Romanjoli

Infermieria përforcon Milanin, lajme pozitive për Gatuzon

Sport Ekspres — Mon, 15 Apr 2019 13:39:27 +0000

Fitorja me Lacion ka rikthyer qetësinë dhe ka rritur moralin e Milanit. Kuqezinjtë renditen përsëri në vendin e katërt dhe gara për kualifikimin në Champions po bëhet gjithnjë e më e bukur.

Ndeshja e radhës për ekipin e Gatuzos është përballë Parmës. Trajneri ka marrë tre lajmë të mira përpara përballjes që do të zhvillohet ditën e shtunë në drekë.

Alesio Romanjoli dhe Davide Kalabria u larguan të dëmtuar nga sfida me Lacion. Dëmtimet e tyre nuk janë serioze dhe dy mbrojtësit do të jenë gati për transfertën emiliane. Kapiteni do të vazhdojë edhe disa ditë me terapi, por mjekët janë të sigurt që Romanjoli do të jetë nën urdhrat e Gatuzos për “finalen” e radhës.

Gati është edhe Xhanluixhi Donaruma. Portieri i ka lënë pas krahëve problemet dhe pritet të rikthehet në mes të shtyllave. Pak më ndryshe situata e Lukas Paketa. Riaftësimi i brazilianit po ecën mirë, por rikthimi i tij është akoma larg. Objektivi është që lojtari të jetë i gatshëm për ndeshjen e 28 prillit, Torino-Milan.

Gatuzo bën shaka me Romanjolin: S’ka çmim, po i vura do të na e marrin

Sport Ekspres — Sat, 23 Feb 2019 19:53:07 +0000

Alesio Romanjoli po përjeton një formë të shkëlqyer që prej rikthimit pas dëmtimit në muajin dhjetor. Kapiteni i Milanit ka qenë deçiziv në çdo takim të “djallit” dhe kjo gjë është vlerësuar nga trajneri Xhenaro Gatuzo.

Tekniku i Milanit u pyet pas fitores së djeshme kundër Empolit mbi vlerën e kartonit të lojtarit të tij. Gatuzo zgjodhi të përgjigjej me një shaka: “Nuk jap çmim për të, pasi po bëra këtë gjë dikush do të na trokasë në derë dhe do të na marrë. Romanjoli do të qëndrojë me ne. Shiriti i kapitenit e ka bërë më të përgjegjshëm, është një lojtar me të ardhme”.

Kontrata e 24-vjeçarit me skuadrën e Milanit zgjat deri në vitin 2022, çka e bën të sigurt se e ardhmja e qendërmbrojtësit do të jetë me “djallin”.

Zapata: Ronaldo anormal, por unë e kam ndalur në Spanjë

Sport Ekspres — Fri, 09 Nov 2018 20:30:06 +0000

Qendërmbrojtësi i Milanit, Kristian Zapata, ka folur për “Sky Sports” në prag të sfidës së kuqezinjve ndaj kampionëve të Italisë, Juventusit. Dëmtimi në gju i Musakios nuk i lë zgjidhje tjetër Gatuzos veçse t’i besojë 32-vjeçarit, i cili do të ketë në dorë çelësat e mbrojtjes së Milanit përkrah kapitenit Alesio Romanjoli.

KUNDËRSHTARI – “Juventusi është një kundërshtari shumë i fortë në të gjitha repartet. Kanë lojtarë të paparë dhe një skuadër të kompletuar. S’duhet të kemi frikë, pasi i dimë vështirësitë që ka kampionati. E dimë se kemi përballë skuadrën më të mirë të Serie A dhe Europës”.

HIGUAIN – “Higuain e ka marrë veten, tani është shumë mirë. U stërvit sot me grupin dhe është shumë i motivuar për të marrë pjesë në këtë takim. Do të ishte bukur nëse do të shënonte golin që do të na siguronte fitoren”.

RONALDO – “Ronaldo është një lojtar i aftë të të ndëshkojë për gabimin më të vogël. E kam markuar disa herë kur luaja në Spanjë me Vijarealin. Në një ndeshje luajta si mbrojtës i djathtë dhe bëra një punë të mirë duke iu qepur gjatë të gjithë takimit. Në fund ishte pak i acaruar. Është një lojtar shumë larg normales”.

ROMANJOLI – “Romanjoli është përmirësuar shumë gjatë këtij viti. Shiriti i kapitenit e ka bërë më të përgjegjshëm. Është një lider i vërtetë, mund të bëhet më i miri”, përfundoi Zapata.

Murinjo kërkon revolucion, “ilaçet” e mbrojtjes gjenden në Serie A

Sport Ekspres — Mon, 08 Oct 2018 16:55:08 +0000

Te Mançester Junajtid besojnë akoma se Zhoze Murinjo është njeriu i duhur për të kthyer “djajtë e kuq” në lavdinë e dikurshme. Klubi ka fituar pak qetësi nga fitorja dramatike me përmbysje ndaj Junajtid dhe tani duhet vepruar sa më parë për të korriguar repartin më problematik të skuarës: Mbrojtjen.

Sipas medies së njohur angleze “The Mirror”, tekniku portugez ka kërkuar nga administratori i klubit Ed Uduard dy qendërmbrojtës cilësor për merkaton e janarit. Dy lojtarët në krye të listës së dëshirave të Murinjos vijnë nga Serie A, madje nga i njëjti qytet.

Bëhet fjalë për Milan Shkriniar dhe Alesio Romanjolin. Dy lojtarët e Interit dhe Milanit cilësohen si futbollistët ideal për të korrigjuar gabimet e shumta që kanë shoqëruar mbrojtjen e Mançesterit gjatë viteve të fundit të fundit. Por, mbetet për t’u parë nëse oferta e anglezëve do të bindë drejtuesit e klubeve të Milanos.