“Tradhëtoi shokët e skuadrës”, akuza të rënda për lojtarin e Junajtid!

Sport Ekspres — Thu, 25 Apr 2019 10:05:34 +0000

Derbi i Mançesterit pritej të ishte i fortë dhe tepër i bukur, por nuk u ngjit në nivelin e duhur. Diferenca të mëdha mes skuadrave, me Junajtid që i rezistoi vetëm një pjesë loje ekipit të Guardiolës.

Dy golat e shënuar në pjesën e dytë nga Bernardo Silva dhe Leroi Sane i dhuruan tre pikë të arta “Qytetarëve” dhe me shumë mundësi titullin kampion. Siti është vetëm tre fitore larg triumfit në kampionat.

Roi Kin

Kjo ishte humbja e shtatë në nëntë ndeshjet e fundit në të gjitha kompeticionet për “Djajtë e Kuq”. Junajtid nuk po funksionon më dhe objektivi Champions është bërë pothuajse i paarritshëm.

Loja e dobët e zhvilluar në derbi dhe gabimet e shumta të lojtarëve dhe portierit De Gea kanë sjellë acarimin e Roi Kin. Ish-kapiteni i famshëm ka folur troç, duke sulmuar një lojtar të ekipit të Solskjaer.

Irlandezi e ka me brazilianin Fred. “Kjo nuk do të thotë të japësh gjithçka ke nga vetja. Fred i tradhtoi shokët e tij. Shikoni si e lë Sterling të bëjë çfarë të dojë dhe t’i largohet në rastin e golit të dytë. Kjo është tradhti”, insiston Roi Kin.

Roi Kin nuk përmbahet: Qaramanë, mbyllni gojën dhe luani futboll!

Sport Ekspres — Thu, 04 Oct 2018 11:25:54 +0000

Roi Kin është një person, i cili shpreh gjithmonë mendimin e tij origjinal. Ish-mesfushori dhe kapiteni i Mançester Junajtid të Fergusonit, i njohur për karakterin e vështirë dhe sherret e shumta gjatë karrierës, ka dhënë mendimin e tij për situatën e komplikuar të “Djajve të Kuq”, duke i dalë në krah trajnerit Murinjo dhe “sulmuar” lojtarët e ekipit.

47-vjeçari, i cili është aktivizuar për 12-të sezone në “Old Trafford”, e shpjegon sipas stilit të tij situatën e komplikuar të ekipit, por kur fillon ndeshja harrohet gjithçka, mbyllet goja dhe duhet dhënë maksimumi.

“Po flasim për futbollistë dhe trajnerë, jo të gjithë lojtarët bien dakord me trajnerin dhe trajnerit nuk mund t’i pëlqejnë të gjithë lojtarët e skuadrës. Por si lojtar, pavarësisht çdo mosmarrëveshje që ke patur me trajnerin, kur futesh në fushë do të japësh maksimumin për skuadrën. Kujt i plasi nëse ‘kacafytesh’ me trajnerin tënd, është pjesë e lojës të debatosh. Nëse të veshësh bluzën e Mançester Junajtid nuk të bën të japësh 100%, kur zbret në fushë, atëherë, i uroj fat të mbarë Murinjos.”

“Nuk e kam me Pogba, sepse është një diskutim i përgjithshëm. Ka lojtarë që acarohen me trajnerin dhe mendojnë: ‘Nuk po stërvitem mirë, sepse më kanë zemëruar’. Ka shumë qaramanë rreth e rrotull dhe nuk janë pak. Kur zbret në fushë, luan për krenarinë tënde, për familjen tënde, qytetin tënd, për çdo gjë. Nuk mund të preokupohesh për atë që thotë trajneri, ose stafi teknik. Zbrit në fushë, mbyll gojën dhe luaj. Ka kohë boll pas ndeshjes për t’u zënë dhe debatuar“, përfundon ish-kapiteni i Mançester Junajtid prononcimin e tij për “Notts TV”.