook.

Së fundmi situata për të ka ndryshuar dhe e ka mbyllur me Kukësin, që i ka ofruar postin e trajnerit të ekipit të dytë. Praktikisht Hallaçi nuk është më pjesë e Kukësit. Gjithsesi, në kampin verilindor nuk kanë mundur të gjejnë kohë qoftë edhe për t’i shkruar dy radhë për ta falënderuar.

Më së shumti i ka shqetësuar dalja sërish në skenë i emrit të Ilir Dajës. Kolegët e “Panorama Sport” shkruanin sot që trajneri i Flamurtarit është një opsion për të pasuar trajnerin Ernest Gjoka në rast se nuk arrihen objektivat sezonalë.

Në fakt Kukësi e ka tentuar më parë Dajën, ndërkohë që edhe vetë presidenti Safet Gjici është shprehur se dy trajnerë ka në vendin tonë: Ilir Daja dhe Shpëtim Duro. Në kampin verilindor janë shqetësuar prej lajmit të dalë në media dhe hedhin poshtë gjithçka, veçse harrojnë të mbajnë edhe një qëndrim zyrtar mbi pozicionin e Rraman Hallaçit. Sigurisht do të flitet edhe për këtë, gjë që në fakt duhet të kishte ndodhur.

REAGIMI PËR DAJËN – “FK Kukësi i konsideron të pavërteta lajmet e përhapura sot në media, sikur në pankinë do jetë një nga trajnerët aktualë që drejton për momentin një tjetër ekip të Superligës. Presidenti dhe klubi i kanë dhënë dhe po i japin mbështeje maksimale ekipit dhe trajnerit Ernest Gjoka, për të kapur dy objektivat, që janë: Vendi i dytë në Superligë dhe fitimi i Kupës së Shqipërisë.

E gjithë vëmendja është përqendruar te këto dy sfida dhe aspak në ndryshimin e stafit. Lajme të tilla, përveçse të pavërteta, synojnë të sjellin shpërqendrim te ekipi, por përvoja e lojtarëve dhe stafit bëjnë që përgjegjësia të jetë tepër e madhe. Ekipi është përqendruar maksimalisht te stërvitja dhe objektivat, dhe me pas te faza përgatitore dhe përfaqësimi dinjitoz në Europë, duke ruajtur bazën e ekipit dhe stafin”, shkruhet në reagimin e Kukësit.

Për “Supersport”, Hallaçi ka folur për ndeshjen e radhës me Flamurtarin në Vlorë, por ka komentuar edhe takimin që barazuan  me Laçin në Elbasan.

“Në futboll duhet të shënosh, e pësuam nga një goditje standarde me Laçin. Historia ka folur për ne, por Flamurtari është një skuadër e fortë. Ata janë forcuar, por ne kemi objektivat tona dhe shkojmë për të rikuperuar ato dy pikë që lamë me Laçin”, deklaroi ndër të tjera zëvendëstrajneri i Kukësit.

Në Vlorë do të gjejnë edhe dy “ish”-ë, si Alla dhe Koliçi. Sigurisht Hallaçi pret që në fund të jenë verilindorët ata që do triumfojnë. “Kemi kaluar mirë me Koliçin dhe Allën, por këtë ndeshje ndoshta do të dalin kokulur”.