Presidenti i Riverit: Tmerr të luanim në Europë, tani duam finalen me… Realin

Sport Ekspres — Fri, 14 Dec 2018 21:53:08 +0000

River Plejt ia doli të fitonte Kupën Libertadores për herë të katërt në historinë e saj. Një festë ndryshe nga herët e tjera, pasi u arrit përballë Boka Zhuniors, “armiqve” të urryer.

Betejat mes dy ekipeve nga Buenos Aires u shijuan në maksimum nga miliona tifozë të futbollit dhe dukej sikur nuk do të përfundonin kurrë, por Riveri ia doli të fitonte me rezultatin 3-1 finalen e dytë (e para përfundoi në barazim 2-2) dhe dërgoi tifozët në delir.

Rodolfo D’Onofrio, presidenti i klubit, ka treguar emocionet e papërshkrueshme, ndërsa nuk e harron akoma faktin që Riveri i tij nuk luajti në mitikun “Monumental”. Sulmi i tifozëve ndaj autobusit të lojtarëve të Bokës rezultoi fatal dhe derbi më i çmendur në botë përfundoi në “Santiago Bernabeu” të Madridit.

Kampionët në fuqi të Amerikës së Jugut nuk kanë kohë për të pushuar, pasi në prag është Botërori për klube. 71-vjeçari zbulon objektivat e tij, si dhe tregon situatën për dy nga lojtarët e ekipit.

STADIUMI – “Ishte e tmerrshme të luanim finalen në Europë. Bokës iu lejua të luante në stadiumin e saj, ndërsa neve jo. Ishte një vendim i marrë për shkak të masave jo të përshtatshme të sigurisë.”

FITORJA – “Të fitosh finalen përballë rivalëve është e jashtëzakonshme dhe mbetet në histori. Është pak a shumë si një finale Champions-i midis Milanit dhe Interit: një emocion unik.”

BOTËRORI PËR KLUBE – “Për momentin ndodhem në Dubai. Të martën do të zbresim në fushë për gjysmëfinalen e kompeticionit. Jemi të përqendruar te kjo ndeshje dhe duam të dalim në finale, ku me shumë mundësi do të ndesheshim me Realin e Madridit.”

MERKATO – “El Piti Martinez do të shkojë në MLS (kampionati amerikan i futbollit) në fund të Botërorit për klube, pasi kemi një akord me Atlantën. Kuintero nuk do të lëvizë. Sapo kemi ushtruar të drejtën e blerjes dhe do të qëndrojë me ne.”

Presidenti i Riverit replikon me homologun e Bokës: Boll më, tregohu burrë!

Sport Ekspres — Wed, 28 Nov 2018 16:34:37 +0000

“Ne nuk pranojmë të luajmë ndeshjen e kthimit! Në vitin 2015 jemi skualifikuar për një ngjarje të ngjashme. Ka precedentë për atë që kërkojmë dhe prandaj presim me qetësi për atë që d9o të vendosë gjykata. Nëse është e nevojshme do të shkojmë dhe në CAS“, u shpreh dje presidenti i Boka Zhuniors, Daniel Angelici.

Presidenti i Riverit (majtas) dhe ai i Bokës (djathtas)

“CONMEBOL” ka vendosur të zhvillojë derbin e famshëm jashtë Argjentinës, ndërsa Asunsion, kryeqyteti i Paraguait, ndodhet në “pole-position” për të pritur duelin e zjarrtë. Pas reagimit të presidentit të Bokës, ka ardhur dhe replika e homologut të Riverit.

“I them presidentit të Bokës që ka ardhur momenti për të thënë boll më, për të lënë mënjanë fjalët dhe të vijë për të luajtur ndeshjen. Ai ka firmosur bashkë me mua dokumentin e ‘CONMEBOL’, dhe dha fjalën e tij përpara meje dhe presidentit të konfederatës. Mos të merret me fjalët që i thonë, por të mbajë fjalën e dhënë. Në jetë duhet të kesh vlera, po na ndjek e gjitha bota dhe është momenti t’i japim fund këtij turpi. Jam shumë i pikëlluar për atë që ka ndodhur dhe shpresoj të të arrijmë një marrëveshje sa më shpejt të jetë e mundur“, përfundon Rodolfo D’Onofrio.