Roger Junio

Kukësi në Ohër, “dezerton” një nga sulmuesit

Sport Ekspres — Thu, 27 Jun 2019 12:07:52 +0000

Kukësi është zhvendosur një ditë më parë në Ohër, aty ku do të përgatitet për ndeshjen e parë kundër hungarezëve të Debrecen. Të shtunën ekipi verilindor me shumë mundësi do të zhvillojë edhe një miqësore të fundit, sërish me Laçin dhe këtë herë në Pogradec. Gjithsesi mbetet për t’u konfirmuar përfundimisht.

MERKATO – Trajneri Ernest Gjoka pret që drejtuesit të mbyllin marrëveshjet edhe me dy lojtarë të tjerë, të cilët të luajnë në repartin e sulmit. Ishte menduar që për Europën të ishte në dispozicion të stafit teknik edhe sulmuesi Roxher Zhunio.

Roxher ne stervitjen e Kukesit

Gjithsesi duket se ai nuk do të jetë pjesë e Kukësit, pasi nuk ka udhëtuar drejt Ohrit, aty ku verilindorët po zhvillojnë fazën përgatitore. Para disa ditësh Roxher u rikthye në Shqipëri.

Ai u bashkua me Kukësin në Elbasan dhe u mendua se palët kishin sheshuar gjithçka. Sulmuesi është larguar sërish nga Shqipëria, një shenjë e qartë se e ardhmja e tij do të jetë jo vetëm larg Kukësit, por edhe larg Superiores.

Kukësi bën gati firmën e radhës, pritet edhe golashënuesi i Kastriotit

Sport Ekspres — Thu, 20 Jun 2019 11:40:57 +0000

Kukësi është pranë zyrtarizimit të radhës dhe bëhet fjalë për një lojtar me të cilin parimisht ishte rënë dakord që javën e shkuar. Tome Kitanovksi ndodhet në kryeqytet dhe shumë shpejt pritet të vijë edhe zyrtarizimi, sigurisht pasi të hidhet e zeza mbi të bardhë.

Mbrojtësi 27-vjeçar ka luajtur rregullisht me Slaven Belupo dhe Istra në Kroaci. Kitanovski ka provuar të aktivizohet edhe në Serbi me Mladost Luçani dhe Vozhdovac, me Universitatea Kraiova në Rumani dhe Pelisterin në Maqedoni. Sezonin e fundit ishte pjesë e Sabail në Azerbajxhan.

ROXHER – Kukësi e afroi vjet në verë dhe pritej shumë nga ai, por në fund u vendos të huazohej te Kastrioti. Braziliani spikati me krutanët, duke shënuar 10 gola. Kjo bëri që të tërhiqte vëmendjen e disa skuadrave, por te Kukësi shprehen se ka kontratë.

Kështu ata po e presin të bashkohet me pjesën tjetër të skuadrës në stërvitje, madje shumë shpejt. Boshllëkun e lënë nga Uilliam mendohet ta mbulojë pikërisht Roxher. Duke parë atë që ka treguar me Kastriotin, besimi është i madh.

Roxher e mbyll me Kastriotin, Kukësi ekipi i ri?

Sport Ekspres — Mon, 03 Jun 2019 16:14:41 +0000

Kastrioti sezonin e ardhshëm do të garojë në Kategorinë e Parë dhe normalisht një pjesë e lojtarëve që e mbyllën kampionatin me krutanët do të largohen. Njëri prej tyre është edhe braziliani Roxher Xhunio, i cili ia doli të shënonte 10 gola me fanellën e Kastriotit.

“Periudha një vjeçare e huazimit të brazilianit Roxher Junio te Kastrioti ka përfunduar, dhe tashmë Junior është larguar nga skuadra dhe Shqipëria me përshtypjet më të mira. Klubi e falenderon për kontributin e çmuar që ka dhënë për ekipin gjatë këtij sezoni, dhe njëkohësisht i uron suksese në karrierë. Faleminderit Roxher!”, shkruan klubi i Kastriotit në faqen zyrtare në Facebook.

Roxher në verë erdhi në Shqipëri dhe firmosi për Kukësin. Sulmuesi anësor ishte jashtë forme në fillim dhe nuk i bindi verilindorët, që e dërguan në huazim te Kastrioti. Me krutanët bëri një kampionat super dhe mbetet për t’u parë nëse do të rikthehet te Kukësi.

https://www.facebook.com/1085994611516755/posts/2211295008986704/