Roko Komiso sapo ka marrë drejtimin e presidencës së Fiorentinës dhe ai e di mirë se shitja e “yllit” do e armiqësonte me tifozët e rinj. “Kieza do të qëndrojë me ne, të paktën edhe një vit. Më kanë siguruar se presidenca e kaluar nuk kishte asnjë lloj akordi për shitjen e tij, kështu që nuk besoj se mund të ketë diçka që se di. I pres në Amerikë, Kiezën, Pezelën dhe Milinkoviç”, thekson padroni vjollcë.

Nga ana tjetër, Fiorentina është hedhur në kërkim të një sulmuesi. Emri i preferuar është Çiçarito Hernandez. 31-vjeçari meksikan ka edhe një vit kontratë me Uest Hemin. Ai tundohet nga ideja për të provuar një eksperiencë në Serie A, ndërsa Fiorentina po përgatit ofertën zyrtare.

Në një prononcim për “Corriere dello Sport”, kreu i klubit vjollcë zbulon se ka një projekt fitues. Hapi i parë është mbajtja e Federiko Kiezës në Firence, ndërsa ëndrra e madhe është titulli kampion.

“Firence meriton një skuadër të bukur me dëshirën për të fituar trofe. Në sport fiton meritokracia dhe ky duhet të jetë synimi ynë. Nuk jetohet pa ëndrra. Ëndërroj ta ngre Fiorentinën në nivele të larta dhe të konkurrojmë për fitimin e titullit kampion”, thekson Roko Komiso.

Roko Komiso ka mbetur i mahnitur nga loja e tij kundër Spanjës dhe e cilëson Kiezen si krenarinë e Fiorentinës. Presidenti i ri nuk ka nevojë për para, do refuzonte menjëherë edhe 100 milionë euro për kartonin e anësorit ofensiv dhe dëshiron ta mbajë lojtarin e talentuar në Firence. Të paktën edhe një vit…

“Nuk e shes as për 100 milionë euro. E kam parë në aksion dhe ka bërë gjëra të shkëlqyera. Federiko është krenaria jonë. Nuk kemi nevojë për para dhe nuk ekziston asnjë lloj klauzole në kontratën e tij. Dua ta mbaj djalin në Firence, të paktën edhe një vit. Dua ta mbaj edhe më shumë, por të shohim.

Nuk kam biseduar akoma me të. Do ulemi së shpejti, tani i duhet të jetë vetëm i përqendruar. Unë e mbaj fjalën kur jap një premtim. Si mund të nis aventurën time, duke shitur lojtarin që prezanton Fiorentinën në kombëtare?”, përfundon Roko Komiso.

Qyteti i Firences duhet të jetë krenar për Fiorentinën dhe loja e bukur nuk duhet të mungojë. Më pas trofetë, ëndrra e madhe dhe “thumbimi” ndaj Milanit. Paratë duhen shpenzua me kujdes dhe jo siç bënë kuqezinjtë.

“Dua të ndërtoj një skuadër që e bën Firencen krenare. Pretendoj një punë të madhe dhe në një kohë të shkurtër dua të shoh lojën e bukur. Ëndërroj të fitoj trofe, nuk e fsheh. Duhet të jemi të kujdesshëm dhe të mos përsërisim gabimet e skuadrave të tjera si Milani, që shpenzoi 200 milionë euro dhe nuk arriti asnjë rezultat”, thekson Roko Komiso.

Do të vijnë zyrtarë të rinj, duke nisur nga drejtori i përgjithshëm deri tek ai sportiv dhe trajneri. Xhankarlo Antonjoni do të jetë drejtor i përgjithshëm, ndërkohë që pritet të bashkohet edhe Umberto Gandini. Masara është kandidati kryesor për postin e drejtorit sportiv.

Rino Gatuzo është opsioni kryesor për stolin e skuadrës nga Firence. Grinta e tij dhe puna e bërë te Milani bën që Komiso t’i besojë stolin. Mundësia tjetër është Sempliçi. Ai aktualisht drejton SPAL. Karrierën e tij si teknik e ka nisur te Fiorentina me të rinjtë. Kështu ai e njeh shumë mirë klubin në brendësi të tij.

21-vjeçari ka oferta të shumta në merkato, kryesisht nga Juventusi dhe Interi. Komiso dëshiron ta mbajë në ekip, të paktën edhe një sezon. Ai pritet të takojë sonte ose të dielën babanë e lojtarit, të mirënjohurin Enriko Kieza.

Presidenti do t’i ofrojë Kiezës një rritje rroge (deri në 4 milionë euro në sezon) dhe shiritin e kapitenit. Kontrata e lojtarit ofensiv me klubin nga Firence përfundon në vitin 2022 dhe palët do të përcaktojnë edhe një klauzolë largimi.

Shifra normale dhe aspak të ekzagjeruara, që do lehtësonin largimin e lojtarit në të ardhmen, por që do mbushnin edhe arkat e Fiorentinës.

Tifozët, totalisht të zhgënjyer nga familja Dela Vale, janë të entuziazmuar dhe shpresojnë që netët magjikë do të rikthehen në Firence. Familja Dela Vale ka bërë publik lajmin e shitjes me anë të një komunikate.

“Fillon një aventurë e re për ekipin vjollcë dhe shpresojmë që të na dhurojë shumë kënaqësi të gjithëve, sidomos tifozëve dhe qytetit të Firences, me të cilin mbetemi shumë të lidhur. Mes ofertave që morëm, i dhamë prioritet jo aspektit ekonomik për ne, por asaj që jepte garanci më të shumta për Fiorentinën. I dërgojmë urimet më të mira presidentit të ri dhe një përqafim të ngrohtë të gjithë personave, të cilët bashkëpunuan me ne në këto 17 vite.”

