Roberto Martinez

Martinez gëzon Interin: Lukaku të largohet, dua t’i shoh lojtarët e lumtur

Sport Ekspres — Tue, 18 Jun 2019 14:10:16 +0000

Roberto Martinez është ndalur te situata e Romelu Lukakut. Trajneri i Belgjikës e kupton dëshirën e sulmuesit për t’u larguar nga Mançester Junajtid. Dëshira e madhe e 26-vjeçarit është transferimi në Serie A, aty ku e kërkon Interi me insistim.

Trajneri spanjoll nuk përmend emra në prononcimin e dhënë për mediat belge, por shtyn Lukakun të largohet. Martinez shpreson që të gjithë lojtarët e tij të jenë të lumtur dhe kur nuk janë, zgjidhja më e mirë është provimi i një aventurë të re.

“Lukaku ka nevojë të provojë gjëra të reja dhe është gati për një eksperiencë të re. Nuk jam i shqetësuar për të, pasi Romelu mund të luajë gjithkund. Unë dua që lojtarët e mi të jenë të lumtur, kështu që mendoj se duhet të largohet dhe të bëjë zgjedhjen e duhur për të ardhmen”, përfundon trajneri i kombëtares belge.

Bllokadë Realit për Martinez, prapaskena Konte-Murinjo

Sport Ekspres — Tue, 30 Oct 2018 14:56:50 +0000

Reali i Madridit ka emëruar Santiago Solarin si trajner të përkohshëm. Në Spanjë janë të shumtë zërat që shohin Antonio Konten si teknikun e ardhshëm. Por ka edhe opsione të tjera dhe një nga emrat e lakuar është ai i Roberto Martinez.

Trajneri i Belgjikës është nën kontratë dhe reagimi i Federatës Belge të Futbollit ka qenë i menjëhershëm. Zëdhënësi për shtyp i federatës, Stefan Van Lok, e ka bërë të qartë se Martinez mund të largohet vetëm pas bisedimeve me federatë,

“Nuk kemi komente mbi kontratën që federata ka me bashkëpunëtorët e saj, sepse të dhënat i konsiderojmë private. Nëse një klub dëshiron të kontaktojë me zotin Martinez, më parë duhet të arrijë një marrëveshje me Federatën Belge të Futbollit”, është shprehur Van Lok.

OPSIONI MURINJO – Nga Italia raportohet se një tjetër pistë është ajo e Zhoze Murinjos. Sipas “Gazetta dello Sport”, portugezi mund të rikthehet në krye të spanjollëve. Por nuk mbyllet me kaq, pasi Antonio Konte do ishte ai që do e zëvendësonte “Special One” në krye të Mançester Junajtid.

Kjo lëvizje do të kënaqte Pol Pogba, i cili ka punuar me trajnerin italian gjatë periudhës që është aktivizuar me Juventusin. Por ka edhe nga ata që do të rrudhnin buzët, si për shembull sulmuesi Romelo Lukaku. Belgu zgjodhi Junajtid para Çelsit dhe një nga arsyet ishin skemat mbrojtëse të trajnerit Antonio Konte.

Bien kuotat e Kontes, trajneri që shkëlqeu në Botëror në garë për stolin e Realit

Sport Ekspres — Mon, 29 Oct 2018 18:57:52 +0000

Florentino Perez po kërkon kohë dhe nuk dëshiron të nxitohet. Julen Lopetegui nuk është shkarkuar ende, por i ka orët e numëruara në stolin e Realit. Presidenti i ka thënë disa miqve të tij gazetarë pas përfundimit të ndeshjes kundër Barcelonës, se Antonio Konte do të jetë trajneri i ekipit.

Megjithatë, kreu i Realit nuk është akoma i bindur dhe kuotat e Kontes janë ulur siç citon një radio e vendit iberik. Palët nuk kanë gjetur akordin mes tyre dhe klubi “merengues” po sheh për alternativa të tjera. Tre janë emrat në listën e Perez: Zhoze Murinjo, Santiago Solari dhe Roberto Martinez. Ky i fundit është trajneri i Belgjikës dhe vjen nga një Botëror shumë i mirë, duke arritur të fitojë medaljen e bronztë.

Ëndrra mbetet portugezi i Junajtid, ndërsa Solari, i cili drejton ekipin e Real Madrid B mbetet një alternativë e momentit. Si fillim pritet të vijë shkarkimi i Lopeteguit dhe më pas do të mësohet më mirë se kush do të jetë pasardhësi i tij. Solari, Martinez, Murinjo, ose… Konte.

Trajneri i Belgjikës analizon merkaton: Blerjen më të volitshme e ka bërë Dortmundi

Sport Ekspres — Thu, 18 Oct 2018 09:49:21 +0000

Tekniku i kombëtares belge Roberto Martinez i ka thurur elozhe mesfushorit Aksel Vitsel, duke e konsideruar transferimin e tij nga kampionati kinez te Borusia Dortmund në Gjermani si transferimin më të goditur të merkatos së verës.

“Për mua transferimi i Vitsel është lëvizja më e zgjuar e merkatos së verës. Ai u ble nga Dortmundi për 20 milionë euro, një shumë kjo që në futbollin e sotëm mund të konsiderohet si normale. Efekti i tij në lojën e skuadrës është lehtësisht i dallueshëm. Nuk kisha dyshim se ai do bënte diferencën në atë ekip”, tha trajneri spanjoll.

Vitsel ka qenë një titullar i padiskutueshëm te Borusia në këtë fillim sezoni. Skuadra e drejtuar nga zvicerani Lusien Favre ndodhet në krye të tabelës së Bundesligës me 17 pikë të grumbulluara pas shtatë ndeshjes, ku janë të pamposhtur me pesë fitore dhe dy barazime.