Nuk kanë munguar as fjalët e para të Roko Komisos, kreut të ri të Fiorentinës. Manjati italo-amerikan nuk e fsheh entuziazmin e tij, ndërsa nuk kursen elozhet për paraardhësit.

“Jam një tifoz i futbollit italian prej kohësh dhe nuk gjej fjalë për të përshkruar se sa i nderuar ndihem nga mundësia për të kontribuar dhe shkruar historinë e një klubi legjendar si Fiorentina. Firence njihet në të gjithë botën si qytet dhe prezanton më se miri kulturën italiane. Në këto tre vite negociata e kam kuptuar rëndësinë e madhe që ka ekipi për qytetin dhe tifozët. Falënderoj familjen Dela Vale. Andrea dhe Diego meritojnë nderime të mëdha, sepse arritën ta shpëtonin Fiorentinën nga kolapsi financiar”, përfundon presidenti i ekipit viola.

Kalimi aksioneve në emrin e tij ka kushtuar plot 170 milionë euro. Komiso është një person shumë i pasur. Ai është me origjinë nga Kalabria, ka emigruar në SHBA në moshën 12 vjeçare dhe sot zotëron një pasuri prej 4.9 miliardë dollarësh. Revista Forbes e rendit në vendin e 200 në listën e njerëzve më të pasur në SHBA. Ai merret me inxhinieri industriale, telekomunikacion (ka krijuar kompaninë Mediacom) dhe investimet në banka.

69-vjeçari u interesua për të blerë Milanin vitin që shkoi, por nuk ia doli përballë fondit Elliot. Tani është gati të nisë projektin e tij ambicioz me klubin nga Firence, ndërsa tifozët, totalisht të lodhur nga presidenca aktuale, besojnë fort se ditë të mira do të vijnë për Fiorentinën.

Sipas raportimeve të mediave italiane, Komiso ka në mendje edhe trajnerin e ri të Fiorentinës. Ai do të jetë Luçiano Spaleti, i cili mbylli aventurën me Interin disa ditë më parë.

Legjenda vjollcë, Xhankarlo Antonjoni pritet të marrë postin e zv.presidentit, ndërsa Umberto Gandini, i cili ka punuar më parë me Milanin dhe Romën, është kandidati kryesor për rolin e administratorit të deleguar të klubit.

Një çështje për t’u zgjidhur është edhe ajo e Federiko Kiezës. 21-vjeçari dëshiron të largohet dhe për të ka një garë mes Juventusit dhe Interit. Shitja e tij do e zbehte prezantimin e Komisos përballë tifozëve të rinj, kështu që italo-amerikani dëshiron ta mbajë në ekip. Kiezën e pret një rritje rroge dhe ai do të jetë qendra e projektit që po lind për të rikthyer Fiorentinën në nivele të larta.

Kështu, me shumë mundësi dy vëllezërve do i duhet ta lënë Fiorentinën në dorën e një pronari tjetër pas 17 vitesh. Në faqen zyrtare në internet të klubit nga Firence është njofutar se do të ketë një mbledhje urgjente të bordit drejtues. Sipas medieve italiane, në këtë mbledhje do të merret vendimi i shitjes së klubit.

Manjati Roko Komiso është gati të blejë Fiorentinën. Ai zotëron një pasuri të madhe dhe është themeluesi i gjigatit të shërbimit kabllor, “Mediacom”. Në mbledhjen e bordit do të jetë i pranishëm përfaqësuesi i tij, Xho Baron. Ky i fundit është administratori i Nju Jork Kozmos, klub në pronësi të Komisos.

Ai u largua në moshën 12-vjeçare nga Kalabria e tij dhe nisi një jetë të re në vendin e mundësive. Akordi me familjen Dela Vale është arritur për shifrën e 150 milionë dollarëve, ndërsa tifozët e Fiores janë entuziastë për fillimin e ri.

Akoma nuk ka asgjë zyrtare, edhe pse 69-vjeçarit ka konfirmuar gjithçka “pa dashje”. Në një prononcim për “Corriere Fiorentino”, Komiso ka dashur të lërë pezull faktin nëse ka blerë klubin nga Firence, por i ka shpëtuar një frazë, nga e cila nënkuptohet gjithçka.

“Nuk mund të jap asnjë lloj konfirmimi, qoftë pozitiv apo negativ. Jam i vetmi që kam lindur në Itali, nga të gjithë që kanë blerë në Itali. Fiorentinës i uroj fat në ndeshjen kundër Xhenoas. E njoh vlerën e bluzës vjollcë dhe e njoh mirë historinë e klubit. Njoh Hamrin dhe Batistutën. E njoh mirë historinë e klubit “, përfundon Roko Komiso.

Palët kishin vendosur të mos e bënin publik lajmin për të mos shpërqendruar ekipin, që të dielën luan sfidën e mbijetesës kundër Xhenoas, por New York Times dhe Corriere dello Sport bënë gjithçka publike. Komiso është me origjinë nga Kalabria, ka emigruar në SHBA në moshën 12 vjeçare dhe sot zotëron një pasuri prej 4.9 miliardë dollarësh.

Revista Forbes e rendit në vendin e 200 në listën e njerëzve më të pasur në SHBA. Ai merret me inxhinieri industriale, telekomunikacion (ka krijuar kompaninë Mediacom) dhe investimet në banka.

69-vjeçari u interesua për të blerë Milanin vitin që shkoi, por nuk ia doli përballë fondit Elliot. Tani është gati të nisë projektin e tij ambicioz me klubin nga Firence, ndërsa tifozët, totalisht të lodhur nga presidenca aktuale, besojnë fort se ditë të mirë do të vijnë për Fiorentinën e tyre.